Ingene Yezu ashimagiza ubugororotsi bw’Imana

“Imana [yashizeho Kristu] bwa shikanwa ku bw’impongano biciye ku kwizera amaraso yiwe. Kwari ukugira ngo yerekane ubugororotsi bwayo bwite.”​—ROM. 3:25.

1, 2. (a) Bibiliya itwigisha iki ku bijanye n’ukuntu abantu bamerewe? (b) Ni ibibazo ibihe birimburwa muri iki kiganiro?

INKURU yo muri Bibiliya yerekeye ubugarariji bwabaye mw’itongo ry’i Edeni irazwi cane. Twese turashikirwa n’ingaruka z’igicumuro ca Adamu nk’uko bisigurwa muri aya majambo agira ati: “Igicumuro cinjiye mw’isi biciye ku muntu umwe urupfu na rwo [ruza] biciye ku gicumuro, gutyo urupfu [rukwira] ku bantu bose kuko bose bari baracumuye.” (Rom. 5:12) Naho twita ku rutare kugira ngo dukore ibigororotse, turakora amakosa, tukaba dukeneye ko Imana iyatubabarira. Mbere n’intumwa Paulo yaraseruye umubabaro yari afise ati: “Iciza nshaka [si] co nkora, mugabo ikibi ntashaka kikaba ari co nkora. Ewe jewe ndagowe!”​—Rom. 7:19, 24.

² Ukuba turi abanyabicumuro bituma havyuka ibi bibazo bihambaye: Vyashobotse gute ngo Yezu w’i Nazareti avuke atagira igicumuro twese twarazwe, kandi ni kubera iki yabatijwe? Ukuntu Yezu yabayeho vyashimagije gute ubugororotsi bwa Yehova? N’igihambaye kuruta, urupfu rwa Yezu rwaranguye iki?

Ubugororotsi bw’Imana buharirizwa

3. Shetani yahenze Eva gute?

³ Abavyeyi bacu ba mbere Adamu na Eva barateye akagere n’ubupfu n’akantu ubusegaba bw’Imana maze bahitamwo gutegekwa na “ya nzoka yo mu ntango, iyitwa Mubesheranyi na Shetani.” (Ivyah. 12:9) Rimbura ingene vyagenze. Shetani yaravyuye ibihari ku bijanye n’uko Yehova Imana yoba ategeka mu buryo bugororotse. Ivyo yabigize mu kubaza Eva ati: “Mbega n’ivy’ukuri koko yukw Imana yavuze, ngo Ntimurye ku giti na kimwe co mur’iri tongo?” Eva yarasubiyemwo itegeko ritomoye Imana yari yaratanze ryavuga yuko igiti kimwe kizwi neza ari co batari bakwiye gukorako, atari aho na ho bagapfa. Shetani yaciye yagiriza Imana yuko ibesha. Uwo Mubesheranyi yavuze ati: “Haba n’intete ntimuzopfa.” Yabandanije guhenda Eva kugira ngo yemere yuko hariho ikintu ciza Imana yariko irabima be n’uko aramutse ariye ico camwa, yociye amera nk’Imana, akagira umwidegemvyo wo kuza arihitiramwo ikibereye n’ikitabereye.​—Ita. 3:1-5.

4. Vyagenze gute ngo abantu batwarwe n’ubutegetsi bwa Shetani burwanya Imana?

⁴ Muri rusangi, Shetani yashatse kuvuga yuko abantu borushirije kugira agahimbare hamwe batokwisunga Imana. Aho kugira ngo Adamu ashigikire ukugororoka kw’ubusegaba bw’Imana, yarumvirije umugore wiwe maze arifatanya na we mu kurya ca camwa cari kibujijwe. Gutyo, Adamu ntiyari akiboneka ko atagira agasembwa imbere ya Yehova maze atuma tuja munsi y’ingǒgo icinyiza y’icaha n’urupfu. Muri ico gihe nyene, abantu baciye batwarwa n’ubutegetsi burwanya Imana bwa Shetani, we “kimana c’iyi si.”​—2 Kor. 4:4, Ubwuzure Bushasha; Rom. 7:14.

5. (a) Yehova yashikije gute ijambo ryiwe? (b) Ni icizigiro ikihe Imana yahaye abokomotse kuri Adamu na Eva?

