7. Milawu ya Xikwembu Nkulukumba i yinene ngopfu ku tlula ya mimfumu ya vhanu

Mimfumu yi hamba milawu akuva yi pfuna ni ku sizrelela vhanu. Na wone Mfumu wa Xikwembu Nkulukumba wu ni milawu. Dondzrani 1 Ba-le-Korinte 6:9-11, mi gama mi bulisana hi swivutiso leswi landzrelaka:

• Xana wene u vona leswaku misava hinkwayu a yi ta tsrhamisisa kuyini loko vhanu hinkwavu a vo yingiseta milawu ya Xikwembu Nkulukumba?a

• U yanakanya leswaku Yehovha a ni mfanelo ya ku djula leswaku vhanu va landzra milawu ya Mfumu wake? Ha yini?

• I yini lexi kombaka leswaku vhanu lava kalaka va nga yingiseti milawu leyi va nga txintxa?—Vona ndzrimana 11.

Vanyingi a va swi zrandzri ku vulavula hi timhaka ta tinkuku. Nambitanu, loko Bibele dzri khanela hi timhaka ta tinkuku, dzri swi hlaya hi ku kongoma kambe hi ndlela ya xitxhavu. Leswi dzri swi hlayaka swa hi pfuna. Leswo swa twala. U nga dzrivali leswaku Yehovha i Mutumbuluxi wezru. Xileswo, awa swi tiva leswi nga swinene kwezru. A hi byela leswi hi fanelaka ku swi yentxa leswaku hi mu nyonxisa ni leswi taka hi pfuna ku tikholisa hi wutomi hi lani ku nga helikiki.

1. Xana Yehovha a ti vonisa kuyini timhaka ta tinkuku?

A timhaka ta tinkuku i xihiwa lexinene lexi pfaka ka Yehovha. A djula leswaku wanuna ni wansati lava txhatiki xikan’we va tikholisa ha tone. Handle ka ku yentxa leswaku va kuma vana, xihiwa lexi xi tlhela xi yentxa leswaku va kombisana lizrandzru hi ndlela ya ntumbuluku ni leyi nyonxisaka. Xileswo, a Zritu dzra Xikwembu Nkulukumba dzri li: ‘Tsrhavela nsati wa vu-mpshwa byaku.’ (Amaproverbia 5:18, 19) Yeho-vha a langusele leswaku vakriste lava txhatiki va dumbeka ka vakatavu, xileswo a va fanelanga ku mbuyeta nikutsrongo.—Dondzra Ba-Heberu 13:4..

2. I yini swiyentxo swa tingana hi tlhelo dzra tinkuku?

A Bibele dzri hi byela leswaku ‘loko ve vawoswani . . . va nga ka va nga di pfindla dzra Mfumu wa Xikwembu Nkulukumba’. (1 Ba-le-Korinte 6:9, 10) A vatsrali va Bibele lava tsraliki hi Xigriki va tizrise zritu ledzri liki por·neiʹa loko va khanela hi swiyentxo swa tingana hi tlhelo dzra tinkuku. Zritu ledzro dzri patsra 1) kuva vhanu lava nga txhatangakiki xikan’we va hamba timhaka ta tinkukua, 2)  ku hamba timhaka ta tinkuku ni mhunu mun’wana wa limbewu ledzri fanaka, ni 3) ku hamba timhaka ta tinkuku ni xihazri. Loko hi ‘dzrela vumbuye’ kumbe hi nga byi yentxi, hi va na hi nyonxisa Yehovha ku tlhela ku pfuneka hine.—1 Ba-le-Thesalonika 4:3.

KELISISA

3. Tsrutsruma swiyentxo swa tingana hi tlhelo dzra tinkuku

Wanuna mumbeni wa ku dumbeka, lweyi a vitaniwaka Yosefa, a yalile loko wansati wa kukazri a djule ku yetlela na yene hikusa a a djula ku va ni mahanyela lama basiki. Dondzrani Genesis 39:1-12, mi gama mi bulisana hi swivutiso leswi:

• I yini xi yentxiki Yosefa a tsrutsruma?—Vonani ndzrimana 9.

• U vona leswaku Yosefa a teke xiboho lexinene? Ha yini?

