XIDONDZRO 57
U Fanela Ku Yentxa Yini Loko U Hambe Xidoho Lexikulu?
Nambiloko u zrandzra Yehovha hi ku helela nakone u tikazratela ku yentxa ku zrandzra kwake, minkama yimbeni u ta mu dohela. Nambi swi li tanu, ku ni swihoxo leswikulu. (1 Ba-le-Korinte 6:9, 10) Loko u yentxa xidoho lexikulu, dzrimuka leswaku Yehovha a ha ku zrandzra. A djula ku ku dzrivalela a tlhela a ku pfuna.
1. I yini lexi hi fanelaka ku xi yentxa akuva Yehovha a hi dzrivalela?
Mhunu lweyi a zrandzraka Yehovha a vaviseka ngopfu loko a xiya leswaku a hambe xidoho lexikulu. Kambe swa tiyisana leswi Yehovha a swi dumbisiki vhanu vake. A li: ‘Nambi swidoho swenu swi zukile ku fana ni xivunguvungu, swi ta yentxa ntlhohe swanga hi xitsrhwatsrhwa.’ (Ezaya 1:18) Loko hi tisola na swi sukela mbilwini, Yehovha a ta hi dzrivalela. Hi nga swi kombisa hi ndlela yini leswaku ha tisola? Loko hakunene hi tisola, hi ta tsrhika ku yentxa leswi bihiki hi va hi kombela lidzrivalelo ka Yehovha. Ntsrhaku ka leswo, hi ta yentxa hinkwaswu leswi hi nga swi kotaka akuva hi txintxa mapimisela yezru kumbe hi tsrhika mintxhumu ya ku biha leyi yi hi dohisiki. Handle ka leswo, hi ta lwela ku yentxa leswi Yehovha a liki i swinene.—Dondzra Ezaya 55:6, 7.
2. Xana Yehovha a va tizrisisa kuyini vakulu akuva va hi pfuna loko hi hambe xidoho?
Loko hi hambe xidoho lexikulu, Yehovha a hi byela leswaku hi ‘vitana vakulu va [bandla]’. (Dondzra Yakob 5:14, 15.) Vakulu va zrandzra Yehovha ni tihamba take. Va tizrisa wutivi bya Bibele lebyi va nga nabyu akuva va hi pfuna ku tlhela hi va ni wunghanu lebyi tiyiki na Yehovha.—Ba-le-Galatia 6:1.
Xana vakulu va hi pfuna hi ndlela yini loko hi hambe xidoho lexikulu? Vakulu vabidzri kumbe vazrazru va ta tizrisa Bibele akuva va hi komba leswaku leswi hi swi yentxiki swi hoxile. Va ta tlhela va hi nyika swidzringanyeto ni swilayu leswi taka hi pfuna kuva hi nga ha tlheli hi doha. Akuva ku sizreleleka bandla ka minkutxetelo ya ku biha, a vakulu va susa bandleni hinkwavu lava yentxaka swidoho leswikulu va va va nga tisoli.
KELISISA
Vona leswaku Yehovha a nga hi pfunisa kuyini loko hi yentxe xidoho lexikulu.
3. Ku tihlaya swidoho swezru swi hi pfuna ku lulamisa wuxaka byezru na Yehovha
Loko hi doha, hi khunguvanyisa Yehovha. Xileswo hi fanela ku tihlaya swidoho swezru kwake. Dondzrani Amapsalma 32:1-5, mi gama mi bulisana hi xivutiso lexi landzrelaka:
A matsrhan’wini ya ku fihla leswi hi swi yentxiki, ha yini swi ni lisima ku byela Yehovha swihoxo swezru?
Ntsrhaku ka ku tihlaya xidoho xezru ka Yehovha, hi ta titwa na hi susi ntsrhwalu loko hi kombela mpfunu ka vakulu. Vonani VHIDIYU, mi gama mi bulisana hi xivutiso lexi landzrelaka.
Ka vhidiyu, xana vakulu va mu pfunise kuyini Canon akuva a tlhelela ka Yehovha?
