Ku dondzra Bibele swi fana ni ku teka liyendzro dzra ku leha. Nambi loko dzri li dzra lisima, swi nga ha djula ku tiyisela. Minkama yin’wana u nga ha tivutisa leswi: ‘Xana ni ta swi kota ku tama ni dondzra Bibele?’ Ha yini swi li swa lisima akuva u tikazratela ku tama u dzri dondzra? I yini swi nga ku pfunaka ku tiyisela nambi loko swi kazrata?

1. Ha yini swi li swa lisima ku dondzra Bibele?

‘Zritu dzra Xikwembu Nkulukumba dzra hanya, dzri ni ntamu.’ (Ba-Heberu 4:12) Ku dondzra Bibele i swa lisima hikusa dzri hi byela miyanakanyu ya Xikwembu Nkulukumba ni ndlela leyi a titwaka ha yone ha hine. A dzri hi pfuni ku kuma wutivi ntsena, kambe dzri tlhela dzri hi pfuna ku kuma wutlhazri bya ntiyiso ni dumbo. Xa lisima ngopfu, dzri hi pfuna ku va vanghanu va Yehovha. Loko hi dondzra Bibele, hi va na hi pfumelela ntamu wa dzrone akuva wu yampswisa wutomi byezru.

2. Ha yini hi fanela ku xiya lisima dzra ntiyiso wa Bibele?

Ntiyiso lowu nga Bibeleni wu fana ni tindzralama ta lisima. Hi yo mhaka leyo Bibele dzri hi kutxaka, dzri ku: ‘Xava xihlayelamfuzri u nga xi xavise.’ (Amaproverbia 23:23) Loko hi xiya lisima dzra ntiyiso wa Bibele, hi ta tikazratela ku tama hi dzri dondzra—nambi loko hi kumana ni swikazratu.—Dondzra Amaproverbia 2:4, 5.

3. Xana Yehovha a nga ku pfunisa kuyini ku tama u dondzra Bibele?

Swanga Muvumbi wa ntamu hinkwawu ni Munghanu waku, Yehovha a djula u dondzra ha yene. A ta ku pfuna leswaku u ‘zrandzra ni ku tizra’. (Dondzra Ba-le-Filipi 2:13.) Xileswo, Yehovha a nga ku pfuna loko u txhuka u godola kumbe swi ku bindzrela ku tizrisa leswi u swi dondzraka. A nga tlhela a ku pfuna loko u vilela ntamu lowu yengetelekiki akuva u hlula swihinga kumbe ku kanetiwa. Minkama hinkwayu, kombela Yehovha hi xikhongoto akuva a ku pfuna ku tama u dondzra Bibele.—1 Ba-le-Thesalonika 5:17.

KELISISA

4. Kombisa leswaku dondzro ya Bibele i ya lisima kwaku

Minkama yimbeni hi na swinyingi swa ku swi yentxa lakakuva swi tikomba na hi nge na nkama wa ku dondzra Bibele. I yini swi nga hi pfunaka? Dondzrani Ba-le-Filipi 1:10, mi gama mi bulisana hi swivutiso leswi landzrelaka:

• Hi mavonela yaku, hi swini ‘leswa ku lulama’, kumbe swa lisima ngopfu, a wuton’wini byaku?

• Xana u nga swi kombisa hi ndlela yini leswaku dondzro ya Bibele i ya lisima a wuton’wini byaku?

1. Loko u zranga hi ku txhela misava ka bakiti u gama u txhela a mazribye a henhla, a mazribye ma nga ti yanela

2. Kambe loko u sungula hi mazribye, ku tala ka misava yi ta yanela, hi lani ku fanaka loko u zrangisa mintxhumu ya lisima ku ta sala nkama wa mintxhumu yimbeni

Ku dondzra Bibele ku yanelisa xivileleko xezru xa moya—kumbe xivileleko xezru xa ku gandzrela Xikwembu Nkulukumba. Dondzrani Matewu 5:3, mi gama mi bulisana hi swivutiso leswi landzrelaka:

• Hi wani matovoko lawa hi taka ma kuma loko hi beka dondzro ya Bibele a mbangwini wa ku sungula?