⁵ Mu gushitsa ijambo ryiwe ryama rivuga ukuri, Yehova yaraciriye urwo gupfa Adamu na Eva. (Ita. 3:16-19) Mugabo ivyo ntivyasobanura yuko umugambi w’Imana uhagaze. Ntibikabe! Igihe Yehova yariko aracira urubanza Adamu na Eva yarahaye abobakomotseko imvo nziza igitangaza yotumye bagira icizigiro. Ivyo yabigize mu kumenyekanisha umugambi yari afise wo gutuma haboneka “uruvyaro” Shetani yokomerekeje igitsintsiri. Ariko rero, urwo Ruvyaro rwasezeranywe rwokize ico gikomere co ku gitsintsiri maze ‘rugakomeretsa Shetani umutwe.’ (Ita. 3:15) Bibiliya iratanga ayandi makuru ku bijanye n’ico ciyumviro mu kuvuga ku vyerekeye Yezu Kristu iti: “Ni co gituma Umwana w’Imana yerekanywe: kugira ngo asambure ibikorwa vya wa Mubesheranyi.” (1 Yoh. 3:8) Ariko none inyifato ya Yezu be n’urupfu rwiwe vyashimagije gute ubugororotsi bw’Imana?

Ico ibatisimu ya Yezu isobanura

6. Tumenya gute yuko Yezu atarazwe icaha na Adamu?

⁶ Yezu ari umugabo, yategerezwa kuba ameze neza na neza nka Adamu igihe atari bwagire agasembwa. (Rom. 5:14; 1 Kor. 15:45) Ivyo bisobanura yuko Yezu yabwirizwa kuvuka atagira agasembwa. None ivyo vyari gushoboka gute? Umumarayika Gaburiyeli yarasiguriye mu buryo butomoye nyina wa Yezu ari we Mariya ati: “Impwemu nyeranda izokuzako, kandi ububasha bwa Musumbavyose buzogutwikiriza igitutu. Ni co gituma kandi ikizovuka kizokwitwa ceranda, Umwana w’Imana.” (Luka 1:35) Igihe Yezu yari akiri umwana, biboneka yuko Mariya yamuhishuriye ibintu bimwebimwe bijanye n’ivuka ryiwe. Ni co gituma, igihe vyashika Mariya na Yozefu se murezi wa Yezu bakamusanga mu rusengero rw’Imana, uwo mwana yari akiri muto yababajije ati: “Ntimwari muzi ko ntegerezwa kuba ndi mu nzu ya Data?” (Luka 2:49) Biragaragara yuko kuva Yezu akiri muto, yari azi yuko yari Umwana w’Imana. Ku bw’ivyo rero, gushemagiza ubugororotsi bw’Imana cari ikintu gihambaye cane kuri we.

7. Ni ibintu vy’agaciro ibihe Yezu yari afise?

⁷ Yezu yarerekanye ko yitwararika cane ibintu vy’impwemu mu kwama yitaba amakoraniro ajanye no gusenga. Akoresheje ubwenge bwiwe butagira agahaze, ategerezwa kuba yaratahura ikintu cose yaba yumvise akanagisoma mu Vyanditswe vy’Igiheburayo. (Luka 4:16) Vyongeye, hariho ikindi kintu c’agaciro yari afise, ico na co kikaba cari umubiri w’umuntu utagira agasembwa wari gushobora gutangwako inkuka ku bw’ineza y’abantu bose. Igihe Yezu yabatizwa, yariko arasenga kandi ashobora kuba yariko arazirikana ku bijanye n’amajambo y’ubuhanuzi avugwa muri Zaburi 40:6-8.​—Luka 3:21; soma Abaheburayo 10:5-10.a

8. Ni kubera iki Yohani Umubatizi yagerageje kubuza Yezu ngo ntabatizwe?

⁸ Yohani Umubatizi yabanje kugerageza kubuza Yezu ngo ntabatizwe. Uti kubera iki? Kubera ko Yohani yariko aribiza mu mazi Abayuda bwa kigereranyo c’uko bigaye igicumuro co kurenga kw’Itegeko. Kubera ko Yohani yari incuti ya hafi ya Yezu, ategerezwa kuba yari azi yuko Yezu yari umugororotsi akaba rero atari akeneye kwigaya. Yezu yarakuye amazinda Yohani yuko vyari bibereye ko abatizwa. Yezu yasiguye ati: ‘Ukwo ni ko bitubereye gushitsa ibigororotse vyose.’​—Mat. 3:15.

