Niwiyubare ku bijanye n’‘ubuhanga bwawe bwo kwigisha’

“Wamamaze rya jambo, . . . ukangire, ukankamire, uhimirize, mu kwiyumanganya kwose n’ubuhanga bwo kwigisha”.​—2 TIM. 4:2.

1. Ni igiki Yezu yategetse abigishwa biwe, kandi ni akarorero akahe yabasigiye?

NAHO Yezu yakoze ibikorwa bitangaje vy’ugukiza indwara mu gihe c’ubusuku bwiwe bwo kw’isi, ahanini ntiyabonwa ko ari uwukiza indwara canke uwukora ibitangaro, ariko yari azwi ko ari umwigisha (Mrk. 12:19; 13:1). Kumenyesha abandi inkuru nziza y’Ubwami bw’Imana ni co kintu Yezu yashira imbere, kandi ukwo ni na ko biri ku bayoboke biwe bo muri iki gihe. Abakirisu bashinzwe kubandanya bakora ico gikorwa co guhindura abantu abigishwa mu kubigisha gukurikiza ibintu vyose Yezu yabategetse.​—Mat. 28:19, 20.

2. Ni igiki dukeneye gukora kugira ngo dushitse igikorwa twashinzwe co kwamamaza?

² Kugira ngo dushitse igikorwa twashinzwe co guhindura abantu abigishwa, twama nantaryo turaba ingene tworyohora ubushobozi bwacu bwo kwigisha. Intumwa Paulo yarashimitse ku kamaro k’ubwo buhinga igihe yandikira Timoteyo, uwo bari basangiye ibanga ryo kwamamaza. Yavuze ati: “Wame wiyubara ubwawe no ku nyigisho yawe. Ugume muri ivyo bintu, kuko niwakora ivyo uzokwikiza ugakiza n’abakwumviriza” (1 Tim. 4:16). Ukwo kwigisha Paulo yari afise ku muzirikanyi si ugupfa kuronsa umuntu ubumenyi gusa. Abasuku bakirisu babishoboye barakora abantu ku mutima bakongera bakabavyurira umutima wo kugira ivyo bahinduye mu buzima bwabo. Ivyo bisaba ubuhanga. None twoshobora gute gutsimbataza ubwo “buhanga bwo kwigisha” igihe dushikiriza abandi inkuru nziza y’Ubwami bw’Imana?​—2 Tim. 4:2.

Nutsimbataze “ubuhanga bwo kwigisha”

3, 4. (a) Dushobora gute gutsimbataza “ubuhanga bwo kwigisha”? (b) Ishure ry’ubusuku bwa gitewokarasi ridufasha gute kuba abigisha babishoboye?

³ Inyizamvugo imwe isobanura “ubuhanga” ko ari “ubuhinga umuntu aronka biciye ku kwiga, ku kwimenyereza, canke ku kwihweza”. Turakeneye kwitwararika ivyo bintu bitatu vyose kugira ngo tube abigisha b’inkuru nziza babishoboye. Uburyo bumwe rudende bushobora kudufasha gutahura neza ikintu twipfuza kumenya ni ukuciga tubijanishije n’isengesho (Soma Zaburi 119:27, 34.). Kwihweza abasuku babishoboye igihe baba bariko barigisha, biradufasha kumenya uburyo bakoresha maze tukabigana. Vyongeye, twihatiye kwama dushira mu ngiro ivyo twiga, bizodufasha kuryohora ubushobozi bwacu.​—Luka 6:40; 1 Tim. 4:13-15.

⁴ Yehova ni we Mucishabwenge wacu Mukuru. Abicishije ku gihimba kiboneka c’ishirahamwe ryiwe, araronsa abasavyi biwe bo kw’isi ubuyobozi bujanye n’ukuntu bakwiye gushitsa igikorwa bashinzwe co kwamamaza (Yes. 30:20, 21). Ku bijanye n’ivyo, uko indwi itashe buri shengero riragira Ishure ry’ubusuku bwa gitewokarasi, rino rikaba rigenewe gufasha abaryiyandikishijemwo bose kuba abamamaji b’Ubwami bw’Imana babishoboye. Bibiliya ni co gitabu nyamukuru gikoreshwa muri iryo shure. Ijambo rya Yehova ryahumetswe ni ryo ritubwira ivyo twokwigisha. Vyongeye, riratwereka uburyo butandukanye bwo kwigisha bw’ingirakamaro kandi bubereye. Ishure ry’ubusuku bwa gitewokarasi ryama ritwibutsa yuko tuzoba abigisha barushirije kuba abahinga nitwashingira inyigisho zacu kw’Ijambo ry’Imana, tugakoresha ibibazo mu buryo bw’ingirakamaro, tukigisha mu buryo bworoshe tukongera tukitwararika abandi bimwe bivuye ku mutima. Nimuze tubanze twihweze ivyo vyiyumviro kimwekimwe ukwaco. Hanyuma turaheza duce irya n’ino ukuntu twokora ku mutima umutohoji wa Bibiliya.

