Ha Yini U Fanela Ku Ya Mahlweni U Dondzra?

1. Xana u ta pfunekisa kuyini hi ku tama u dondzra Bibele?

Handle ka ku ganaganeka, nkatsrakanyu lowu wa tindondzro ta masungulu ta Bibele wu tiyise lizrandzru dzraku ha Yehovha. Lizrandzru ledzri dzri djula ku tsrhama hi ku txutxeliwa. (1 Petros 2:2) Dumbo dzraku dzra wutomi lebyi nga helikiki dzri ta hetiseka hi loko u ya mahlweni hi ku tsrhindzrekela ka Xikwembu Nkulukumba hi ku dondzra Zritu dzrakwe.​—Dondzra Yohan 17:3; Yuda 21.

Loko u ya mahlweni u kula hi wutivi bya Xikwembu Nkulukumba, lipfumelo dzraku dzri ta ya mahlweni dzri tiya. Lipfumelo dzri ta ku pfuna ku nyonxisa Xikwembu Nkulukumba. (Ba-Heberu 11:1, 6) Dzri ta ku yentxa u tisola ni ku txintxa mahanyela yaku.​—Dondzra Amintiṛo 3:19.

2. Xana wutivi lebyi u nga nabyu ha Xikwembu Nkulukumba byi nga pfunisa kuyini vambeni?

Nakunene, u ta navela ku bulela vambeni leswi u swi dondzriki—hinkwezru ha swi zrandzra ku khanela hi ndzrava leyinene. Loko u ya mahlweni u dondzra Bibele, u ta tiva ndlela ya ku tizrisa Bibele ku tlhamuxela leswaku ha yini u pfumela ka Yehovha ni ka madzrungula lamanene.​—Dondzra Ba-le-Roma 10:13-15.

Vanyingi va sungula hi ku bulela vanghanu kumbe maxaka hi madzrungula lamanene. Vana ni wunyaminyami. A matsrhan’wini ya ku hlaya leswaku wukhongoti byavu byi hoxile, bula navu hi swidumbiso swa Xikwembu Nkulukumba. Handle ka leswo, dzrimuka leswaku vhanu va tala ku kokiwa hi hanyela dzraku ledzrinene ku tlula leswi u swi hlayaka hi nomu.​—Dondzra 2 Timoteo 2:24, 25.

3. Hi byini wuxaka lebyi u nga vaka na byone na Xikwembu Nkulukumba?

Ku dondzra Zritu dzra Xikwembu Nkulukumba swi ta ku pfuna ku kula hi le moyeni. Hi ku famba ka nkama, u nga va ni wuxaka bya ku hlawuleka swinene na Yehovha. Hi ntiyiso wa kone u nga va xizro xa ndangu wakwe.​—Dondzra 2 Ba-le-Korinte 6:18.

4. U nga swi kotisa kuyini ku tama u phokophela?

U nga phokophela he moyeni hi ku tama u dondzra Zritu dzra Xikwembu Nkulukumba. (Ba-Heberu 5:13, 14) Kombela mun’we wa Timboni ta Yehovha a dondzra na wene Bibele hi ku tizrisa buku ledzri liki I Yini Leswi Hi Nga Swi Dondzraka A Bibeleni?. Loko u ya mahlweni u dondzra Zritu dzra Xikwembu Nkulukumba, u ta ya u kateka a wuton’wini byaku.​—Dondzra Amapsalma 1:1-3; 73:27, 28.

Madzrungula lamanene ma pfa hi le ka Yehovha, Xikwembu Nkulukumba lwa nyonxiki. U nga tsrhindzrekela ka yene hi ku tsrhindzrekela ka vhanu vakwe. (Ba-Heberu 10:24, 25) Hi ku ya mahlweni ni ku lwela ku nyonxisa Yehovha, u tidjulela ku kuma wutomi lebyi nga byone​—wutomi lebyi nga helikiki. Ku tsrhindzrekela ka Xikwembu Nkulukumba hakunene hi swone swa swinene ku tlula hinkwaswu leswi u nga swi yentxaka.​—Dondzra 1 Timoteo 1:11; 6:19.