Mintlhamuxelo Ya Xibukwana Xa Wutomi Ni Wutizreli Byezru

2-8 Ka DEZEMBRU

WUKOSI BYI NGA BIBELENI | APFULETELO 7-9

“Xitsrhungu Lexikulu Xi Tovokisiwa Hi Yehovha”

Perspicaz vol-2 p. 253 § 2

Xitsrhungu Lexikulu

Leswo swi sekelekisa xivutiso lexi: Loko lava ‘xitsrhungu lexikulu’ ku li vhanu lava taka huluka kutani va tama va va la misaveni, ‘va yimi mahlweni ka xiluvelo xa Xikwembu Nkulukumba ni le mahlweni ka Hambana hi ndlela yini’? (Mpf 7:9) Minkama mimbeni Bibele dzri tizrisa zritu ku ‘yima’ ku kombisa ku yamukeliwa kumbe ku pfumeleliwa mahlweni ka lweyi mhunu kumbe ntlawa wu taka yima mahlweni kwakwe. (Ps 1:5; 5:5; Pr 22:29, AT; Lk 1:19) Nakunene, ka ndzrima leyi khalutiki ya Apfuletelo, ‘a tihosi ta misava, ni vakulu, ni tindzruna, ni vafuyi, ni lava ntamu, ni hinkwaswu swikazrawa, ni hinkwavu lava ntsrhunxekiki’, va hlayiwa lava djulaka ku fihliwa ‘mahlweni ka wuso bya Lwa tsrhamiki xiluvelweni, ni le mahlweni ka mahlundzru ya Hambana; hikuva a siku ledzrikulu dzra mahlundzru ya yone dzri tlhasile; hi mani lwa nga swi kotaka ku yima?’ (Mpf 6:15-17; dzringanisa ni Lk 21:36.) Swi nga yentxeka ‘xitsrhungu lexikulu’ xi vumbiwa hi lava taka huluka hi nkama wolowo wa mahlundzru ni lava taka ‘yima’ swanga lava yamukeliwiki ha Nkulukumba ni Hambana.

Perspicaz vol-3 p. 739 § 2

Nhlomulo

Ntsrhaku ka 30 wa malembe na muti wa Yerusalema wu helisiwile, mupostola Yohani a byeliwe leswi mayelanu ni xitsrhungu lexikulu lexi pfaka ka matiko hinkwawu, tinyimba hinkwatu, ni tindzrimi hinkwatu: ‘Lava hi lava pfaka nhlomulweni lowukulu.’ (Mpf 7:13, 14) Akuva lava va xitsrungu lexikulu va ‘pfa nhlomulweni lowukulu’, swi komba leswaku va ntsrhunxiwe ku wone. Leswi swi tiyisiwa hi mazritu lama fanaka ma nga ka Amintiṛo 7:9, 10: ‘Xikwembu Nkulukumba ifa e na [Yosefa]; a mu huluxa mahlomulweni yakwe hinkwawu.’ Akuva Yosefa a huluxiwile a mahlomulweni yakwe hinkwawu a swi nga hlayi leswaku a to kota ku ma tiyiselela ntsena, kambe afa a ta kota ku ntsrhunxeka ku wone.

Perspicaz vol-2 p. 253 § 1

Xitsrhungu Lexikulu

Ndlela Ya Ku Va Tiva. Hi nga tiva lava ‘xitsrhungu lexikulu’ ka dzrungula ledzri kumekaka ka ndzrima 7 ya Apfuletelo, ni ka dzrungula ledzri yelanaka. Apfuletelo 7:15-17 yi li Xikwembu Nkulukumba ‘a ta va xizrela hi tende dzrakwe’, va kongomisiwa ‘tinhlobyeni ta mati ya vutomi’ nakone Xikwembu Nkulukumba a ta hlangula ‘minyembeti hinkwayu amahlweni yavu’. Ka Apfuletelo 21:2-4, hi kuma mahlayela lama fanaka ‘wuyaku bya Xikwembu Nkulukumba byi le ku vhanu’, nakone yene ‘a ta hlangula minyembeti hinkwayu mahlweni yavu’ ni ‘ku fa ku nga he vi kone’. Xivoniso lexi kombisiwiki xi kombetela vhanu lava nga liki matilweni, lani ku ‘xikaka Yerusalema Lwemumpswha’, kambe a misaveni, a makazri ka vhanu.

Djulisisa Tindzralama Ta Moya

Clímax de Revelação pp. 113-115 § 4

Ku Fungiwa Ka Israyele Wa Xikwembu Nkulukumba

Handle ka ku ganaganeka, tintsrumi leta mune ti yimela mintlawa ya mune ya tintsrumi, leti Yehovha a ti tizrisaka ku sivela ku tisiwa ka wuyavanyisi ku ya tlhasela nkama lowu bekiwiki. Loko tintsrumi leto ti tsrhiketela timheho leto ta mahlundzru ya Xikwembu Nkulukumba ti hunga nkama wun’we ti huma a n’walungu, nyingitimu, a wuxeni ni wupela dambu, ku honeka ku ta va kukulu. Swi ta fana ni nkama luwani Yehovha a tizrisiki mimoya leya mune ku hangalasa va-Elam va khale, a va txhavisa a tlhela a va helisa, kambe a nkameni lowu swi ta txhavisa ngopfu. (Yeremiya 49:36-38) Ku ta va ni xivhun’wa-vun’wana lexikulu lexi honhaka ku tlula ‘xidzedze’ lexi Yehovha a helisiki tiko dzra Amon ha xone. (Amos 1:13-15) A ku na xiphemu xa nhlengeletanu ya Sathana a misaveni lexi taka kota ku tiyisela a sikwini ledzri dzra mahlundzru ya Yehovha, loko a lwela wuhosi byakwe hi la ku nga helikiki.​—Amapsalma 83:15, 18; Ezaya 29:5, 6.

Perspicaz vol-1 p. 10 §§ 8-9

Abadon

Hi mani Abadon ntsrumi ya khele?

