Vamakwavu Lava Twananaka

YEHOVHA a tizrisane ni tiko dzra Israyele swanga vhanu lava tameliki vito dzrakwe ku dzringana kolomu ka 1.500 wa malembe. Kambe Yehovha a game a ‘yanakanya ku titekela a makazri ka vamatiko a tiko ledzri taka txhuliwa hi vito dzrakwe’. (Min 15:14) Vhanu lava vitaniwaka hi vito dzra Yehovha a va ta va timboni takwe, leti twananaka hi miyanakanyu ti tlhela ti hamba ntizro wun’we, nambi ti tsrhama kwini a misaveni. Ku hlengeleta vhanu lava tiviwaka hi vito dzra Xikwembu Nkulukumba a swi ta pfela ka ntizro lowu Yesu a wu nyikiki valandzreli vakwe: ‘Hi leswo ke, fambani, n’wi ya dondzrisa matiko hinkwawu, n’wi va babatisa hi vito dzra tatana, ni dzra n’wana, ni dzra moya lowa ku xwenga; n’wi va dondzrisa ku bekisa hinkwaswu leswi ni n’wi leletiki swone.’​—Mt 28:19, 20.

² Leswi u tinyiketeliki ka Yehovha u tlhela u babatisiwa, u ndzruluke mudondzrisiwa wa Yesu Kriste. U xiyenge xa vamakwavu lava nga vakriste lava twananaka a misaveni hinkwayu, lava nga pfumeliki ku hambanisiwa hi tiko, lixaka ni xiyimu xa timali. (Ps 133:1) Xileswo, u zrandzra vakriste-kuloni a bandleni u tlhela u va bekela xitxhavu. Swi nga ha yentxeka vambeni mi hambana hi nhlonge, tiko kumbe ndlela leyi mi dondzriki ha yone, lava kumbexana khale a u nga titlhanganisi na vone hi kola ka ku hambana koloko. Mi ni lizrandzru dzra wumakwavu ledzri tiyiki swinene ku tlula wuxaka byini na byini, a nga ha va bya lomu u kuleliki kone, bya wukhongoti kumbe bya ndangu.​—Mr 10:29, 30; Kl 3:14; 1Pe 1:22.

KU LULAMISA MAPIMISELA

³ Loko vambeni swi va kazratela ku hlula xihlawuhlawu lexi dzimiki timitsru, lexi fambelanaka ni nhlonge, politika, lixaka kumbe xihlawuhlawu ximbeni, va fanela ku dzrimuka vakriste va va-Yuda va dzana dzra ku sungula, lava a va fanela ku tsrhika xihlawuhlawu xa wukhongoti lexi va-Yuda a va xi kombisa vhanu hinkwavu va matiko mambeni. Loko Yehovha a lelete Petrosi ku ya a kaya ka Korneliyo, muzrangeli wa khandzra dzra va-Roma, Yehovha a lulamisele Petrosi hi lizrandzru leswaku a hetisisa xiyavelo lexi.​—Min, Ndzrima 10.

⁴ Ka xivoniso ximbeni, Petrosi a nyikiwe xileleto xa leswaku a dlaya ni ku da swihazri swa kukazri leswi a swi nga basanga hi ku ya hi va-Yuda. Loko Petrosi a yalile, ku twale zritu a tilweni dzri ku: ‘Leswi Xikwembu Nkulukumba a nga swi basisa wene u nga hlaye leswaku swa yila.’ (Min 10:15) Swi djule leswaku Xikwembu Nkulukumba a nhingenela akuva Petrosi a lulamisa mapimisela yakwe mayelanu ni xiyavelo lexi a a ta nyikiwa xone, xa ku ya pfuxela wanuna wa matiko. Hi ku yingiseta nkongomiso wa Xikwembu Nkulukumba, Petrosi a byele lava a va hlengeletanile a ku: ‘Ma swi tiva, n’wine, leswaku swa yila ku wanuna wa mu-Yuda ku tlhangana, kumbe ku nhingena ka mhunu wa dzrin’wana lixaka. Kambe mine, Xikwembu Nkulukumba a ndzri kombise leswaku a swi fanekelanga ku hlaya leswaku mhunu a wa yila, kumbe a nga basanga. Hi leswo ni tiki, ndzri nga yalisi, loko ndzri vitaniwile.’ (Min 10:28, 29) A ntsrhaku ka leswo, Petrosi a vone wumboni bya leswaku Yehovha a mu yamukelile Korneliyo ni ndangu wakwe.

