XIDONDZRO 24
Tintsrumi Ti Tsrhamisise Kuyini Nakone Ti Yentxa Yini?
Yehovha a djula leswaku hi dondzra hi ndangu wake wa le tilweni. Ndangu lowo wu patsra ni tintsrumi leti vitaniwaka ‘vana va Xikwembu Nkulukumba’. (Yob 38:7) I yini leswi Bibele dzri swi hlayaka hi tintsrumi? I yini leswi ti swi yentxaka? Xana tintsrumi hinkwatu ti hamba xiyenge xa ndangu wa Xikwembu Nkulukumba?
1. Tintsrumi ti tsrhamisise kuyini?
Yehovha a zrange a hamba tintsrumi na a nga si na hamba misava. Ku fana na Xikwembu Nkulukumba, tintsrumi ti ni mizri wa moya nakone ti tsrhama matilweni. (Ba-Heberu 1:14) Ku ni magidigidi ya tintsrumi nakone ti ni matsrhamela ya ku siyanasiyana. (Apfuletelo 5:11) Tone ti ‘yentxa swileleto swa [Yehovha], ti yingiseta zritu dzra ku hlaya kwakwe’. (Amapsalma 103:20) A nkameni lowu khalutiki, Yehovha minkama yin’wana a a tizrisa tintsrumi akuva a nyikela madzrungula, a pfuna vhanu vake ni ku huluxa malandzra yake loko ma li nghozini. Namunhla, tintsrumi ti pfuna vakriste akuva va kuma vhanu lava va djulaka ku dondzra ha Xikwembu Nkulukumba.
2. Xana Sathana ni mademona yake i vamani?
Tintsrumi tin’wana ti tsrhike ku dumbeka ka Yehovha. Ntsrumi ya ku sungula leyi pfukeliki Yehovha yi vitaniwa ‘Diyavulosi na Sathana, [lweyi a] kanganyisaka misava hinkwayu’. (Apfuletelo 12:9) Sathana a djule ku va mufumi, xileswo a hlohlotele Adamu na Evha kun’we ni tintsrumi tin’wana akuva va tsrhika ku yingiseta Yehovha. Tintsrumi leti yimiki na Sathana ti vitaniwa mademona. Yehovha a hlongole tintsrumi toleto a matilweni ti ta la misaveni. Kambe tintsrumi toleto ti ta helisiwa.—Dondzra Apfuletelo 12:9, 12.
3. Xana Sathana ni mademona va dzringisa ku hi kanganyisa hi ndlela yini?
Sathana ni mademona va kanganyisa vhanu vanyingi hi ku tizrisa wungoma, ku nga xihena xa ku biha xa ku dzringisa ku vulavula ni mimoya leyi bihiki. Hi xikombiso, vhanu van’wana va vulavula ni vangoma lava tizraka hi tinyeleti, vapfhumbi, vangoma ni tin’anga. Vambeni va djuletela madahela lama fambisanaka ni wungoma. Sathana a tlhela a yentxa vhanu va kholwa leswaku va nga swi kota ku vulavula ni vafi. Kambe Yehovha a hi byela leswi: ‘N’wi nga vi ndzrulukela lava vutisaka vafi, kumbe vangoma.’ (Levitika 19:31) Yehovha a hi byela leswo akuva a hi sizrelela ka Sathana ni mademona. Vone i valala va Xikwembu Nkulukumba nakone va djula ku hi vavisa.
KELISISA
Dondzra hi mintxhumu leyinene leyi tintsrumi ti yi yentxaka, hi makhombo ya ku tizrisa wungoma ni ndlela leyi hi nga tisizrelelaka ha yone ka Sathana ni mademona.
4. Tintsrumi ti pfuna vhanu akuva va dondzra hi Yehovha
Tintsrumi ta Yehovha a ti zrezreli vhanu hi ku kongoma. A matsrhan’wini ya leswo, ti nga kongomisa malandzra ya Xikwembu Nkulukumba akuva ma kuma vhanu lava va djulaka ku dondzra ha Yehovha. Dondzrani Apfuletelo 14:6, 7, mi gama mi bulisana hi swivutiso leswi landzrelaka:
Ha yini hi vilela mpfunu wa tintsrumi loko hi zrezra?
Xana wa nyonxa hi ku tiva leswaku tintsrumi ti nga ku kongomisa akuva u kuma vhanu lava djulaka ku dondzra Bibele? Ha yini u hlaya leswo?