Ka Apfuletelo 9:11, zrito ‘Abaddon’ dzri tizrisiwa ka ‘ntsrumi ya khele’. A vito dzra xigriki, Apollion, dzri hlaya ‘Muhelisi’. A dzaneni dzra wu-19 ku hambiwe minzamu ya ku kombisa leswaku tsralwa ledzri hi ku ya hi wuprofeta dzri tizra ka vhanu va ku fana na imperador Vespasiano, Maomé nambi ka Napoleão, ni le ka ntsrumi leyi ha kanyingi a yi voniwa swanga “Sathana”. Ka Apfuletelo 20:1-3 yi komba leswaku a ntsrumi leyi nga ni ‘mpfungulo wa khele’ i muyimeli wa Xikwembu Nkulukumba, nakone a pfa tilweni, ku nga li wa “Sathana”, kutani a khoma Sathana a mu boha a mu txukumetela kheleni. Loko ku tlhamuxeliwa Apfuletelo 9:11 A Bíblia do Intérprete dzri li: “Abaddon a hi ntsrumi ya Sathana, kambe ya Xikwembu Nkulukumba, leyi yentxaka ntizro wa yone wa wuyavanyisi lowu yi zrumiwiki ha Xikwembu Nkulukumba.”

Ka matsralwa ya xi-Heberu ya ha ka ku ma dondzra, swi le livaleni leswaku ʼavad·dohnʹ swi yelana ni Sheol ni lifu. Ka Apfuletelo 1:18 hi kuma mazritu ya Yesu lama liki: ‘Dzra hanya hi masiku ni masiku; dzri na ni mimpfungulo ya ku fa ni ya mbangu wa lava ku fa.’ Ntamu wakwe mayelanu ni khele wu kombisiwa ka Luka 8:31. Leswaku a ni ntamu wa ku helisa, ku patsra ni ntamu wa ku helisa Sathana, swi kombisiwa ka Ba-Heberu 2:14, leyi hlayaka leswaku Yesu a hlengemele hi nyama ni ngati akuva ‘hi ku fa kwakwe, a ta helisa lwa nga ni ntamu wa ku fa, hi leswaku Diavulosi.’ Ka Apfuletelo 19:11-16 a yimela Muhelisi lwa bekiwiki ha Xikwembu Nkulukumba.​—Vona APOLION.

9-15 KA DEZEMBRU

WUKOSI BYI NGA BIBELENI | APFULETELO 10-12

“‘Timboni Tibidzri’ Ti Dlayiwa Kambe Ti Tlhela Ti Pfuxiwa”

Sentinela 15/11/2014 p. 30

Swivutiso Swa Vadondzri

I vamani timboni tibidzri ku vulavuliwaka ha tone ka Apfuletelo ndzrima 11?

Apfuletelo 11:3 yi vulavula hi timboni tibidzri leti a ti ta profeta ku dzringana masiku ya 1.260. Tindzrimana leti landzrelaka ti hlaya leswaku xihazri a xi ta ‘ti hlula, xi ti dlaya’. Kambe ‘a ntsrhaku ka masiku mazrazru ni wukazri’, timboni leti bidzri a ti ta pfuxiwa ku feni, ku nga mhaka leyi a yi ta hlamalisa vhanu hinkwavu lava va hlaleliki.​—Mpf 11:7, 11.

I vamani timboni letibidzri? Mongo wa dzrungula ledzri wu hi pfuna leswaku hi ti tiva. Xa ku sungula, hi byeliwa leswaku i ‘minhlwazri mibidzri, ni mimotsre mibidzri’. (Mpf 11:4) Leswi swi hi dzrimuxa hi mimotsre ni minhlwazri mibidzri leswi ku vulavuliwaka ha swone ka wuprofeta bya Zakariya. Minhlwazri leyi a yi yimela ‘vatotiwa vabidzri’, ku nga Ndzruna-nkulu Zerubabele ni Muprista Lwenkulu Yoxuwa, ‘lava yimiki kusuhi ni Hosi ya misava hinkwayu’. (Zk 4:1-3, 14) Xa wubidzri, ku tlhamuxeliwa leswaku timboni letibidzri ti hamba mahlolana ya ku fana ni lawa ma yentxiwiki ha Moxe na Eliya.​—Dzringanisa Apfuletelo 11:5, 6 ni Atinhlayo 16:1-7, 28-35 ni 1 Tihosi 17:1; 18:41-45.

Hi kwini ku yelana loku nga kone ka swiyentxakalu leswibidzri? Ka xiyentxakalu ha xin’we, dzrungula dzra kone dzri vulavula hi vatotiwa va Xikwembu Nkulukumba lava zrangeliki hi nkama wa dzringiwo. Xileswo loko ku hetiseka Apfuletelo ndzrima 11, vamakwavu lava totiwiki lava zrangeliki nkameni wolowo wa ku simekiwa ka Mfumu wa Xikwembu Nkulukumba a matilweni hi 1914, vazrezri va ‘yambali masaka’ ku dzringana malembe mazrazru ni hamfu.

Loko vatotiwa lava va heta ku zrezra na va yambale masaka, va dlayiwile hi ndlela ya ku fanekisela loko va pfaleliwe a djele ku dzringana nkama wa ku goma, lowu a wu yimela masiku mazrazru ni hamfu. Ntizro wa ku zrezra a wu yimisiwile hi ku ya hi valala va Xikwembu Nkulukumba, leswi va yentxiki va nyonxa swinene.​—Mpf 11:8-10.

Nambitanu, hi ku pfumelelana ni mazritu ya wuprofeta, loko ku hela masiku mazrazru ni hamfu, timboni letibidzri ti pfuxiwile a ku feni. Vatotiwa lava a va ntsrhunxiwile a djele nakone lava tsrhamiki va dumbekile va nyikiwe ntizro wa ku hlawuleka hi Xikwembu Nkulukumba hi ku tizrisa Hosi yavu, Yesu Kriste. Hi 1919 va hlawuliwile akuva va va ‘nandzra lwe wa ku dumbeka ni ku tlhazriha’ akuva va yanelisa swivileleko swa moya swa vhanu va Xikwembu Nkulukumba a masikwini lawa ya wugamu.​—Mt 24:45-47; Mpf 11:11, 12.

