Vhanu va ku tala va tsrhike ku ya a makezrekeni yavu hikusa a va kumi nkongomiso wa moya kumbe ku txhaveleliwa. Kutani, ke, ha yini u fanela ku hlalela mintlhanganu leyi lulamiseliwaka hi Timboni ta Yehovha? Xana u ta kuma yini ka mintlhanganu yoleyo?

U ta nyonxa hi ku va makazri ka vhanu lava nga ni lizrandzru ni ku hanyelana. Ka dzana dzra ku sungula, Vakriste a va hlengeletana hi mabandla, nangweso a va tlhangana akuva va gandzrela, va dondzra Matsralwa ni ku kutxanana. (Ba-Heberu 10:24, 25) Hi ku hlengeletana ka mbangu lowu nga ni lizrandzru, a va titwa na va li makazri ka vanghanu va xihlayelamfuzri​—vamakwavu va moya. (2 Ba-le-Thesalonika 1:3; 3 Yohan 14) Na hine hi landzra xikombiso xolexo, mfuzri hi kuma ku nyonxa loku fanaka.

U ta pfuneka hi ku dondzra ku tizrisa minsinya ya milawu ya Bibele. Swanga hi leswi a swi li xiswone a minkameni ya ku tsraliwa ka Bibele, vaxinuna, vaxisati ni vatsrongwana hinkwavu va hlengeletana a mbangwini wun’we. Vadondzrisi lava fanelekaka, va tizrisa Bibele ku hi pfuna leswaku hi twisisa ndlela leyi hi nga tizrisaka minsinya ya dzrone ya milawu ka wutomi bya siku ni siku. (Deuteronoma 31:12; Nehemiya 8:8) Hinkwezru hi nga hlengela ka mabulo lama patsraka vayingiseti ni le ku yimbeleleni, leswi hi nyikaka nkama wa ku kombisa dumbo dzrezru dzra Wukriste.​—Ba-Heberu 10:23.

U ta kuma tovoko dzra ku tiyisiwa lipfumelo ka Xikwembu Nkulukumba. Muapostola Pawulo a byele dzrin’we dzra mabandla a nkameni wakwe a ku: “Ni navela ku mi vona, . . . akuva hi ta tiyisana hi lipfumelo ledzri mun’wana ni mun’wana a nga nadzru, dzra ka kwanga ni dzra ka kwenu”. (Ba-le-Roma 1:11, 12, NM) Loko hi vonana ni vapfumeli-kulozri a mintlhanganwini nkama ni nkama swi tiyisa lipfumelo dzrezru ni ku tiyimisela ka ku hanya swanga Vakriste.

Ha ku zramba leswaku u ya hlalela ntlhanganu lowu hi taka va na wone vhiki ledzri akuva u tivonela ha wuswaku leswi nga tlhamuxeliwa la henhla. U ta hoyozeliwa hi mavoko mabidzri. Ka mintlhanganu hinkwayu ku ngheniwa mahala​—a ku fambisiwi xiparatwana xa minhlengo.

• Xana i xikombiso xini lexi mintlhanganu yezru ya bandla yi xi landzraka?

• Hi nga kuma mabindzru wani loko hi ya ka mintlhanganu ya Wukriste?

Nambi loko hi sindzriseka ku famba mpfhuka wa ku leha tinhoveni leti txhavisaka kumbe ku neliwa hi timpfula, nkama ni nkama hi kone a mintlhanganwini yezru ya Wukriste. Nambi leswi hi bindzreliwaka hi wutomi ni leswi hi kazralaka a ntsrhaku ka ku tizra siku hinkwadzru, ha yini hi tihita leswaku hi va xikan’we ni vapfumeli-kulozri?

Swi pfuna hine. Loko a vulavula hi lava hi hanyaka na vone a bandleni, Pawulo a hlaye leswaku hi fanela kuva “hi yanakanyana”. (Ba-Heberu 10:24) Xiga lexi xi tlhamuxela “ku pimisa hi wunyaminyami”, a nga kuva hi tivana. Xileswo, mazritu ya muapostola Pawulo ma hi kutxa kuva hi zron’weka hi van’wana. Loko hi tolovelana ni mindangu yin’wana ya Vakriste, hi gungula leswaku van’we va vone va hlule swikazratu leswi fanaka ni swezru ni leswaku va nga hi pfuna kuva na hine hi swi hlula.

