Loko u ti tiva ha hombe, u ta kota ku yima u tiyile
KA VAMPSHWA
9 KU TITIVA HA HOMBE
LESWI TLHAMUXELAKA SWONE
Ku titiva swi tlhamuxela swinyingi ku tlula ku tiva vito dzraku ni matsrhamela yaku ya le handle. Swi patsra milawu leyi u tibekeliki yone, leswi u swi pfumelaka ni wumhunu byaku. Wumhunu byaku byi tlhamuxela hinkwaswu leswi u nga swone.
HA YINI SWI LI SWA LISIMA
Loko u titiva ha hombe, u yimela leswi u swi pfumelaka matsrhan’wini ya ku pfumelela tintanga taku ti ku lawula.
“Vhanu vanyingi va fana ni swibonekana leswi swi navetisaka swiyambalu a switolo. A swi tihlawuleli swiyambalu kambe swo hlawuleliwa.”—Adrian.
“Ni dondzre ku yimela leswinene nambiloko swi bindzra. Vanghanu vanga va ntiyiso ni va vona hi ndlela leyi va yentxaka mintxhumu ha yone ni ndlela leyi ni yentxaka mintxhumu ha yone loko ni li na vone.”—Courtney.
NSINYA WA NAWU WA BIBELE: ‘N’wi nga tifaniseni ni misava ya swoswi; ya ni ku ndzrulutiwa hi vumpswha bya ku yanakanya kwenu, akuva n’wi ta kota ku pimisa, a ku zrandzra ka Xikwembu Nkulukumba leswaku hi lokunene, loku tsrhavisaka, loku hetisekiki.’—Ba-le-Roma 12:2
LESWI U NGA SWI YENTXAKA
Tiva leswi u nga swone swoswi ni leswi u djulaka ku va swone hi ku kambisisa leswi u kotaka ku swi yentxa ha hombe, leswi u tsrandzrekaka ka swone ni leswi u pfumelaka ka swone. Ndlela leyinene ya ku sungula i ku hlamula swivutiso leswi landzrelaka.
Leswi u swi kotaka: Hi byini wuswikoti lebyi ni nga nabyu? I yini leswi ni swi kotaka ha hombe? (Hi xikombiso: Xana na wu khoma nkama? Xana na swi kota ku tikhoma? Xana ni tizra hi nkhinkhi? Xana na hanana?) Hi yini mintxhumu leyinene leyi ni yi yentxaka?
MAVONELA: Xana swa ku bindzrela ku xiya mintxhumu leyinene leyi u yi yentxiki? Vutisa mupswali kumbe munghanu lweyi u mu dumbaka a ku byela mintxhumu leyi u kotaka ku yi yentxa ha hombe a tlhela a ku tlhamuxela ni xivangelo xa kone.
NSINYA WA NAWU WA BIBELE: ‘Kambe a mun’wana ni mun’wana a a tikambele a ntizro wakwe, hi kone a taka kota ku titwalisa a ku tiyanakanyeni kwakwe, ku nge ha ku tifanisa na mun’wana.’—Ba-le-Galatia 6:4.
Leswi u tsrandzrekaka ka swone: Hi kwini lani ni fanelaka ku yampswisa kone ngopfungopfu ka wumhunu byanga? I yini leswi talisaka ku ni dzringa a ku yentxa leswa ku biha? Hi le ka swiyimu swini lani ni fanelaka ku tikhoma ka swone?
NSINYA WA NAWU WA BIBELE: ‘Loko hi ku a hi na xihono, ha ku ti kanganyisa, a xihlayelafumzri a xi kone ku hine’.—1 Yohan 1:8
Leswi u pfumelaka ka swone: Hi yini milawu ya mahanyela leyi yi ni kongomisaka naswone ha yini? Xana na pfumela ka Xikwembu Nkulukumba? I yini lexi yentxiki ni dumba leswaku Xikwembu Nkulukumba a kone? Hi swini swiyentxo leswi ni vonaka swi bihile naswone i yini lexi yentxaka swi va tanu? I yini leswi ni dumbaka leswaku swi ta yentxeka a nkameni lowu taka?
NSINYA WA NAWU WA BIBELE: ‘A ku tlhavukanya ku ta ku lavisela, a ku yingelisisa ku ta ku bekisa.’—Amaproverbia 2:11.