Mhaka ya lisima ngopfu swinene leyi nga Bibeleni, i Mfumu wa Xikwembu Nkulukumba. Yehovha a ta tizrisa Mfumu wolowo akuva a ndzruluta misava yi va Paradeyisi. Xana Mfumu i yini? Hi swi tivisa ku yini leswaku wa fuma? I yini leswi Mfumu lowu wu kotiki ku swi yentxa? I yini leswi wu taka swi yentxa a nkameni lowu taka? Xidondzro lexi ni swibidzri leswi landzrelaka swi ta hlamula swivutiso leswi.

1. Mfumu wa Xikwembu Nkulukumba i yini, nakone i mani Hosi ya Mfumu wolowo?

A Mfumu wa Xikwembu Nkulukumba i wuhosi lebyi bekiwiki hi Yehovha. A Hosi ya wone i Yesu Kriste, nakone a fuma na a li matilweni. (Matewu 4:17; Yohan 18:36) A Bibele dzri li Yesu: ‘A ta fuma . . . hi minkama hinkwayu.’ (Luka 1:32, 33) Swanga Hosi ya Mfumu wa Xikwembu Nkulukumba, Yesu a ta fuma vhanu hinkwavu a misaveni.

2. I vamani lava taka fuma na Yesu?

Yesu a nga fumi wuswake. Vhanu va ‘tinxaka hinkwatu, ni tindzrimi hinkwatu, ni swiloso hinkwaswu, ni matiko hinkwawu . . . va ta fuma misava’ na yene. (Apfuletelo 5:9, 10) I vangani lava taka fuma na Kriste? Ku sukela loko Yesu a tile lani misaveni, vhanu vanyingi va ve vakriste. Kambe xana vakriste hinkwavu va ta fuma na Yesu? Im-him. Ko va ntsena 144.000 lava taka ya fuma tilweni na yene. (Dondzra Apfuletelo 14:1-4.) Vakriste lavambeni hinkwavu va ta va xiyenge xa vhanu va Xikwembu Nkulukumba lani misaveni.—Amapsalma 37:29.

3. Ha yini a Mfumu wa Xikwembu Nkulukumba wu li wunene ku tlula mimfumu ya vhanu?

Nambi loko mimfumu yi dzringisa ku yentxa mintxhumu ya yinene, yone a yi na ntamu wa ku yentxa hinkwaswu leswi yi swi djulaka. Hi ku famba ka nkama, yi txintxiwa hi mimfumu yin’wana, leyi minkama yimbeni yi nga naveliki ku yentxela vhanu leswinene. Kambe a Hosi ya Mfumu wa Xikwembu Nkulukumba, ku nga Yesu, a nge ti za a txintxiwa hi mhunu mumbeni. Xikwembu Nkulukumba a ta ‘pfuxa Mfumu lowu nga tiki honeka ni siku ni dzrin’we’. (Daniel 2:44) Yesu a ta fuma misava hinkwayu nakone a ta yentxela vhanu leswinene. Yene a ni lizrandzru, wunene ni wululami, nakone a ta dondzrisa vhanu akuva va hanya hi ndlela ya lizrandzru, va kombanana wunene ni wululami.—Dondzra Ezaya 11:9.

4. A Mfumu wa Xikwembu Nkulukumba wu ta fuma misava hinkwayu

A ntamu lowu Yesu a nga na wone wa ku fuma wu tlakukile ku tlula wa mimfumu hinkwayu leyi samiki yi va kone. Dondzrani Matewu 28:18, mi gama mi bulisana hi xivutiso lexi landzrelaka:

• Hi kwini ku hambaka ka ntamu wa ku fuma lowu Yesu a nga na wone ni wa mimfumu ya vhanu?

A minfumu ya vhanu yi tsrhamela ku txintxatxintxa, nakone wun’wana ni wun’wana wo fuma tiko dzra wone ntsena. Kambe swi li yini hi Mfumu wa Xikwembu Nkulukumba? Dondzrani Daniel 7:14, mi gama mi bulisana hi swivutiso leswi landzrelaka:

• Ha yini swi nyonxisa ku tiva leswaku a Mfumu wa Xikwembu Nkulukumba a wu nge ti “honeka” kumbe ku helisiwa?

• Ha yini swi nyonxisa ku tiva leswaku a Mfumu wa Xikwembu Nkulukumba hi wone wu taka fuma misava hinkwayu?