Swi hi nyika vanghanu va wutomi hinkwabyu. Ka mintlhanganu yezru, hi hanyisana ni ntlawa wa vanghanu lavakulu, ku nga li vhanu lava ho ko va vona ntsena. Minkama yin’wana, ha tlhangana akuva hi hungata hi ndlela leyinene. Xana hi pfuneka ha yini loko hi tsrhama hi ku va xikan’we? Hi dondzrela ku vona leswaku mun’wana ni mun’wana wezru a ni lisima, kutani leswo swi yentxa leswaku hi zrandzrana swinene. Xileswo, loko vanghanu vezru va tlhangana ni swikazratu, hi kahlula hi va pfuna hikusa wunghanu byezru kutani i byikulu. (Amaproverbia 17:17) Loko hi va kusuhi ni swizro hinkwaswu swa bandla dzrezru, hi kombisa leswaku ha “bekisana”.​—1 Ba-le-Korinte 12:25, 26.

Hi ku kutxa leswaku u hlawula vanghanu lava yentxaka ku zrandzra ka Xikwembu Nkulukumba. U ta kuma vanghanu volavo a makazri ka Timboni ta Yehovha. U nga pfumelele ntxhumu wu ku sivela ku titlhanganisa na hine.

• Hi kuma mabindzru wani hi ku va xikan’we a mintlhanganwini?

• Xana u navela ku buya siku muni u ta ta tiva bandla dzrezru?

Loko Vakriste va dzana dzra ku sungula va li mintlhanganwini, ngopfu-ngopfu a va yimbelela tinsimu, va hamba swikhongoto, va dondzra Matsralwa va tlhela va bula ha wone—na va nga landzreleli swihena. (1 Ba-le-Korinte 14:26) U ta kuma leswi fanaka ni swoswo a mintlhanganwini yezru.

Leswi dondzrisiwaka swi seketeliwe a Bibeleni nakone swa pfuna. Hi ku hela ka vhiki, bandla dzrin’wana ni dzrin’wana dzra tlhangana akuva dzri yingiseta Wukaneli Bya Bibele bya 30 wa maminutu, lebyi tlhamuxelaka ndlela leyi Matsralwa ma khumbaka wutomi byezru ha yone kun’we ni minkama leyi hi hanyaka ka yone. Hinkwezru hi kutxiwa ku landzrisela ka mabibele yezru loko wukaneli byi famba. Loko ku gama wukaneli, ku landzrela Xihondzro Xa Ku Zrindzra lexi tekaka wora dzrin’we, lani swizro swa bandla swi ntsrhunxekaka ku hlamula loko ku dondzriwa nhloko-mhaka leyi nga ka Xihondzro Xa Ku Zrindzra xa swidondzro swa bandla. Xidondzro lexo xi hi pfuna ku tizrisa nkongomiso wa Bibele a wuton’wini byezru. Ku dondzriwa mhaka yoleyi ya yin’we ka mabandla yezru lama tlulaka 118.000 wa wone a misaveni hinkwayu.

Hi pfuniwa ku yampswisa madondzrisela yezru. Hi tlhela hi tlhangana madambyeni a makazri ka vhiki ka ntlhanganu wa swiyenge swizrazru wa Wutomi Ni Wutizreli Byezru Bya Wukriste, lowu seketeliwiki ka Xibukwana Xa Ntlhanganu Wa Wutomi Ni Wutizreli lexi humexiwaka wheti ni wheti. Xiyenge xa ku sungula xa ntlhanganu lowu i Wukosi Lebyi Nga Bibeleni, lexi hi pfunaka ku tolovelana ni tindzrimana ta Bibele leti swizro swa bandla swi dondzriki na swa ha li makaya. Kutani ku landzrela xiyenge lexi liki Tihite Ntizrweni Wa Nsimu, lexi nga ni minkombiso ya ku bula hi Bibele ni van’wana. Mulayi a gama a hlaya mazritunyana ku hi pfuna ku yampswisa madondzrela ni madondzrisela yezru. (1 Timoteo 4:13) Xiyenge xa wugamu, lexi liki Ku Hanya Swanga Vakriste, xi kombisa ndlela ya ku tizrisa minsinya ya milawu ya Bibele a wuton’wini bya siku ni siku. Xiyenge lexi xi patsra bulo dzra swivutiso ni tinhlamulo ledzri hi pfunaka ku twisisa Bibele hi wuyenti.

