Ku nga li khale, Yehovha a ta tizrisa Mfumu wake akuva a helisa swikazratu swezru hinkwaswu. Ndzrava leyo i ya lisima swinene lakakuva hinkwavu va fanela ku yi tiva. Yesu a lelete vadondzrisiwa vake akuva va byela vhanu ndzrava leyo! (Matewu 28:19, 20) Xana Timboni ta Yehovha ti swi yentxisa kuyini leswi Yesu a ti zrumiki swone?

1. Xana a tsralwa dzra Matewu 24:14, dzri hetiseka hi ndlela yini a nkameni wezru?

Yesu a te: “Madzrungula lamanene ya Mfumu ma ta zrezriwa a misaveni hinkwayu.” (Matewu 24:14) Timboni ta Yehovha ti nyonxa swinene hi ku hlengela a ntizrweni lowu wa lisima. Hi zrezra madzrungula lamanene a misaveni hinkwayu hi tindzrimi leti tlulaka 1.000! Ntizro lowu lowukulu, wu djula ku tikazrata swinene ni nhleleko. A swi nge na ku koteka ku wu yentxa na hi nga pfuniwi hi Yehovha.

2. Hi tikazrata hi ndlela yini akuva hi zrezrela vhanu?

Hi zrezra kwini na kwini lomu vhanu va kumekaka kone. Ku fana ni vakriste va khale, hi zrezra a “tindlwini” kumbe hi muti ni muti. (Amintiṛo 5:42) Hi ku tizrisa yentxela ledzri, hi kota ku kuma vhanu vanyingi lembe ni lembe. Leswi vhanu va nga kumekiki makaya minkama hinkwayu, hi zrezra a mimbangwini yinyingi ya le livaleni. Minkama hinkwayu hi djuletela mikhandlu ya ku byela van’wana hi Yehovha ni leswi a taka swi yentxela vhanu.

3. I mani lweyi a fanelaka ku zrezra madzrungula lamanene?

Vakriste hinkwavu va ntiyiso va fanela ku zrezra madzrungula lamanene ka vhanu. Ntizro lowu hi wu nyika lisima. Hi zrezra hi lani hi nga kotaka ha kone hikusa ha swi tiva leswaku leswo swi nga huluxa wutomi bya vhanu. (Dondzra 1 Timoteo 4:16.) A hi holi mali hi ntizro lowu, hikusa Bibele dzri li: “Mi yamukeli mahala, nyikani mahala.” (Matewu 10:7, 8) A hi hikwavu lava yamukelaka dzrungula dzrezru, kambe nambitanu hi tama hi zrezra hikusa loko hi yentxa leswo hi va na hi yingiseta Yehovha hi tlhela hi mu nyonxisa.

KELISISA

4. Hi tikazrata ngopfu akuva hi zrezrela vhanu hinkwavu

VHIDIYU: Ku Zrezra ‘Ku Ya Tlhasa Vugan’wini Bya Misava’ (7:33)

• I yini leswi swi ku nyonxisaka ka hinkwaswu leswi Timboni ta Yehovha ti swi yentxaka akuva ti zrezra?

Dondzrani Matewu 22:39 ni Ba-le-Roma 10:13-15, mi gama mi bulisana hi swivutiso leswi landzrelaka:

• Xana ntizro wezru wa ku zrezra wu swi kombisisa kuyini leswaku ha va zrandzra vhanu?

• Xana Yehovha a titwisa kuyini hi lava va zrezraka madzrungula lamanene?—Vonani ndzrimana 15.

5. Hi tizrisana na Xikwembu Nkulukumba

Ku ni swinyingi leswi hi kholwisaka leswaku Yehovha a kongomisa ntizro wezru. Hi xikombiso, makwezru lweyi a vitaniwaka Paul, a a li ntizrweni wa ku zrezra hi muti ni muti a Nova Zelândia ni nhlikanhi. Hi loko a kuma wansati wa kukazri lweyi a mixweni ka kone hi siku dzrodzro, a a khongote ka Xikwembu Nkulukumba. A tizrise vito dzra Xikwembu Nkulukumba a kombela leswaku a yendzreliwa hi mhunu. Paul a li: “A ntsrhaku ka mawora mazrazru, ni gongondzre xipfalu xake.”

Dondzrani 1 Ba-le-Korinte 3:9, mi gama mi bulisana hi xivutiso lexi landzrelaka:

• Xana mimfambu ya ku fana ni lowu yentxekiki a Nova Zelândia, yi swi kombisa hi ndlela yini leswaku Yehovha a kongomisa ntizro wa ku zrezra?

Dondzrani Amintiṛo 1:8, mi gama mi bulisana hi xivutiso lexi landzrelaka:

• Ha yini hi djula mpfunu wa Yehovha akuva hi zrezra?

A wu swi tiva?

Vhiki ni vhiki ka ntlhanganu wa xikazri ka vhiki, hi dondzra tindlela leti hi zrezraka ha tone. Loko u same u kumeka ka wun’we wa mintlhanganu yoleyo, u yi vonise kuyini dondzro leyi nyikeliwiki?