5. Mimfumu ya misava yi fanela ku txintxiwa

Ha yini swi vileleka akuva a Mfumu wa Xikwembu Nkulukumba wu txintxa mimfumu ya vhanu? Vonani VHIDIYU, mi gama mi bulisana hi xivutiso lexi landzrelaka.

VHIDIYU: I Yini Mfumu Wa Xikwembu Nkulukumba?—Xitlephu (1:41)

• Xana ku yentxeka yini hi mhaka ya mimfumu ya vhanu?

Dondzrani Eklesiasta 8:9, mi gama mi bulisana hi xivutiso lexi landzrelaka:

• Xana u pimisa leswaku a Mfumu wa Xikwembu Nkulukumba wu fanela ku txintxa mimfumu ya vhanu? Ha yini u hlaya leswo?

6. A Mfumu wa Xikwembu Nkulukumba wu ni vafumi lava hi twisisaka

Hosi yezru Yesu Kriste a hanye lani misaveni swanga mhunu wa nyama, xileswo a nge hluleki ku ‘tsretsrelela gome dzrezru’. (Ba-Heberu 4:15) Handle ka leswo, Yehovha a hlawule 144.000 wa vavanuna ni vavasati va ku dumbeka, akuva va fuma na Yesu, vhanu va ‘tinxaka hinkwatu, ni tindzrimi hinkwatu, ni swiloso hinkwaswu, ni matiko hinkwawu’.—Apfuletelo 5:9.

• Xana u titwisa kuyini loko u tiva leswaku Yesu ni lava taka fuma na yene va swi twisisa swikazratu leswi u langusanaka na swone? Ha yini u hlamulisa xileswo?

7. Milawu ya Xikwembu Nkulukumba i yinene ngopfu ku tlula ya mimfumu ya vhanu

Mimfumu yi hamba milawu akuva yi pfuna ni ku sizrelela vhanu. Na wone Mfumu wa Xikwembu Nkulukumba wu ni milawu. Dondzrani 1 Ba-le-Korinte 6:9-11, mi gama mi bulisana hi swivutiso leswi landzrelaka:

• Xana wene u vona leswaku misava hinkwayu a yi ta tsrhamisisa kuyini loko vhanu hinkwavu a vo yingiseta milawu ya Xikwembu Nkulukumba?a

• U yanakanya leswaku Yehovha a ni mfanelo ya ku djula leswaku vhanu va landzra milawu ya Mfumu wake? Ha yini?

• I yini lexi kombaka leswaku vhanu lava kalaka va nga yingiseti milawu leyi va nga txintxa?—Vona ndzrimana 11.

NKATSRAKANYU

Mfumu wa Xikwembu Nkulukumba i Mfumu wa hakakunene lowu nga matilweni nakone wu ta fuma misava hinkwayu.

Mpfuxeto

• Hi vamani vafumi va Mfumu wa Xikwembu Nkulukumba?

• Ha yini Mfumu wa Xikwembu Nkulukumba wu li wunene ku tlula minfumu ya vhanu?

• Xana Yehovha a djula leswaku vhanu va yentxa yini akuva va lumba Mfumu wake?

HANDZRISISA

Vona leswi Yesu a swi dondzrisiki mayelana ni lomu wu kumekaka kone a Mfumu wa Xikwembu Nkulukumba.

“Xana Mfumu Wa Xikwembu Nkulukumba Ko Va Ntxhumu Lowu Nga Timbilwini Ta Vhanu?” (Leswi kumekaka ka jw.org)

Ha yini Timboni ta Yehovha ti vona swi li swa lisima ku dumbeka ka Mfumu wa Xikwembu Nkulukumba ku tlula ka mimfumu ya vhanu?

A Va Tinyiketela Ka Mfumu Wa Xikwembu Nkulukumba (1:43)

Vona leswi Bibele dzri swi hlayaka mayelana ni lava 144.000 lava hlawuliwiki hi Yehovha akuva va fuma na Yesu.

“I Vamani Lava Yaka Tilweni?” (Leswi kumekaka ka jw.org)

I yini lexi kholwisiki wansati lweyi a a li djele leswaku ko va Xikwembu Nkulukumba ntsena lweyi a taka helisa ku kala wululami a misaveni?