Loko u va kone a mintlhanganwini yezru, handle ka ku ganagana, u ta hlamalisiwa hi ku vona leswaku dondzro ya Bibele leyi u taka yi kuma i ya lisima swinene.​—Ezaya 54:13.

• Xana u ta twa yini a mintlhanganwini ya Timboni ta Yehovha?

• U navela ku kumeka ka wini ka mintlhanganu yezru ya vhiki ni vhiki khambi dzri taka?

Xana u swi vonile ka mifoto leyi nga ka xibukwana lexi leswaku Timboni ta Yehovha ti yambala ha hombe loko ti ya mintlhanganwini ya tone ya bandla? Ha yini hi ku tekela nhlokweni ku yambala ni ku tixongisa kwezru?

Ku kombisa xitxhavu ka Xikwembu xezru. I ntiyiso leswaku Xikwembu Nkulukumba a nga lavisi ndlela leyi hi langusekaka ha yone he handle. (1 Samuel 16:7) Nambitanu, loko hi tlhangana akuva hi mu gandzrela, ku xuva ka timbilu tezru i ku kombisa xitxhavu ka Yene ni le ka vagandzreli-kulozri. Loko a ho yima mahlweni ka muyavanyisi a hubyeni, a hi ta zron’weka ngopfu hi ndlela leyi hi langusekaka ha yone hi mhaka ya ku hlonipha muyavanyisi yelweyo. Hi ku fanana, mayambalela yezru a mintlhanganwini ma kombisa xihlonipho ka ‘Mutsremi wa misava hinkwayu’, Yehovha Xikwembu Nkulukumba, ni ka mbangu lowu hi mu gandzrelaka ka wone.​—Genesis 18:25.

Hi kombisa leswaku hi hanya hi minsinya yini ya milawu. Bibele dzri kutxa Vakriste ku yambala ‘hi ku simama ni ku tikhoma’. (1 Timoteo 2:9, 10) Ku yambala hi ‘ku simama’, kumbe ku titsrongahata, swi hlaya ku nga yambali mpahla leya ku dula swinene, leyi nga pfuxaka nyanyuku kumbe leyi holokelaka. Nakone ‘ku tikhoma’, kumbe ku va ni miyanakanyu leyinene, swi hi pfuna ku hlawula mpahla leyi xongiki, leyi nga hi yentxikiki vhanu va futa kumbe va ku titsrhika. Minsinya leyi ya milawu ya ha tama yi hi pfulela mikhandlu leyikulu ya ku tihlawulela. Nambi loko hi nga vulavuli hi nomu, loko hi yambala ha hombe hi tlhela hi xonga, hi nga ‘nkhensisa ndondzro ya Muhuluxi wezru’ hi va hi ‘dzrumisa Xikwembu Nkulukumba’. (Tito 2:10; 1 Petros 2:12) Hi ku yambala hi ndlela leyinene loko hi ya mintlhanganwini, hi yentxa leswaku van’wana va vona lisima dzra ku gandzrela Yehovha.

U nga txhave ku ya Ndlwini ya Mfumu hi mhaka ya leswi mpahla yaku yi nga tsrhamisisa xiswone. Akuva mpahla yezru yi va leyi yamukelekaka, yi basiki mfuzri yi tsrhamisekiki a swi sindzrisi leswaku yi va ya ku dula kumbe ya mimoda.

• Ha yini swi li swa lisima ku yambala ha hombe loko hi gandzrela Xikwembu Nkulukumba?