5. U nga pfumeleli van’wana va ku tsrhikisa ku dondzra Bibele

VHIDIYU: A Ku Tiyisela Kwake A Ku Vanga Ka Mahala (5:22)

• Ka vhidiyu, xana vanghanu va Francesco ni maxaka yake va yentxe yini loko a va byela leswi a a swi dondzra?

• Hi dzrini hakelo ledzri a viki nadzru hi kola ka ku tiyisela kwake?

Dondzrani 2 Timoteo 2:24, 25, mi gama mi bulisana hi swivutiso leswi landzrelaka:

• Xana maxaka ni vanghanu vaku va li yini hi leswi u swi dondzraka?

• Hi ku ya hi tindzrimana leti, xana hi swini leswi u faneliki ku swi yentxa loko mhunu wa kukazri a nga swi djuli kuva u dondzra Bibele? Ha yini?

6. Dumba leswaku Yehovha a ta ku pfuna

VHIDIYU: Yehovha A Hi Pfuna Ku Yampswisa Mahanyela Yezru (3:56)

• Hi ku ya hi vhidiyu, hi wani mahanyela lawa Jim a ma tsrhikiki akuva a nyonxisa Yehovha?

• Xana i yini xi ku nyonxisiki ka xikombiso xake?

Dondzrani Ba-Heberu 11:6, mi gama mi bulisana hi swivutiso leswi landzrelaka:

• Xana Yehovha a ta va yentxela yini ‘lava mu djulaka’—kumbe, lava va lwelaka ku mu tiva ni ku yentxa ku zrandzra kwake?

• Xana Yehovha a titwisa kuyini loko a ku vona na u tikazratela ku dondzra Bibele?

NKATSRAKANYU

I ntiyiso leswaku a hi minkama hinkwayu swi nabyalaka ku dondzra Bibele. Kambe loko u dzri dondzra, u nga kuma ku nyonxa hi la ku nga helikiki. Tama u dumba Yehovha, Yene a ta ku tovokisa.

Mpfuxeto

• Hi mavonela yaku, ha yini ntiyiso wa Bibele wu li wa lisima?

• U nga kombisa hi ndlela yini leswaku u zrangisa mintxhumu ya lisima ngopfu?

• Ha yini u fanela ku kombela Yehovha leswaku a ku pfuna ku tama u dondzra Bibele?

HANDZRISISA

Vona a tindlela ta mune leti pfuneke vhanu vanyingi akuva va tizrisa nkama hi wutlhazri

“Ndlela Ya Ku Tizrisa Nkama Waku Hi Wutlhazri” (Pfukani!, Fevhereru wa 2014)

A nuna wa Grace a a nga dzri voni lisima dzra ku a nsati wake a tizrela Xikwembu Nkulukumba. Vona ndlela leyi Yehovha a pfuniki Grace ha yone.

Yehovha A Hi Nyika Ntamu Wa Ku Hlula Swikazratu Swezru (5:05)

Vona ndlela leyi wanuna mun’we a pfunekiki ha yone hi ku tiyisela ka nsati wake.

Ni Kambele Ntiyiso (6:30)

Minkama yimbeni Timboni ta Yehovha ti lumbetiwa ku hahlula mindangu. Xana leswo i ntiyiso?

“Xana Timboni Ta Yehovha Ta Yaka kumbe Ti Hahlula Mindangu?” (Leswi kumekaka ka jw.org)

Hinkwezru hi ni swiboho leswi hi fanelaka ku swi teka. Swinyingi swa swone swi nga byi khumba hi ndlela leyikulu wuxaka byezru na Yehovha. Hi xikombiso, swi nga ha djula hi teka xiboho xa leswaku hi ta tsrhama kwini, hi ta yi kuma kwini mali akuva hi tiwundla ni leswaku hi ta txhata kumbe im-him. Loko hi teka swiboho swa wutlhazri, hi nga va ni wutomi bya ku nyonxisa hi tlhela hi nyonxisa Yehovha.

1. Xana u nga dzri tizrisisa kuyini Bibele akuva dzri ku pfuna ku teka swiboho swa wutlhazri?

Na u nga si na teka xiboho, khongota ka Yehovha u kombela mpfunu, nakone kambisisa ka Bibele akuva u tiva leswaku dzri li yini hi mhaka ya kone. (Dondzra Amaproverbia 2:3-6.) Ka swiyimu swimbeni, Yehovha a nyikela nkongomiso lowu wu nga livaleni. Kutani ka xiyimu lexo, ku yingiseta nkongomiso wolowo a ta va xiboho xa wutlhazri.

