Ububasha bw’Imana burabonekera mu nyenyeri
“Ni mwunamure amaso yanyu murābe hejuru, murābe uwaremye izo nyenyeri uw’ari we, asohora ingabo zazo mu bitigiri: azihamagara zose mu mazina; kubg’ububasha bg’ubushobozi bgiwe, no kubg’inkomezi ziwe nyinshi, nta n’imwe ihara.”—YESAYA 40:26.
IZUBA ni ikinyenyeri gifise gusa ubunini bugereranye. Naho ari ukwo, rifise ubunini buruta ubw’isi incuro 330.000. Nyinshi mu nyenyeri ziri hafi y’isi ni ntonto uzigereranije n’izuba. Ariko rero izindi nyenyeri, nk’iyo bita V382 Cygni, ziraruta izuba n’imiburiburi incuro 27.
None izuba rirekura ubushuhe bungana gute? Niwiyumvire ukuntu umuriro woba ukaze nka hamwe wewe woba uri ku bilometero 15 uvuye ahari uwo muriro, mugabo ukaguma wumva ubushuhe bwawo bukwokera. Izuba riri nko ku bilometero imiliyoni 150 uvuye kw’isi. Yamara, iyo izuba ririko riraka cane, ubushuhe bwaryo burashobora kubabura uruhu rw’umuntu. Igitangaje, nk’ic’umuliyaridi kimwe gusa c’ubushuhe bw’izuba ni co gishika kw’isi. Mugabo ntiwumve, ako gace inzatsa k’ubushuhe bw’izuba karahagije kugira ngo ibiri n’ubuzima bishobore kubaho kuri uno mubumbe.
Kukaba nkako, abanyasiyansi baraharuye basanga ubushuhe bwose hamwe burekurwa n’izuba ryonyene, buhagije kugira ngo bubesheho ibintu bifise ubuzima vyoba biba ku mibumbe imiliyaridi ibihumbi mirongo itatu na kimwe (31.000.000.000.000) imeze nk’iyi si. Canke na ho, kugira ngo duharure mu bundi buryo ukuntu ubwo bushuhe izuba rirekura ari umurengera, ikigo kimwe kiza kiramenyesha ibijanye n’ukuntu ibihe bizoba vyifashe mu kirere (Space Weather Prediction Center [SWPC]) kivuga biciye ku muhora waco wo kuri Internet yuko, hamwe vyoshoboka ko ubushuhe bwose izuba rirekura bwokorakoranirizwa hamwe mu musegunda umwe gusa, ubwo bushuhe bwotuma Leta Zunze Ubumwe za Amerika zironka “umuyagankuba uhagije zokoresha mu myaka 9.000.000 iri imbere, ufatiye ku rugero rw’uwusanzwe ukoreshwa” muri ico gihugu.
Ubushuhe bw’izuba buva mu ntimatima yaryo, iyo ikaba ikora nk’imashini ituma twa duhimba dutoduto twitwa atome tuza turamenagurana, gutyo bigatuma haboneka ubushuhe bwinshi. Izuba ni rinini cane, intimatima yaryo na yo ikaba yitsindagiye cane, ku buryo bisaba imyaka amamiliyoni n’amamiliyoni kugira ngo ubushuhe buba bwahinguriwe muri iyo ntimatima bushobore gushika ku buringanire bwaryo. Biciye kuri wa muhora wo kuri Internet, ca kigo (SWPC) kivuga yuko “hamwe muri kino gihe izuba ryohagarika guhingura ubushuhe, hoca imyaka 50.000.000 kugira ngo abantu baba kw’isi batangure gushikirwa n’ingaruka zavyo bimwe vyibonekeza.”
Ubu na ho rimbura iki kintu: Igihe wunamuye amaso yawe ukaraba kw’ijuru mw’ijoro rikeye, urabona inyenyeri ibihumbi n’ibihumbi, imwimwe yose ikaba irekura inguvu zitagira uko zingana, cokimwe n’izuba. Vyongeye, abanyasiyansi baharura yuko mu kirere hariho inyenyeri amamiliyaridi n’amamiliyaridi.