• Hi yini minsinya ya milawu leyi kongomisaka ndlela leyi hi yambalaka ni ku tixongisa ha yone?

Loko u dondzra Bibele ni mun’we wa Timboni ta Yehovha, swi nga ha yentxeka u dzringisa ku pfuxeta leswi taka dondzriwa ka dondzro yin’wana ni yin’wana. I swa lisima ku yentxa leswi fanaka na u nga si ya mintlhanganwini ya bandla akuva u ta susa londzrovoto ledzrikulu. Hi kuma mabindzru makulu loko hi va ni mukhuva lowunene wa ku pfuxeta.

Bekisa siku ni mbangu wa ku dondzra. Xana hi wini nkama lowu u nga hambaka u dondzra ha wone na u pepile miyanakanyu? Xana ku nga va mpundzrwini na u nga si na sungula ku tizra kumbe wusikwini loko vanaku va ye ku yetleleni? Nambi loko u nga ti swi kota ku dondzra hi nkama wa ku leha, tibekele nkama wa ku dondzra nakone dzringisa ku kala u nga pfumeleli ntxhumu wu ku hingeleta. Djula mbangu lowu zruliki, u susa hinkwaswu leswi nga ku hingeletelaka, hi ku tima radiyo, televhizawu ni selulari. Ku khongota na u nga si na sungula ku dondzra swi ta ku pfuna ku pumba ku hlatiyela hi swa siku akuva u kota ku talelisa miyanakanyu ka Zritu dzra Xikwembu Nkulukumba.​—Ba-le-Filipi 4:6, 7.

Funga tinhlamulo u tlhela u lulamela ku hlamula. Sungula hi ku kuma mongo wa dondzro hinkwayu. Yanakanyisisa hi nhloko-mhaka kumbe ndzrima, u vona leswaku swinhlokwana-mhaka swa kone swi yelanisa kuyini ni dondzro, u gama u kambisisa a mifoto hinkwayu leyi nga kone ka dondzro yoleyo ni swivutiso swa mpfuxeto leswi khanyisaka tinhla-nkulu. Kutani dondzra yava ha dzrin’we u tlhela u djuletela nhlamulo ya xivutiso lexi nga ka dondzro. Pfula u va u dondzra tindzrimana leti nyikeliwiki, u tlhela u pimisa hi ndlela leyi ti seketelaka dondzro ha yone. (Amintiṛo 17:11) Loko u kuma nhlamulo, funga kumbe u tsrala ntsrhati hansi ka mazritu matsrongo kumbe swiga swi tameliki mongo wa yava dzroledzro akuva swi ta ku pfuna ku dzrimuka loko u li ntlhanganwini. Lanu ke, loko u li ntlhanganwini, u nga ha tlakuxa voko loko u swi djula akuva u hlamula hi ku gomisa hi mazritu yaku.

Loko u kambisisa timhaka ta ku hambana-hambana leti dondzriwaka vhiki ni vhiki a mintlhanganwini, u ta yengetela miyanakanyu leyimpswha a ‘wukosini’ byaku bya wutivi bya Bibele.​—Mattheo 13:51, 52.

• Xana u nga tibekela mukhuva wini akuva u lulamisela mintlhanganu?

• Xana u nga tilulamisela hi ndlela yini leswaku u hlamula a ntlhanganwini?

Ku sukela a minkameni ya khale, Yehovha a djula leswaku mindangu yi heta nkama kun’we, yi tiyisa wumoya ni wuxaka bya yone. (Deuteronoma 6:6, 7) Hi nkonta ya leswo, mindangu ya Timboni ta Yehovha yi tibekela nkama ndzreni ka vhiki leswaku yi gandzrela kun’we, yi li kazri yi bula hi timhaka ta moya leti nga swivileleko swa yone, ka xiyimu xa ku ntsrhunxeka. Nambi loko u hanya wuswaku, u nga tizrisa nkama lowo akuva u tsrhindzrekela ka Xikwembu Nkulukumba hi ku dondzra mhaka ya kukazri ya Bibele leyi u yi djulaka.