9. Ibatisimu ya Yezu yagereranya iki?

⁹ Kubera ko Yezu yari umuntu atagira agasembwa, yari gushobora gushika ku ciyumviro c’uko we, cokimwe na Adamu, yari ashoboye kuvyara umuryango w’abantu batagira agasembwa. Ariko rero, Yezu ntiyigeze yipfuza kugira kazoza nk’ako kubera yuko ivyo atari vyo Yehova yamugombako. Imana yari yarungitse Yezu kw’isi kugira ngo arangure uruhara rwerekeye rwa Ruvyaro rwasezeranywe, ari rwo Mesiya. Muri urwo ruhara harimwo ivy’uko Yezu yotanze ubuzima bwiwe bw’umuntu atagira agasembwa ngo bube inkuka. (Soma Yesaya 53:5, 6, 12.) Ariko ntiwumve, ibatisimu ya Yezu ntiyari ifise insobanuro imwe n’iyacu. Ntiyasaba ko Yezu yiyegurira Yehova, kuko yari asanzwe ari uwo mw’ihanga rya Isirayeli ryari ryariyeguriye Imana. Ahubwo nyabuna, ibatisimu ya Yezu yagereranya yuko yishikanye kugira ngo akore ivyo Imana igomba nk’uko vyari vyaravuzwe mu Vyanditswe vyerekeye Mesiya.

10. Ukuba Yezu yabwirizwa gukora ivyo Imana igomba ari Mesiya vyarimwo iki, kandi yiyumva gute ku bijanye n’ico kintu?

¹⁰ Mu vyo Yehova yagomba ko Yezu akora harimwo ukwamamaza inkuru nziza yerekeye Ubwami bw’Imana, uguhindura abantu abigishwa, be n’ukubategura kugira ngo bazokore igikorwa co guhindura abantu abigishwa. Ukwishikana kwa Yezu kwarimwo kandi ukuba yari yiteguriye kwihanganira uruhamo be n’ugupfa bunyamaswa mu gushigikira ubusegaba bwa Yehova Imana bugororotse. Kubera ko Yezu yakunda vy’ukuri Se wiwe wo mw’ijuru, yarahimbarwa no gukora ivyo Imana igomba kandi yabona yuko gushikiriza umubiri wiwe ngo ube inkuka cari ikintu kimara akanyota cane. (Yoh. 14:31) Vyongeye, vyaramuhimbara kumenya yuko agaciro k’ubuzima bwiwe butagira agasembwa kashobora gushikirizwa Imana ngo kabe incungu ituma dukurwa mu buja bw’icaha n’urupfu. None Imana yoba yaremeye ko Yezu yishikana kugira ngo yikorere ayo mabanga ahambaye? Neza cane!

11. Yehova yerekanye gute ko yemeye yuko Yezu ari we Mesiya yari yarasezeranywe, canke Kristu?

¹¹ Abanditsi b’Injili bose uko ari bane baremeza ko Yehova Imana yavuze mu buryo butomoye yuko ashima Yezu igihe uno yiburuka mu mazi y’Uruzi Yorodani. Yohani Umubatizi yemeje ati: “Nabonye impwemu imanuka nk’inuma, ivuye mw’ijuru, hanyuma iguma kuri [Yezu]. . . . Nanje narabibonye, kandi narashinze intahe yuko uwo ari we Mwana w’Imana.” (Yoh. 1:32-34) N’ikindi kandi, ico gihe Yehova yamenyesheje ati: “Uyu ni Umwana wanje, umukundwa, uwo nashimye.”​—Mat. 3:17; Mrk. 1:11; Luka 3:22.

Yarabaye umwizigirwa gushika ku rupfu

12. Yezu yamaze imyaka itatu n’inusu akora iki aho amariye kubatizwa?

¹² Mu myaka itatu n’inusu yakurikiye, Yezu yaritanze ata co yisigarije mu kwigisha abantu ivyerekeye Se wiwe be n’ukugororoka kw’ubusegaba bw’Imana. Kugira ingendo mu Gihugu c’isezerano cose n’amaguru vyaramuruhisha, ariko nta kintu na kimwe cari gushobora kumubuza gushingira intahe inogangije ukuri. (Yoh. 4:6, 34; 18:37) Yezu yarigishije abandi ivyerekeye Ubwami bw’Imana. Mu gukiza abarwayi ku gitangaro, mu kugaburira amasinzi ashonje, eka mbere no mu kuzura abapfuye, yarerekanye ivyo Ubwami bwokoreye abantu.​—Mat. 11:4, 5.