VHIDIYU: Tsrutsruma Wumbuye (5:06)

Yehovha a djula leswaku hinkwezru hi hambula mahanyela lama bihiki hi tlhelo dzra tinkuku. Dondzrani 1 Ba-le-Korinte 6:18, mi gama mi bulisana hi swivutiso leswi:

• I swiyimu muni leswi nga yentxaka mhunu a tipeta ka swiyentxo swa tingana hi tlhelo dzra tinkuku?

• U nga swi tingawulisa kuyini swiyentxo swa tingana?

4. U nga swi kota ku hlula ndzringo

VHIDIYU: Lwisana Ni Mindzringo Hi Ku Dondzra Bibele (3:02)

• Xana makwezru wa le ka vhidiyu a yentxe yini loko a vone leswaku miyanakanyu ni mintizro yake a swi ta mu yentxa a nga dumbeki ka nsati wake?

Nambi vakriste va ku dumbeka minkama yimbeni a swi va nabyaleli ku tsrhama na va basile a miyanakanywini. U nga swi tingawulisa kuyini ku tsrhamela ku pimisela mintxhumu ya ku biha? Dondzrani Ba-le-Filipi 4:8, mi gama mi bulisana hi swivutiso leswi:

• I mintxhumu muni leyi hi fanelaka ku pimisa ha yone?

• Xana ku dondzra Bibele ni ku tsrhama na hi khomekile a ntizrweni wa Yehovha, swi nga hi pfunisa kuyini ku hlula loko hi dzringiwa hi xidoho?

5. A milawu ya Yehovha yi pfuna hine

VHIDIYU: Ku Pfumala Wutlhazri (9:31)

• Xana mumpshwa a nghenise kuyini ka xiyimu lexi dzringanaka?—Vonani Amaproverbia 7:8, 9.

• Hi ku ya hi Amaproverbia 7:23, 26, a swiyentxo swa tingana hi tlhelo dzra tinkuku swi nga va ni mihandzru leyi bavaka swinene. Xana hi nga huluka ka swikazratu muni hi ku tsrhama na hi basile a mahanyeleni?

• Ku basa a mahanyeleni swi nga hi pfunisa kuyini akuva hi hanya hi ku nyonxa hi la ku nga helikiki?

Vambeni va pimisa leswaku leswi Bibele dzri swi hlayaka mayelanu ni ku va mhunu a hamba timhaka ta tinkuku ni mhunu mun’wana wa limbewu ledzri fanaka, a swi kombisi lizrandzru. Kambe Yehovha, Xikwembu Nkulukumba wa lizrandzru, a djula leswaku hinkwavu va tikholisa hi wutomi hi la ku nga helikiki. Akuva hi faneliwa hi wutomi lebyo, hi fanela ku hanya hi milawu yake. Dondzrani 1 Ba-le-Korinte 6:9-11, mi gama mi bulisana hi xivutiso lexi:

• Hi ku ya hi vonela dzra Xikwembu Nkulukumba a timhakeni ta tinkuku, ko va wusodoma ntsena byi bihiki?

Akuva hi nyonxisa Xikwembu Nkulukumba, hinkwezru hi fanela ku txintxa swa kukazri. Xana hi ta bindzrula yini? Dondzrani Amapsalma 19:8, 11, mi gama mi bulisana hi swivutiso leswi:

• U vona leswaku swa koteka ku landzra milawu ya Yehovha ya mahanyela? Ha yini?

NKATSRAKANYU

A timhaka ta tinkuku i xihiwa lexi pfaka ka Yehovha. A djula leswaku nuna ni nsati va tikholisa ha xone.

Mpfuxeto

• Xana swiyentxo swa tingana hi tlhelo dzra tinkuku swi patsra yini?

• I yini xi nga hi pfunaka ku tingawula swiyentxo swa tingana a timhakeni ta swa tinkuku?

• Hi pfunekisa kuyini loko hi landzra milawu ya Yehovha ya mahanyela?

HANDZRISISA

Kambisisa leswaku ha yini Xikwembu Nkulukumba a djula leswaku wanuna ni wansati lava djulaka ku hanya xikan’we va txhata.