I nkama wa ku tsrhindzrekela ka Yehovha. ‘Tsrhindzrekelani ku Xikwembu Nkulukumba; na yene a ta tsrhindzrekela ku n’wine’. (Yakob 4:8) Hi tiva Yehovha ku yampswa loko hi dondzra mayelanu ni wumhunu ni swiyentxo swakwe a Zritwini dzrakwe, ku nga Bibele. Ndlela ya ku nabyala ya ku sungula wugandzreli bya ndangu i ku heta nkamanyana na mi dondzra Bibele hi zritu dzra ku tlakuka, kumbexana na mi landzrelela xiyimiso xa vhiki ni vhiki xa Ntlhanganu wa Wutomi ni Wutizreli. Xizro xin’wana ni xin’wana xa ndangu xi nga nyikiwa ku dondzra xiyenge xin’we, mi gama mi bula hi leswi mi swi dondzriki ka Matsralwa.

I nkama wa ku va kusuhi ni swizro swa ndangu. Vanuna ni vasati, kun’we ni vapswele ni vana, va tiyisa wuxaka byavu loko va dondzra Bibele hi ndangu. Wu fanela ku va nkama wa ku nyonxisa ni wa ku zrula lowu ndangu wu wu laviselaka hi manyawu ndzreni ka vhiki. Vapswele va nga hlawula timhaka leti taka dondzriwa hi ku ya hi tintanga ta vana, kumbexana va tizrisa tindondzro leti kumekaka ka Xihondzro Xa Ku Zrindzra ni Despertai! (Pfukani!) kumbe ka pajina dzrezru dzra jw.org. Mi nga ha vulavula hi swikazratu leswi vanaku va kumaniki na swone a xikole ni ndlela ya ku swi hlula. Nakone mi nga hlalela nongonoko wa televhizawu ka Wuhaxi bya JW (ka pajina dzra tv.jw.org), mi gama mi bulisana hi leswi mi swi dondzriki. Kumbexana mi nga titoloveta tinsimu leti taka yimbeleliwa a mintlhanganwini mi gama mi nwa swa ku titimeta nkolo ntsrhaku ka wugandzreli bya ndangu.

Nkama lowu wa ku hlawuleka mi wu hetaka xikan’we ku gandzrela Yehovha vhiki ni vhiki, wu ta mi pfuna leswaku mi nyonxa hi Zritu dzra Xikwembu Nkulukumba nakone yene a ta tovokisa minzamu yenu swinene.​—Amapsalma 1:1-3.

• Ha yini hi tibekela nkama wa ku va ni wugandzreli bya ndangu?

• Xana vapswele va nga yentxa leswaku wugandzreli bya ndangu byi nyonxisa hinkwavu a ndangwini hi ndlela yini?

Ha yini vhanu lava va nyonxe ngopfu? Va le ku hlaleleni ka tin’we ta tinhlengeletanu tezru. Swanga hi malandzra ya Xikwembu Nkulukumba ya khale, lama leletiwiki ku tlhangana kazrazru hi lembe, na hine hi lavisela hi manyawu ku tlhangana hi mintlawa leyikulu. (Deuteronoma 16:16) Lembe ni lembe, hi ni swiyentxakalu swizrazru: tinhlengeletanu tibidzri ta muganga ta siku dzrin’we ni nhlengeletanu leyikulu ya xifundzra wa masiku mazrazru. Xana hi kuma mabindzru wani ka tinhlengeletanu leti?

Ti tiyisa wukwavu byezru bya Wukriste. Ku fana ni Va-Israyele lava a va nyonxa hi ku dzrumisa Yehovha a “tinhlengeletanwini”, na hine ha nyonxa hi ku mu gandzrela ka swiyentxakalu swa ku hlawuleka. (Amapsalma 26:12; 111:1) Ka mintlhanganu yoleyo hi kuma mikhandlu ya ku tiva Timboni ta Yehovha ta mabandla man’wana ni matiko man’wana. Hi nkama wa xifihlulu, hi da swakuda ka mbangu wolowo wa nhlengeletanu, leswi yentxaka leswaku swiyentxakalu leswi swa moya swi tala hi wunghanu. (Amintiṛo 2:42) Ka swiyentxakalu leswi, hi vona ha byezru lizrandzru ledzri tlhanganisaka nhlengeletanu ya vamakwezru a misaveni hinkwayu.​—1 Petros 2:17.

