Xana i tingani Timboni ta Yehovha leti u ti tivaka? Van’we ka hine hi nga ha va vayakelani vaku, vatizri-kuloni, kumbe vadondzri-kuloni. Kumbexana hi sama hi bulisana na wene hi Bibele. Xana hi hine vamani hi ntshima-ntshima, nakone ha yini hi khanela ni van’wana a livaleni hi leswi hi swi pfumelaka?

Hi vhanu lava tolovelekiki. Hi va matiko ya ku hambana-hambana ni swiyimu swa ku siyana-siyana. Van’we ka hine khale a hi li ka wukhongoti byin’wana, na kasi van’wana a va nga pfumeli leswaku ku ni Xikwembu. Kambe na hi nga si va Timboni, hinkwezru hi tinyike nkama wa ku lavisisa tindondzro ta Bibele hi wunyaminyami. (Amintiṛo 17:11) Hi pfumelelane ni leswi hi swi dondzriki, kutani mun’wana ni mun’wana a yentxe xiboho xa ku gandzrela Yehovha Xikwembu Nkulukumba.

Ha pfuneka hi ku dondzra Bibele. Ku fana ni vambeni, na hine hi naswu swikazratu ni swihoxo leswi hi bohekaka ku lwa na swone. Kambe hi ku dzringisa ku hanya hi ku tizrisa minsinya ya milawu ya Bibele siku ni siku, hi kume leswaku wutomi byezru byi yampswe ngopfu swinene. (Amapsalma 128:1, 2) Lexo i xin’we xa swivangelo leswi yentxaka hi byela vambeni mintxhumu ya lisima leyi hi yi dondzriki a Bibeleni.

Hi hanya hi minsinya ya milawu ya Xikwembu Nkulukumba. Minsinya yoleyo ya milawu, leyi nga Bibeleni, yi dondzrisa ku hanya ha hombe ni ku hlonipha van’wana, kun’we ni ku va mhunu wa ku dumbeka ni wa munene. Yi pfunisa ku dondzrisa vayaki-tiko ku sivela mavabyi ni ku zrandzra ku tizra, nakone yi kutxa wumun’we bya ndangu ni mahanyela manene. Leswi hi tiyisekaka leswaku ‘Xikwembu Nkulukumba a nga langusi wuso’, nhlengeletanu yezru i ntlhanganu wa vamakwavu va moya va matiko hinkwawu, lava kalaka va nga hambanisiwi hi nhlonge kumbe timhaka ta mafumela. Nambi leswi hi nga vhanu lava tolovelikiki, hi vhanu lava hlawulekiki.—Amintiṛo 4:13; 10:34, 35.

• I yini lexi yentxaka Timboni ta Yehovha ti fana ni vhanu van’wana?

• Xana hi yini minsinya ya milawu leyi Timboni ta Yehovha ti yi dondzriki a Bibeleni?

Vhanu va ku tala va pimisa leswaku vito ledzri liki Timboni ta Yehovha i dzra wukhongoti bya nyiwana. Nambitanu, ka malembe ya 2.700 lama hundzriki, malandzra ya Xikwembu Nkulukumba a ma vitaniwa swanga “timboni” takwe. (Ezaya 43:10-12) Ku ya tlhasa 1931, a hi tiviwa swanga Swidondzri swa Bibele. Ha yini hi yamukele vito ledzri liki Timboni ta Yehovha?

Dzri komba leswaku i mani Xikwembu xezru. Hi ku ya hi mabuku ya khale lama tsraliwiki hi voko, vito dzra Xikwembu Nkulukumba, Yehovha, a dzri humelela makhambi ya makume ya madzana a Bibeleni. Ka wundzruluteli bya ku tala, vito ledzri dzri siviwile hi mavitanela lama liki Hosi kumbe Xikwembu. Kambe Xikwembu xa xihlayelamfuzri a xi titivise ka Moxe hi vito dzra xone hi ntshima, ku nga Yehovha, xi ku: “Ledzri i vito dzranga hi la ku nga helikiki”. (Eksoda 3:15, NM) Hi ndlela leyi, xi tihambanise ni swikwembu hinkwaswu swa madzrimi. Ha nyonxa hi ku zrwala vito dzra ku xwenga dzra Xikwembu Nkulukumba.