⁵ Swi vilele kuva Sawulo wa le Tarsos, mufarisi lweyi a dondzriki ngopfu, a titsrongahata a tlhela a titlhanganisa ni lava khale a va nga yamukeleki kwakwe. A tlhele a yamukela nambi nkongomiso lowu humaka kwavu. (Min 4:13; Ga 1:13-20; Flp 3:4-11) Yanakanya ndlela leyi vhanu va ku fana na Sergiyus Paulus, Diyoniziyu, Damaris, Filemoni, Onesimos ni vambeni va lulamisiki mapimisela yavu ha yone loko va yamukele madzrungula lamanene va ndzruluka vadondzrisiwa va Yesu Kriste.​—Min 13:6-12; 17:22, 33, 34; Flm 8-20.

KU HLAYISA WUXAKA LEBYINENE NI VAMAKWEZRU A MISAVENI HINKWAYU

⁶ A swi ganaganekisi leswaku a lizrandzru dzra vamakwezru a bandleni dzri ku pfune ku tsrhindzrekela kusuhi na Yehovha ni nhlengeletanu yakwe. U vone lizrandzru dzra xihlayelamfuzri ledzri fungaka vadondzrisiwa va kakunene va Yesu Kriste, hi lani a hlayiki ha kone a ku: ‘Ndzri n’wi nyika nawu lowumpshwa, hi leswaku n’wi zrandzrana. Swanga hi leswi ndzri n’wi zrandzriki, na n’wine zrandzranani. Hi laha hinkwavu va taka tiva leswaku n’wi vadondzrisiwa vanga, loko n’wi zrandzrana.’ (Yh 13:34, 35) Handle ka leswo, u ye u mu tlangela ngopfu Yehovha ni nhlengeletanu yakwe loko u xiye leswaku a lizrandzru ledzri nga bandleni ko va ntsena xikombiso xa ndlela leyi vamakwezru va zrandzranaka ha yone a misaveni hinkwayu. U le ku voneni ka ku hetiseka ka wuprofeta bya Bibele mayelanu ni ku hlengeletiwa ka vhanu a masikwini ya wugamu leswaku va gandzrela Yehovha hi ku zrula ni wumun’we.​—Mik 4:1-5.

⁷ Leswi namunhla ku nga na swinyingi leswi hambanisaka vhanu, i mani lweyi a a hlaya leswaku siku dzrin’wana swi nga koteka ku tlhanganisa vhanu ‘va matiko hinkwawu, ni va tinxaka hinkwatu, ni va tintsrhundzru, ni va tindzrimi’? (Mpf 7:9) Vona ku hambana loku nga kone a makazri ka vhanu lava hluvukiki ngopfu hi tlhelo dzra teknolojiya ni lava va ha hanyaka hi ku landzra swihena swa khale swa lixaka. Vona ku lwisana ka wukhongoti loku nga kone a makazri ka vhanu va nhlonge ni tiko ledzri fanaka. Leswi vhanu va yaka va tikhuza hi tiko dzravu, va ya va hambana hi tlhelo dzra politika ku tlula masiku ntsrhaku. Loko u yanakanya hi ku hambana loku nga kone hi tlhelo dzra timali kun’we ni swimbeni swa ku tala leswi hambanisaka vhanu, ku tlhanganisa vhanu va matiko hinkwawu, tindzrimi, mintlawa ni swiyimu hinkwaswu leswaku va hanyisana hi ku zrula ni lizrandzru ledzri nga tsremekiki i hlolana ledzri nga yentxiwaka ntsena ha Xikwembu Nkulukumba wa Ntamu Hinkwawu.​—Zk 4:6.