Ti hi pfuna ku hluvuka hi tlhelo dzra moya. Va-Israyele va tlhele va pfuneka hi ku ‘yingelisisa mazritu’ ya Matsralwa lawa a va tlhamuxeliwa wone. (Nehemiya 8:8, 12) Na hine hi tlangela ku dondzrisiwa Bibele loku hi ku kumaka a tinhlengeletanwini. Nongonoko wun’wana ni wun’wana wu seketeliwe ka nhloko-mhaka ya Matsralwa. Hi kola ka wukaneli lebyi nyonxisaka, minxaxamelo ni minkombiso, hi dondzra ndlela ya ku yentxa ku zrandzra ka Xikwembu Nkulukumba a wuton’wini byezru. Ha kutxeka loko hi twa mimfambu ya lava kotiki ku hlula swikazratu swavu, akuva va kota ku hanya swanga Vakriste ka nkama lowu wa ku bindzra. Ka tinhlengeletanu letikulu ta xifundzra, madrama ya xikhale ma dzrungula timhaka ta Bibele hi ndlela ya ku hanya nakone ma hi dondzrisa tindondzro leti pfunaka. Ka nhlengeletanu yin’wana ni yin’wana, ku ni babatiso dzra lava djulaka ku kombisa ku tinyiketela kwavu ka Xikwembu Nkulukumba.

• Ha yini tinhlengeletanu ti li swiyentxakalu swa ku nyonxisa?

• Xana u nga kuma mabindzru wani loko u hlalela nhlengeletanu?

Loko Yesu a nga si na fa, a hlaye leswi: “Kutani madzrungula lamanene ya Mfumu ma ta zrezriwa a misaveni hinkwayu leyi yakiwiki, akuva byi va wumboni a matikweni hinkwawu, hi kone ku taka tlhasa wugamu”. (Mattheo 24:14, NM) Kambe, xana ntizro lowu wa ku zrezra a misaveni hinkwayu a wu ta yentxisiwa kuyini? Hi ku landzra xikombiso lexi Yesu a xi siyiki loko a li la misaveni.​—Luka 8:1.

Hi dzringisa ku khanela ni vhanu a makaya kwavu. Yesu a dondzrise vadondzrisiwa vakwe ku zrezra madzrungula ya Mfumu hi yindlu ni yindlu. (Mattheo 10:11-13; Amintiṛo 5:42; 20:20) Vazrezri volavo va dzana dzra ku sungula a va nyikiwe mimbangu leyi a va ta zrezrela ka yone. (Mattheo 10:5, 6; 2 Ba-le-Korinte 10:13) Hi lani ku fanaka namunhla, ntizro wezru wa ku zrezra wu hleliwe ha hombe, nakone bandla ni bandla dzri nyikiwa mbangu lowu dzri fanelaka ku wu tizra hi ku helela. Leswo swi hi pfumelela ku hetisisa xileleto xa Yesu xa ku va hi zrezra ni ku ‘hamba wumboni’ hinkwabyu.​—Amintiṛo 10:42.

Hi tikazratela ku kuma vhanu kwini na kwini lomu va nga kone. Yesu a tlhele a beka xikombiso xa ku zrezrela vhanu a livaleni, swanga hi le matlhelweni ka lwandle kumbe xihlobyeni xa vhanu va muganga wa kukazri. (Marka 4:1; Yohan 4:5-15) Na hine hi bula ni vanhu hi Bibele kwini na kwini lomu hi nga swi kotaka​—a switaratwini, a mimbangwini ya ku xavisa, a majaradi kumbe hi fone. Hi tlhela hi zrezrela vayakelani, vatizri-kulozri, vadondzri-kulozri ni maxaka loko hi kuma mukhandlu wunene. Hi nkonta ya minzamu yoleyo makhulu-khulu ya vhanu a misaveni hinkwayu ma twa ‘madzrungula lamanene ya huluku’.​—Amapsalma 96:2, NM.