Dzri komba leswaku hi wini ntizro wezru. Vhanu va ku tala va minkama ya khale, ku sukela ka Abele, mhunu wa ku lulama, va beke wumboni mayelanu ni lipfumelo dzravu ka Yehovha. Hi ku famba ka tinguva, Nowa, Abrahamu, Sara, Moxe, Davhida ni van’wana va ve xiyenge xa ntlawa lowu wa ku nhati wa timboni’. (Ba-Heberu 11:4–12:1) Swanga hi leswi mhunu wa kukazri a nga fakazelaka mhunu lwa ngeke na nandzru a hubyeni ya wuyavanyisi, na hine hi tiyimisele ku yentxa leswaku xihlayelamfuzri mayelanu ni Xikwembu xezru xi tiviwa.

Hi yetisela Yesu. Bibele dzri hlaya leswaku Yesu i ‘mboni leya ku dumbeka, leya ku hlayela mfuzri’. (Apfuletelo 3:14) Yesu ha byakwe a hlaye leswaku a ‘tivise vito dzra Xikwembu Nkulukumba’ nakone a ye mahlweni a ‘tiyisa xihlayelamfuzri’ mayelanu na Xikwembu Nkulukumba. (Yohan 17:26; 18:37) Hi nkonta ya leswo, valandzreli va Kriste va xihlayelamfuzri, va fanela ku zrwala vito dzra Yehovha ni ku dzri yentxa dzri tiviwa. Hi leswi Timboni ta Yehovha ti tikazratelaka ku swi yentxa.

• Ha yini Swidondzri swa Bibele swi yamukele vito ledzri liki Timboni ta Yehovha?

• Xana Yehovha a ni nkama wungani na a ni timboni la misaveni?

• I mani Mboni leyikulu ya Yehovha?

Bibele dzri profete leswaku a ntsrhaku ka lifu dzra Yesu, a ku ta tumbuluka vadondzrisi va madzrimi a makazri ka Vakriste va ku sungula nakone a va ta sombolota xihlayelamfuzri xa Bibele. (Amintiṛo 20:29, 30) Hi swoswo swi yentxekiki hi ku famba ka nkama. Va pfuve tindondzro ta Yesu ni mavonela ya wukhongoti ya wuhedeni, kutani ku tumbuluka muxaka wa Wukriste wa madzrimi. (2 Timoteo 4:3, 4) I yini lexi nga hi yentxaka hi dumba leswaku namunhla hi swi twisisa ha hombe leswi Bibele dzri swi dondzrisaka hi ntshima-ntshima?

Ku tlhase nkama wa kuva Yehovha a paluxa xihlayelamfuzri. A profete leswaku hi ‘nkama wa wugamu, wutivi bya xihlayelamfuzri a byi ta yengeteleka’. (Daniel 12:4) Hi 1870, ntlawa wutsrongo wa vhanu lava a va djuletela xihlayelamfuzri wu twisise leswaku tindondzro tinyingi ta makezreke a ti nga li ta Matsralwa. Xileswo, wu sungule ku dondzrisisa akuva wu twisisa tindondzro ta ku sungula ta Bibele, kutani Yehovha a wu tovokise hi ku wu nyika ku twisisa ka Matsralwa.

Vhanu va timbilu ta ku basa va kambisise Bibele hi wunyaminyami. Swidondzri leswo swa Bibele leswi hi zrangeliki, leswi a swi dondzra hi mbilu hinkwayu, swi tizrise madondzrela ya ku fana ni lawa hi ma tizrisaka ni namunhla. A swi bulisana hi Bibele hi nhloko-mhaka ha yin’we-yin’we. Loko swi kuma tsralwa dzra Bibele ledzri a dzri kazrata ku dzri twisisa, a swi djuletela tindzrimana tin’wana akuva swi kuma ntlhamuxelo. Loko swi tlhasela magamu ya mhaka lama twananaka ni Matsralwa man’wanyana, a swi yentxa hi ku ma tsrala. Hi ku tsrhika Bibele dzri titlhamuxela, swi tlhele swi kuma xihlayelamfuzri mayelanu ni vito dzra Xikwembu Nkulukumba ni Mfumu wakwe, nkongometo wakwe hi vhanu ni misava, xiyimu xa vafi ni dumbo dzra ku pfuka ka vafi. Ku kambisisa koloko ku swi ntsrhunxe ka tindondzro tinyingi ni mikhuva ya madzrimi.—Yohan 8:31, 32.