13. Yezu yigishije iki ku bijanye n’isengesho?

¹³ Aho kugira ngo Yezu yiyitirire inyigisho yatanga be n’ibikorwa vy’ugukiza yakora, yaratanze akarorero gahambaye mu kwerekeza ugushemezwa kwose kuri Yehova yicishije bugufi. (Yoh. 5:19; 11:41-44) Yezu yaramenyesheje kandi ibintu bihambaye kuruta ibindi vyose dukwiye gusenga dusaba. Mu masengesho dutura hakwiye kuba harimwo ugusaba yuko izina ry’Imana, ari ryo Yehova, ‘ryezwa’ be n’uko ubusegaba bugororotse bwayo busubirira ubutegetsi bwa Shetani bubi kugira ngo ‘ivyo Imana igomba bibe kw’isi nko mw’ijuru.’ (Mat. 6:9, 10) Yezu yaraduhimirije kandi gukora duhuza na mwene ayo masengesho mu ‘kubanza kurondera ubwami n’ubugororotsi bw’Imana.’​—Mat. 6:33.

14. Naho Yezu yari umuntu atagira agasembwa, ni kubera iki vyamusavye akigoro kugira ngo arangure uruhara afise mu mugambi w’Imana?

¹⁴ Uko urupfu rwa Yezu rwo kwitangako inkuka rwegereza, ni ko yarushiriza gutahura ukuntu ibanga yari yikoreye ryari rihambaye. Kugira ngo umugambi wa Se wiwe uranguke no kugira ngo uno agume afise izina ryiza vyari kuvana n’uko Yezu yihanganiye ugusambishwa kurimwo akarenganyo be n’ukwicwa bunyamaswa. Hasigaye imisi itanu ngo Yezu apfe, yasenze ati: “Ubu umutima wanje urahagaze, none mvuge iki? Data, nkiza iyi saha. Yamara rero, iki ni co catumye nshika kuri iyi saha.” Yezu amaze guserura izo nyiyumvo abantu bose bagira, yaciye ashira umutima ku kintu cari gihambaye kuruta ata bwikunzi abigiranye, maze asenga ati: “Data, ninahaza izina ryawe.” Yehova yaciye ubwo nyene yishura ati: “Nararininahaje kandi nzokwongera kurininahaza.” (Yoh. 12:27, 28) Egome, Yezu yari yiteguriye guca mu kigeragezo gikomeye kuruta ibindi vyose kijanye n’ugutungana ata wundi muntu n’umwe yigeze ahura na co. Ariko kwumva ayo majambo ya Se wiwe wo mw’ijuru nta gukeka ko vyatumye Yezu yizigira bimwe bikomeye yuko yoshoboye gushimagiza no kuburanira ubusegaba bwa Yehova. Kandi yarabishoboye!

Ivyo urupfu rwa Yezu rwaranguye

15. Imbere gato y’uko Yezu apfa, ni kubera iki yavuze ati: “Birarangutse”?

¹⁵ Igihe Yezu yari amanitse ku giti co gusinzikarizwako agira acikane, yavuze ati: “Birarangutse!” (Yoh. 19:30) Ese ukuntu Yezu yashoboye kurangura ibintu bihambaye abifashijwemwo n’Imana mu myaka itatu n’igice yahaciye kuva kw’ibatisimu yiwe gushika ku rupfu rwiwe! Igihe Yezu yapfa, harabaye ikinyamugigima gikaze, kandi intwazangabo y’Umuroma yari ihagarikiye iyicwa ryiwe yaravyuriwe umutima wo kuvuga iti: “Ni ivy’ukuri, uyu yari Umwana w’Imana.” (Mat. 27:54) Biboneka ko iyo ntwazangabo yari yabonye Yezu ariko aratyekezwa ahorwa ko yavuze yuko ari Umwana w’Imana. Naho Yezu yashikiwe n’ivyo bintu vyose, yagumanye ugutungana kwiwe aba yerekanye ko Shetani ari umubeshi katwa. Ku bijanye n’abo bose bashigikira ubusegaba bw’Imana, Shetani yari yarahaririye ati: “Umuntu yoheba ivyo afise vyose kugira ngo akize ubuzima bwiwe.” (Yobu 2:4, Complete Jewish Bible) Kuba Yezu yagumye ari umwizigirwa, vyarerekanye yuko Adamu na Eva bari gushobora kuguma ari abizigirwa mu kigeragezo barimwo cari kirushirije kuba icoroshe. N’igihambaye kuruta vyose, ubuzima bwa Yezu n’urupfu rwiwe vyarashigikiye vyongera birashimagiza ukugororoka kw’ubusegaba bwa Yehova. (Soma Imigani 27:11.) Hoba hari ikindi urupfu rwa Yezu rwaranguye? Kirahari nyene!