“Leswi Ni Xi Tivisiki Xiswone Xivangelo Xa Ku Kala Wululami Misaveni” (Pfukani!, Novhembru wa 2011)

A Mfumu wa Xikwembu Nkulukumba wu sungule ku fuma a tilweni hi 1914. Hi nkama wolowo ku sungule masiku ya wugamu ya mimfumu ya vhanu. Hi swi tivisa kuyini leswo? A hi voneni leswi Bibele dzri swi hlayiki mayelana ni mhaka leyi, ni leswaku hi xini xiyimu xa misava ku sukela hi 1914.

1. I yini leswi Bibele dzri swi hlayiki?

A buku dzra Daniyele dzri hi pfuna ku twisisa leswaku Mfumu wa Xikwembu Nkulukumba a wu ta sungula ku fuma ku heleni ka nkama lowu hlayiwaka ‘minkama ya 7’. (Daniel 4:16, 17) A ntsrhaku ka 100 wa malembe, Yesu a vitane minkama leyi leswaku i ‘minkama ya vamatiko’. Yesu a dondzrisi leswaku minkama leyo a yi nga si na hela. (Luka 21:24) Minkama ya 7 a yi ta hela hi 1914.

2. I yini leswi yentxekaka misaveni ku sukela hi 1914?

A vadondzrisiwa va Yesu va mu vutise leswi: “Xana mintxhumu leyi yi ta yentxeka siku muni, nakone xi ta va xini xikombiso xa ku ta kwaku ni xa ku hela ka xiyimu lexi xa misava?” (Matewu 24:3) Ka nhlamulo yake, Yesu a vulavule hi mintxhumu yinyingi leyi a yi ta yentxeka loko a sungula a ku fuma a matilweni swanga Hosi. Swin’wana ka swone a ku ta va tiyimpi, ku pfumaleka ka swakuda ni ku tsrekatsreka ka misava. (Dondzra Matewu 24:7.) Bibele na dzrone, dzri hlaye leswi vhanu a va ta va xiswone ‘a masikwini ya wugamu’ nakone hi kola ka xivangelo, lexo a wutomi a byi ta ‘nonon’hwa’. (2 Timoteo 3:1-5) Ku sukela hi 1914 mintxhumu yoleyo yo tama yi yengeteleka.

3. Ku sukela loko Mfumu wa Xikwembu Nkulukumba wu sungule ku fuma, ha yini mintxhumu yi ya yi biha ku tlulisa?

Ntsrhakunyana ka loko Yesu a sungule a ku fuma swanga Hosi ya Mfumu wa Xikwembu Nkulukumba, a lwe yimpi na Sathana ni mademona yake a tilweni. Sathana a hluliwile ka yimpi yoleyo. A Bibele dzri li: ‘Dzra ku txukumeteliwa misaveni, ni tintsrumi ta dzrone ti txukumetiwa kun’we na dzrone.’ (Apfuletelo 12:9, 10, 12) Sathana a hlundzruke ngopfu swinene hi ku tiva leswaku a ta helisiwa. Hi xivangelo lexo, a vanga ku vaviseka ni ku xaniseka a misaveni hinkwayu. A swi hlamalisi loko misava yi bihi hi ndlela leyi! Kambe Mfumu wa Xikwembu Nkulukumba wu ta helisa swikazratu hinkwaswu leswo.

KELISISA

4. A wuprofeta bya Bibele byi kombetela ka lembe dzra 1914

VHIDIYU: Mfumu Wa Xikwembu Nkulukumba Wu Sungule Ku Fuma Hi 1914 (5:02)

Xikwembu Nkulukumba a yentxe leswaku hosi Nebukadnetsari, hosi ya Babilona wa khale, a lozra lozro. Ka lozro ledzro Yehovha a mu kombe leswi a swi ta yentxeka ka nkama lowu taka. Daniyele a tlhamuxele leswi lozro a dzri hlaya swone nakone a dzri yimela a mfumu wa Nebukadnetsari ni Wa Xikwembu Nkulukumba.—Dondzrani Daniel 4:17.a

Dondzrani Daniel 4:20-26, mi gama mi tizrisa bokisi ledzri kumekaka ka tluka 133 akuva u hlamula swivutiso leswi landzrelaka:

• A) I yini leswi Nebukadnetsari a swi voniki ka lozro?—Vona tindzrimana 20 ni 21.

• B) A ku ta yentxeka yini hi nsinya?—Vona ndzrimana 23.

• C) I yini leswi a swi ta yentxeka ntsrhaku ka ‘minkama ya 7’?—Vona ndzrimama 26.

Hi kwini ku yelana loku nga kone a makazri ka nsinya wa lozro ni Mfumu wa Xikwembu Nkulukumba?