“Xana Bibele Dzri Li Yini Hi Ku Hanya Xikan’we Na Mi Nga Txhatanga?” (Leswi kumekaka ka jw.org)

Loko Bibele dzri dondzrisa leswaku swi bihile kuva mhunu a hamba timhaka ta tinkuku ni mhunu mun’wana wa limbewu ledzri fanaka, a swi hlayi swone leswaku hi hambula lava hambaka leswo. Kambisisa leswaku ha yini.

“Xana Swi Bihile Kuva Mhunu A Hamba Tinkuku Ni Mhunu Mun’wana Wa Limbewu Ledzri Fanaka?” (Leswi kumekaka ka jw.org)

Tiva leswaku milawu ya Xikwembu Nkulukumba mayelanu ni mixaka hinkwayu ya timhaka ta tinkuku yi hi sizrelelisa kuyini.

“Xana Ku Nyan’wa Swizro Swa Limbewu I Ku Yentxa Timhaka Ta Tinkuku?” (Leswi kumekaka ka jw.org)

Ka mfambu lowu liki “Va Ni Khome Hi Ndlela Ya Xitxhavu”, vona leswi susumeteliki wanuna wa kukazri lweyi a a hamba timhaka ta tinkuku ni mhunu mun’wana wa limbewu ledzri fanaka, akuva a txintxa mahanyela yake leswaku a nyonxisa Xikwembu Nkulukumba.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Abrili wa 2011)

A misaveni hinkwayu, vhanu va ni mavonela ya ku hambana hi byala. Van’we va swi zrandzra ku nwa byala ni vanghanu. Vambeni va vona swi yampswa kuva va nga nwi nikutsrongo. Kasi vambeni mfuzri va byi kukutlela va za va popswa. Xana Bibele dzri li yini hi byala?

1. Xana swi bihile ku nwa byala?

Bibele a dzri soli ku nwa byala. Ku hlaya ntiyiso, loko dzri khanela hi swihanano swa ku siyanasiyana leswi hi nyikiwiki ha Xikwembu Nkulukumba, Bibele dzri patsra ni ‘vuvhinya lebyi tsrhavisaka mbilu ya mhunu’. (Amapsalma 104:14, 15) Vavanuna ni vavasati vambeni va ku dumbeka lava ku khaneliwaka ha vone a Bibeleni, a va nwa byala.—1 Timoteo 5:23.

2. I xilayu muni lexi Bibele dzri xi nyikaka lava nwaka byala?

Yehovha awa swi sola ku nwa ngopfu ni ku popswa. (Ba-le-Galatia 5:21) A Zritu dzrake dzri li: ‘U nga tolovelani ni swinwi swa vuvhinya.’ (Amaproverbia 23:20) Xileswo, loko hi djula ku nwa byala, nambiloko hi li wuswezru, a hi fanelanga ku nwa lakakuva hi hluleka ku yanakanya ha hombe, ku lawula mazritu ni mintizro yezru kumbe lakakuva hi hona wutomi byezru. Loko swi hi hlula ku lawula manwela yezru, hi fanela ku tiyimisela ku byi tsrhika hi ku helela.

3. Hi nga xi hloniphisa kuyini xiboho xa vambeni mayelanu ni byala?

Mun’wana ni mun’wana a fanela ku titekela xiboho mayelanu ni ku nwa byala. A hi na mfanelo ya ku sola lweyi a hlawulaka ku nwa hi ku dzringanisela, nambi ku sindzrisa lweyi a nga swi djulikiki ku nwa. (Ba-le-Roma 14:10) Hi hlawula kuva hi nga nwi loko ku yentxa leswo swi ta khunguvanyisa vambeni. (Dondzra Ba-le-Roma 14:21.) ‘A mhunu a nga tidjulele swakwe ntsena, kambe mhunu mun’wana ni mun’wana a a djulele van’wana leswi va fanekelaka.’—Dondzra 1 Ba-le-Korinte 10:23, 24.

KELISISA

4. Teka xiboho xa leswaku u ta nwa kumbe im-him

Xana Yesu a a byi vonisa kuyini byala? Akuva u kuma nhlamulo, kambisisa hlolana dzra ku sungula ledzri a dzri yentxiki. Dondzrani Yohan 2:1-11, mi gama mi bulisana hi swivutiso leswi:

• Hi nga dondzra yini ka hlolana ledzri mayelanu ni leswi Yesu a byi vonisaka xiswone byala ni lava byi nwaka?

