Xana A Bandla Dzri Hleleke Hi Ndlela Yini?

Yehovha i Xikwembu Nkulukumba lwa hlelekiki. (1 Ba-le-Korinte 14:33) Hi mhaka leyo, swa twala kuva hi lavisela leswaku na wone malandzra yake ma va lama hlelekiki. Xana a bandla dzra wukriste dzri hleleke hi ndlela yini? Xana hi nga yentxa yini akuva dzri tama dzri va ledzri hlelekiki?

1. I mani lweyi a zrangelaka bandla?

“Kriste i nhloko ya bandla.” (Ba-le-Efesa 5:23, NM) Yesu a lavisela mintizro ya malandzra ya Yehovha a misaveni hinkwayu na a li matilweni. Yesu a hlawule “nandzra wa ku dumbeka ni ku tlhazriha”—ku nga ntlawanyana wa vavanuna lava wupfiki, nakone wu vitaniwa Huvo leyi Zrangelaka. (Dondzra Matewu 24:45-47.) Huvo leyi Zrangelaka yi kongomisa mabandla a misaveni hinkwayu, ku fana ni leswi a vapostola ni vakulu a va yentxisa xiswone a Yerusalema, a nkameni lowu khalutiki. (Amintiṛo 15:2) Vavanuna lava a hi vafumi va nhlengeletanu yezru. Va dondzra Bibele akuva va twisisa leswi Yehovha a swi djulaka nakone va landzra nkongomiso wa Yesu.

2. I vamani vakulu va bandla nakone he wini ntizro wavu?

Vakulu i vavanuna lava nga va vakriste lava wupfiki, lava tizrisaka Bibele akuva va dondzrisa vhanu va Xikwembu Nkulukumba. Nakone vone va tilulamisele ku pfuna ni ku tiyisa lava tizrelaka Yehovha. A va holi mali. A matsrhan’wini ya leswo, va tizrela ‘hi ku pfuna ntsena; ku nge ha ku tizrela bindzru, ka ku va hi ku swi zrandzra’. (1 Petros 5:1, 2) Vakulu va bandla va pfuniwa hi malandzra ya wutizreli, lawa hi ku famba ka nkama, ma nga ha fanelekaka ku tizra swanga vakulu.

A Huvo leyi Zrangelaka yi hlawula vakulu va kukazri va mabandla akuva va tizra swanga valaviseli va miganga. Vavanuna volavo va yendzrela mabandla ya ku hambanahambana akuva va ma kongomisa ni ku ma tiyisa. Valaviseli va miganga va tiseketela hi Matsralwa akuva va vona swaku makwezru wa kukazri a nga hlawuliwa swanga nandzra wa wutizreli kumbe nkulu wa bandla.—1 Timoteo 3:1-10, 12; Tito 1:5-9.

3. He wini ntizro wa Mboni yin’wana ni yin’wana ya Yehovha?

Hinkwavu a bandleni va ‘dzrumisa vito dzra Yehovha’ hi ku hlengela a mintlhanganwini ya bandla ni ku zrezra hi ku ya hi swiyimu swavu.—Dondzra Amapsalma 148:12, 13.

KELISISA

4. Yesu i muzrangeli lwenene

Yesu a hi nyiki xizrambu xa lizrandzru. Dondzrani Matewu 11:28-30, mi gama mi bulisana hi xivutiso lexi landzrelaka:

• Xana Yesu i muzrangeli wa matsrhamela muni, nakone a djula swaku hi titwisa kuyini?

VHIDIYU: Vakulu Va Pfuna Vamakwezru A Nepal A Ntsrhaku Ka Ku Tsrekatsreka Ka Misava (4:56)

Bibele dzri yi beka livaleni ndlela leyi vakulu va fanelaka ku yentxa ntizro wavu ha yone.

Dondzrani Ezaya 32:2 ni 1 Petros 5:1-3, mi gama mi bulisana hi swivutiso leswi landzrelaka:

• Xana u titwisa kuyini loko u tiva leswaku vakulu va bandla va tikazratela ku kombisa wunene ku fana na Yesu?

• Hi tini tindlela tin’wana leti vakulu va bandla va nga yetiselaka Yesu ha tone?

5. Vakulu va bandla va dondzrisa hi ku nyikela xikombiso

VHIDIYU: Vakulu Va Zrangela! (7:39)

Yesu a nyikela milawu ka lava zrangelaka a bandleni. Dondzrani Matewu 23:8-12, mi gama mi bulisana xivutiso landzrelaka:

• I yini lexi ku hlamalisaka loko u vona a ku hambana a xikazri ka milawu leyi Bibele dzri nyikaka vakulu ni leswi yentxiwaka hi vazrangeli va wukhongoti?

1. Vakulu va tiyisa wuxaka byavu na Yehovha va tlhela va pfuna mindangu yavu akuva na yone yi yentxa swoswo

2. Vakulu va hlayisa hinkwavu a bandleni

3. Vakulu va zrezra nkama ni nkama

4. Vakulu i vadondzrisi nakone va tlhela va pfunisa ka wubasisi ni ka mintizro yin’wana

6. Hi nga tizrisana ni vakulu va bandla

A Bibele dzri hi nyika xivangelo xa lisima xa kuva hi tizrisana ni vakulu va bandla. Dondzrani Ba-Heberu 13:17, mi gama mi bula hi swivutiso leswi landzrelaka:

• Ha yini Bibele dzri hlaya leswaku hi fanela ku yingiseta vakulu va bandla na swi sukela mbilwini? Wene ke, u swi vonisa ku yini?

Dondzrani Luka 16:10, mi gama mi bula hi xivutiso lexi landzrelaka:

• Ha yini hi fanela ku yingiseta vakulu va bandla minkama hinkwayu, nambi loko hi vona ingiki mhaka ya kone a hi yikulu?

NKATSRAKANYU

Yesu i nhloko ya bandla. Hi tizrisana ni vakulu na hi nyonxile hikusa va ni wunene nakone va hi dondzrisa hi xikombiso xavu.

Mpfuxeto

• I mani nhloko ya bandla?

• I yini leswi vakulu va swi yentxaka akuva va pfuna bandla?

• He wini ntizro wa mugandzreli mun’wana ni mun’wana a bandleni?

HANDZRISISA

Vona ku zron’weka lokukulu loku Huvo leyi Zrangelaka ni vakulu van’wana va nga na kone hi vakriste namunhla.

Ku Va Ni Wumun’we Nambiloko Ntizro Wu Yilisiwa (4:22)

Vona ntizro lowu valaviseli va miganga va wu yentxaka.

Wutomi Bya Mun’we Wa Mulaviseli Wa Muganga A Ntlhaveni (4:51)

Dondzra mayelana ni ntizro wa lisima lowu yentxiwaka hi vavasati a bandleni.

“Xana Timboni Ta Yehovha Ta Va Tizrisa Vavasati Leswaku Va Dondzrisa?” (Xihondzro Xa Ku Zrindzra, 1 ka Setembru wa 2012)

Vona ndlela leyi vakulu va tikazrataka ngopfu ha yone akuva va tiyisa vamakwavu.

“Vakulu Lava Nga Vakriste Va ‘Tizrisana Na Hine Ku Nha Hi Kuma Ku Tsrhava’ ” (Xihondzro Xa Ku Zrindzra, 15 ka Janeru wa 2013)