WUPROFETA (Daniel 4:20-36)

Mfumu

A) Nsinya lowu tlakukiki

A wu ta yima ku fuma

B) ‘Xakatsrani muzri’ ku kondzra ku hundzra a ‘minkama ya 7’

A wu ta tlhela wu fuma

C) “A mfumu waku wu ta tlheliseliwa ku wene”

Ku hetiseka ka ku sungula ka wuprofeta lebyi . . .

• D) Xana nsinya a wu yimela mani?—Vona ndzrimana 22.

• E) Wu yime dzrini ku fuma?—Dondzrani Daniel 4:29-33.

• F) Xana ku yentxeke yini ha Nebukadnetsari loko ku hele ‘minkama ya 7’?—Dondzrani Daniel 4:34-36.

KU HETISEKA KA KU SUNGULA

Mfumu

D) Nebukadnetsari, hosi ya Babilona

A wu ta yima ku fuma

E) Ntsrhaku ka 606 Mahlweni ka Nguva Yezru, Nebukadnetsari a sungula ku hlanya kutani a nga swi koti ku fuma ku dzringana 7 wa minkama

A wu ta tlhela wu fuma

F) Nebukadnetsari a tlhela a tiva a va a sungula ku fuma

Ku hetiseka ka wubidzri ka wuprofeta lebyi . . .

• G) Xana a nsinya wu yimela mani?—Dondzrani 1 Makronika 29:23.

• H) Xana va yime dzrini ku fuma? Hi swi tivisa ku yini leswaku a va nga fumi loko Yesu a li lani misaveni?—Dondzrani Luka 21:24.

• I) Xana Mfumu lowu wu sungule ku fuma nkama muni nakone kwini?

KU HETISEKA KA WUBIDZRI

Mfumu

G) Tihosi ta Israyele leti yimelaka Mfumu wa Xikwembu Nkulukumba

A wu ta yima ku fuma

H) Yerusalema a helisiwa nakone tihosi ta Israyele ti yima ku fuma ku dzringana 2.520 wa malembe

A wu ta tlhela wu fuma

I) Yesu a sungula ku fuma a tilweni swanga Hosi ya Mfumu wa Xikwembu Nkulukumba

5. Misava yi txintxe ngopfu ku sukela hi 1914

Vonani VHIDIYU

VHIDIYU: Misava Yi Txintxile Ku Sukela Hi 1914 (1:10)

Yesu a hlaye leswi misava a yi ta va xiswone loko a yene a va Hosi. Dondzrani Luka 21:9-11, mi gama mi bulisana hi xivutiso lexi:

• Ka mintxhumu leyi, i yini leswi u swi vonaka namunhla?

Mupostola Pawulo a vulavule hi leswi vhanu a va ta va xiswone a masikwini ya wugamu ya tihosi ta vhanu. Dondzrani 2 Timoteo 3:1-5, mi gama mi bula hi xivutiso lexi:

• Xana u vona leswaku vhanu va masiku lawa va tikhoma hi ndlela leyi?

6. Hi djula ku seketela Mfumu wa Xikwembu Nkulukumba

Dondzrani Matewu 24:3, 14, mi gama mi bulisana hi swivutiso leswi:

• Hi wini ntizro wa lisima lowu kombisaka leswaku a Mfumu wa Xikwembu Nkulukumba wu sungulile a ku fuma?

• Xana u nga hlengelisa kuyini ka ntizro lowo?

Mfumu wa Xikwembu Nkulukumba wa fuma nakone siku dzra kuva wu fuma misava hinkwayu dzra tsrhindzrekela. Dondzrani Ba-Heberu 10:24, 25, mi gama mi bula hi xivutiso lexi:

• I yini leswi mun’wana ni mun’wana wezru a faneliki ku swi yentxa leswi a ‘siku dzri tsrhindzrekelaka kusuhi’?

NKATSRAKANYU

A wuprofeta bya Bibele ni xiyimu xa misava swi beka wumboni bya leswaku a Mfumu wa Xikwembu Nkulukumba wa fuma. Loko hi zrezra hi tlhela hi ya mintlhanganwini, hi kombisa leswaku ha kholwa ka swone.

Mpfuxeto

• A buku dzra Daniel dzri vulavula hi minkama ya 7. Ku yentxeke yini a ku heleni ka minkama yoleyo?

• I yini xi ku kholwisaka leswaku a Mfumu wa Xikwembu Nkulukumba wu sungule ku fuma hi 1914?