Lexi nyonxisaka, Apfuletelo 11:1, 2 yi kombisa leswaku swiyentxakalu a swi fambisana ni nkama lowu tempele dzra moya a dzri ta pimiwa ha wone. Malaki ndzrima 3 yi vulavula hi ku kambeliwa loku fanaka ka tempele dzra moya, loku landzriwiki hi nkama wa ku basisiwa. (Mlk 3:1-4) Ku kambeliwa ni ku basisiwa loku swi teke nkama wa ku dzringana kwini? Ku sukela hi 1914 ku ya ku sunguleni ka 1919. Nkama lowu wu patsra masiku ya 1.260 (42 wa tiwheti) ni masiku mazrazru ni hamfu ya ku fanekisela lawa ku vulavuliwaka ha wone ka Apfuletelo ndzrima 11.

Hi nyonxa swinene leswi Yehovha a hleliki leswaku ku va ni ntizro lowu wa ku basisiwa hi tlhelo dzra moya akuva a basisa vhanu va ku hlawuleka leswaku va yentxa mintizro leyinene! (Tito 2:14) Ku yengetela kolanu, ha xi tlangela xikombiso lexi bekiwiki hi vatotiwa va ku dumbeka lava zrangeliki a nkameni wolowo wa ku kambeliwa kutani hi ndlela yoleyo va tizri swanga timboni tibidzri ta ku fanekisela.

Djulisisa Tindzralama Ta Moya

Perspicaz vol-3 p. 458 § 9

Buku, Papela

Hi Ndlela Ya Ku Fanekisela. Ku ni swikombiso swinyingi a Bibeleni, ku tizrisiwaka zritu ‘papela’ hi ndlela ya ku fanekisela. Ezekiyele kun’we na Zakariya va vone papela ledzri tsraliwiki matlhelo ha mabidzri. Swanga hi leswi tlhelo dzrin’we dzra papela a dzri talisa ku tizrisiwa, a matsralwa ka matlhelo ha mabidzri swi nga ha yentxeka ku vulavuliwa hi ntikelo ni lisima dzra tsremo ledzri tsraliwiki ka mapapela lawo. (Ezk 2:9–3:3; Zk 5:1-4) Ka xivoniso xa Apfuletelo, lwa afaka a tsrhame xiluvelweni afa a khome buku ledzri fungiwiki hi 7 wa swifungu, leswi a swi sivela ku pfuliwa ka dzrone ku ko Hambana ya Xikwembu Nkulukumba yi dzri pfula. (Mpf 5:1, 12; 6:1, 12-14) Ka xivoniso xin’wana lexi Yohani a xi voniki, a nyikiwe buku ledzri a byeliwiki leswaku a dzri da. A dzri nandzrika ka Yohani, kambe a dzri bava a khuzrini dzrakwe. Swanga hi leswi a buku a dzri pfuliwile nakone a dzri nga fungiwanga, leswo a swi kombisa leswaku a dzri fanele ku twisisiwa. A swi ‘nandzrika’ ka Yohani ku yamukela dzrungula dzra buku, kambe a swi ti komba ingiki a ku ni mitxhumu ya ku bava leyi afaka a ta yi profeta hi lani a zrumiwi ha kone. (Mpf 10:1-11) Ezekiel a ve ka xiyimu lexi fanaka hi papela ledzri a nyikiwiki dzrone ledzri a dzri ni ‘swidzrilo, ni ta ku bubula ni ta nhlomulo’.​—Ezk 2:10.

Perspicaz vol-1 p. 743 §§ 2-4

Swivavu Swa Ku Beleka

Ka xivoniso xa mupostola Yohani, ka Apfuletelo, a vone wansati wa le tilweni na a dzrila ‘hi nkota ya ku yingela ku vavisa ni ku lun’wa ka ku beleka kwakwe’. A n’wana lwa belekiwiki afa a li ‘n’wana wa wanuna, lwa fanelaka ku byisa matiko hinkwawu hi nhonga ya nhumbu’. Nambi leswi a dragona dzri djulaka ku mu da, ‘a n’wanakwe a ku tekeliwa ku Xikwembu Nkulukumba ni le ku xiluvelo xakwe’. (Mpf 12:1, 2, 4-6) A ku wutliwa ka n’wana ha Xikwembu Nkulukumba swi kombisa ku yamukeliwa ka N’wana swanga wakwe. Xihena lexi a xi tolovelekile a nkameni wa khale ku nyikela n’wana lwa ha ka ku belekiwa ku yamukeliwa hi tatana wakwe. (Vona NASCIMENTO.) Hi nga hetelela hi ku hlaya leswaku ‘wansati’ i ‘mutekiwa’ wa Xikwembu Nkulukumba, ‘Yerusalema wa le henhla’, ‘mamana’ wa Kriste ni vamakwavu va moya.​—Ga 4:26; Hb 2:11, 12, 17.

A ‘wansati’ wa le tilweni wa Xikwembu Nkulukumba, nakunene, a tava lwa hetisekiki, nakone a ku beleka a ku nge ti va ni swivavu swa ku fanekisela. Swivavu swa ku beleka, hi ku fanekisela a swi kombisa leswaku nkama wa ku beleka wu ku suhi; afa a ta swi yimela ku nga li khale.​—Mpf 12:2.

A ku ta va mani ‘n’wana wa wanuna’? Yene afa a ta ‘byisa matiko hinkwawu hi nho nga ya nhumbu’. Leswo swi hlayiwe na swi kombetela ka Hosi ya Wumesiya ya Xikwembu Nkulukumba, ka Amapsalma 2:6-9. Kambe Yohani a ve ni xivoniso lexi ntsrhaku ka ku belekiwa ka Kriste la misaveni, ni lifu ni ku pfuxiwa kwakwe. Kutani, a xivoniso, a xi ta voneka ingi xi kombetela a ku pswaliwa ka Mfumo wa Wumesiya a mavokweni ya n’wana wa Xikwembu Nkulukumba, Yesu Kriste, lweyi a pfuxiwiki ka lava ku fa, ‘ku ya tsrhamisa hi laha ku nga helikikiki, a vokweni dzra xinene dzra Xikwembu Nkulukumba, na a zrindzela ku kondzra a valala vakwe va bekiwa va va wunalavutelo bya minkondzro yakwe.’​—Hb 10:12, 13; Ps 110:1; Mpf 12:10.