⁸ Kambe wumun’we lebyo byi kone ha kakunene, nakone u ve xiyenge xa byone loko u ndzruluke Mboni ya Yehovha leyi tinyiketeliki yi va yi babatisiwa. Leswi u pfunekaka hi wumun’we lebyi, na wene u fanela ku byi txutxela. U nga byi txutxela hi ku yingiseta mazritu ya mupostola Pawulo lama nga ka Ba-le-Galatiya 6:10, lama liki: ‘Leswi hi nga ni nkama, a hi tizreni, hi yentxela leswinene hinkwavu, ngopfu a va yindlu ya wupfumeli.’ Hi tlhela hi landzrela xilayu lexi: ‘N’wi nga yentxeni ntxhumu hi ku kanetana, kumbe hi ku titwalisa ka ku ka ndlela; kambe, hi ku titsrongahata, a mun’wana ni mun’wana a a hlaye leswaku va mu tlula van’wana; a mun’wana ni mun’wana a nga txhuki a tilavisela swakwe, kambe a a lavisele ni swa van’wana.’ (Flp 2:3, 4) Loko hi titoloveta ku vona vambeni hi ndlela leyi Yehovha a va vonaka ha yone, ku nga li hi ku ya hi leswi va vonekisaka xiswone hi le handle, hi ta tama hi va ni wuxaka bya ku zrula ni lebyi nyonxisaka na vone.​—Ef 4:23, 24.

ZRON’WEKA HI VAMBENI

⁹ Hi lani mupostola Pawulo a hi bekeliki xikombiso ha kone, a bandla a dzri tsravukananga. A matsrhan’wini ya leswo, hinkwavu lava dzri vumbaka va zron’weka hi mun’wana ni mun’wana. (1Ko 12:14-26) Swi nga yentxeka hi le kule na kule ni vamakwezru vambeni, kambe leswo a swi pumbi ndlela leyi hi zron’wekaka ha yone ha vone. Loko vamakwezru vambeni va xanisiwa, hinkwezru ha kazrateka swinene. Loko vambeni va pfumala kumbe va hlaseliwa hi mhangu, yimpi, kumbe mpfilumpfilu, hinkwezru hi navela ku kuma tindlela ta ku va pfuna hi tlhelo dzra moya ni dzra nyama.​—2Ko 1:8-11.

¹⁰ Hinkwezru hi fanela ku khongotelela vamakwezru siku ni siku. Vambeni va dzringiwa ku yentxa leswi bihiki. Vambeni va xaniseka hi ndlela leyi nga livaleni. Kasi vambeni va kanetiwa hi tindlela leti nga tiviwikiki hi ku kongoma, hi vatizri-kulobye ni hi mindangu leyi yavaniki. (Mt 10:35, 36; 1Te 2:14) Leswo swa hi zron’wa hikusa hi vamakwezru a misaveni hinkwayu. (1Pe 5:9) A makazri kwezru ku ni lava gingiritekaka swinene a ntizrweni wa Yehovha, va zrangela a ntizrweni wa ku zrezra ni le mabandleni. Tlhantakubidzri, ku ni lava va nyikiwiki wutiyanguleli bya ku lavisela ntizro wa misava hinkwayu. Hinkwavu hi fanela ku va khongotelela, swanga ndlela ya ku kombisa lizrandzru dzrezru ni ku zron’weka ka xihlayelamfuzri, nambi loko kumbexana hi nge ti swi kota ku va pfuna hi ku kongoma.​—Ef 1:16; 1Te 1:2, 3; 5:25.

¹¹ Vhanu va Yehovha va fanela ku tsrhama na va tibekisele ku pfunana a masikwini lawa ya wugamu ya mpfilumpfilu a misaveni. Loko ku ni timhangu ta ku fana ni ku tsrekatsreka ka misava ni tindhambhi, ku djuleka vamakwezru akuva va pfunisa, kun’we ni ntsrengo lowukulu wa mintxhumu leyi vonekaka. Vakriste va dzana dzra ku sungula va hi bekele xikombiso lexinene a mhakeni leyi. Na va yanakanya hi xilayu xa Yesu, vadondzrisiwa va le Antiyoka va zrumele xipfuno xa mintxhumu leyi vonekaka ka vamakwavu a Yudeya na va nyonxe ngopfu. (Min 11:27-30; 20:35) Hi ku famba ka nkama, Pawulo a kutxe va le Korinte leswaku va seketela a malulamiselo ya xipfuno lawa a ma yentxiwa hi ndlela leyi hlelekiki. (2Ko 9:1-15) Namunhla wa siku, loko vamakwezru va kumana ni swiyimu leswi djulaka xipfuno xa swa nyama, nhlengeletanu ni mukriste ha mun’we va kahlula va yentxa xa kukazri ni ku nyikela leswi vilelekaka.