6. Hi yingiseta xileleto xa Xikwembu Nkulukumba xa kuva hi zrezra

A nkameni wa vapostola, vakaneti va dzringise ku yimisa valandzreli va Yesu akuva va nga zrezri. Vakriste va ku sungula va lwele mfanelo yavu ya ku zrezra hi ku ‘tiyisa evhangeli’ hi ku ya hi nawu. (Ba-le-Filipi 1:7) Timboni ta Yehovha ti yentxa hi lani ku fanaka a masikwini yezru.a

VHIDIYU: Ku Lwela Madzrungula Lamanene Hi Nawu (2:28)

Dondzrani Amintiṛo 5:27-42, mi gama mi bulisana hi xivutiso lexi landzrelaka:

• Ha yini hi nga fanelanga ku yima ku zrezra?—Vona tindzrimana 29, 38 ni 39.

NKATSRAKANYU

Yesu a zrume valandzreli vake ku zrezra madzrungula lamanene ka vhanu hinkwawu. Yehovha a pfuna vhanu vake ku yentxa ntizro lowu.

Mpfuxeto

• Xana madzrungula lamanene ma zrezriwa hi ndlela yini a misaveni hinkwayu?

• Xana ntizro wezru wa ku zrezra wu swi kombisisa kuyini leswaku ha va zrandzra vhanu?

• Xana u yanakanya leswaku a ntizro wa ku zrezra wu nga hi tisela ku nyonxa? Ha yini?

HANDZRISISA

Vona ndlela leyi Timboni ta Yehovha ti zrezraka ha yone a madoropeni lamakulu.

Tsima Dzra Ku Hlawuleka Dzra Ku Zrezra Ka Madoropa Lamakulu A Paris (5:11)

Xana Timboni ta Yehovha ti yentxa yini akuva ti zrezrela vahlapfa?

Ku Pfuna Vahlapfa Akuva Va Va Vanghanu Va Yehovha (5:59)

Margarita a hete nkama wunyingi na a zrezra madzrungula lamanene. Ha yini ku yentxa leswo swi mu yentxe a nyonxa?

Ni Nyonxile Hi Leswi Ni Hlawuliki Ntizro Lowu (6:29)

Vona ndlela leyi swiboho swa lisima swa matribunali swi pfunisiki ha yone ka ntizro wa ku zrezra.

“Vazrezri Va Mfumu Va Yisa Nandzru Wavu A Tribunali” (Mfumu Wa Xikwembu Nkulukumba Wa Fuma!, Ndzrima 13)

Yesu a dondzrise leswaku vakriste va fanela ku babatisiwa. (Dondzra Matewu 28:19, 20.) Kambe babatiso i yini? Nakone i yini lexi mhunu a fanelaka ku xi yentxa akuva a babatisiwa?

1. Xana babatiso i yini?

Zritu “babatisa” dzri pfa ka zritu dzra Xigriki ledzri tlhamuxelaka ku “nyuveta” mhunu hi ku helela a matini. Swi ve tanu ka Yesu loko a babatisiwa a nambyeni wa Yordani, mizri wake hinkwawu wu nyuvetiwe matini. Leswo hi swi tiva hikusa Bibele dzri li a ntsrhaku ka babatiso a “huma matini”. (Marka 1:9, 10) Hi lani ku fanaka, vakriste va ntiyiso loko va babatisiwa, mizri wavu hinkwawu wu nyuvetiwa matini.

2. Xana loko mhunu a babatisiwa a va na a kombisa yini?

Loko mhunu a babatisiwa a kombisa leswaku a nyiketele wutomi byake ka Yehovha Xikwembu Nkulukumba. A swi kombisisa kuyini leswo? Na a nga si na babatisiwa, a zranga hi ku khongota ka Yehovha, a mu byela leswaku a djula ku mu tizrela hi lani ku nga helikiki. A dumbisa Yehovha leswaku a ta tizrela yene ntsena ni ku tlhela a zrangisa ku yentxa ku zrandzra ka Yehovha a wuton’wini byake. A tiyimisela ku ‘tiyala kutani . . . a tama a landzra’ tindondzro ni xikombiso xa Yesu. (Matewu 16:24) Loko mhunu a tinyiketela a tlhela a babatisiwa, swi nga koteka kuva a va ni wuxaka lebyinene na Yehovha kun’we ni lava mu gandzrelaka.