16-22 KA DEZEMBRU

WUKOSI BYI NGA BIBELENI | APFULETELO 13-16

“U Nga Txhavi Swihazri Swa Buku Dzra Apfuletelo”

Sentinela 15/06/2012 p. 8 § 6

Yehovha I ‘Mupfuleteli Wa Swihundla’

Kolomu ka 96 N.Y., Yesu lweyi a pfuxiwiki a kombe mupostola Yohani nxaxamelo wa swivoniso leswi hlamalisaka. (Mpf 1:1) Ka xin’wana xa swone, Yohani a vone Diyavulosi, lwa yimelaka dragona, na a yime saveni dzra likhulu. (Dondzra Apfuletelo 13:1, 2.) Yohani nakone a tlhele a vona xihazri lexi kalaka xi nga tolovelekanga xi huma a likhulwini kutani xi nyikiwa wulawuli lebyikulu hi Diyavulosi. A ntsrhakunyana, ntsrumi yi byela Yohani leswaku xihazri xa libungu lexi nga ni 7 wa timhondzro, lexi nga xifaniso xa xihazri lexi nga ka Apfuletelo 13:1, xi yimela ‘tihosi le ta ntlhanu na tibizri’ kumbe mimfumu. (Mpf. 13:14, 15; 17:3, 9, 10) Loko Yohani a tsrala buku dzra Apfuletelo, ntlhanu wa tone afa ti wile, yin’wana ya ha li kone leyi yin’wana ‘a yi si tlhasa.’ Hi tini tihosi leto kumbe mimfumu leyo ya misava? A hi kambisiseni nhloko ha yin’we ya xihazri lexi tlhamuxeliwiki ka Apfuletelo. Hi ta tlhela hi vona ndlela leyi buku dzra Daniel dzri tlhamuxelaka ha yone hi wuyenti mimfumu yoleyo ka ha sale madzana ya malembe leswaku yi humelela.

Clímax de Revelação p. 194 § 26

Ku Lwa Ni Swihazri Swibidzri Swa Ku Lebya

Xana a nga va a li yini? I Mfumu wa Ntamu wa Misava Hinkwayu wa Anglo-América​—xa fana ni xa 7 wa tinhloko ta xihazri xa ku sungula kambe xone xi ni ntizro wa lisima! Mhaka ya leswaku xi hambanisiwe ni lexin’wana a xivonisweni, yi hi pfuna ku vona ha hombe leswaku xi tiyentxela ku zrandzra ka xone a misaveni. Xihazri lexi xa ku fanekisela lexi nga ni timhondzro tibidzri xi vumbiwa hi mimfumu yibidzri leyi fumaka hi nkama wun’we, yi tifumela hi ku zrandzra ka yone kambe na yi pfunisana. Leswi timhondzro ta xone tibidzri ti ‘fanaka ni ta hambana,’ swi kombisa leswaku xi tiyentxa ingiki xi ni ku zrula kutani a xi zrandzri yimpi nakone i mfumu lowu hluvukiki lowu misava hinkwayu yi fanelaka ku wu yamukela. Kambe xi khanela ‘swanga i dragona’ hileswi xi disaka mbitsi vhanu ni ku va pfukela nambi ku va hlasela hi ku kongoma loko wuhosi bya xone byi nga yamukeliwi. A xi kutxi mhunu ku titsrongohata ka Mfumu wa Xikwembu Nkulukumba lowu nga hansi ka hambana ya Xikwembu Nkulukumba, kambe xi djula leswaku vhanu va titsrongohata ka Sathana, dragona lwekulu. Xi kutxa moya wa wutiko ni livengo leswi hlohlotelaka vhanu ku va va gandzrela xihazri xa sungula.

Clímax de Revelação p. 195 §§ 30-31

Ku Lwa Ni Swihazri Swibidzri Swa Ku Lebya

Matimu ma kombisa leswaku xifaniso lexi xi yimela nhlengeletanu leyi sunguliwiki ni ku buyiseliwa hi mfumu wa Grã-Bretanha ni Estados Unidos, lowu ku sunguleni a wu vitaniwa Ntwanano wa Matiko. Ntsrhakunyana, ka Apfuletelo ndzrima 17, xi tlhela xi humelela kambe xi tava na xi hamba ntizro wun’wana wa xihazri xa muvala wa libungu lexi kutani xi hanyaka nakone xi fumaka xi li wuswaxone. Nhlengeletanu leyi ya misava hinkwayu ya ‘vulavula’ hikusa ya tikhuza, yi hlaya leswaku hi yone ntsena leyi nga kotaka ku tisela vhanu ku zrula ni nsizrelelo. Kambe ntiyiso wa mhaka hi leswaku yo matlhutlhisa duvi matiko lama yi seketelaka, hikusa ma tsrhamela ku tlhavana hi mazritu ha yone ni ku zruketelana hi kola ka yone. Yi ma txhavisela hi ku hlaya leswaku tiko ledzri nga yingisetikiki, dzri ta khatisiwa hi ku hlongoliwa ka nhlengeletanu ya yone kumbe dzri fulazreliwa. Nakunene Ntwanano Wa Matiko wu ma hlongolile matiko lama hlulekiki ku yentxa leswi wu swi hlayiki. Loko nhlomulo lowukulu wu sungula, ‘timhondzro’ leti ta yimpi ta xifaniso lexi xa xihazri ti ta hamba ntizro wun’wana wa lisima wa ku lovisa.​—Apfuletelo 7:14; 17:8, 16.