• Xana u nga swi kombisa hi ndlela yini leswaku a Mfumu wa Xikwembu Nkulukumba wa fuma?

HANDZRISISA

Vona leswi va ta wudzrunguli ni van’wana va swi hlayiki mayelana ni ku txintxa ka mahanyela ku sukela hi 1914.

“Mahanyela Ma Hohloke Ngopfu Swinene” (Pfukani!, Abrili wa 2007)

Vona ndlela leyi wuprofeta lebyi kumekaka ka Matewu 24:14, byi txintxiki wutomi bya wanuna wa kukazri ha yone.

“A Ni Zrandzra Ngopfu Beisebol Ku Tlula Hinkwaswu!” (Xihondzro Xa Ku Zrindzra, N^o 3 2017)

Hi swi tivisa kuyini leswaku wuprofeta bya Daniel 4 byi vulavula hi Mfumu wa Xikwembu Nkulukumba?

“Mfumu Wa Xikwembu Nkulukumba Wu Sungule Dzrini Ku Fuma? (Xiyenge 1)” (Xihondzro Xa Ku Zrindzra,1 ka Otubru wa 2014)

Hi swi tivisa kuyini leswaku ‘minkama ya 7’ leyi ku khaneliwaka ha yone ka Daniel 4 yi hele hi 1914?

“Mfumu Wa Xikwembu Nkulukumba Wu Sungule Dzrini Ku Fuma? (Xiyenge 2)” (Xihondzro Xa Ku Zrindzra,1 ka Novhembru wa 2014)

Mfumu wa Xikwembu Nkulukumba wa fuma tilweni. Ku nga li khale wu ta yentxa ku txintxa lani misaveni. A hi voneni yin’wana ya mintxhumu ya ku xonga leyi taka yentxiwa hi Mfumu lowo.

1. Xana Mfumu wa Xikwembu Nkulukumba wu ta yentxisa kuyini akuva wu buyisa ku zrula lani misaveni?

Yesu, Hosi ya Mfumu wa Xikwembu Nkulukumba, a ta helisa vhanu lava yentxaka mintxhumu ya ku biha ni mimfumu ya vhanu, ka yimpi ya Armagedon. (Apfuletelo 16:14, 16) Loko leswo swi yentxeka, ku ta va na ku hetiseka xidumbiso lexi kumekaka ka Bibeleni, lexi liki: ‘Ku sala nkamanyana lwemfani, a ta va a nge he kone.’ (Amapsalma 37:10) Hi ku tizrisa Mfumu wa Xikwembu Nkulukumba, Yesu a ta buyisa ku zrula ni wululami a misaveni hinkwayu.—Dondzra Ezaya 11:4.

2. Xana byi ta va hi ndlela yini wutomi byezru loko a ku zrandzra ka Xikwembu Nkulukumba ku yentxeka lani misaveni?

Tiyanakanye na u hanya ka misava leyi vhanu hinkwavu va nga vanene, nakone hinkwavu va zrandzra” ka Yehovha va tlhela va zrandzranana! Swi ta va hi ndlela leyo ka Mfumu wa Xikwembu Nkulukumba, hikusa, ‘lava ku lulama va ta da pfindla dzra misava, va ta yaka ku yone hi la ku nga helikiki’. (Amapsalma 37:29) Ku nge he vi na mhunu lweyi a taka vabya, nakone hinkwavu va ta hanya hi lani ku nga helikiki.

3. I yini leswi Mfumu wa Xikwembu Nkulukumba wu taka swi yentxa ntsrhaku ka loko wu helise vhanu lava yentxaka mintxhumu ya ku biha?

Ntsrhaku ka loko ku helisiwe lava yentxaka mintxhumu ya ku biha, Yesu a ta fuma misava ku dzringana 1.000 wa malembe. Hi nkama wolowo, yene ni lava 144.000 va taka fuma na yene, va ta pfuna vhanu lani misaveni akuva va va lava hetisekiki. A ku heleni ka 1.000 wa malembe, a misava hinkwayu yi ta va mbangu wa ku xonga, nakone vhanu hinkwavu va ta va lava nyonxiki hikusa va ta hanya na va yingiseta milawu ya Xikwembu Nkulukumba. Kutani Yesu a ta tlhelisela wuhosi ka Papayi wake Yehovha. A vito dzra Yehovha dzri ta “xwengisiwa” ku tlula a ku sunguleni. (Matewu 6:9, 10) Swi ta va livaleni leswaku Yehovha i Hosi leyi zron’wekaka hi vhanu. Yehovha a ta helisa Sathana, mademona ni hinkwavu lava hlawulaka ku lwisana ni Mfumu wake. (Apfuletelo 20:7-10) Mfumu wa Xikwembu Nkulukumba wu ta yentxa leswaku a wutomi byi va lebyi hetisekiki hi matlhelo hinkwawu nakone leswo swi ta va swa hi lani ku nga heliki.

