Abami ba kabiri
19 Umwami Hezekiya akimara kuvyumva, aca yitaburirako impuzu maze yambara igunira, araheza aja mu nzu ya Yehova+. 2 Aca arungika Eliyakimu yari ajejwe ivyo ku kirimba*, n’umunyamabanga Shebuna n’abakuru mu baherezi ngo baje kuraba umuhanuzi Yesaya+ mwene Amozi. Bagiye bambaye amagunira. 3 Babwira Yesaya bati: «Hezekiya avuze ati: “Uyu musi ni umusi w’amarushwa, umusi wo gukarirwa*, umusi w’ibimaramare, kuko tumeze nk’umugore atagira inguvu zo kwibaruka kandi hageze ko umwana avuka*+. 4 Hari aho Yehova Imana yawe yogira ico akoze yumvise ivyo Rabushake yavuze vyose, uwo shebuja umwami wa Ashuri yatumye gucokora Imana nzima+. Hari aho Yehova Imana yawe yomuhana kubera amajambo yumvise. Ndagusavye rero usengere+ abagisigaye mu gihugu.”»
5 Izo ntumwa z’umwami Hezekiya zimaze guha Yesaya ubwo butumwa+, 6 Yesaya azibwira ati: «Mubwire shobuja muti: “Yehova avuze ati: ‘Ntutinye+ kubera amajambo wumvise avugwa n’abasuku umwami wa Ashuri yarungitse kuntuka+. 7 Ngira ndamushiremwo iciyumviro* ku buryo azokwumva amakuru, agaca asubira mu gihugu iwe. Nzotuma yicishwa inkota mu gihugu iwe+.’”»
8 Rabushake yumvise yuko umwami wa Ashuri yavuye i Lakishi+, aca aja iyo ari, asanga ariko arwanira i Libuna+. 9 Umwami yumva amakuru avuga ko Tiruhaka umwami wa Etiyopiya yaje kumutera. Aca yongera kurungika intumwa+ kuri Hezekiya ati: 10 «Genda mubwire Hezekiya umwami w’Ubuyuda muti: “Iyo Mana yawe wizigira ntiguhende ngo Yeruzalemu ntizofatwa n’umwami wa Ashuri+. 11 None ntiwumvise ivyo abami ba Ashuri bakoreye ibihugu vyose bakabitikiza+? Wibaza ko ari wewe uzorokoka? 12 Mbega amahanga ba sogokuruza banje bahoneje, imana zayo zoba zarayarokoye? Ihanga rya Gozani, irya Harani+ n’irya Rezefu ari hehe? Abantu b’i Edeni bahora i Telasari, bobo bari he? 13 Ari hehe umwami w’i Hamati n’uw’i Arupadi? Umwami w’ibisagara vy’i Sefaruvayimu, uw’i Hena n’uw’i Iva, bobo bari hehe+?”»
14 Hezekiya atora rero amakete izo ntumwa zimuzaniye arayasoma, hanyuma aja ku nzu ya Yehova, ayagaranzura* imbere ya Yehova+. 15 Hezekiya aca atangura gusengera+ imbere ya Yehova ati: «Ewe Yehova Mana ya Isirayeli, wewe wicaye ku ntebe yawe y’ubwami hejuru* y’abakerubi+, ni wewe wenyene uri Imana y’ukuri y’ubwami bwose bwo kw’isi+. Ni wewe waremye* ijuru n’isi. 16 Tega ugutwi wumve, Yehova we+! Ugurura amaso Yehova+, urabe. Niwumve ubutumwa Senakeribu yarungitse bwo kugucokora wewe Mana nzima. 17 Ewe Yehova, ni ivy’ukuri ko abami ba Ashuri batikije amahanga n’ibihugu vyayo+. 18 Imana z’ayo mahanga bazitereye mu muriro kuko zitari imana vy’ukuri+. Zahinguwe n’abantu+, zikorwa mu biti no mu mabuye. Ni co gituma bashoboye kuzitikiza. 19 None rero Yehova Mana yacu, turakwinginze udukize umwami wa Ashuri, kugira ngo ubwami bwose bwo kw’isi bumenye yuko wewe Yehova, wewe wenyene ari wewe Mana+.»
