Vona Leswinene Ka Vambeni

Xikazratu

Vhanu van’wana va zrandzra ku tidjulela swa vone vinyi nakone leswo swi nga va yentxa va va ni xihlawuhlawu. Mhunu wa matsrhamela lawo a tivona na a yampswa ku tlula van’wana nakone a va vona na va nga li va ntxhumu. Mun’wana ni mun’wana wezru a nga wa ka ntlhamu lowo. A Encyclopædia Britannica dzri li: “Ku tala ka mintlawa ya vhanu hi ndlela ya kukazri yi pimisa leswaku ndlela leyi va hanyaka ha yone, swakuda swavu, mpahla yavu, leswi va swi toloveliki, leswi va swi pfumelaka ni mintxhumu yin’wana yavu yi tlula ya vhanu vambeni.” Hi nga ma tingawulisa kuyini mapimisela lawo?

Leswi Bibele Dzri Swi Hlayaka

‘Hi ku titsrongahata, a mun’wana ni mun’wana a a hlaye leswaku va mu tlula van’wana.’—BA-LE-FILIPI 2:3.

Xana hi dondzra yini? Akuva hi tingawula ku tikukumuxa hi fanela ku titsrongahata. Ku titsrongahata ku hi pfuna ku tiva leswaku minkama hinkwayu ku ta va ni swin’wana leswi vhanu va hi tlulaka ka swone. A ku na ntlawa lowu yentxaka hinkwaswu hi ndlela leyinene.

Vona xikombiso xa Stefan, lweyi a kuliki tikweni dzra Vakomunixta. A hlule xihlawuhlawu lexi a a li na xone hi vhanu lava a va nga lumbi tiko dzra vakomunixta. Stefan a li: “Ni yanakanya leswaku ku vona vhanu vambeni swanga lava ni tlulaka i ndlela ya lisima ya ku hlula xihlawuhlawu. Na pfumela leswaku a ni tivi hinkwaswu. Ni zama ku dondzra swa nyiwana ka vhanu vambeni.”

Xana U Fanela Ku Yentxa Yini?

Zama ku tivona hi ndlela leyi nga yone nakone u fanela ku pfumela leswaku na wene wa phazama. U fanela ku pfumela leswaku van’wana va nga yentxa mintxhumu hi ndlela ya ku yampswa ku ku tlula. U nga tsrhameli ku pimisa leswaku vhanu va ntlawa wa kukazri va ni mimphazamu leyi fanaka.

A matsrhan’wini ya ku pimisa mintxhumu ya ku biha mayelanu ni mhunu wa ntlawa wa kukazri tivutise leswi:

Pfumela leswaku van’wana va nga ku tlula ku yentxeni ka mintxhumu ya kukazri

‘Xana mintxhumu leyi ni hlayaka leswaku a ni yi zrandzri ka mhunu mun’wanyana yi bihile hakunene kumbe o va mhunu lweyi a hambaniki na mine?’
‘Xana mhunu yelweyo a pimisa mintxhumu leyi bihiki ha mine?’
‘Xana hi yini mintxhumu leyi mhunu lweyo a tivaka ku yi yentxa ku ni tlula?’

Loko u hlamula swivutiso leswo hi ku dumbeka, u ta kota ku hlula xihlawuhlawu nakone u ta sungula ku nyonxisiwa hi matsrhamela lamanene ya mhunu lweyo.

Leswi Yentxekeliki Van’wana: Nelson (Estados Unidos)

“Ni pswaliwe ka mbangu lowu ku tala kwezru a hi fana hi nhlonge ni mahanyela. Kambe loko ni ni 19 wa malembe ni zruzre ni ya tsrhama ka doropa dzrikulu akuva ni ta ya tizra ka komponi ya kukazri, leswo swi ni yentxe ni va a xikazri ka vhanu lava a hi nga fani hi nhlonge ni mahanyela.

“Hi ku famba ka nkama ni ye ni va tiva ku yampswa vhanu lava ni tizraka na vone ni ku ya ni hamba xinghanu na vone, ntsrhaku ka leswo ni vone leswaku nhlonge ya mhunu, lidzrimi ledzri a khanelaka dzrone kumbe mbangu lowu a pswaliwiki ka wone a swi hlayi swone leswaku mhunu lweyo awa tizra ngopfu, kumbe awa dumbeka, nakone a swi hlayi ntxhumu mayelanu ni matitwela yakwe.

“Hi ku famba ka nkama ni txhate ni wansati lweyi a nga wa tiko ni mahanyela lama hambaniki ni yanga, nakone ni sungule ku zrandzra swakuda swimbeni ni ku twa wunanga byimbeni. Wutomi byi ni dondzrise leswaku hinkwezru hi ni matsrhamela lamanene ni lama nga liki manene. Ku hlaya ntiyiso ni sungule ku va mhunu wa ku yampswa loko ni sungule ku hlamalisiwa, ku vona ni ku yetisela matsrhamela lamanene lawa vhanu vambeni va nga na wone.”