KELISISA

4. Mfumu wa Xikwembu Nkulukumba wu ta helisa mimfumu ya vhanu

A Bibele dzri li: ‘Mhunu a fuma mun’wana ku mu yentxa swa ku biha.’ (Eklesiasta 8:9) Yehovha a ta tizrisa Mfumu wake akuva a helisa wubihi byolebyo hinkwabyu.

Dondzrani Daniel 2:44 ni 2 Ba-le-Thesalonika 1:6-8, mi gama mi bulisana hi swivutiso leswi landzrelaka:

• I yini leswi Yehovha na Yesu va ta ka swi yentxa hi mimfumu leyi ya vhanu ni lava va yi seketelaka?

• Loko u pimisa mayelana ni leswi Yehovha na Yesu va swi yentxiki, ha yini u nga dumbaka leswaku ku yavanyisa kwavu ku ta va loko ka kunene?

5. Yesu i Hosi leyi fanelekaka

Swanga Hosi ya Mfumu wa Xikwembu Nkulukumba, Yesu a ta yentxa mintxhumu yinyingi ya yinene akuva a pfuna vhanu a misaveni. Vonani VHIDIYU akuva mi vona ndlela leyi Yesu a swi djulaka ku tizrisa ntamu lowu a wu kumiki ka Xikwembu Nkulukumba ha yone a akuva a pfuna vhanu.

VHIDIYU: Yesu A Kombise Leswi Mfumu Wu Taka Swi Yentxa (1:13)

Leswi Yesu a swi yentxiki na a li lani misaveni, i xikombiso xa leswi a taka swi yentxa swanga Hosi ya Mfumu wa Xikwembu Nkulukumba. Ka swidumbiso leswi nga la ni hansi, he swini leswi u navelaka akuva swi hetiseka? Dondzrani tindzrimana leti khanelaka ngopfu hi swidumbiso leswi.

6. Mfumu wa Xikwembu Nkulukumba wu ta tisa wumundzruku lebyi nyonxisaka

VHIDIYU: Wumundzruku Bya Ku Nyonxisa Lebyi Tsrhindzrekelaka (4:38)

Dondzrani Amapsalma 145:16, mi gama mi bulisana hi xivutiso lexi landzrelaka:

• U titwisa kuyini hi ku tiva leswaku Yehovha a ta ‘xuzrisa ku navela ka mintxhumu lemi hanyaka hinkwayu’?

NKATSRAKANYU

Mfumu wa Xikwembu Nkulukumba wu ta yentxa hinkwaswu leswi yene a swi djulaka. Wu ta ndzruluta misava hinkwayu yi va paradeyisi, leyi taliki hi vhanu lava taka gandzrela Yehovha.

Mpfuxeto

• Xana a Mfumu wa Xikwembu Nkulukumba wu ta dzri xwengisisa kuyini a vito dzra Yehovha?

• Ha yini hi fanela ku kholwa leswaku a Mfumu wa Xikwembu Nkulukumba wu ta hetisisa swidumbiso hinkwaswu leswi nga Bibeleni?

• Ka hinkwaswu swa ku xonga leswi Mfumu wu swi dumbisaka, he swini leswi u navelaka ku swi vona na swi yentxeka?

HANDZRISISA

Twana leswaku Armagedoni i yini.

“I Yini Yimpi Ya Armagedoni?” (Leswi kumekaka ka jw.org)

Kambisisa leswi taka yentxeka ka nkama lowu Yesu a hlayiki leswaku i “nhlmulo lowukulu”—Matewu 24:21.

“que é a grande tribulação?” (Perguntas Bíblicas Respondidas)

Vona ndlela leyi mindangu yi taka titwisa xiswone a paradeyisini.

Tivone Na U Li Paradeyisini (1:50)

Ka nhlokomhaka leyi liki “A Ni Ni Swivutiso Swinyingi”, vona ndlela leyi mun’we wa mupfukeli wa politika a kumiki nhlamulo ya leswi a a swi djula.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Janeru wa 2012)