Hi 1879, Swidondzri swa Bibele a swi swi xiyile leswaku a wu tlhasile nkama wa ku tivisa xihlayelamfuzri hinkwaku. Xileswo, hi lembe dzroledzro, swi sungule ku humexa revhixta ledzri dzra ha humexiwaka ni namunhla, Xihondzro Xa Ku Zrindzra Xi Zrezraka Mfumu Wa Yehovha. Swoswi hi bula ni vhanu hi mintiyiso ya Bibele a matikweni ya 240 hi tindzrimi leti tlulaka 900. Wutivi bya xihlayelamfuzri a byi si tsrhama byi talisa xileswi!

• Ntsrhaku ka lifu dzra Kriste, ku yentxeke yini hi xihlayelamfuzri xa Bibele?

• I mpswini leswi hi pfuniki ku tlhela hi kuma xihlayelamfuzri lexi nga Zritwini dzra Xikwembu Nkulukumba?

Timboni ta Yehovha ti hete malembe ya ku tala swinene na ti tizrisa mabibele hi wundzruluteli bya ku hambana-hambana, ti ma gandlisa ni ku ma yavela. Kambe hi vone swi djuleka ku humexa wundzruluteli lebyimpswha lebyi a byi ta pfuna vhanu ku yampswa leswaku va ‘tlhasa ku tiveni ka xihlayelamfuzri’, ku nga leswi Xikwembu Nkulukumba a swi xuvelaka vhanu hinkwavu. (1 Timoteo 2:3, 4) Xileswo, hi 1950, hi sungule ku humexa swiyenge swa Bibele hi mavulavulela ya xinan’waka, ku nga Tradução do Novo Mundo. Bibele ledzri dzri ndzruluteliwe hi ndlela leyinene ni leyi dumbekaka hi tindzrimi leti tlulaka 150.

A ku djuleka Bibele ledzri nabyaliki ku dzri twisisa. Tindzrimi ta txintxa hi ku famba ka nkama, kambe mabibele manyingi ma ha ni mavulavulela ya xikhale, ya ku bindzra ni lama kazrataka ku ma twisisa. Hi tlhelo dzrin’wana, ku tsrumbuliwe mabuku ya khale ya ku tsraliwa hi voko lama khanelaka xihlayelamfuzri nakone ma fanaka ngopfu ni ya ku sungula, leswi yentxiki leswaku swi nabyala ku twisisa Xiheberu, Xiaramayika ni Xigrika lexi tizrisiwiki loko ku tsraliwa Bibele.

A ku djuleka wundzruluteli lebyi namazrelaka Zritu dzra Xikwembu Nkulukumba. A matsrhan’wini ya ku txintxa matsralwa lama huhuteliwiki hi Xikwembu Nkulukumba, vandzruluteli va Bibele va fanela ku namazrela leswi tsralwa dzra ku sungula dzri hlayiki swone. Nambitanu, ka wundzruluteli byinyingi, vito dzra Xikwembu Nkulukumba, ledzri liki Yehovha, a dzri tizrisiwi ka Matsralwa Laya Ku Xwenga.

A ku djuleka Bibele ledzri yisaka lidzrumu ka Mutsrali wa dzrone. (2 Samuel 23:2) Ka Tradução do Novo Mundo, vito dzra Yehovha dzri tlhele dzri bekiwa lomu a dzri humelela kone makhambi ya 7.000 ka mabuku ya Bibele ya ku tsraliwa hi voko ya khale swinene, swanga heswi swi kombisiwiki ha kone la hansi. (Amapsalma 83:18) Mihandzru ya malembe ya ku tala ya ku kambisisa hi wunyaminyami ku ve ku humexiwa ka Bibele ledzri nyonxisaka ku dzri dondzra hikusa dzri kombisa miyanakanyu ya Xikwembu Nkulukumba hi ndlela ya ku khanya. Nambi u li na dzrone Tradução do Novo Mundo hi lidzrimi dzraku kumbe ihim, hi ku kutxa leswaku u tibekela nkama siku ni siku wa ku dondzra Zritu dzra Yehovha.​—Yehošua 1:8; Amapsalma 1:2, 3.

• Ha yini hi vone swi djuleka ku va ni wundzruluteli ledzrimpswha bya Bibele?

• I mukhuva wini wa siku ni siku lowu nga wunene ka lweyi a djulaka ku tiva ku zrandzra ka Xikwembu Nkulukumba?