Ku sukela ka Yimpi ya Wubidzri ya Misava, xifaniso xa xihazri​—lexi swoswi xi yimeliwaka hi Ntlhangano wa Matiko—a na xi dlayiwile hakakunene. Hi xikombiso, hi 1950 masotxha ya Ntlhanganu wa Matiko ma nghenelelile a xikazri ka yimpi ya Coreia do Sul. Masotxa ya Ntlhanganu lowu, ma dlaye vhanu va kolomu ka 1.420.000 va le Coreia do Norte ni va le China. Hi la ku fanaka, ku sukela hi 1960 ku ya tlhasa 1964, masotxha ya Ntlhanganu wa Matiko a ma lwa a Congo (Kinshasa). Ntlhantakubidzri, vazrangeli va wukhongoti, ku patsra na vapapa Pawulo 6 na João Paulo wa wubidzri, va ye mahlweni va tiyisekisa leswaku xifaniso lexi i dumbo ledzrikulu dzra ku buyisela vhanu ku zrula. Va sindzrise ni mavonela ya leswaku loko vhanu va nga djuli ku xi gandzrela, a va ta tilovisa ha wuswavu. Xileswo, hi ndlela ya ku fanekisela va yentxe leswaku ku dlayiwa vhanu hinkwavu lava yaliki ku tizrisana ni xifaniso lexi ni ku xi gandzrela.​—Deuteronoma 5:8, 9.

Sentinela 15/02/2009 p. 4 § 2

Nkatsrakanyu wa buku dzra Apfuletelo—II

13:16, 17. Nambi loko hi bindzreliwa hi mintizro ya siku ni siku leyi hi nga ha vaka nayone, ya ku fana ni ‘ku xava ni ku xavisa’, a hi fanelanga hi pfumelela xihazri xi lawula wutomi byezru. Ku yamukela ‘mfungo wa xihazri a vokweni kumbe a mobyeni wezru’ swi fana ni loko hi xi pfumelela leswaku xi lawula swiyentxo swezru kumbe xi lawula ndlela leyi hi yanakanyaka ha yone.

Djulisisa Tindzralama Ta Moya

Sentinela 15/02/2009 p. 4 § 5

Nkatsrakanyu wa buku dzra Apfuletelo​—II

16:13-16. ‘Mimoya . . . lemimfani’ yi yimela dzrungula ledzri soholotiwiki dzra mademona ledzri yentxeliwiki ku tiyisekisa leswaku tihosi ta misava a ti hlohloteliwi hi ku txhululiwa ka 7 wa swigadzrana swa mahlundzru ya Xikwembu Nkulukumba kambe a matsrhan’wini ya leswo ti kanetana na Yehovha.​—Mt 24:42, 44.

Sentinela 15/07/2015 p. 16 § 9

“Ku Tizruliwa Kwenu Ku Kusuhi”!

Hi nkama wa nhlomulo lowukulu ku ta va ku nga li nkama wa ku zrezra ‘evhangeli ledzri dzra Mfumo’. Nkama lowo wu tava wu khalutile. ‘Wugamu’ byi tava byi tlhasile! (Mt 24:14) Vhanu va Xikwembu Nkulukumba va dzri zrezra hi xixixi dzrungula ledzri tsremaka nhlana dzra ku yavanyisa ledzri taka khumba vhanu hinkwavu. Dzrungula dzroledzro ku nga ha va dzra leswaku misava leya ku biha ya Sathana yi le kusuhi ni ku heliseliwa wugamu. Bibele dzri fanisa dzrungula dzroledzro ni xihangu loko dzri ku: ‘Xihangu lexikulu xi xika tilwini, a mabyana ya xone ma bindzra ku fana ni talanta, swi wela henhla ka vhanu; a vhanu va ku sandzra Xikwembu Nkulukumba hi nkonta ya khombo dzra xihangu, hikusa a khombo dzra xone i dzrikulu ngopfu.’​—Mpf 16:21.

23-29 KA DEZEMBRU

WUKOSI BYI NGA BIBELENI | APFULETELO 17-19

“Yimpi Ya Xikwembu Nkulukumba Leyi Taka Helisa Tiyimpi Hinkwatu”

Sentinela 01/04/2008 p. 8 §§ 3-4

Armagedoni​—Yimpi Ya Xikwembu Nkulukumba Leyi Taka Helisa Tiyimpi Hinkwatu

Loko ka ha fuma vhanu va ku biha, vhanu va ku lulama a ve nge vi na ku zrula ni nsizrelelo. (Amaproverbia 29:2; Eklesiasta 8:9) I ntiyiso leswaku a hi nge swi koti ku tsimbisa vhanu va ku somboloka ku yentxa mintxhumu ya ku biha. Hi leswo ke, ku zrula loku nga helikiki ni wululami swi ta va kone ntsena loko ku tava ku helisiwe vhanu va ku somboloka. Salomoni a tsrale leswi: ‘Lwe wa ku biha i tizrulo dzra lwa lulamiki.’​—Amaproverbia 21:18.

Leswi Xikwembu Nkulukumba a nga muyavanyisi, hi nga tiyiseka leswaku ndlela yin’wana leyi a taka yavanyisa lava ku somboloka ha yone yi tava leyi lulamiki. Abrahamu a vutise leswi: ‘A mutsremi wa misava hinkwayu anha a nga tsremi timhaka hi ku lulama xana?’ Ka nhlamulo ya kone, Abrahamu a dondzre leswaku minkama hinkwayu Yehovha a lulamile! (Genesis 18:25) Matsrhan’wini ya leswo, Bibele dzra hi tiyisekisa leswaku Yehovha a nga swi nyonxeli ku helisa mhunu wa ku somboloka; kambe leswo a swi yentxa hi leswi ku kalaka ku nga na xin’wana lexi a nga xi yentxaka.​—Ezekiel 18:32; 2 Petros 3:9.

Perspicaz vol-1 p. 475 § 1

Hantxhi

Ka xivoniso xa ku fanekisela xa mupostola Yohani, Yesu Kriste lwa phatimisiwiki a fanisiwa ni lwa khandzriyiki hantxhi dzra ntlhohe, na heleketiwa hi khandzra, hinkwavu na va khandzriye mahantxhi ya ntlhohe. Xivoniso lexi xi pfuleteliwe Yohani swanga wululami ni wunene ka yimpi leyi Kriste a taka lwa ni valala vakwe, na a lwela Xikwembu Nkulukumba tlhelo Tatana wakwe, Yehovha. (Mpf 19:11, 14) Ku nga si na tlhasa leswo, swiyentxo swa Kriste swa wululami ni makhombo lama landzrelaka, swi yimeliwa hi vakhandzriyi va mahantxhi va ku hambana-hambana.​—Mpf 6:2-8.

