XIDONDZRO 52
Ha Yini Hi Fanela Ku Yanakanyisisa Hi Ndlela Leyi Hi Yambalaka Ni Ku Tixongisa Ha Yone?
Hinkwezru ha swi zrandzra ku yambala ni ku tixongisa hi ndlela ya kukazri. Loko hi landzra minsinya ya milawu ya kukazri ya Bibele, hi nge ti yambala leswi hi swi zrandzraka ntsena, kambe hi ta tlhela hi tsrhavisa Yehovha. A hi kambisiseni yin’wana ya minsinya leyo ya milawu.
1. I yini xi nga hi pfunaka ku teka xiboho mayelanu ni mpahla ni ndlela ya ku tixongisa?
Hi fanela ku hlawula ‘minkhantxu kumbe mpahla leyi fanekelaka, hi ku simama ni hi ku tikhoma’, hi tlhela hi tsrhama na hi basile hikusa hi ‘tizrela Xikwembu Nkulukumba’. (1 Timoteo 2:9, 10) Kambisisa minsinya leyi ya milawu ya mune: 1) Mpahla yezru yi fanela ku va leyi “fanekelaka”. Hi lani u swi vonaka ha kone a mintlhanganwini ya bandla, a vhanu va Yehovha va yambala hi tindlela ta ku siyanasiyana, kambe mpahla yezru ni mabekisela ya misisi swi kombisa xitxhavu ka Xikwembu Nkulukumba wezru. 2) Ku yambala “hi ku simama” kumbe hi ku dzringanisela swi hlaya leswaku mpahla yezru a yi fanelanga ku pfuxela vambeni ku navela ka tinkuku, nambi ku va yentxa va hi langusa ku tlula mpimu. 3) Hi kombisa leswaku ha “tikhoma” loko hi nga hlongoliseli mimoda. 4) Ndlela leyi hi langusekaka ha yone minkama hinkwayu yi fanela ku kombisa leswaku hi ‘tizrela Xikwembu Nkulukumba’, akuva vambeni va swi vona hi ku nabyala leswaku hi vagandzreli va Xikwembu Nkulukumba wa ntiyiso.—1 Ba-le-Korinte 10:31.
2. Xana mayambalela yezru ma nga va khumbisa kuyini vagandzrelikulozri?
Nambileswi hi nga ni ntsrhunxeko wa ku yambala leswi hi swi djulaka, hi fanela ku pimisa hi leswi mpahla yezru yi taka va khumbisa xiswone vambeni. Hi yentxa leswi hi nga swi kotaka leswaku hi nga khunguvanyisi mhunu, hi lwela ku ‘tsrhavisa walekwezru, hi mu djulela leswa hombe, leswi yakelisanaka’.—Dondzra Ba-le-Roma 15:1, 2.
3. Xana mayambalela yezru ma nga va kokelisa kuyini vambeni a wugandzrelini bya ntiyiso?
Nambileswi hi yambalaka hi ndlela leyinene ka swiyimu hinkwaswu, hi yentxa hi ku tlulisa ngopfu loko hi ya a mintlhanganwini ya bandla ni loko hi ya nsin’wini. A hi swi djuli ku yentxa vhanu va nga swi twi leswi hi va dondzrisaka swone hi mhaka ya mayambalela yezru. A matsrhan’wini ya leswo, hi djula mayambalela yezru ma kokela vhanu a ntiyisweni, ma ‘khensisa ku hinkwavu dondzro ya Xikwembu Nkulukumba Muhuluxi wezru’.—Tito 2:10.
KELISISA
Vona leswi hi nga swi yentxaka akuva hi tiyiseka leswaku mayambalela yezru ni ndlela leyi hi tixongisaka ha yone swa kombisa leswaku hi vakriste va ntiyiso.