Nushingire inyigisho yawe kw’Ijambo ry’Imana

5. Inyigisho zacu zikwiye kuba zishingiye ku ki, kandi kubera iki?

⁵ Yezu, wa mwigisha ahambaye kuruta abandi bigisha bose, yashingira inyigisho ziwe ku Vyanditswe (Mat. 21:13; Yoh. 6:45; 8:17). Ntiyavuga ivyo yibwiye, ariko yavuga ivyo yabwiwe n’Uwamurungitse (Yoh. 7:16-18). Ako ni ko karorero dukurikiza. Ku bw’ivyo, ivyo tuvuga mu gihe c’ubusuku bw’inzu ku nzu canke mu gihe c’inyigisho za Bibiliya zo ku mihana bikwiye kuba vyerekana ko Ijambo ry’Imana ari bwo buyobozi twisunga (2 Tim. 3:16, 17). Naho twoba dushoboye kuzirikana ku bintu mu buryo buranga ubwenge gute, ivyo ntibishora na gato kugereranywa n’agaciro k’Ivyanditswe vyahumetswe be n’ububasha bwavyo. Bibiliya irafise ububasha. Kugira ngo tugerageze gufasha umutohoji gutahura iciyumviro ico ari co cose, uburyo bwiza kuruta ubundi dushobora gukoresha ni ukumusaba kwisomera ico Ivyanditswe bikivugako.​—Soma Abaheburayo 4:12.

6. Umwigisha ashobora gute kwiyemeza neza yuko umutohoji yatahuye koko amayagwa bariko bararimbura?

⁶ Ariko ntiwumve, ivyo ntibisobanura yuko umwigisha mukirisu adakeneye kwitegurira inyigisho ya Bibiliya. Ahubwo riho, umwigisha arakwiye kuzirikana yitonze imbere y’igihe kugira ngo ahitemwo mu vyanditswe vyatanzwe ivyo azosoma muri Bibiliya mu gihe c’inyigisho canke ivyo azosaba umutohoji gusoma. Mu bisanzwe, ni vyiza gusoma birya vyanditswe usanga ari vyo shimikiro ry’ivyo twemera. N’ikindi kandi, birakenewe ko dufasha uwo mutohoji gutahura ico icanditswe cose dusomye gisobanura.​—1 Kor. 14:8, 9.

Nukoreshe ibibazo ngirakamaro

7. Ni kubera iki gukoresha ibibazo ari uburyo bwiza bwo kwigisha?

⁷ Ugukoresha neza ibibazo biratuma umutohoji azirikana bikongera bigafasha umwigisha kumukora ku mutima. Ku bw’ivyo, aho gusigurira ivyanditswe umutohoji wigisha, numusabe abe ari we abigusigurira. Rimwe na rimwe wosanga bikenewe ko ubaza umutohoji wigisha ikindi kibazo kimwe canke mbere nka bingahe, kugira ngo umufashe gutahura neza ivyo muriko muriga. Igihe ukoresha neza ibibazo mu kwigisha umutohoji, ku bwa ngingo, ntuba uriko uramufasha gutahura gusa imvo zatumye mushika ku ciyumviro kinaka, ariko kandi uba uriko uratuma na we ubwiwe ajijuka ku bijanye n’ico ciyumviro.​—Mat. 17:24-26; Luka 10:36, 37.