Clímax de Revelação p. 286 § 24

Hosi Leyi Nga Nhenha Ya Hlula Ka Armagedoni

Xihazri xa 7 wa tinhloko ni 10 wa timhondzro lexi humaka likhulwini, lexi yimelaka nhlengeletanu ya Sathana ya politika xa helisiwa kun’we ni muprofeta wa madzrimi, lwa nga mfumu wa 7 wa misava. (Apfuletelo 13:1, 11-13; 16:13) Va txukumetiwa ‘tiveni dzra ndzrilo’ na va ha ‘hanya’, kumbe va ha li nyandzra yin’we a ku kaneteni ka vhanu va Xikwembu Nkulukumba a misaveni. Xana i tiva dzra ndzrilo dzra hi ntshima? Im-him, hikusa xihazri ni muprofeta wa madzrimi a hi swa ntshima. Kambe, dzri yimela ku helisiwa ka wugamu, ku loviseliwa wugamu Lani hi kone lani lifu ni Hades kun’we na Diyavulosi ha byakwe, va taka txukumetiwa kone. (Apfuletelo 20:10, 14) Hakunene a hi le ndzrilweni lowu ku xanisawaka lava ku biha hila ku nga helikiki, swanga hi leswi mbangu wa ku tasu wu nyenyetsaka Yehovha.​—Yeremiya 19:5; 32:35; 1 Yohan 4:8, 16.

Clímax de Revelação p. 286 § 25

Hosi Leyi Nga Nhenha Ya Hlula Ka Armagedoni

Lavan’wana hinkwavu lava a va nga li xiphemu xa mfumu hi ku kongoma kambe lava a va li xiphemu lexi nga khalutikiki xa misava leya ku biha na vone va ‘dlawa hi tlhazri dzra lwa khandzriyiki hantxhi’. Yesu a ta va hlaya lava faneliwaka hi lifu. Xana leswi mayelanu na vone ku kalaka ku nga vulavuliwanga hi tiva dzra ndzrilo, xana hi nga langutela leswaku va ta pfuxiwa? A ku na la hi byeliwaka kone leswaku lava dlayiwiki hi Mutsremi wa Yehovha a nkameni wolowo va ta pfuxiwa. Hi la Yesu ha byakwe a hlayiki ha kone, hinkwavu lava nga liki ‘tihamba’ va ta ya ‘ndzrilweni lowu nga timekikiki lowu bekiseliwiki Diyavulosi ni swizrun’wa swakwe’, hi leswaku ‘va ta ya ku biweni loku nga helikiki’. (Mattheo 25:33, 41, 46) Leswi swi txhaputa ‘a siku dzra tsremo ni dzra suviso dzra vhanu lava ku ka wukhongoti’.​—2 Petros 3:7; Nahum 1:2, 7-9; Malaki 4:1.

Djulisisa Tindzralama Ta Moya

Clímax de Revelação pp. 247-248 §§ 5-6

Ku Paluxiwa Ka Xihundla Lexikulu

‘Xihazri lexi . . . afa xi kone.’ Ina afa xi li kone, xi vitaniwa Ntwanano wa Matiko ku sukela hi 10 ka Janeru wa 1920 ku ya mahlweni nakone xi seketeliwe hi 63 wa matiko. Kambe hi ku famba ka nkama tiko dzra Japão, Alemanha ni Itália ma humile nakone khale ka tiko dzra União Sovietica dzri susiwile ka ntlawa lowu wa Ntwanano wa Mtiko. Hi Setembru wa 1939, mufumi wa tihanyi wa Munazi wa le Alemanha a sungule Yimpi ya Wubidzri ya Misava. Hi 1942 wu ve ntxhumu nkama lowu khalutiki. Yehovha a nyike vhanu vakwe ntlhamuxelo lowu yentiki wa xivoniso lexi hi nkama lowu fanekeliki! Ka Nhlengeletanu Ya Misava Leyimpswha Leyi Kongomisiwaka hi Xikwembu Nkulukumba, makwezru N. H. Knorr a hlaye leswaku ‘xihazri lexi . . . a xi kone.’ Ntsrhaku ka leswo a vutisile a ku, “Xana ntlawa lowu wa Ntwanano wa Matiko wu ta tsrhama wu li kheleni?” Loko a hlamula, a tsrhahe Apfuletelo 17:8, kutani a ku: “Ntlawa lowu wa matiko ya misava wu ta tlhela wu huma kheleni.” Leswi swi ve tanu hakunene​—hi la Zritu dzra Yehovha dzra wuprofeta dzri hlayiki ha kone!

Xi Huma Kheleni

Xihazri xa libungu xi tlhele xi huma a kheleni hi la a swi hlayiwe ha kone. Hi 26 ka Junyu wa 1945, a ku ni pongwe ledzrikulu a São Francisco, E.U.A., loko matiko ya 50 ma vhota a ku yamukela papela dzra nhlengeletanu ya Ntwanano wa Matiko. Nhlengeletanu leyi a yi ni nkongometo wa ku ‘hlayisa ku zrula ni nsizrelelo a misaveni hinkwayu’. Ntlhanganu wa Matiko a wu li ni mitxhumu yinyingi leyi a wu fana ha wone ni lowuya wa Ntwanano wa Matiko. A Enciclopédia Delta Universal dzri li: “Ntlhanganu wa Matiko wa fananyana ni Ntlawa wa Ntwanano wa Matiko, lowu simekiwiki ntsrhaku ka Yimpi ya ku Sungula ya Misava . . . Matiko manyingi a ma li swizro swa Ntwanano wa matiko loko wu simekiwa, ma tlhele ma va swizro swa ntlawa wa Ntlhanganu wa Matiko loko wu simekiwa. Ku fana ni Ntlawa wa Ntwanano wa Matiko, Ntlawa wa Ntlhanganu wa Matiko wu simekiwe leswaku wu hlayisa ku zrula ndzreni ka matiko. Swizro-nkulu swa Ntlhanganu wa Matiko swa fana ni swa Ntlawa wa Ntwanano wa Matiko.” Nakunene, ku simekiwa ka Ntlhanganu wa Matiko i ku pfuxetiwa ka xihazri xa libungu. Swizro swa wone swa matiko ya kolomu ka 190 swi swi tlula swinene swizro swa 63 swa Ntlawa wa Ntwanano wa Matiko; nakone Ntlawa wa Ntlhangano wa Matiko wu ni wutiyanguleli lebyikulu swinene ku tlula lowa Ntwanano wa Matiko.