Mayambalela yezru ma nga kombisa leswaku ha va bekela xitxhavu lava nga ni wulawuli kumbe ha va yeyisa. Nambileswi Yehovha a vonaka leswi nga mbilwini yezru, ndlela leyi hi yambalaka ni ku tixongisa ha yone swi fanela ku kombisa leswaku hi mu bekela xitxhavu
4. Loko hi yambala hi ndlela leyinene hi kombisa leswaku hi hlonipha Yehovha
He xini xivangelo lexikulu lexi hi yentxaka hi nyika lisima ndlela leyi hi yambalaka ha yone? Dondzrani Amapsalma 47:2, mi gama mi bulisana hi swivutiso leswi landzrelaka:
Hine hi yimela Yehovha. Xana leswo swi fanela ku ma khumba hi ndlela yini mayambalela yezru?
U vona leswaku swa vileleka hakunene ku yambala hi ndlela leyinene loko hi ya mintlhanganwini ni le nsin’wini? Ha yini?
5. Hi nga hlawulisa kuyini mpahla leyinene ni ndlela ya ku tixongisa
Nambiloko mpahla yezru yi dula kumbe yi txhipile, yi fanela ku va leyi basiki yi tlhela yi fambisana ni mbangu lowu hi vaka hi li ka wone. Dondzrani 1 Ba-le-Korinte 10:24 na 1 Timoteo 2:9, 10. Mi gama mi bula hi leswaku ha yini hi nga fanelanga ku yambala mpahla leyi . . .
nyakapfaliki kumbe yi nga yelaniki ni lomu hi nga kone.
dezenyaranaka, yi vonekelaka kumbe yi pfuxelaka vambeni ku navela ka tinkuku.
Nambileswi vakriste va nga ha liki hansi ka Nawu wa Moxe, nawu lowo wa ha kombisa mayanakanyela ya Yehovha. Dondzrani Deuteronoma 22:5, mi gama mi bulisana hi xivutiso lexi landzrelaka:
Ha yini hi fanela ku tingawula mpahla leyi yentxaka vavanuna va voneka ingiki i vavasati, ni vavasati ingiki i vavanuna?
Dondzrani 1 Ba-le-Korinte 10:32, 33 na 1 Yohan 2:15, 16, mi gama mi bulisana hi swivutiso leswi landzrelaka:
Ha yini hi fanela ku kazrateka loko mayambalela ni matixongisela yezru swi khunguvanyisa vambeni a mugangeni kumbe a bandleni?
I mayambalela ni matixongisela muni ma tolovelekiki lomu u tsrhamaka kone?
Xana man’wana ya mayambalela lawo a ma lwisani ni ya vakriste? Ha yini?
Hi nga yambala ni ku tixongisa hi tindlela tinyingi leti nyonxisaka Yehovha
VAN’WE VA LI: “A wu ngheni mbangu ka mpahla yanga; ni ni mfanelo ya ku tiyambalela xin’wana ni xin’wana lexi ni xi djulaka.”
U yima na vone? Ha yini?
NKATSRAKANYU
Loko hi hlawula ha hombe ndlela leyi hi yambalaka ni ku tixongisa ha yone, hi kombisa leswaku hi hlonipha Yehovha ni vambeni.
Mpfuxeto
Ha yini mayambalela ni matixongisela yezru swi li swa lisima ka Yehovha?
He yini minsinya yimbeni ya milawu leyi fanelaka ku hi kongomisa loko hi djula mpahla ni ku tixongisa?
Xana mayambalela yezru ma nga yi khumbisa kuyini ndlela leyi vambeni va vonaka wugandzreli bya ntiyiso ha yone?
HANDZRISISA
Kambisisa leswi vambeni va pimisaka swone ha wene hi kola ka mayambalela yaku.
Tiva leswaku ha yini u fanela ku zranga hi ku pimisa na u nge si na hamba tatuwaji.
“Xana Bibele Dzri Li Yini Hi Matatuwaji?” (Leswi kumekaka ka jw.org)
Kambisisa minsinya yimbeni ya milawu leyi nga hi pfunaka ku teka swiboho.
I yini xi pfuniki wansati wa kukazri lweyi a a djula ku nyonxisa Xikwembu Nkulukumba, leswaku a dzringanisela ka ndlela leyi a vonaka mayambalela ya vambeni ha yone?