Tera Uja Imbere, Wunguruze

IGIHE watangura kwiga gukoresha ingingo ngenderwako za Bibiliya, uburyo bwo kwiyumvira, imvugo hamwe n’inyifato vyari vyaranyengetereye vyatanguye kuza birahinduka buhorobuhoro. Vyinshi muri ivyo vyarabaye n’imbere y’uko wiyandikisha mw’Ishure ry’Ubusuku bwa Gitewokarasi. Ubu na ho bisa n’uko wateye imbere gushika aho wegurira ubuzima bwawe Yehova. Ivyo vyoba bisobanura yuko ushobora guhagarika kugira iterambere? Ihibambewe! Ukubatizwa kwawe ni intango nsa.

Umwigishwa Timoteyo yari asanzwe akora bwa mukurambere w’Umukirisu igihe Paulo yamubwira ‘kurimbura’ impanuro yahawe hamwe n’uduteka tw’umurimo yatewe​—‘kwama’ muri ivyo bintu—​kugira ngo “kuja imbere kw[i]we kubonekere bose.” (1 Tim. 4:12-15) Waba ari ho ugitangura gukurikira inzira y’ukuri canke ukaba uciye uruma cane mu vyo kubaho rukirisu, ukwiye gushimishwa no gutera imbere.

Ubumenyi Hamwe n’Uguhinduka

Mu Banyaefezi 3:14-19 (UB), dusoma yuko intumwa Paulo yasavye Imana yuko abizeye bagenziwe boba abashoboye “gutegera uko ubwaguke n’uburebure n’ubwira n’ubwimbike” bw’ukuri bungana. Kugira ngo babishikeko, Yezu yaratanze abantu b’ingabirano bo kwigisha, kubogora no kwubaka ishengero. Ukuzirikana kw’Ijambo ry’Imana tudahorereza, hamwe n’inyobozo iva ku bigisha baciye uruma, birashobora kudufasha ‘gukura’ mu vy’impwemu.—Ef. 4:11-15.

Iryo kura ririmwo “ukugirwa bashasha mu nguvu ikoresha umuzirikanyi wanyu.” (NW) Ivyo birimwo ugutsimbataza impengamiro yo mu bwenge ikomeye mu buryo buhuye n’iy’Imana na Kirisitu. Bisaba kwihereza tudahengeshanya ukwiyumvira kwabo, kugira ngo ‘twambare wa muntu mushasha.’ (Ef. 4:23, 24) Igihe utohoza Injili, izo nkuru z’ubuzima bwa Kirisitu woba uzibona bwa citegererezo wokurikira? Woba urondera kugenekereza utugeso twiza twagaragajwe na Yezu hanyuma ukagira akigoro nyako ko kuzigana mu buzima bwawe?—1 Pet. 2:21.

Ivyo ushira mu biyago bishobora kwerekana urugezo washikanyeko mu kugira iryo terambere. Abambaye wa muntu musha ntibaja mu vyo kugira imvugo y’ubugunge, y’ugutukana, y’ibiterasoni canke ihebuza. Ahubwo, imvugo yabo ni “ijambo ryiza ryose ryo gukuza . . . kugira ngo riheshe abaryumvise ubuntu bg’Imana.” (Ef. 4:25, 26, 29, 31; 5:3, 4; Yuda 16) Ivyo bavuga biherereye canke bari ku makoraniro y’ishengero, birahishura yuko ukuri kuriko kurahindura ubuzima bwabo.

Nimba ‘utakizungazungishwa n’imipfunda ngo ujanwe irya n’ino n’imiyaga yose y’inyigisho,’ ivyo na vyo nyene biba ari ikimenyamenya c’uko utera imbere mu vy’impwemu. (Ef. 4:14) Woba uvyifatamwo gute nk’akarorero igihe isi igucucagiye ivyiyumviro bishasha, imvo nshasha z’ukwisamaza canke ubwoko bushasha bwakwo? Woba uca wumva wohejwe gukevya umwanya uwukura ku vyo utegerezwa vyo mu vy’impwemu kugira ngo ukurikirane mwene ivyo bintu? Kugenza gutyo bishobora kuniga iyunguruza ryo mu vy’impwemu. Ese ingene birushiriza kuba ivy’ubukerebutsi gucungura umwanya ku bw’ugukurikirana ivy’impwemu!—Ef. 5:15, 16.