Xana u nga yentxa yini loko ku nge na nkongomiso wa ku kongoma a Bibeleni? Yehovha a ta ku fambisa a “ndleleni leyi u fanelaka ku famba ha yone”. (Ezaya 48:17) A ta swi yentxisa kuyini leswo? Ku ni minsinya ya milawu leyi nga ku kongomisaka. Minsinya ya milawu ya Bibele i mintiyiso ya Bibele leyi hi dondzrisaka leswi Yehovha a titwisaka xiswone hi mintxhumu ya kukazri. Minkama hinkwayu hi tiva matitwela ya Xikwembu Nkulukumba loko hi dondzra wudzrunguli lebyi nga Bibeleni. Loko hi tiva matitwela ya Yehovha, hi nga swi kota ku teka swiboho swa wutlhazri.

2. He swini leswi u nga yanakanyaka ha swone na u nga si na teka xiboho xa kukazri?

Bibele dzri li: ‘Lwa nga ni ku yanakanya a langusisa laha a kandzretelaka kone.’ (Amaproverbia 14:15) Leswi swi tlhamuxela leswaku na hi nga si na teka xiboho, hi fanela ku tinyika nkama wa ku yanakanya hi leswi patsrekaka ka ku hlawula koloko. Loko u kambisise xiyimu ha xin’we, tivutise: ‘He yini minsinya ya milawu ya Bibele leyi tizraka ka xiyimu lexi? Xana xiboho lexi xi ta ni nyika ku zrula ka miyanakanyu? Xana xiboho xanga xi ta va khumbisa kuyini van’wana? Xa lisima ngopfu, xana xi ta mu nyonxisa Yehovha?’—Deuteronoma 32:29.

Yehovha a ni mfanelo ya ku hi byela leswi lulamiki ni leswi bihiki. Loko hi tiva milawu ni minsinya ya milawu ya Yehovha, nakone hi tiyimisela ku yi landzra, lipfalu dzrezru dzri ta va ledzri dondzrisiwiki ha hombe. Lipfalu hi dzrone dzri hi byelaka leswi nga swinene kumbe leswi bihiki. (Ba-le-Roma 2:14, 15) Lipfalu ledzri dondzrisiwiki ha hombe dzri ta hi pfuna ku teka swiboho swa wutlhazri.

KELISISA

3. Tsrhika Bibele dzri ku kongomisa

VHIDIYU: Pfumelela Minsinya Ya Milawu Yi Ku Kongomisa (5:54)

• I yini ntsrhunxeko wa ku tihlawulela?

• Ha yini Yehovha a hi nyike ntsrhunxeko wa ku tihlawulela?

• Ha yini Yehovha a hi pfuna ku tizrisa ntsrhunxeko wa ku tihlawulela hi ndlela leyinene?

Akuva u vona xikombiso xa nsinya wa nawu wa Bibele, dondzrani Ba-le-Efesa 5:15, 16. Ntsrhaku ka leswo, bulani hi ndlela leyi u nga wu “tizrisaka ha wone nkama hi ndlela leyinene” akuva . . .

• u dondzra Bibele nkama ni nkama.

• u va nuna, nsati, papayi kumbe n’wana lwenene.

• u hlalela mintlhanganu ya bandla.

4. Dondzrisa lipfalu dzraku akuva u teka swiboho swa wutlhazri

VHIDIYU: Hlayisa Lipfalu Ledzrinene (5:13)

• Ka vhidiyu, makwezru wa xisati a yentxe yini akuva a dondzrisa lipfalu dzrake ni ku teka xiboho akuva a nyonxisa Yehovha?

Ha yini hi nga fanelanga ku yimela leswaku vambeni va teka swiboho swa ku fana ni swezru? Dondzrani Ba-Heberu 5:14, mi gama mi bulisana hi swivutiso leswi:

• Nambileswi swi nga ha vonekaka ingiki swa nabyala ku va vambeni va hi tekela swiboho, i yini leswi hi fanelaka ku kota ku tihambanisela swone ha wuswezru?