Hi fanela ku vulavula ntiyiso ka vakulu; vone va kone akuva va hi pfuna. Dondzrani Yakob 5:16, mi gama mi bulisana hi xivutiso lexi landzrelaka:
Ha yini a ku vulavula ntiyiso ka vakulu swi yentxa swi va nabyalela akuva va hi pfuna?
Hlaya swidoho swaku, u nga va tlhoteli ntxhumu vakulu, pfumela mpfunu wa Yehovha
4. Yehovha a va komba wumbilu a vadohi
Loko mhunu a yentxa xidoho lexikulu a tlhela a yala ku yentxa leswi Yehovha a liki i swinene, a nge he vi xizro xa bandla. Mhunu yelweyo awa susiwa, nakone a ha ha khaneli na yene nambi ku titlhanganisa na yene. Dondzrani 1 Ba-le-Korinte 5:6, 11 na 2 Yohan 9-11, mi gama mi bulisana hi xivutiso lexi landzrelaka:
A fermentu dzri kukumukisa mbila hinkwayu. Ha yini ku titlhanganisa ni mudohi lweyi a kalaka a nga tisoli swi nga vaka nkutxetelo wa ku biha a bandleni?
Vanyingi ka lava a va susiwile va tlhele va buyiseliwa a bandleni. Leswo swi kotekile hikusa va yamukele xilayu. Nambileswi xilayu xi vavisaka, xi va pfunile akuva va tisola. (Amapsalma 141:5)
Xana ndlela leyi Yehovha a va khomkaka ha yone vadohi, yi kombisa leswaku awa dzringanisela, a ni timpswalu ni lizrandzru?.
5. Loko hi tisola, Yehovha awa hi dzrivalela
Yesu a tizrise xifaniso lexi hi pfunaka ku twisisa ndlela leyi Yehovha a titwaka ha yone loko mhunu wa kukazri a tisola. Dondzrani Luka 15:1-7, mi gama mi bulisana hi xivutiso lexi landzrelaka:
Leswo swi hi dondzrisa yini ha Yehovha?
Dondzrani Ezekiel 33:11, mi gama mi bulisana hi xivutiso lexi landzrelaka:
Hi wini ntxhumu wa lisima lowu hi fanelaka ku wu yentxa akuva hi kombisa leswaku hakunene ha tisola?
Yehovha awa ti khatalela ngopfu swinene tihamba take hi lani a mubyisi a ti khatalelaka ha kone a tihamba take
VAN’WE VA LI: “Loko no hlaya xidoho xanga ka vakulu, va ta ni susa bandleni.”
U nga mu byela yini mhunu lweyi a pimisaka hi ndlela leyo?
NKATSRAKANYU
Loko hi hamba xidoho lexikulu, Yehovha a nga hi dzrivalela. Akuva leswo swi koteka, hi fanela ku tisola swi sukela mbilwini ni ku tlhela hi tiyimisela ku tsrhika ku yentxa mintxhumu ya ku biha.
Mpfuxeto
Ha yini swi li swinene ku byela Yehovha swidoho swezru?
I yini leswi hi fanelaka ku swi yentxa akuva hi dzrivaleliwa swidoho swezru?
Loko hi hambe xidoho lexikulu, ha yini hi fanela ku djula mpfunu wa vakulu?
HANDZRISISA
Vona ndlela leyi wanuna wa kukazri a titwiki ha yone timpswalu ta Yehovha leti tsraliwiki ka Ezaya 1:18.
U Nga Txhuki U Ganaganeka Mayelanu Ni Timpswalu Ta Yehovha (5:02)
Xana a vakulu va zama ku pfuna lava yentxiki xidoho lexikulu hi ndlela yini?
Vona ndlela leyi u nga mu tlhamuxelaka ha yone mhunu lweyi a ngeke Mboni ya Yehovha mayelanu ni mhaka ya ku susiwa bandleni.
Vona mfambu lowu liki: “A Ni Djula Ku Tlhelela Ka Yehovha”, akuva u vona leswaku ha yini wanuna lweyi a a tsrhike ntiyiso a twisise leswaku Yehovha hi yene a nga mu koka akuva a tlhelela.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Abrili wa 2012)