Sentinela 15/06/2012 p. 18 § 17

Yehovha A Hi Pfuletela Leswi ‘Fanelaka Ku Humelela Swoswi’

Nambitanu, wukhongoti bya madzrimi byi nga ti tekela ku nyamalala. Wansati wa wumbuye a ta ya mahlweni a va ni ntamu ni ku dzringeta ku kutxetela tihosi leswaku ti yentxa ku zrandzra kwakwe ku ko Xikwembu Nkulukumba a nhingenisa miyanakanyu yakwe timbilwini ta tone. (Dondzra Apfuletelo 17:16, 17.) Ku nga li khale Yehovha a ta hlohlotela mimfumu ya misava leyi ya Sathana, leyi yimeliwaka hi Ntlhanganu wa Matiko, akuva yi hlasela wansati wa wumbuye. Yi ta helisa nkutxetelo ni wukosi byakwe. Malembe ya 20 kumbe 30 lama khalutiki, vhanu vanyingi a va nga yanakanyi leswaku wukhongoti byi ta hlaseliwa. Namunhla wansati wa wumbuye a khandzriye xihazri xa muvala wa libungo. Nambitasu, a nge wi hakutsrongo-kutsrongo ka xone, kambe a ta wa hi xitxhuketa ni hi ndlela leyi vavisaka.​—Mpf 18:7, 8, 15-19.

30 KA DEZEMBRU–5 KA JANERU

WUKOSI BYI NGA BIBELENI | APFULETELO 20-22

“Vonani, Hinkwaswu Ndzra Swi Yentxa Leswimpswha”

Clímax de Revelação p. 301 § 2

Tilo Ledzrimpswha Ni Misava Lemimpswha

Loko ka ha sale madzana ya malembe akuva ku tlhasa siku dzra Yohani, Yehovha a same a byela Ezaya a ku: ‘Hikuva, lavisa, ndzri tumbuluxa matilo lamampswha, ni misava lemimpswha; ku nga ka ku nga dzrimukiwi timhaka ta ku sungula, ti nga ka ti nga ha buyeli miyanakanywini.’ (Ezaya 65:17; 66:22) Wuprofeta lebyi byi hetiseki dzra ku sungula loko va-Yuda va ku dumbeka va tlhelela Yerusalema hi 537 M.N.Y. ntsrhaku ka loko va hete 70 wa malembe va li wukazraweni a Babilonia. Hi nkama wolowo wa ku pfuxetiwa, hi vone lava a va li lixaka dzra vhanu lava basiki, ku nga ‘misava lemimpswha’, lava fumiwaka hi mfumu lowumpswha, ku nga ‘matilo lamampswha’. Nambitanu, mupostola Petro a vulavule hi ku hetiseka kun’wana ka wuprofeta lebyi, a ku: ‘Ha ku lavisela matilo lamampswha ni misava lemimpswha hi ku dumbisa kwakwe, leswi ku lulama ku yakiki ku swone.’ (2 Petros 3:13) Yohani swoswi a kombisa leswaku xidumbiso lexi xi hetiseka a sikwini dzra Hosi. ‘Tilo ni misava swa ku sungula’, ku nga xiyimu xa misava ya Sathana lexi hlelekiki, kun’we ni mimfumu ya wone leyi kutxeteliwaka hi Sathana ni mademona yakwe, swi ta khaluta. ‘Likhulu’ ledzri kazrihiki dzra lava ku somboloka, ku nga vhanu lava dukiki, a dzri nge he vi kone. Dzri ta siviwa hi ‘tilo ledzrimpswha ni misava leyimpswha’​—ku nga vhanu lava taka hanya a misaveni leyimpswha va fumiwaka hi mfumu lowumpswha, Mfumu wa Xikwembu Nkulukumba.​—Dzringanisa Apfuletelo 20:11.

Sentinela 01/12/2013 p. 11 §§ 2-4

“Vonani, Hinkwaswu Dzra Swi Yentxa Leswimpswha”

‘[Xikwembu Nkulukumba] a ta hlangula minyembeti hinkwayu a mahlweni yavu.’ (Apfuletelo 21:4) I minyembeti muni leyi taka hlanguliwa? A hi minyembeti ya ku nyonxa kumbe leyi sizrelelaka mahlu yezru. Xidumbiso xa Xikwembu Nkulukumba xi kombetela ka minyembeti leyi vangiwiki hi ku xaniseka ni mahlomulo. Nkulukumba a nga womisa minyembeti leyo ntsena; kambe a ta yi hlangula hi ku helela hikusa a ta susa hinkwaswu leswi vangaka minyembeti—ku nga ku xaniseka ni mahlomulo.

‘Ni ku fa ku nga ha vi kone.’ (Apfuletelo 21:4) I yini lexi vangiki minyembeti yinyingi leyi nga djulekiki loko ku nga li nala, ku nga lifu? Yehovha a ta ntsrhunxa vhanu lava yingisetaka ka wukazrawa bya lifu. Hi ndlela yini? Hi ku susa lexi vangaka lifu: xidoho lexi hi xi kumiki ka Adamu. (Ba-le-Roma 5:12) Yehovha a ta yentxa leswaku vhanu lava yingisetaka va va lava hetisekiki hi ku tizrisa gandzrelo dzra tizrulo dzra Yesu. Kutani nala wa wugamu, ku nga lifu, a ta ‘helisiwa’. (1 Ba-le-Korinte 15:26) Vhanu va ku dumbeka va ta swi kota ku hanya hi la ku nga helikiki va li ni lihanyu ledzri hetisekiki swanga hi leswi kongometo wa Xikwembu Nkulukumba a wu li xiswone.