• He swini switizro leswi nga hi pfunaka ku dondzrisa lipfalu dzrezru ni ku teka swiboho leswinene?

5. Hlonipha lipfalu dzra vambeni

Leswi vhanu va kalaka va nga fani, va teka swiboho leswi hambaniki. Hi nga hloniphisa kuyini lipfalu dzra vambeni? Yanakanya hi swiyimu swibidzri:

Xiyimu xa ku sungula: Makwezru wa kukazri wa xisati lweyi a zrandzraka ku tipenda, a zruzrela ka bandla ledzri vamakwezru vanyingi va xisati swi nga khomikiki ha hombe ku vona va xisati na va tipendile.

Dondzrani Ba-le-Roma 15:1 ni 1 Ba-le-Korinte 10:23, 24, mi gama mi bulisana hi swivutiso leswi landzrelaka:

• Hi ku twanana ni tindzrimana leti, xana makwezru lweyi a nga yentxa yini? Xana wene u ta yentxa yini loko ku ni mhunu lweyi lipfalu dzrake dzri mu yalelaka ku yentxa mintxhumu leyi lipfalu dzraku dzri ku pfumelelaka ku yi yentxa?

Xiyimu xa wubidzri: Makwezru wa kukazri wa xinuna awa swi tiva leswaku Bibele a dzri tsimbisi ku nwa byala hi ndlela leyi dzringaniseliwiki, kambe a hlawula ku kala a nga nwi ni byitsrongo. Hi loko a zrambiwa ka fexta dzra kukazri. Loko a li kwahala, a vona vamakwezru na va tinwela byala.

Dondzrani Eklesiasta 7:16 ni Ba-le-Roma 4:1, 10, mi gama mi bulisana hi swivutiso leswi landzrelaka:

• Hi ku ya hi tindzrimana leti, i yini leswi makwezru lweyi a nga hlawulaka ku swi yentxa? Xana u ta yentxa yini loko u vona mhunu mumbeni a yentxa ntxhumu lowu lipfalu dzraku dzri liki wu bihile?

U nga yentxa yini akuva u teka swiboho swa wutlhazri?

1. Khongota ka Yehovha akuva a ku pfuna ku teka xiboho.—Yakob 1:5.

2. Hamba wusetxhi a Bibeleni ni ka mabuku lama seketeliwiki a Bibeleni akuva u kuma minsinya ya milawu leyi tizraka ka xiyimu lexo. U nga ha tlhela u bula ni vakriste lava wupfiki.

3. Yanakanyisisa hi leswi xiboho xaku xi taka dzri khumbisa xiswone lipfalu dzraku ni dzra vambeni.

NKATSRAKANYU

Hi nga teka swiboho swa wutlhazri loko hi tiva ndlela leyi Yehovha a titwaka ha yone hi mhaka ya kukazri ni ku vona ndlela leyi swiyentxo swezru swi nga va khumbaka ha yone vambeni.

Mpfuxeto

• Xana u nga swi tekisa kuyini swiboho leswi nyonxisaka Yehovha?

• U nga dzri dondzrisisa kuyini lipfalu dzraku?

• U nga swi kombisisa kuyini leswaku wa dzri hlonipha lipfalu dzra vambeni?

HANDZRISISA

U nga swi yentxisa kuyini swiboho leswi taka tiyisa wunghanu byaku na Xikwembu Nkulukumba?

“Teka swiboho Leswi Kombisaka Leswaku U Hlonipha Yehovha” (Xihondzro Xa Ku Zrindzra, 15 ka Abrili wa  2011)

Dondzra ndlela leyi Yehovha a hi nyikaka swilayu ha yone.

Yehovha A Kongomisa Vhanu Vake (9:50)

Vona leswi nga pfuna wanuna wa kukazri akuva a teka xiboho xa ku kazrata swinene.

Leswi Yehovha A Hi Nyikaka Swone I Swinene (5:46)

Dondzra leswi yengetelekiki mayelanu ni ndlela leyi hi nga nyonxisaka Yehovha ha yone lani ku ngeke na nawu lowu kongomiki ka mhaka ya kukazri.

“Xana Minkama Hinkwayu U Djula Nkongomiso Wa Bibele” (Xihondzro Xa Ku Zrindzra, 1 ka Dezembru wa 2003)