Ntsrhaku ka loko Adamu na Evha va humile a xizrambeni xa Edeni va pswale vana vanyingi. A n’wana wa ku sungula ku ve Khayini, kasi wa wubidzri ku ve Abele. Khayini a a li mudzrimi kasi Abele a a li mubyisi wa tihamba.

Siku dzrin’wana, Khayini na Abele va teke xiboho xa ku nyika Yehovha swihiwa. Wa swi tiva leswaku vhanu a va swi vitanisa kuyini swihiwa leswo? A va ku i swihanano kumbe magandzrelo. Yehovha a nyonxe ngopfu swinene hi magandzrelo ya Abele kambe a nga ma nyonxelanga magandzrelo ya Khayini. Leswo swi yentxe leswaku Khayini a hlundzruka ngopfu swinene. Yehovha a swi xiyile leswo, a va a mu byela leswaku loko o tama a hlundzruka ngopfu a ta gama hi ku yentxa ntxhumu wa ku biha. Kambe Khayini a nga swi yingisetanga leswi Yehovha a mu byeliki swone.

A matsrhan’wini ya leswo, a byele Abele a ku: ‘A hi yi nhoveni.’ Nkama lowu na va li wuswavu a nhoveni, Khayini a dlaye Abele. Yehovha a mu hlundzrukele ngopfu swinene Khayini. Hi kola ka leswo, Yehovha a mu hlongolile a va a mu yisa kule ni ndangu wake. Khayini a a nge he ti tlhelela kaya.

Hi dondzra yini ka xikombiso xa ku biha xa Khayini? Minkama yimbeni a mintxhumu a yi yentxeki hi lani hi navelaka ha kone, leswo swi nga hi yentxa hi hlundzruka ngopfu swinene. Loko hi swi xiya leswaku hi hlundzrukile, kumbe loko mhunu wa kukazri a hi byela leswaku hi hlundzrukile, hi fanela ku tivonela. Swi djula hi tikhoma, hikusa loko hi nga yentxi leswo, matitwela ya ku biha ma nga ha kula hi va hi wugamu hi yentxa ntxhumu lowu bihiki ngopfu swinene.

Xana Yehovha a mu dzrivalile Abele? Im-him, a nga mu dzrivalanga. Abele a a li wanuna wa ku lulama nakone a a mu zrandzra ngopfu Yehovha. Xileswo Yehovha a nge ti txhuka a mu dzrivala. Loko misava yi ta va paradeyisi, Yehovha a ta pfuxa Abele akuva a tlhela a hanya.

Ntsrhaku ka loko ku khalute malembe manyingi, misava yi tale hi vhanu, kambe vhanu vanyingi a va yentxa mintxhumu ya ku biha. Nambi tintsrumi ta kukazri ti ndzruluke ta ku biha ti va ti xika hi le matilweni ti ta a misaveni ti va ti ti yentxa vhanu. Xana wa swi tiva leswaku ha yini tintsrumi ti yentxe leswo? Hikusa a ti djula ku txhata ni vavasati.

Tintsrumi leto ta ku biha ti txhate ni vavasati, ti tlhela ti pswala vana na vone. Loko vana lavo va ye va kula, va ve ni ntamu ngopfu swinene nakone a va xanisa vhanu. Kambe Yehovha a a djula ku swi helisa hinkwaswu leswo, kutani a teke xiboho xa ku helisa vhanu va ku biha hi ku tizrisa ndhambhi. Xana wa swi tiva leswaku ku ve yini ndhambhi yoleyo? Ku ve mpfula ya yikulu ngopfu swinene leyi tatiki misava hinkwayu hi mati.

Kambe lani misaveni a ku hanya wanuna lwenene lweyi a a zrandzra Yehovha. A vito dzrake a a li Nowa. Nowa a a txhatile nakone a a ni vana vazrazru, a mavito yavu a ku li Xeme, Hamu na Yafeta. A vana va Nowa na vone a va txhatile. Yehovha a a swi djula ku huluxa Nowa ni ndangu wake ka ndhambhi. Xileswo a zrume Nowa akuva a yaka ngalawa. A ngalawa a ku li kaxa dzra dzrikulu ngopfu swinene ledzri a dzri hambiwe hi mapulangu. A kaxa ledzro a dzri ta famba henhla ka mati. Yehovha a byele Nowa leswaku a nghenisa swihazri swinyingi ndzreni ka ngalawa akuva na swone swi nga fi hi ndhambhi.

Nowa ni ndangu wake a va hlwelanga, va tekele ku yaka ngalawa. Vone va yake ngalawa hi ndlela leyi Yehovha a va byeliki ha yone. Va hete kolomu ka 50 wa malembe na va yaka ngalawa leyo. Nowa a o ngo yaka ngalawa ntsena, a a tlhela a byela vhanu leswaku a ku ta va ni ndhambhi, kambe a ku na lweyi a kholwiki.

Kutani ku tlhase nkama wa kuva va nghena a ngalaweni. Ka dondzro leyi landzrelaka hi ta vona leswaku ku game ku yentxeka yini.