Ha Yini Xikwembu Nkulukumba A Ni Nhlengeletanu?

1. Ha yini Xikwembu Nkulukumba a hlengelete tiko dzra Israyele wa khale?

Xikwembu Nkulukumba a hlengelete vana va mulumuzana Abrahamu a va yentxa tiko a tlhela a va nyika milawu. Tiko ledzri a dzri txhule vito dzra “Israyele” nakone a dzri yentxe muyimeleli wa wugandzreli bya ntiyiso ni wa zritu dzrakwe. (Amapsalma 147:19, 20) Hi ndlela leyo, a swi ta koteka kuva vhanu va matiko hinkwawu va pfuneka hi Israyele.​—Dondzra Genesis 22:18.

Xikwembu Nkulukumba a hlawule va-Israyele ku va timboni takwe. Matimu yavu ya khale ma kombisa leswaku vhanu va pfunekisa kuyini loko va yingiseta milawu ya Xikwembu Nkulukumba. (Deuteronoma 4:6) Xileswo, hi kola ka va-Israyele, van’wana a va ta swi kota ku tiva Xikwembu xa ntiyiso.​—Dondzra Ezaya 43:10, 12.

2. Ha yini Vakriste va ntiyiso va hlengeletiwile?

Hi ku famba ka nkama, Israyele a nga tamanga a zrandzriwa ha Xikwembu Nkulukumba, nakone Yehovha a pfalete tiko ledzro hi bandla dzra wukriste. (Mattheo 21:43; 23:37, 38) Swoswi, a matsrhan’wini ya va-Israyele, Vakriste va ntiyiso va tizra swanga Timboni ta Yehovha.​—Dondzra Amintiṛo 15:14, 17.

Yesu a hlengelete valandzreli vakwe akuva va zrezra ni ku yentxa vadondzrisiwa a matikweni hinkwawu. (Mattheo 10:7, 11; 24:14; 28:19, 20) Ntizro lowu wu kusuhi ni ku hela swoswi, loko ku hela xiyimu lexi xa mintxhumu. Hi nkama wa ku sungula a matin’wini, Yehovha a tlhanganise vhanu va ntsrandzra-vahlayi a matikweni hinkwawu ka wugandzreli bya ntiyiso. (Apfuletelo 7:9, 10) Vakriste va ntiyiso va hlengeleteliwe akuva va tiyisana ni ku pfunana. A misaveni hinkwayu, va ni nongonoko wolowu wa wun’we wa ku dondzra Bibele mintlhanganwini yavu.​—Dondzra Ba-Heberu 10:24, 25.

3. Xana nhlengeletanu ya namunhla ya Timboni ta Yehovha yi sungulise kuyini?

Hi ma-1870, ntlawa wa wutsrongo wa swidondzri swa Bibele wu sungule ku tlhela wu tsrumbula mintiyiso ya Bibele leyi a ku li khale na yi lahlekile. Va swi tivile leswaku Yesu a a hlengelete bandla dzra wukriste akuva dzri zrezra, kutani va sungule ntizro wa ku zrezra Mfumu a misaveni hinkwayu. Hi 1931, va pfumele ku vitaniwa hi vito dzra Timboni ta Yehovha.​—Dondzra Amintiṛo 1:8; 2:1, 4; 5:42.

4. Xana Timboni ta Yehovha ti hlelisiwe kuyini?

Ka dzana dzra ku sungula, mabandla ya wukriste a matikweni manyingi ma pfuneke hi ku va ni huvo leyi zrangelaka ya le ntsindzra leyi a yi pfumela leswaku Yesu hi yene Nhloko ya bandla. (Amintiṛo 16:4, 5) Hi ku fana namunhla, Timboni ta Yehovha a misaveni hinkwayu ti pfuneka hi ku va ni Huvo leyi Zrangelaka leyi vumbiwaka hi vakulu lava nga ni malembe na va tizrela. Yi lavisela mazrwavi ya Timboni ta Yehovha leti ndzrulutelaka, ti gandlisa ni ku yavela mabuku ya ku dondzra Bibele hi ku tlula 700 wa tindzrimi. Xileswo, Huvo leyi Zrangelaka ya swi kota ku tiyisa hi Matsralwa ni ku kongomisa ku tlula 120.000 wa mabandla a misaveni hinkwayu. A bandleni dzrin’wana ni dzrin’wana, vavanuna lava fanekelaka va tizra swanga vakulu, kumbe valaviseli. Vavanuna lava va hlayisa ntlhambi wa Xikwembu Nkulukumba hi lizrandzru.​—Dondzra 1 Petros 5:2, 3.

Timboni ta Yehovha ti hleliwe hi ndlela ya ku kota ku zrezra madzrungula lamanene ni ku yentxa vadondzrisiwa. Ku fana ni vapostola, hi zrezra hi yindlu ni yindlu. (Amintiṛo 20:20) Handle ka leswo, ha tinyikela kuva hi dondzra Bibele ni vhanu lava zrandzraka ntiyiso hi mbilu hinkwayu. Kambe Timboni ta Yehovha a to va nhlengeletanu ntsena. Hi ndangu lowu nga ni Tatana wa lizrandzru. Hi vamakwavu vaxinuna ni vaxisati lava zrandzranaka. (2 Ba-le-Thesalonika 1:3) Leswi vhanu va Yehovha va hlengeletiwiki kuva va nyonxisa Xikwembu Nkulukumba ni ku pfuna van’wana, va yentxa ndangu lowu tlulaka hinkwayu hi ku nyonxa la misaveni.​—Dondzra Amapsalma 33:12; Amintiṛo 20:35.