5. Fambela kule ni wungoma
Sathana ni mademona yake i valala va Yehovha. Nakone vone va tlhela va va valala vezru. Dondzrani Luka 9:38-42, mi gama mi bulisana hi xivutiso lexi landzrelaka:
I yini leswi mademona ma swi yentxaka ka vhanu?
A hi swi djuli ku pfumelela mademona ma hi hlohlotela. Dondzrani Deuteronoma 18:10-12, mi gama mi bulisana hi swivutiso leswi landzrelaka:
He tini tindlela leti mademona ma dzringisaka ku vulavula na hine ni ku hi hlohlotela ha tone? He yini mintxhumu leyi fambisanaka ni wungoma leyi tolovelekiki lomu u tsrhamaka kone?
Xana u swi vona na swi twala kuva Yehovha a tsimbisa wungoma? Ha yini u hlaya leswo?
Vonani VHIDIYU, mi gama mi bulisana hi swivutiso leswi landzrelaka.
Paula a a beke sindzra ka voko dzra n’wanake. Xana u vona leswaku leswo a swi ni khombo? Ha yini u hlaya leswo?
I yini leswi Paula a a fanela ku swi yentxa akuva a tisizrelela ka mademona?
Vakriste va ntiyiso minkama hinkwayu va ma yalela mademona. Dondzrani Amintiṛo 19:19 ni 1 Ba-le-Korinte 10:21, mi gama mi bulisana hi xivutiso lexi landzrelaka:
Ha yini swi li swa lisima ku txukumeta kumbe ku hisa ntxhumu wun’wana ni wun’wana lowu u nga na wone lowu fambisanaka ni wungoma?
6. Hlula Sathana ni mademona yake
Mademona ma fumiwa hi Sathana. Kambe a tintsrumi ta ku dumbeka ti fumiwa hi ntsrumi leyikulu, Mikayele. Ledzro i vito dzrin’wana dzra Yesu. Xana Mikayele a ni ntamu wa ku gama kwini? Dondzrani Apfuletelo 12:7-9, mi gama mi bulisana hi swivutiso leswi landzrelaka:
A xikazri ka Mikayele ni tintsrumi take, na Sathana ni mademona yake, i mani lweyi a nga ni ntamu lowukulu?
Hi mavonela yaku, xana valandzreli va Yesu va fanela ku mu txhava Sathana ni mademona yake?
U nga swi kota ku hlula Sathana ni mademona yake. Dondzrani Yakob 4:7, mi gama mi bulisana hi xivutiso lexi landzrelaka:
U nga tisizrelela hi ndlela yini ka Sathana ni mademona yake?
VAN’WE VA LI: “A swi bihanga ku tha majogu, ku hlengela ka mintlangu kumbe ku hlalela mafilmi lama fambisanaka ni wungoma. Ko va swihungatiso ntsena.”
Ha yini mapimisela lawa ma ni khombo?
NKATSRAKANYU
Tintsrumi ta ku dumbeka ta hi pfuna. Sathana ni mademona yake i valala va Yehovha nakone va tizrisa wungoma akuva va kanganyisa vhanu.
Mpfuxeto
Xana tintsrumi ti va pfuna hi ndlela yini vhanu akuva va dondzra hi Yehovha?
Xana Sathana ni mademona yake i vamani?
I yini leswi ku yentxaka u djula ku fambela kule ni wungoma?
HANDZRISISA
Vona wumboni lebyi kombisaka leswaku Yesu i Mikayele ntsrumi leyikulu.
“I Mani Mikayele Ntsrumi Leyikulu?” (Leswi kumekaka ka jw.org)
Vona wumboni lebyi kombisaka leswaku Diyavulosi i mhunu wa ntshima hakakunene, ku nga li wubihi lebyi nga mbilwini ya mhunu.
“Xana Diyavulosi A Kone Hakakunene?” (Leswi kumekaka ka jw.org)
Vona leswi wansati wa kukazri a swi yentxiki akuva a tsrhika ku fumiwa hi mademona.
“A Gungule Leswaku Wutomi Byi Ni Nkongometo” (Xihondzro Xa Ku Zrindzra, 1 ka Julhu wa 1993)
Vona ndlela leyi Sathana a kanganyisaka vhanu ha yone hi ku tizrisa wungoma.