Xana ku ni mhunu wa kukazri lweyi u yanakanyaka leswaku u nga mu byela madzrungula ya Mfumu wa Xikwembu Nkulukumba ni ndlela leyi ma nga mu pfunaka ha yone ka wumundzruku byakwe? U nga tsrhame ha wone madzrungula wolawo lama nyikaka dumbo. Ma byele van’wana hi ku kahlula!

• Hi wani “madzrungula lamanene” lama fanelaka ku zrezriwa?

• Timboni ta Yehovha ti tekelelisa kuyini ndlela leyi Yesu a a zrezra ha yone?

Zritu dzra ku “phayona” hakanyingi dzri hlaya mhunu lweyi a valangaka mimbangu yimpswha a tlhela a pfulela van’wana ndlela leswaku va landzrela. Ku nga hlayiwa leswaku Yesu a a li phayona, hikusa a zrumeliwe la misaveni akuva a ta ta yentxa ntizro lowu nyikaka wutomi ni ku pfulela vhanu ndlela leyi yisaka ku huluxiweni. (Mattheo 20:28) Namunhla wa siku, valandzreli vakwe va mu tekelela hi ku heta nkama wunyingi na ‘va yentxa vhanu va va vadondzrisiwa.’ (Mattheo 28:19, 20) Van’we va swi kotile ku teka ntizro lowu hi wu vitanaka ntizro wa wuphayona.

Phayona i muzrezri wa nkama hinkwawu. Timboni ta Yehovha hinkwatu i vazrezri va madzrungula lamanene. Nambitanu, van’we va lulamise wutomi byavu akuva va tizra swanga maphayona ya nkama hinkwawu, va heta 70 wa mawora ka ntizro wa ku zrezra wheti ni wheti. Akuva va kota ku yentxa leswi, vanyingi va tizra hamfu ya siku a ntizrweni wavu wa ku tihanyisa. Van’wana va langiwa akuva va tizra swanga maphayona ya ku hlawuleka lomu ku nga ni xivileleko lexikulu xa vazrezri, nakone hi wheti va heta 130 wa mawora kumbe ku tlula a ntizrweni wa ku zrezra. Maphayona ma titwa na ma yaneliwa hi ku hanya hi mintxhumu ya yitsrongo, na ma dumba leswaku Yehovha a ta ma nyika leswi ma swi vilelaka a wuton’wini. (Mattheo 6:31-33; 1 Timoteo 6:6-8) Lava hlulekaka ku tizra swanga maphayona ya nkama hinkwawu, va tizra swanga maphayona ya ku pfunisa loko va swi kota, va yengetela ntizro wavu wa ku zrezra wu tlhasa ka 30 kumbe 50 wa mawora hi wheti.

Phayona dzri susumetiwa hi ku zrandzra Xikwembu Nkulukumba ni vhanu. Ku fana na Yesu, hi xiya leswaku vanyingi namunhla wa siku va le xiyin’wini lexi txhelanaka wusiwana hi tlhelo dzra moya. (Marka 6:34) Kambe hine hi na byone wutivi lebyi nga va pfunaka swoswi ni ku va nyika ku lavisela loku tiyiki ka wumundzruku. Ku zrandzra vayakelani swi susumeta phayona akuva dzri hanana hi nkama wa dzrone ni ntamu wa dzrone ku pfuna van’wana hi tlhelo dzra moya. (Mattheo 22:39; 1 Ba-le-Thesalonika 2:8) Hikola ka leswo, lipfumelo dzra phayona dzra tiyisiwa, nakone dzri tsrhindzrekela kusuhi na Xikwembu Nkulukumba, dzri va dzri kuma ku nyonxa lokukulu.​—Amintiṛo 20:35.

• Xana u nga tlhamuxela leswaku phayona i yini?

• I yini lexi susumetelaka van’wana ku teka ntizro wa wuphayona bya nkama hinkwawu?