8. Dushobora gute kumenya neza ikiri mu mutima w’umutohoji?

⁸ Uburyo bwo kwiga bukoreshwa mu bitabu vyacu ni ubw’ibibazo n’inyishu. Nta gukeka ko abantu benshi mwigana Bibiliya bazoshobora guca bishura ibibazo vyanditswe bakoresheje ivyavuzwe mu ngingo zijanye n’ivyo bibazo. Yamara, umwigisha azi kubona neza ibintu ntazohimbarwa gusa n’izo nyishu nziza zitangwa. Nk’akarorero, umutohoji yoshobora gusigura neza ivyo Bibiliya ivuga ku bijanye n’ubusambanyi (1 Kor. 6:18). Yamara rero, kubaza ubigiranye ubugenge ibibazo bituma umutohoji aserura iryo agona birashobora kwerekana ico uwo mutohoji yiyumvira vy’ukuri ku vyo ariko ariga. Umwigisha rero yoshobora kubaza ati: “Ni kubera iki Bibiliya yiyamiriza ivyo guhuza ibitsina kw’abatubakanye? Wewe ubona gute ico kintu Imana itubuza? Woba wibaza yuko hari iciza na kimwe kiri mu kubaho uhuza n’ingingo mfatirwako z’ukwigenza runtu Imana itanga?”. Inyishu uwo mutohoji atanga kuri mwene ivyo bibazo zirashobora guhishura ikiri mu mutima wiwe.​—Soma Matayo 16:13-17.

Nugume wigisha mu buryo bworoshe

9. Ni igiki dukwiye kugumiza ku muzirikanyi igihe tubwira abandi ico Ivyanditswe bivuga?

⁹ Ibintu vyinshi vyerekeye ukuri kwo mw’Ijambo ry’Imana usanga ubwavyo bisa n’ivyoroshe. Ariko, hari aho wosanga abantu twigana Bibiliya baravurugwa ubwenge n’inyigisho z’idini ry’ikinyoma. Bwa bigisha, dufise ibanga ryo gutuma ivyo Bibiliya ivuga vyoroha gutahura. Abigisha babishoboye bashikiriza inyigisho mu buryo bworoshe, butomoye kandi butagira amakosa. Nitwakurikiza ubwo buyobozi, ntituzotuma ukuri kurushiriza kuba ukugoye gutahura kuruta uko kwoba gusanzwe kumeze. Turirinda kuvuga ibintu vy’ido n’ido bidakenewe. Ntibikenewe ko tugira ico tuvuze ku mice yose y’icanditswe tuba duhejeje gusoma. Ahubwo, twibanda gusa ku muce nyamukuru ushira ahabona iciyumviro tuba turiko turarimbura. Uko umutohoji agenda aratera imbere mu gutahura kwiwe ni ko azogenda araha agaciro ukuri kwo mu Vyanditswe kugera kure.​—Heb. 5:13, 14.

10. Ni ibintu ibihe bidufasha kumenya uko amayagwa tworimbura mu kiringo kimwe c’inyigisho ya Bibiliya yoba angana?

¹⁰ Dukwiye kurimbura amayagwa angana gute mu kiringo kimwe c’inyigisho? Kugira tuyamenye, birasaba ko dukoresha ugutahura. Naho ubushobozi umutohoji be n’umwigisha bafise hamwe n’uko ivyabo vyifashe usanga bitandukanye, dukwiye kwama twibuka yuko intumbero dufise bwa bigisha ari iyo gufasha umutohoji kugira ukwizera gukomeye. Ni co gituma tumuronsa umwanya uhagije wo gusoma, gutahura no kwemera ukuri dusanga mw’Ijambo ry’Imana. Ntiturimbura amayagwa arengeye ayo ashobora gutahura. Muri ico gihe nyene, tuguma dutuma iyo nyigisho tugira itera imbere. Umutohoji twigisha amaze gutahura iciyumviro kinaka, duca tuja ku gikurikira.​—Kol. 2:6, 7.

11. Ni icigwa ikihe kijanye n’ukwigisha dushobora kwigira ku ntumwa Paulo?

¹¹ Intumwa Paulo yaguma ashikiriza ubutumwa bwerekeye inkuru nziza mu buryo bworoshe igihe yaba ariko arayaga n’abantu bashasha. Naho yari yarize amashure menshi, yaririnda gukoresha imvugo ihanitse (Soma 1 Abakorinto 2:1, 2.). Ukuri kwo mu Vyanditswe gushikirijwe mu buryo bworoshe kurakwegera abantu b’imitima nziraburyarya kukongera kukabamara akanyota. Si ngombwa ngo umuntu abe yaraminuje kugira ngo atahure ukwo kuri.​—Mat. 11:25; Ibik. 4:13; 1 Kor. 1:26, 27.