None izo nyenyeri zose zakomotse hehe? Abashakashatsi benshi muri kino gihe bemera yuko bivuye ku mvo zinaka n’ubu bataratahura, ubu haheze nk’imyaka imiliyaridi 14 ikirere kibayeho giturumbuka. Bibiliya yo ivuga mu buryo butomoye iti: “Ubga mbere na mbere Imana yaremye ijuru n’isi.” (Itanguriro 1:1) Ata gukeka, Umwe yarema inyenyeri zikora bwa bimashini amahero bihingura inguvu, arashobora kudondorwa ko afise “ububasha bg’ubushobozi.”—Yesaya 40:26.
Ingene Imana ikoresha ububasha bwayo
Yehova Imana arakoresha ububasha bwiwe kugira ngo ashigikire abakora ivyo agomba. Nk’akarorero, intumwa Paulo yarakoresheje inguvu ziwe mu kwigisha abandi bantu ivyerekeye Imana. Naho Paulo yari umuntu nkatwe, yarashoboye kurangura ibintu vyiza bitari bike naho bamurwanya bimwe bikomeye. None yabishoboye gute? Yariyemereye ko Imana ari yo yamuhaye “ububasha burengeye ubusanzwe.”—2 Abakorinto 4:7-9.
Yehova Imana yarakoresheje kandi ububasha bwiwe mu gusangangura abantu bahonyanze n’ibigirankana ingingo mfatirwako ziwe zigenga ivy’inyifato runtu. Yezu Kristu yaravuze ivyerekeye ugusangangurwa kwa Sodomu na Gomora be n’ivyerekeye Isegenya ryo mu gihe ca Nowa, mu kwerekana uburorero bw’ukuntu Yehova atajaniranya mu gukoresha ububasha bwiwe bwo gusangangura. Yezu yaramenyesheje imbere y’igihe yuko vuba Yehova agiye gusubira gukoresha ububaha bwiwe kugira ngo asangangure abantu batera akagere ingingo mfatirwako ziwe.—Matayo 24:3, 37-39; Luka 17:26-30.
Bituma wumva umerewe gute?
Umaze kuzirikana ku bubasha bw’Imana bubonekera mu nyenyeri, woshobora guca wumva umerewe nka wa Mwami Dawidi, uwavuze ati: “Iyo nitegereje ijuru ryawe, igikorwa c’intoke zawe, n’ukwezi n’inyenyeri, ivyo waremye; umuntu n’iki ah’umwibuka, cank’umwana w’umuntu ah’umugendera?”—Zaburi 8:3, 4.
Vy’ukuri, kumenya yuko ari nk’aho ata co tuvuze twigereranije n’ikirere amahanga, biratuma duca bugufi. Naho ari ukwo, ntidukwiye guterwa ubwoba cane n’ububasha bw’Imana. Yehova yarahumekeye umuhanuzi Yesaya ngo yandike aya majambo asubiriza umutima mu nda agira ati: “Ni we [Imana] aha inkomezi abadendebukiwe, kand’ūtagira intege amwongeramw’inkomezi. Imisore yonadendebukirwa, ikaruha, n’imisore y’imikangara yokwicakw igatemba, arikw abīteze Uhoraho bazokwama biyubura mu nkomezi nsha; bazodūgisha amababa nk’inkukuma, biruke ntibaruhe, bagende ntibadendebukirwe.”—Yesaya 40:29-31.
Nimba wipfuza gukora ivyo Imana igomba, urashobora gushira amazinda ko izokuronsa impwemu yayo nyeranda kugira ngo ibigufashemwo. Ariko rero, iyo mpwemu utegerezwa kuyisaba. (Luka 11:13) Ubifashijwemwo n’Imana, urashobora kwihanganira ingorane iyo ari yo yose yogushikira maze ukaronka inkomezi zo gukora ibibereye.—Abafilipi 4:13.
[Iciyumviro ku rup. 7]
Ubifashijwemwo n’Imana, urashobora kuronka inkomezi zo gukora ibibereye
[Amafoto ku rup. 7]
Uvuye hejuru ibubamfu ukurikiza uko urushinge rw’isaha ruzunguruka: Igalagisi yitwa Whirlpool, akagwi k’inyenyeri zitwa Pléiades, igipfungu c’umukungugu be n’umwuka citwa Orion, igalagisi yitwa Andromède
[Amafoto ku rup. 7]
Izuba rifise ubunini buruta ubw’isi incuro 330.000
[Abo dukesha ifoto]
Pléiades: Ifoto ya NASA, ESA be na AURA/Caltech; izo zindi zose ziri aho haruguru: National Optical Astronomy Observatories