Timboni ta Yehovha i khale na ti ni swikole swa ku yentxa ntizro wa Xikwembu Nkulukumba. Ku ni swikole swa ku hlawuleka swa ku wupfisa lava tinyikelaka ka ntizro wa nkama hinkwawu wa ku zrezra Mfumu, akuva va kota ku ‘hetisisa wutizreli byavu’.​—2 Timoteo 4:5.

Xikole Xa Ntizro Wa Wuphayona. Loko phayona dzra nkama hinkwawu dzri heta lembe dzra ku sungula ka ntizro wa dzrone, dzra tsralisiwa ka xikole xa 6 wa masiku, lexi nga ha fambisiwaka ka Yindlu ya Mfumu leyi nga kusuhi ni lani dzri tsrhamaka kone. Nkongometo wa xikole lexi i ku pfuna phayona leswaku dzri tsrhindzrekela ka Yehovha, dzri yengetela wuswikoti bya dzrone ka swiyenge hinkwaswu swa wutizreli ni ku ya mahlweni dzri tizra hi ku dumbeka.

Xikole Xa Vazrezri Va Mfumu. Xikole lexi, xi tekaka tiwheti tibidzri, xi yentxeliwe ku wupfisa maphayona lama nga ni wuswikoti, lama tibekiseliki ku zruzra lomu ma tsrhamaka kone ma ya tizra kwini na kwini lomu ma djuliwaka kone. Nakunene, maphayona lawa ma li: ‘Hi mine lwe; zruma mine’, ma li kazri ma tekelela Muzrezri-nkulu lwa samiki a tizra la misaveni, Yesu Kriste. (Ezaya 6:8; Yohan 7:29) Ku zruzrela kule ni kaya, swi nga ha patsra kuva ma dondzrela ku hanya hi mintxhumu yitsrongo. Mahanyela, maxela ni swakuda swa kone swi nga ha hambana ngopfu ni leswi ma swi toloveliki. Swi nga ha vileleka leswaku ma dondzra ni lidzrimi dzrin’wana. Xikole lexi xi pfuna vamakwezru vaxinuna ni vaxisati lava kalaka va nga txhatanga kun’we ni lava txhatiki, lava nga ka malembe ya ku sukela ka 23 ku ya ka 65, leswaku va va ni matsrhamela ya moya, lawa va taka ma djula ka swiyavelo swavu, ni wuswikoti lebyi taka va yentxa va tizrisiwa swinene ha Yehovha ni nhlengeletanu yakwe.

Xikole Xa Bibele Xa Gileyadi. Hi Xiheberu, zritu dzra ku “Gileyadi” dzri tlhamuxela “Wumboni Byinyingi”. Ku sukela loko xikole xa Gileyadi xi sunguliwile hi 1943, swi kotekile ku zrumela khale ka vadondzri lava tluka 8.000 a matikweni akuva va tizra swanga vazrumiwa, leswaku va haxa wumboni ku ya tlhasa a ‘wugan’wini bya misava’. (Amintiṛo 13:47) Loko vazrumiwa va tlhase a tikweni dzra Peru hi khambi dzra ku sungula, a ku nge na bandla a tikweni hinkwadzru. Kambe swoswi ku ni mabandla lama tlulaka 1.000. Loko vazrumiwa va sungule ku tizra a Japão, a ko va ni timboni leti nga tlhasikiki nambi 10 a tikweni hinkwadzru. Kambe swoswi ku ni Timboni leti tlulaka 200.000. Kursu dzra Gileyadi, ledzri tekaka 5 wa tiwheti, dzri patsra ku dondzra Zritu dzra Xikwembu Nkulukumba hi wuyenti. Lava va tizraka swanga maphayona ya ku hlawuleka kumbe vazrumiwa a nsin’wini, lava nga zrwavini kumbe lava nga ka ntizro wa muganga, va zrambiwa ka xikole lexi leswaku va wupfisiwa ngopfu akuva va pfuna ku tiyisa ni ku fambisa ntizro wa misava hinkwayu.

• Xana hi wini nkongometo wa Xikole xa Ntizro wa Wuphayona?

• Xana Xikole xa Vazrezri va Mfumu xi yentxeliwe vamani?