• Leswi Yesu a kalaka a nga solanga ku nwa byala, xana mukriste a fanela ku mu vonisa kuyini lweyi a tinwelaka?

Nambileswi mukriste a ntsrhunxekiki ku nwa byala, a swi hlayi swone leswaku minkama hinkwayu a nga tinwela loko a byi djula. Dondzrani Amaproverbia 22:3, mi gama mi kambisisa leswaku a swiyimu leswi landzrelaka swi nga mu pfunisa kuyini mhunu ku vona leswaku swa fanela kuva a nwa kumbe im-him:

• U ya ku fambiseni kumbe a ku tizriseni ka mutxhini wa kukazri.

• U ni nyimba.

• Dotori a ku byele leswaku u nga nwi.

• Swa ku kazratela ku pimela loko u nwa.

• A nawu a wu ku pfumeleli ku nwa byala.

• U ni mhunu lweyi a hlawulaka kuva a nga nwi hi leswi khale a swi mu kazratela ku tipimela loko a nwa.

Xana u fanela ku va nyika byala vhanu lava tiki mutxhatwini kumbe ka swikhumbyana swin’wana swa ku tihungata? Akuva u vona leswi nga ku pfunaka ku teka xiboho, vonani VHIDIYU.

VHIDIYU: Xana Ni Fanela Ku Nyika Byala Van’wana? (2:41)

Dondzrani Ba-le-Roma 13:13 ni 1 Ba-le-Korinte 10:31, 32. A ntsrhaku ka ku dondzra tsralwa ha dzrin’we, bulisanani hi xivutiso lexi:

• Xana ku tizrisa minsinya leyi ya milawu swi nga ku pfunisa kuyini ku teka xiboho lexi taka nyonxisa Yehovha?

5. Teka xiboho mayelanu ni ntsrengo lowu u taka nwa wone

Loko u hlawula ku nwa byala, dzrimuka leswi: Nambileswi Yehovha a nga swi solikiki ku nwa byala, awa swi sola ku nwa ku tlula mpimu. Ha yini? Dondzrani Hošea 4:11, 18, mi gama mi bulisana hi xivutiso lexi:

• Ku nga yentxeka yini loko mhunu o nwa ku tlula mpimu?

Hi nga swi tingawulisa kuyini ku nwa ku tlula mpimu? Hi fanela ku dzringanisela, hi tiva mpimu wezru. Dondzrani Amaproverbia 11:2, mi gama mi bulisana hi xivutiso lexi:

• Ha yini swi li wutlhazri ku tibekela mpimu lowu u taka wu nwa?

6. Leswi nga ku pfunaka ku tsrhika ku nwa ku tlula mpimu

VHIDIYU: ‘A Ni Kolwile Hi Mahanyela Yanga’ (6:32)

• Hi ku ya hi vhidiyu, xana byala a byi yi hlohlotelisa kuyini ndlela leyi Dmitry a a tikhoma ha yone?

• Xana a swi kotile ku tekela ku byi tsrhika?

• A swi kotise kuyini hi wugamu ku byi tsrhika?

Dondzrani 1 Ba-le-Korinte 6:10, 11, mi gama mi bulisana hi swivutiso leswi:

• Xana ku popswa ku ni khombo dzra ku gama kwini?

• I yini xi kombisaka leswaku mhunu lweyi a nwaka ku tlula mpimu a nga swi kota ku txintxa?

Dondzrani Matewu 5:30, mi gama mi bulisana hi xivutiso lexi:

• Ku tsrema voko swi fanekisela ku tikazrata leswaku u nyonxisa Yehovha. U nga yentxa yini loko swi ku kazratela ku tsrhika ku nwa byala ku tlula mpimu?a

Dondzrani 1 Ba-le-Korinte 15:33, mi gama mi bulisana hi xivutiso lexi:

• Xana vanghanu va nga yi khumbisa kuyini ndlela leyi u nwaka ha yone?

NKATSRAKANYU

Yehovha a hi nyike byala leswaku hi tinyonxisa ha byone, kambe awa swi sola ku nwa ku tlula mpimu ni ku popswa.

Mpfuxeto

• He dzrini vonela dzra Bibele hi byala?

• He wani makhombo ya ku nwa ku tlula mpimu?