Nufashe abatohoji bahe agaciro ivyo biga

12, 13. Ni igiki cotuma umutohoji ashira mu ngiro ivyo ariko ariga? Bitangire akarorero.

¹² Kugira ngo ivyo twigisha bibe ngirakamaro bikwiye kuba bikora ku mutima umutohoji twigisha. Ni ngombwa ko uwo mutohoji atahura ukuntu ivyo tumwigisha bimwerekeye ubwiwe, ukuntu yovyungukirako be n’ukuntu ubuzima bwiwe bworyohorwa aramutse akurikije ubuyobozi bwo mu Vyanditswe.​—Yes. 48:17, 18.

¹³ Nk’akarorero, hari aho twoba turiko turarimbura ibivugwa mu Baheburayo 10:24, 25, aharemesha abakirisu gukoranira hamwe n’abo basangiye ukwizera kugira ngo baremeshanye biciye ku Vyanditswe no kugira ngo bifatanye mu buryo burangwa urukundo. Niba uwo mutohoji ataritaba amakoraniro y’ishengero, twoshobora kumusigurira muri make ukuntu ayo makoraniro agirwa be n’ibizorimburwa kw’ikoraniro rinaka ryimirije. Twoshobora kumubwira yuko amakoraniro y’ishengero ari mu bigize ugusenga kwacu tukongera tukamwereka ukuntu twebwe ubwacu tuyungukirako. Twoshobora rero guca tumutumira kuyitaba. Icipfuzo uwo mutohoji afise co kugamburukira Yehova ni co gikwiye kumuvyurira umutima wo gukurikiza ivyo Ivyanditswe bimutegeka gukora; ntakwiye kubitumwa n’ugushaka guhimbara uwumugirira inyigisho.​—Gal. 6:4, 5.

14, 15. (a) Ni ibiki umutohoji wa Bibiliya ashobora kumenya ku vyerekeye Yehova? (b) Kumenya kamere z’Imana bishobora gute kugirira akamaro umutohoji wa Bibiliya?

¹⁴ Ikintu nyamukuru abatohoji bungukira ku kwiga Bibiliya no ku gushira mu ngiro ingingo ngenderwako zo muri yo ni ukumenya yuko Yehova abaho koko no kumukunda (Yes. 42:8). Ntibamenya gusa ko ari Umuvyeyi munyarukundo, Umuremyi w’ibiriho vyose akaba na We vyegukira, ariko kandi baramenya yuko ahishurira kamere ziwe be n’ubushobozi bwiwe abamukunda bakanamusukurira (Soma Kuvayo 34:6, 7.). Igihe Musa yari yimirije kuyobora ihanga rya Isirayeli arikuye mu buja bwo mu Misiri, Yehova yarivuze uwo ari we akoresheje iyi mvugo igira iti: “Nzoba ico nzoba” (Kuv. 3:13-15; NW). Ivyo vyasobanura yuko Yehova yobaye ico ari co cose vyobaye ngombwa ko aba kugira ngo ashitse imigambi yiwe ku bw’ineza y’abasavyi biwe yitoranirije. Gutyo, Abisirayeli baramenye yuko Yehova ari Umurokozi, Umurwanantambara, Umutanzi, Uwushitsa ivyo yasezeranye akaba n’Uwabafasha mu bundi buryo butandukanye.​—Kuv. 15:2, 3; 16: 2-5; Yos. 23:14.

¹⁵ Abatohoji twigisha, mu buzima bwabo vyoshika Yehova ntabafashe mu buryo bw’igitangaro nka kumwe yabigirira Musa. Yamara rero, uko abo batohoji barushiriza kugira ukwizera no guha agaciro ivyo biga kandi bagatangura kuza barabishira mu ngiro, ata gukeka bazobona ko bikenewe yuko biheka kuri Yehova kugira abaronse umutima rugabo, ubukerebutsi be n’ubuyobozi. Nibabigenza gutyo, na bo nyene bazomenya ko Yehova ari we Mutanzi w’impanuro w’umunyabukerebutsi kandi w’umwizigirwa, ko ari We abakingira akaba na We abaronsa ivyo bakeneye vyose atitangiriye itama.​—Zab. 55:22; 63:7; Imig. 3:5, 6.

Niwitwararike abandi ubigiranye urukundo

16. Ni kubera iki ubushobozi bwo kwigisha dusanganywe atari co kintu gihambaye kuruta ibindi gituma tuba abigishwa babishoboye?