3. Akuva mhunu a babatisiwa a fanela ku yentxa yini?

Na u nge si na babatisiwa, i swa lisima kuva u dondzra hi Yehovha u tlhela u va ni lipfumelo ledzri tiyiki ka yene. (Dondzra Ba-Heberu 11:6.) Loko u ya u va ni wutivi ni lipfumelo, lizrandzru dzraku ha Yehovha dzri ta ya dzri kula. Nakunene u ta susumeteleka ku byela vambeni ha yene ni ku hanya hi ku landzra leswi a hlayaka leswaku i swinene kumbe swi bihile. (2 Timoteo 4:2; 1 Yohan 5:3) Loko mhunu a hanya ‘hi laha swi fanekelaka [ka] Hosi [Yehovha] a mu tsrhavisa’, a nga ha hlawula ku tinyiketela ka Yehovha a va a babatisiwa.—Ba-le-Kolosa 1:9, 10.a

KELISISA

4. Hi dondzra swinyingi ka babatiso dzra Yesu

Dondzrani Matewu 3:13-17 akuva u kuma leswi yengetelekiki mayelanu ni babatiso dzra Yesu, mi gama mi bulisana hi swivutiso leswi landzrelaka:

• Xana Yesu a a li xibebetana nkama lowu a babatisiwiki ha wone?

• A babatisiwe hi ndlela yini? Xana ve mu phuphutela swimatana a nhlokweni?

Ntsrhaku ka babatiso dzrake, Yesu a sungule ntizro wake wa ku hlawuleka lowu Xikwembu Nkulukumba a mu nyikiki wone. Dondzrani Luka 3:21-23 na Yohan 6:38, mi gama mi bulisana hi xivutiso lexi landzrelaka:

• Ntsrhaku ka loko Yesu a babatisiwile, hi wini ntizro lowu a wu zrangisiki wuton’wini byake?

5. Babatiso i ntxhumu lowu u nga wu yentxaka

Loko hi pimisa hi ku tinyiketela ka Yehovha ni ku babatisiwa, hi nga ha swi vona na a li wutiyanguleli byikulu. Kambe loko u ya u dondzra hi Yehovha u va u hanya hi leswi a swi hlayaka, swi ta ku nabyalela ku teka xiboho lexi xa lisima. Akuva u vona swikombiso swa vhanu vambeni lava va yentxiki leswo, vonani VHIDIYU.

VHIDIYU: Hi Nga Va Vanghanu Va Yehovha Hi Ndlela Yini? (1:11)

Dondzrani Yohan 17:3 na Yakob 1:5, mi gama mi bulisana hi xivutiso lexi landzrelaka:

• I yini lexi nga pfunaka mhunu kuva a lulamela ku babatisiwa?

1. Hi tinyiketela loko hi byela Yehovha leswaku hi djula ku mu tizrela hi la ku nga helikiki

2. Loko hi babatisiwa, hi komba lava hi hlalelaka leswaku hi tinyiketelile ka Yehovha

6. Loko hi babatisiwa, hi hamba xiyenge xa ndangu wa Yehovha

Loko hi babatisiwa, hi hamba xiyenge xa ndangu lowu nga ni wumun’we wa misava hinkwayu. Nambiloko hi li va tiko kumbe lixaka dzrimbeni, hinkwezru hi kholwa ka ntxhumu wun’we hi tlhela hi yingiseta swileleto swin’we swa Xikwembu Nkulukumba. Dondzrani Amapsalma 25:14 na 1 Petros 2:17, mi gama mi bulisana hi xivutiso lexi landzrelaka:

• Ntsrhaku ka loko mhunu a babatisiwile, i wunghanu bya muxaka muni lebyi a sungulaka ku va na byone na Yehovha kun’we ni vagandzreli vake?

NKATSRAKANYU

Yesu a dondzrise leswaku vakriste va fanela ku babatisiwa. Akuva leswo swi yentxeka, swi djula leswaku mhunu a va ni lipfumelo ledzri tiyiki ka Yehovha a tlhela a hanya hi leswi Yehovha a hlayaka leswaku i swinene ni ku tinyiketela kwake.

Mpfuxeto

• Babatiso i yini nakone ha yini dzri li dzra lisima?

• He kwini ku yelana loku nga kone a xikazri ka ku tinyiketela ni babatiso?

• I yini leswi mhunu a fanelaka ku swi yentxa na a nga si na tinyiketela ka Yehovha ni ku babatisiwa?

HANDZRISISA

Dondzra leswi babatiso dzri tlhamuxelaka swone ni leswi dzri ngeke swone.

“Xana Babatiso I Yini?” (Leswi kumekaka ka jw.org)

Dondzra leswi mhunu a fanelaka ku swi yentxa akuva a babatisiwa.

“Lizrandzru Ni Ku Tlangela Yehovha Swi Hi Susumetela Ku Babatisiwa” (Xihondzro Xa Ku Zrindzra, Marsu wa 2020)

Vona ndlela leyi wanuna wa kukazri a tekiki xiboho xa ku djula ku babatisiwa ha yone.

“A Va Djula Leswaku Ni Tikholwisa Hi Ntiyiso Ha Wuswanga” (Xihondzro Xa Ku Zrindzra, 1 ka Fevhereru wa 2013)

Vona leswaku ha yini ku babatisiwa ku li ntxhumu wa lisima lowu u nga wu yentxaka ni leswaku u nga tibekisela hi ndlela yini akuva u wu yentxa.

“Xana Ni Fanela Ku Babatisiwa?” (Swivutiso Leswi Vampshwa Va Swi Vutisaka—Tinhlamulo Leti Tizraka, Vhulumi 2, Ndzrima 37)