Ukuntu ukorana n’abandi bantu birashobora kandi kuba icerekana iyunguruza ryawe ryo mu vy’impwemu. Woba warize ‘kugiriranira imbabazi, guharirana’ n’abavukanyi be n’abavukanyikazi bawe?—Ef. 4:32.

Iterambere ryawe mu gukora ibintu mu buryo bwa Yehova rikwiye kugaragara mw’ishengero no mu rugo iwanyu. Rikwiye kandi kwibonekeza kw’ishure, mu bibanza vy’abantu bose hamwe n’aho ukorera akazi. (Ef. 5:21–6:9) Nimba mu bihe mwene ivyo hose uriko ugaragaza kamere ziva ku Mana ku rugero rurushirije kuba urwuzuye, iyunguruza ryawe rero ririko ririgaragaza.

Koresha Ingabirano Ufise

Yehova yarahaye umwumwe wese muri twebwe ububasha n’ubuhanga. Yiteze ko tubikoresha ku neza y’abandi, ku buryo biciye kuri twebwe ashobora guserura ubuntu bwiwe tudakwiriye. Kuri ivyo, intumwa Petero yanditse ati: “Nk’uk’umuntu wese yagabiwe ingabire muzigaburirane, nk’uko bibereye ababgiriza beza b’ubuntu bg’Imana.” (1 Pet. 4:10) Wewe ububwiriza bwawe uriko uburangura gute?

Petero abandanya ati: “Umuntu iy’avuze, avuge nk’ūbivugishijwe n’Imana.” (1 Pet. 4:11) Uwo murongo urashimika kw’ibanga ryo kuvuga mu buryo buhuye rwose n’Ijambo ry’Imana, kugira ngo Imana ininahazwe. Uburyo ukwo kuvuga kugirwa bukwiye na bwo nyene kuninahaza Yehova. Ukumenyerezwa gutangwa biciye kw’Ishure ry’Ubusuku bwa Gitewokarasi kurashobora kugufasha gukoresha ingabirano ufise muri mwene ubwo buryo​—ukaninahaza Imana biciye mu buryo ufasha abandi. Ivyo ubigize intumbero yawe, ukwiye kugera iterambere ryawe mw’ishure gute?

Aho kwiyumvira amanuta umaze kurangiza ku gafomu kawe k’impanuro z’ivy’ukuvuga, canke ubwoko bw’ibigabu wahawe, nuzirikane aho imenyerezwa ryawe ryagejeje mu kuryohora agaciro k’ikimazi utanga c’ishemezo. Iryo shure riradutegura kugira turushirize kuba kirumara mu busuku bwo mu ndimiro. Niwibaze rero uti: ‘Noba vy’ukuri ntegura ivyo nja kuvuga mu murimo wo mu ndimiro? Noba naramenye kwerekana ko mbabara vy’ukuri abo nshingira intahe? Noba nshiraho umushinge w’amasubirayo mu gusigira abantu ikibazo co kuzoganirako hanyuma? Nimba ndiko ndigana Bibiliya n’umuntu kanaka, noba ndiko ndagira akigoro ko kuryohora bwa mwigisha ashikira umutima?’

Ntubone iterambere nk’uduteka gusa tw’umurimo uterwa. Iyunguruza ryawe ntiribonerwa gusa mu kigabu ushingwa, ahubwo ni mu vyo ugikoza. Nimba uhawe ikigabu kirimwo ukwigisha, niwibaze uti: ‘Noba vy’ukuri nakoresheje ubuhanga bwo kwigisha? Noba nashikirije nya mayagwa mu buryo vyagize ico bihindura mu buzima bw’abayumvise?’