• Xana hi swi hloniphisa kuyini swiboho swa vambeni mayelanu ni byala?

HANDZRISISA

Xana vampshwa va nga tekisa kuyini swiboho leswinene mayelanu ni byala?

Xana Ni Fanela Ku Nwa? (2:31)

Gungula mintxhumu leyi u nga yi yentxaka leswaku u hlula xikazratu xa ku nwa ngopfu.

“Tiva Ku Lawula Byala” (Xihondzro Xa Ku Zrindzra, 1 ka Janeru wa 2010)

Xana vakriste va fanela ku gunyanisa makopo?

“Swivutiso Swa Vadondzri” (Xihondzro Xa Ku Zrindzra, 15 ka Fevhereru wa 2007)

Vona leswi wanuna wa kukazri a hlulisiki xiswone xikazratu xa ku kukutlela byala, ka dzrungula ledzri liki “A Ni Li Tambori Dzra Ku Boxeka”.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Mayu wa 2012)

Nambiloko u zrandzra Yehovha hi ku helela nakone u tikazratela ku yentxa ku zrandzra kwake, minkama yimbeni u ta mu dohela. Nambi swi li tanu, ku ni swihoxo leswikulu. (1 Ba-le-Korinte 6:9, 10) Loko u yentxa xidoho lexikulu, dzrimuka leswaku Yehovha a ha ku zrandzra. A djula ku ku dzrivalela a tlhela a ku pfuna.

1. I yini lexi hi fanelaka ku xi yentxa akuva Yehovha a hi dzrivalela?

Mhunu lweyi a zrandzraka Yehovha a vaviseka ngopfu loko a xiya leswaku a hambe xidoho lexikulu. Kambe swa tiyisana leswi Yehovha a swi dumbisiki vhanu vake. A li: ‘Nambi swidoho swenu swi zukile ku fana ni xivunguvungu, swi ta yentxa ntlhohe swanga hi xitsrhwatsrhwa.’ (Ezaya 1:18) Loko hi tisola na swi sukela mbilwini, Yehovha a ta hi dzrivalela. Hi nga swi kombisa hi ndlela yini leswaku ha tisola? Loko hakunene hi tisola, hi ta tsrhika ku yentxa leswi bihiki hi va hi kombela lidzrivalelo ka Yehovha. Ntsrhaku ka leswo, hi ta yentxa hinkwaswu leswi hi nga swi kotaka akuva hi txintxa mapimisela yezru kumbe hi tsrhika mintxhumu ya ku biha leyi yi hi dohisiki. Handle ka leswo, hi ta lwela ku yentxa leswi Yehovha a liki i swinene.—Dondzra Ezaya 55:6, 7.

2. Xana Yehovha a va tizrisisa kuyini vakulu akuva va hi pfuna loko hi hambe xidoho?

Loko hi hambe xidoho lexikulu, Yehovha a hi byela leswaku hi ‘vitana vakulu va [bandla]’. (Dondzra Yakob 5:14, 15.) Vakulu va zrandzra Yehovha ni tihamba take. Va tizrisa wutivi bya Bibele lebyi va nga nabyu akuva va hi pfuna ku tlhela hi va ni wunghanu lebyi tiyiki na Yehovha.—Ba-le-Galatia 6:1.

Xana vakulu va hi pfuna hi ndlela yini loko hi hambe xidoho lexikulu? Vakulu vabidzri kumbe vazrazru va ta tizrisa Bibele akuva va hi komba leswaku leswi hi swi yentxiki swi hoxile. Va ta tlhela va hi nyika swidzringanyeto ni swilayu leswi taka hi pfuna kuva hi nga ha tlheli hi doha. Akuva ku sizreleleka bandla ka minkutxetelo ya ku biha, a vakulu va susa bandleni hinkwavu lava yentxaka swidoho leswikulu va va va nga tisoli.

KELISISA

3. Ku tihlaya swidoho swezru swi hi pfuna ku lulamisa wuxaka byezru na Yehovha

Loko hi doha, hi khunguvanyisa Yehovha. Xileswo hi fanela ku tihlaya swidoho swezru kwake. Dondzrani Amapsalma 32:1-5, mi gama mi bulisana hi xivutiso lexi landzrelaka:

• A matsrhan’wini ya ku fihla leswi hi swi yentxiki, ha yini swi ni lisima ku byela Yehovha swihoxo swezru?