‘Ni ku vaviseka ku nga ha vi kone.’ (Apfuletelo 21:4) I ku vaviseka muni loku taka helisiwa? Ku vaviseka ka le miyanakanywini ni le mizrini loku ku viki kone hi kola ka xidoho ni ku ka ku hetiseka loku yentxiki wutomi bya vhanu va ntsrandzra-vahlayi byi nga nyonxisi a ku nge he vi kone.

Sentinela 01/08/2003 p. 12 § 14

Yehovha Xikwembu Nkulukumba Wa Xihlayelamfuzri

Hi fanela ku teka leswi Yehovha a hi byelaka swone a Zritwini dzrakwe swi li swa lisima. Yene a xileswi a hlayaka swaku a swone, nakone a ta yentxa leswi a hlayaka leswaku a ta swi yentxa. Hi ni swivangelo hinkwaswu swa ku dumba Xikwembu Nkulukumba. Hi nga kholwa loko Yehovha a ku a ta tisa ‘dzrihiselo ka lava nga tivikiki Xikwembu Nkulukumba, ni lava ku ka va nga yingiseti evhangeli dzra Hosi yezru Yesu’. (2 Ba-le-Thesalonika 1:8) Nakone hi fanela ku ma tekela nhlokweni mazritu ya Yehovha loko a ku awa va zrandzra lava zrandzraka wululami, loko a ku a ta va nyika wutomi lebyi nga helikiki hinkwavu lava kombisaka lipfumelo, ni loko a ku a ta helisa ku vaviseka, nkosi nambi ku fa. Yehovha a tiyisekisa xidumbiso lexi hi ku byela mupostola Yohani a ku: ‘Tsrala, hikuva mazrito lawa ma dumbeka, i xihlayelamfuzri.’​—Apfuletelo 21:4, 5; Amaproverbia 15:9; Yohan 3:36.

Djulisisa Tindzralama Ta Moya

Perspicaz vol-3 p. 784 § 2

Wutomi

Xikwembu Nkulukumba a lelete Adamu, leswaku loko afa a yingisetile, nha a nga fanga. (Gn 2:17) Swi hi ku fanana ni vhanu lava yingisetaka, loko nala wa wugamu wa mhunu, ku nga lifu, a ta helisiwa, a ku nga ha ti va ni xidoho mizrini yavu lexi taka va vangela lifu. A va nge he ti fa ni siku ni dzrin’we. (1Ko 15:26) Ku helisiwa ka lifu ku ta yentxeka a ku heleni ka mfumu wa Kriste, lani buku dzra Apfuletelo dzri hlayaka leswaku ku ta teka 1.000 wa malembe. Dzri hlaya leswaku lava va taka va tihosi ni vaprista kun’we na Kriste, ‘va hanya kambe, va fuma na Kriste ha khume dzra madzana ya malembe’. ‘Loko ve van’wana lava ku fa’ va nga hanyi ‘ku ko ku hela khume dzra madzana ya malembe’, hi lava taka va na va hanya a ku heleni ka 1.000 wa malembe, kambe na Sathana a nga si na ntsrhunxiwa kheleni kutani a tisa dzringiwo dzra wugamu a vhanwini. A wungan’wini bya 1.000 wa malembe, vhanu a misaveni va tava va tlhaseli ku hetiseka va va ka xiyimu lexi Adamu na Evha a va li ka xone na va nga si na doha. Va ta va ni wutomi bya ku hetiseka hakunene. Lava taka khaluta ndzringweni lowo, loko Sathana a ntsrhuxiwa kheleni hi nkamanyana, va ta tikholisa hi wutomi lebyi nga helikiki.​—Mpf 20:4-10.

Perspicaz vol-2 pp. 639-640

Tiva Dzra Ndzrilo

A xiga lexi xi humelela ntsena ka buku dzra Apfuletelo nakone swi le livaleni leswaku i xifananiso. A Bibele dzri nyikela ntlhamuxelo wa dzrone ni mahlayela ya xifananiso, dzri ku: ‘Loku hi ku fa ka wubidzri, a tiva dzra ndzrilo.’​—Mpf 20:14; 21:8.

A tsrhamela dzra ku fanekisela dzra tiva dzra ndzrilo dzre dla livaleni ka ntlhamuxelo wa buku dzra Apfuletelo. (Mpf 19:20; 20:14) A lifu, hakunene, a dzri nge hisiwi hi ku kongoma. Ntlhantakubidzri, Diyavulosi, xivumbiwa xa moya, xi txukumetiwa ka tiva ledzro. Swanga moya, a nge xanisiwi hi ndzrilo wa hi ntshima.​—Mpf 20:10; ndzringanisa Eks 3:2 na Abaṭ 13:20.

Swanga hi leswi a tiva dzra ndzrilo dzri yimelaka ‘ku fa ka wubidzri’, ni leswi Apfuletelo 20:14 dzri hlayaka leswaku ‘a lifu ni Hades’ swi ta txukumetiwa kone, swi le livaleni leswaku tiva a dzri nge yimeli lifu ledzri munhu a dzri kumiki ka Adamu (Ro 5:12), nakone a ku hlayiwi Hades (Sheol). Swinga yentxeka ku li xifaniso xa muxaka wa lifu dzrin’wana, lifu dzra ku kala pfuku, hikusa a ku kombisiwi ni kan’we lani ku nga ni ‘tiva’ ledzro lani dzri humexaka lava nga ku dzrone, ku fana ni lifu hi kola ka Adamu ni Hades (Sheol). (Mpf 20:13) Hi leswo ke, lava kalaka va nga tsraliwanga ‘a bukwini dzra wutomi’, vakaneti lava nga tisoliki va wuhosi bya Xikwembu Nkulukumba, va ta txukumetiwa tiveni dzra ndzrilo, leswi hlayaka ku suvisiwa hi la ku nga helikiki, kumbe lifu dzra wubidzri.​—Mpf 20:15.