16, 17. (a) Ni kubera iki Ivyabona vya Yehova babayeho imbere y’ubukirisu bashoboye kugira impagararo igororotse imbere yiwe? (b) Yehova yahaye impera gute Umwana wiwe kubera yagumye ari umwizigirwa, kandi Umukama Yezu Kristu abandanya gukora iki?

¹⁶ Hari abasavyi ba Yehova benshi babayeho imbere y’uko Yezu aza kw’isi. Bari bafise impagararo igororotse imbere y’Imana kandi barahawe icizigiro c’izuka. (Yes. 25:8; Dan. 12:13) Ariko none ni ikintu kijanye n’amategeko ikihe ya Mana nyeranda Yehova yashoboye kwishimikiza kugira ngo ihezagire abantu b’abanyabicumuro mu buryo bwiza igitangaza nk’ubwo? Bibiliya isigura iti: “Imana [yashizeho Yezu Kristu] bwa shikanwa ku bw’impongano biciye ku kwizera amaraso yiwe. Kwari ukugira ngo yerekane ubugororotsi bwayo bwite kuko yariko ibabarira ibicumuro vyabaye kera igihe Imana yagira ukwirengagiza; kugira ngo yerekane ubugororotsi bwayo bwite muri iki kiringo, ngo ibe iyigororotse mbere n’igihe yita umugororotsi umuntu yizera Yezu.”​—Rom. 3:25, 26.b

¹⁷ Yehova yarahaye impera Yezu mu kumuzura ikamushira mu kibanza kiruta ico yari afise imbere y’uko aza kw’isi. Ubu Yezu arafise ukudapfa ari ikiremwa c’impwemu kininahaye. (Heb. 1:3) Kubera ko Umukama Yezu Kristu ari Umuherezi Mukuru akaba n’Umwami, arabandanya gufasha abayoboke biwe gushimagiza ubugororotsi bw’Imana. Ese ukuntu dukenguruka kuba Data wa twese wo mw’ijuru Yehova aha impera abo bose bashimagiza ubugororotsi bwiwe bakongera bakamusukurira badahemuka mu kwigana Umwana wiwe!​—Soma Zaburi 34:3; Abaheburayo 11:6.

18. Ni ibiki bizorimburwa mu kiganiro co kwiga gikurikira?

¹⁸ Abantu b’abizigirwa babayeho kuva kuri Abeli baragiraniye ubucuti somambike na Yehova kubera ko bizera rwa Ruvyaro rwari rwarasezeranywe bakongera bakarwizigira. Yehova yari azi yuko Umwana wiwe yogumanye ugutungana kwiwe be n’uko urupfu rwiwe rwopfutse mu buryo butagira agahaze “igicumuro c’isi.” (Yoh. 1:29) Vyongeye, urupfu rwa Yezu rurazanira ivyiza abantu babayeho muri iki gihe. (Rom. 3:26) Ku bw’ivyo none, ni imihezagiro iyihe incungu ya Kristu ishobora kukuzanira? Ivyo ni vyo bizorimburwa mu kiganiro co kwiga gikurikira.

[Utujambo tw’epfo]

Wokwishura gute?

• Ubugororotsi bw’Imana bwaharirijwe gute?

• Ibatisimu ya Yezu yagereranya iki?

• Urupfu rwa Yezu rwaranguye ibiki?

[Akajambo gasigura ifoto ku rup. 9]

Woba uzi ico ibatisimu ya Yezu yagereranya?