VHIDIYU: “Lweyi Yehovha A Mu Zrandzraka Awa Mu Laya” (3:01)

• Ka vhidiyu, xana vakulu va mu pfunise kuyini Canon akuva a tlhelela ka Yehovha?

Hi fanela ku vulavula ntiyiso ka vakulu; vone va kone akuva va hi pfuna. Dondzrani Yakob 5:16, mi gama mi bulisana hi xivutiso lexi landzrelaka:

• Ha yini a ku vulavula ntiyiso ka vakulu swi yentxa swi va nabyalela akuva va hi pfuna?

4. Yehovha a va komba wumbilu a vadohi

Loko mhunu a yentxa xidoho lexikulu a tlhela a yala ku yentxa leswi Yehovha a liki i swinene, a nge he vi xizro xa bandla. Mhunu yelweyo awa susiwa, nakone a ha ha khaneli na yene nambi ku titlhanganisa na yene. Dondzrani 1 Ba-le-Korinte 5:6, 11 na 2 Yohan 9-11, mi gama mi bulisana hi xivutiso lexi landzrelaka:

• A fermentu dzri kukumukisa mbila hinkwayu. Ha yini ku titlhanganisa ni mudohi lweyi a kalaka a nga tisoli swi nga vaka nkutxetelo wa ku biha a bandleni?

Xana ndlela leyi Yehovha a va khomkaka ha yone vadohi, yi kombisa leswaku awa dzringanisela, a ni timpswalu ni lizrandzru?.

5. Loko hi tisola, Yehovha awa hi dzrivalela

Yesu a tizrise xifaniso lexi hi pfunaka ku twisisa ndlela leyi Yehovha a titwaka ha yone loko mhunu wa kukazri a tisola. Dondzrani Luka 15:1-7, mi gama mi bulisana hi xivutiso lexi landzrelaka:

• Leswo swi hi dondzrisa yini ha Yehovha?

Dondzrani Ezekiel 33:11, mi gama mi bulisana hi xivutiso lexi landzrelaka:

• Hi wini ntxhumu wa lisima lowu hi fanelaka ku wu yentxa akuva hi kombisa leswaku hakunene ha tisola?

NKATSRAKANYU

Loko hi hamba xidoho lexikulu, Yehovha a nga hi dzrivalela. Akuva leswo swi koteka, hi fanela ku tisola swi sukela mbilwini ni ku tlhela hi tiyimisela ku tsrhika ku yentxa mintxhumu ya ku biha.

Mpfuxeto

• Ha yini swi li swinene ku byela Yehovha swidoho swezru?

• I yini leswi hi fanelaka ku swi yentxa akuva hi dzrivaleliwa swidoho swezru?

• Loko hi hambe xidoho lexikulu, ha yini hi fanela ku djula mpfunu wa vakulu?

HANDZRISISA

Vona ndlela leyi wanuna wa kukazri a titwiki ha yone timpswalu ta Yehovha leti tsraliwiki ka Ezaya 1:18.

U Nga Txhuki U Ganaganeka Mayelanu Ni Timpswalu Ta Yehovha (5:02)

Xana a vakulu va zama ku pfuna lava yentxiki xidoho lexikulu hi ndlela yini?

“Ndlela Leyi vakulu Va Kombi-saka Lizrandzru Ni Timpswalu Ha Yone Ka Lava Yentxiki Xidoho Lexikulu” (Xihondzro  Xa Ku Zrindzra, Agoxto  wa 2024)

Vona ndlela leyi u nga mu tlhamuxelaka ha yone mhunu lweyi a ngeke Mboni ya Yehovha mayelanu ni mhaka ya ku susiwa bandleni.

“Ndlela Leyi Vakulu va Nga Pfunaka Lava Susiwiki Bandleni Ha Yone” (Xihondzro Xa Ku Zrindzra, Agoxto wa 2024)

Vona mfambu lowu liki: “A Ni Djula Ku Tlhelela Ka Yehovha”, akuva u vona leswaku ha yini wanuna lweyi a a tsrhike ntiyiso a twisise leswaku Yehovha hi yene a nga mu koka akuva a tlhelela.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Abrili wa 2012)