2. Xana Bibele dzri hi byela yini hi Yehovha?

Bibele dzri li ka swikwembu hinkwaswu leswi vhanu va swi gandzrelaka, ko va Yehovha ntsena a nga Xikwembu Nkulukumba wa ntiyiso. Ha yini? Ku ni swivangelo swinyingi. Yehovha a ni wuhosi lebyi tlakukiki. Yene wuswake, a ‘tlakukile henhla ka misava’. (Dondzra Amapsalma 83:18.) Hi yene ‘wa ntamu hinkwawu’, leswi liki, a ni ntamu wa ku yentxa xin’wana ni xin’wana lexi a xi djulaka. Hi yene ‘lwa nga tumbuluxa hinkwaswu’—matilo ni misava ni hinkwaswu swi nga ka yone. (Apfuletelo 4:8, 11) Ku hambana ni mhunu mun’wana ni mun’wana, Yehovha a ve kone minkama hinkwayu nakone a ta va kone hi la ku nga helikiki.—Amapsalma 90:2.

Hi fanela ku gandzrela Yehovha ntsena hikusa hi yene Mutumbuluxi wezru. (Apfuletelo 4:11) Leswi swi hlaya leswaku hi fanela ku mu zrandzra ni ku gandzrela yene ntsena na hi nga tizrisi swithombe kumbe swifaniso.—Dondzra Ezaya 42:8.

Wugandzreli byezru byi fanela ku va lebya ‘ku xwenga, bya ku tsrhavisa’ ka Yehovha. (Ba-le-Roma 12:1) Swi hlaya leswaku hi fanela ku yingiseta milawu yake. Hi xikombiso, lava zrandzraka Yehovha va zrandzra milawu yake mayelana ni wukati va tlhela va yi landzra. Nakone a va yentxi mintxhumu leyi honaka ya ku fana ni ku dzraha, ku tizrisiwa ka mizri loku nga liki nawini ni ku popswa.a