KU HLAWULELIWA KU YENTXA KU ZRANDZRA KA YEHOVHA

¹² Swanga vamakwavu lava nga ni wumun’we a misaveni hinkwayu, hi hleleliwe ku yentxa ku zrandzra ka Yehovha. A ku zrandzra ka Yehovha namunhla i kuva a madzrungula lamanene ya Mfumu ma zrezriwa a misaveni hinkwayu, akuva byi va wumboni ka matiko hinkwawu. (Mt 24:14) Loko hi li ku yentxeni ka ntizro lowu, a ku zrandzra ka Yehovha i ka leswaku hi hanya hi ku ya hi milawu yakwe leyi tlakukiki. (1Pe 1:14-16) Hi fanela ku tibeka hansi ka vambeni hi mbilu ya ku swi zrandzra na hi tizra hi nkongometo wa ku yisa madzrungula lamanene mahlweni. (Ef 5:21) Ku tlula nkama wini na wini lowu khalutiki, lowu a hi wone nkama wa ku zrangisa timhaka tezru. A matsrhan’wini ya leswo, hi fanela ku zrangisa Mfumu wa Xikwembu Nkulukumba a wuton’wini byezru. (Mt 6:33) Loko hi dzrimuka leswo, hi va hi tizra hi wumun’we leswaku hi yisa madzrungula lamanene mahlweni, hi ta kuma ku nyonxa swoswi swi tlhela swi hi nyika matovoko lama nga helikiki.

¹³ Swanga Timboni ta Yehovha, ko va hine ntsena hi hlawuliwiki ka vhanu hinkwavu swanga vhanu lava basiki, akuva hi hisekela ku tizrela Xikwembu Nkulukumba wezru. (Ti 2:14) Wugandzreli byezru ka Yehovha byi hi yentxa hi va lava hambaniki. A ho tizrisana ntsena ni vamakwezru a misaveni hinkwayu, kambe hi vulavula lidzrimi dzrin’we dzra xihlayelamfuzri hi tlhela hi hanya hi ku ya hi xihlayelamfuzri lexi hi xi vulavulaka. Yehovha a profete mhaka leyo hi ku tizrisa muprofeta wakwe Tsefaniya, a ku: ‘Ndzri ta nyika matiko milomu ya ku basa, akuva ma ta vitana hinkwawu a vito dzra Yehovha, ma mu tizrela hi mbilu yin’we.’​—Tsf 3:9.

¹⁴ Yehovha a tlhele a huhutela Tsefaniya ku tlhamuxela ku twanana ka vamakwavu lava nga kone namunhla, a ku: ‘A nsalu ya Israyele yi ngaka yi nga yentxi wusomboloki, ni ku vulavula madzrimi; a tindzrimi ta ku kanganyisa ti ngaka ti nga kumiwi milon’wini yavu; hikusa va ta da, va yetlela hansi, ku nge na wa ku va txhavisa.’ (Tsf 3:13) Hi kota ku tizra hi wumun’we hikusa hi twisise Zritu dzra Yehovha dzra xihlayelamfuzri, hi txintxa mayanakanyela yezru hi tlhela hi twananisa wutomi byezru ni milawu ya Yehovha. Hi yentxa leswi vonekaka ingiki a swi koteki a matihlweni ya lava va vonaka mintxhumu hi ndlela ya ximhunu. I ntiyiso, hi vhanu va Xikwembu Nkulukumba lava hambaniki, lava va mu dzrumisaka a misaveni hinkwayu.​—Mik 2:12.