20 Yesaya mwene Amozi aca arungikira Hezekiya ubutumwa bugira buti: «Yehova Imana ya Isirayeli avuze ati: “Ivyo wambwiye mw’isengesho vyerekeye Senakeribu umwami wa Ashuri navyumvise+. 21 Ibi ni vyo jewe Yehova mvuze kuri we:
‘Umukobwa w’isugi wa Siyoni* aragusuzuguye, aragutwenze.
Umukobwa wa Yeruzalemu arakuzungagirije umutwe.
22 Mbega urazi uwo wacokoye? Urazi uwo watutse+?
Uwo wakankamiye+,
ukamurabana ubwibone, uramuzi?
Ni wa Mweranda wa Isirayeli+!
23 Warungitse intumwa+ kuncokora jewe Yehova+, uvuga uti:
“Ko mfise imikogote myinshi y’intambara,
nzoduga hejuru ku misozi,
nshike mu duce tw’i Libani turi kure cane.
Nzokwicira ibiti vyaho vy’amasederi birebire n’ivy’imiberoshi* vyizavyiza.
Nzokwinjira mu bibanza vyaho binyegeye cane, mu mashamba yaho azitanye cane.
24 Nzokwimba amariba, nywe amazi yo mu bindi bihugu.
Nzokamya imigende yose y’amazi* yo mu Misiri nkoresheje ibirenge vyanje.”
25 Mbega ntiwari bwavyumve? Navyiyumviriye* kuva kera cane+.
Nabiteguye* kuva kera na rindi+.
Ubu rero ngira ndabikore+.
Uzotikiza ibisagara bikingijwe ibihome, bisigare ari ibirundo vy’ibihomvagurike+.
26 Ababibamwo ntibazoronka ikibatabara.
Bazotekerwa n’ubwoba bamaramare.
Bazoba nk’ibimera vyo mu gahinga n’ivyatsi bitoto+,
bamere nk’ivyatsi binaga hejuru ku nzu*, bikababurwa n’umuyaga wo mu buseruko.
27 Ndazi neza igihe wicara, igihe usohoka, igihe ugaruka+,
n’igihe uba umfitiye ishavu rikaze+.
28 Erega narumvise ishavu rikaze umfitiye+ n’ukuroha kwawe+.
Nzoshira rero igera ryanje mu zuru ryawe n’imigozi* yanje+ hagati y’iminwa yawe,
mpeze ndagusubize inyuma ndagucishije mu nzira wazananye+.’
29 Iki ni co kizokubera ikimenyetso Hezekiya: uyu mwaka muzorya ivyimejeje, mu mwaka ugira kabiri murye intete zimejeje bivuye ku zakorotse mu mwaka wa mbere+. Mugabo mu mwaka ugira gatatu, muzobiba imbuto, mwimbure, mutere n’imirima y’imizabibu, murye ivyamwa vyayo+. 30 Abo mu Buyuda bazoba barokotse bagasigara+, bazoshora imizi munsi maze bame ivyamwa hejuru. 31 Mu gisagara ca Yeruzalemu hazova amasigarira, ku musozi Siyoni have abarokotse. Umwete wa Yehova Nyeningabo ni wo uzobikora+.
32 Ni co gituma ku bijanye n’umwami wa Ashuri, jewe Yehova mvuze+ nti:
‘Ntazokwinjira muri iki gisagara+
canke ngo aharase umwampi
canke ngo ahatumbere yitwaje inkinzo
canke ngo aharunde ibivu yuririrako kugira ahatere+.
33 Inzira yazananye ni yo azocamwo mu gusubira inyuma.
Ntazokwinjira muri iki gisagara’, ni jewe Yehova ndabivuze.
35 Kuri uwo musi nyene mw’ijoro, umumarayika wa Yehova araza, yica ingabo 185.000 mw’ikambi y’Abashuri+. Abantu bavyutse kare mu gitondo basanga ingabo zose ni imivyimba gusa+. 36 Nuko Senakeribu umwami wa Ashuri aragenda asubira i Ninewe+, agumayo+. 37 Umusi umwe ariko arasenga imana yiwe Nisiroki mu rusengero* rwayo, abahungu biwe bwite, ari bo Adurameleki na Shareseri, bamwicisha inkota+ hanyuma bahungira mu karere ka Ararati+. Umuhungu wiwe Esari-Hadoni+ aca atangura kuganza mu kibanza ciwe.