‘Ndahimbawe n’inyigisho naronse’

UMWIGEME yitwa Kazuna yaraguye mu gahundwe igihe umwigisha wiwe yamugira inama y’uko yoja mw’ihiganwa ryo kuraba abavuga neza ururimi rw’icongereza. Iryo higanwa ryari ryatumiwemwo abiga mu mashure yisumbuye bose bo mw’izinga rinini ryo mu Buraruko bw’Ubuyapani ryitwa Hokkaido. Mugabo ishure yigako ntiryari bwigere riserukirwa muri iryo higanwa. Umusi w’ihiganwa ushitse, Kazuna yarahagaritse umutima kubera yategerezwa guhiganwa n’abandi banyeshure bashika 50. Mbere yarahagaritse umutima gusumba, igihe yakubita ijisho abagabo babiri bari bajejwe guha amanuta abahiganwa, abo na bo ururimi kavukire rwabo rukaba rwari icongereza.

Barahamagaye abatsinze bahereye ku waronse agashimwe ka nyuma. Igihe bahamagara izina rya Kazuna, rikaba ari ryo baherejeko, vyamubereye nk’igitangaro. Kazuna n’umwigisha wiwe, uno akaba yari yicaye iruhande yiwe, baciye barabana batangaye. Kazuna akimeze nk’uwakubiswe n’inkuba, yaraduze ku mukiruruko kwakira agashimwe kiwe. Erega yari aronse agashimwe ka mbere!

Akamwemwe kariko karamusya, Kazuna yasiguye ati: “Icabinshoboje si ikindi atari ya nyigisho itangwa n’ishirahamwe rya Yehova biciye kw’Ishure ry’ubusuku bwa gitewokarasi. Ndahimbawe cane kuba nararonse iyo nyigisho”. Iryo shure Kazuna yitavye kuva akiri muto, ni rimwe mu makoraniro y’ishengero y’Ivyabona vya Yehova. Mu kwitegurira iryo higanwa, Kazuna yaritwararitse bimwe bidasanzwe uburyo bwiza bwo kuvugira kuri mikoro, kuvugana igishika n’ubushwashwanutsi, kugira ibimenyetso vy’umubiri, kurabana n’abumviriza, be n’ibindi bintu vyigishwa muri iryo Shure ry’ubusuku bwa gitewokarasi.

Turakwingize wemere ubutumire tuguhaye bwo kuza kuraba ingene iryo shure rigirwa, na ryo rikaba riba uko indwi itashe ku Ngoro y’Ubwami y’Ivyabona vya Yehova y’aho uba. Uraza wirabire ingene abato n’abakuze baryungukirako. Uwo ari we wese arashobora kuza muri iryo koraniro. Ushaka kumenya vyinshi ku vyerekeye ishure ribera hafi y’aho uba, turakwinginze ubaze Ivyabona vya Yehova b’aho iwanyu.