Kwibwiriza birakenewe kubera ko wingingwa ngo ukoreshe ingabirano ufise. Woba wibwiriza gukorana n’abandi mu busuku bwo mu ndimiro? Woba urondera uturyo two gufasha abashasha, abakiri bato canke abamugaye bo mu bagize ishengero ryanyu? Woba witanga uvyishakiye mu gusukura Ingoro y’Ubwami canke mu gusahiriza mu buryo butandukanye ku mahwaniro no ku materaniro? Woba ushobora kuza uriyandikisha uko igihe gitashe ngo ube umutsimvyi mufasha? Woba ushoboye gusukura bwa mutsimvyi asanzwe canke ugafasha mw’ishengero ririmwo umukeno munini kuruta? Nimba uri umuvukanyi, woba uriko uregereza kugira ngo ushitse kamere zisabwa n’Ivyanditswe ku bakozi b’ishengero n’abakurambere? Umutima ukunze ugira wo gusahiriza no kwemera gushingwa amabanga ni ikimenyetso c’uko wunguruje.—Zab. 110:3.

Uruhara Uguca Uruma Kurangura

Nimba wumva hari ivyo udashobora bivuye ku kuba utaraca uruma mu kubaho kwa gikirisu, rema. Ijambo ry’Imana rishobora gutuma “uwutaraca uruma aba inkerebutsi.” (Zab. 19:7, NW; Zab. 119:130; Imig. 1:1-4) Gukurikiza impanuro ya Bibiliya biratuma dushobora kwungukira ku bukerebutsi butagira agasembwa bwa Yehova, ari na bwo bw’agaciro kuruta ukundi kumenya ukwo ari kwo kwose umuntu aronka biciye mu guca uruma vyonyene. Yamara, uko tugira iyunguruza mu murimo turangurira Yehova, turunguka koko uguca uruma kw’agaciro. Dushobora none kugukoresha neza gute?

Kubera ko umuntu aba yaraciye mu bintu bitandukanye mu buzima, yohava yoshwa kwiyumvira gutya: ‘Ibi bintu nari maze kubicamwo. Ndazi ico nogira.’ Ubwo iyo yoba ari yo nzira y’ubukerebutsi? Mu Migani 3:7 hatugabisha hati: “Ntukiyite umunyabgenge wewe ubgawe.” Uguca uruma ntikwobura kudufasha tukarushiriza kubona ibintu tworimbura igihe turiko dutunganya ibintu binaka mu buzima. Mugabo nimba turiko turagira iterambere mu vy’impwemu, uguca uruma kwacu gukwiye kandi kwandika mu mizirikanyi no mu mitima yacu yuko dukeneye umuhezagiro wa Yehova kugira turoranirwe. Iyunguruza ryacu riragaragara rero, atari gusa mu guhangana n’ibintu twiyizigiye, ahubwo mu kuba twiteguye guhindukirira Yehova kugira aduhe ubuyobozi mu buzima bwacu. Ukwizigira kwacu kurerekana yuko ata kintu na kimwe gishobora gushika atari uko Yehova akirekuye, bikerekanwa kandi n’uko tugumya imigenderanire iranga ukwizigira dufitaniye na Dawe wo mw’ijuru.

Nugume Ushingīra Ibiri Imbere

Intumwa Paulo, naho yari akuze mu vy’impwemu, akaba n’Umukirisu yasizwe, yaremeye yuko yari akeneye kuguma ‘ashingīra ibiri imbere.’ (Flp. 3:13-16) Woba nawe ubona ibintu muri ubwo buryo?

None wewe iterambere urigejeje he? Nugere ikura ryawe ufatiye ku kuntu umaze kwambara wa muntu mushasha ukihwanya, ku kuntu uyobokera ubusegaba bwa Yehova bimwe bishitse, hamwe no ku kuntu uriko urakoresha ingabirano ufise ushirutse ubute kugira utere iteka Yehova. Uko wungukira ku nyigisho yo mw’Ishure ry’Ubusuku bwa Gitewokarasi, kamere zerekanwa mw’Ijambo ry’Imana zikwiye buhorobuhoro kuza ziribonekeza mu kungene uvuga no mu kungene wigisha. Nugume utumbereye iyo mice y’ikura ryawe. Egome, nuyinezererwe, iyunguruza ryawe na ryo ntirizoteba kugaragara.