¹⁶ Niba ubona yuko utari umuhinga mu kwigisha nk’uko wavyipfuza, gumya umutima. Yehova na Yezu ni bo bahagarikiye porogarama y’ukwigisha iriko iragirwa hirya no hino kw’isi muri iki gihe (Ibik. 1:7, 8; Ivyah. 14:6). Barashobora guhezagira utwigoro tugira kugira ngo amajambo tuvuga ashike ku co twipfuriza umuntu w’umutima ugororotse (Yoh. 6:44). Urukundo rutarimwo uburyarya umwigisha akunda umutohoji yigisha rurashobora gusubirira ikintu cose uwo mwigisha yoba ahajije ku bijanye n’ubushobozi bwo kwigisha asanganywe. Intumwa Paulo yarerekanye ko yatahura akamaro ko gukunda abariko bigishwa.​—Soma 1 Abanyatesalonika 2:7, 8.

17. Dushobora gute kwitwararika bimwe bivuye ku mutima umutohoji wa Bibiliya umwumwe wese ukwiwe?

¹⁷ Na twebwe nyene turashobora kwitwararika bimwe bivuye ku mutima umutohoji wa Bibiliya umwumwe wese mu gufata umwanya tukamumenya. Mu gihe twoza turaganira na we ku ngingo ngenderwako zo mu Vyanditswe, vyoshoboka ko tumenya neza uko ivyiwe vyifashe. Twoshobora kuraba yuko amaze guhuza ubuzima bwiwe n’ibintu bimwebimwe vyo muri Bibiliya amaze kwiga. Ashobora kuba agikeneye kugira ivyo ahinduye mu yindi mice. Mu gihe dufashije uwo mutohoji kubona ingene ivyo yiga mu gihe c’inyigisho ya Bibiliya bimwerekeye ubwiwe, turashobora kumusahiriza tubigiranye urukundo agacika umwigishwa wa Kristu w’ukuri.

18. Ni kubera iki bihambaye gusenga turi kumwe n’umutohoji twigisha kandi tukadomako ibimwerekeye?

¹⁸ Igihambaye kuruta vyose, turashobora gusenga turi kumwe n’umutohoji twigisha kandi tukadomako ibimwerekeye. Uwo mutohoji arakwiye kubona neza yuko dufise intumbero yo kumufasha kugira ngo arushirize kumenya neza Umuremyi wiwe, kumwiyegereza no kwungukira ku buyobozi atanga (Soma Zaburi 25:4, 5.). Nitwasenga dusaba ngo Yehova ahezagire utwigoro umutohoji agira kugira ngo ashire mu ngiro ivyo ariko ariga, azobona yuko gucika ‘uwukora rya jambo’ bihambaye (Yak. 1:22). N’ikindi kandi, uko uwo mutohoji yumviriza amasengesho avuye ku mutuma dutura, ni ko na we nyene azorushiriza kumenya ukuntu akwiye gusenga. Ese ukuntu ari akanyamuneza gufasha abatohoji ba Bibiliya kugira ngo batsimbataze ubucuti bafitaniye na Yehova!

19. Ni igiki kirimburwa mu kiganiro gikurikira?

¹⁹ Biraremesha kumenya ko Ivyabona barenga imiliyoni zitandatu n’igice hirya no hino kw’isi bariko baratsimbataza “ubuhanga bwo kwigisha”, barondera gufasha abantu b’umutima nziraburyarya kugira ngo bakurikize ibintu vyose Yezu yabategetse. Ni ivyiza ibihe biriko birava mu gikorwa co kwamamaza turangura? Inyishu y’ico kibazo irarimburwa mu kiganiro gikurikira.

Woba uvyibuka?

• Ni kubera iki abakirisu bakeneye gutsimbataza “ubuhanga bwo kwigisha”?

• Ni uburyo butandukanye ubuhe dushobora gukoresha kugira ngo tube abigisha babishoboye kuruta?

• Ni igiki gishobora gusubirira ikintu cose twoba duhajije ku bijanye n’ubushobozi bwo kwigisha dusanganywe?

[Ifoto ku rup. 9]

Woba wariyandikishije mw’Ishure ry’ubusuku bwa gitewokarasi?

[Ifoto ku rup. 10]

Ni kubera iki bihambaye gusaba umutohoji ngo asome muri Bibiliya?

[Ifoto ku rup. 12]

Nusenge uri kumwe n’umutohoji wigisha kandi udomeko ibimwerekeye