Ya Paradizo ivugwa muri Bibiliya iri hehe? — ICEGERANYO C'IBITABU CO KURI INTERNET ca Watchtower

Abasomyi bacu barabaza . . .

Ya Paradizo ivugwa muri Bibiliya iri hehe?

▪ Umugabo umwe yari ku mpfiro yaragize umutima rugabo araserura ukwizera afitiye Yezu. Yezu yamusezeraniye ati: “Uzoba uri kumwe nanje muri Paradizo.” (Luka 23:43) None uwo mugabo yobaye hehe? Iyo Paradizo yobaye iri mw’ijuru, kw’isi, canke ahandi hantu abantu barindirira gucirwa urubanza?

Abavyeyi bacu ba mbere barigeze kuba mw’Iparadizo. Bibiliya itubwira iti: “Yehova Imana atunganya umurima muri Edeni, amaja mu Buseruko, maze ahashira nya muntu yari yabumvye. . . . Yehova Imana afata wa muntu, amushira muri nya murima wa Edeni kugira awurime no kugira awitwararike.” (Itanguriro 2:8, 15) Igihe ayo majambo yashirwa mu kigiriki, ijambo “umurima” ryahinduwe ngo pa·raʹdei·sos, rikaba ari na ryo ryakomotseko ijambo ry’ikirundi “paradizo.”

Nk’uko nyene umugabo n’umugore bokwagura aho baba igihe baronse abandi bana, vyari vyitezwe ko n’abavyeyi bacu ba mbere bagura Iparadizo yo muri Edeni uko umuryango w’abantu wogiye uragwira. Imana yababwiye iti: “Mwuzure isi kandi muyigabe.”—Itanguriro 1:28.

Umugambi Umuremyi wacu yari afise rero, wari uw’uko abantu baba mw’Iparadizo ng’aha kw’isi kandi bakarondoka. Bobayeho ibihe bidahera mw’itongo ritunganije neza rikwiye kw’isi yose, kandi nta matongo y’abapfuye bokeneye. Isi ni ho hantu umuryango wose w’abantu wobandanije kuba. Ntibitangaje rero kuba ibintu kama bigize umubumbe wacu biduhimbara cane! Twaremwe ngo tube kw’isi iteye igomwe.

Umugambi w’Imana woba none warahindutse? Oya. Kuko Yehova adukura amazinda ati: “Ni ko n’ijambo ryanje riva mu kanwa kanje rizomera. Ntirizogaruka kuri jewe hatagize ikivamwo, mugabo rizokora koko icampimbaye.” (Yesaya 55:11) Haciye imyaka irenga 3.000 umuntu aremwe, Bibiliya yaravuze ku bijanye n’“Uwabumvye isi akayihingura” yuko “[atayiremeye] ubusa gusa,” ahubwo “[yayiremye] ngo ibeko abantu.” (Yesaya 45:18) Ivyo Imana igomba ntivyahindutse. Impera n’imperuka, isi izoba Iparadizo.

Birashimishije kubona imirongo myinshi ya Bibiliya ijanye n’Iparadizo ari iyidondora ubuzima bwo kw’isi. Nk’akarorero, ubuhanuzi bwa Yesaya buvuga buti: “Emwe, bazokwubaka amazu bayiberemwo; emwe, bazotera imirima y’imizabibu birire ivyamwa vyayo.” (Yesaya 65:21) None ni hehe bubaka amazu, bagatera n’imirima y’imizabibu? Ni hehe barya ivyamwa? Ni kw’isi. Mu Migani 2:21 haradomako hati: “Abagororotse [ni] bo bazokwibera mw’isi.”

Yezu na we nyene yaravuze ibijanye n’Iparadizo yo kw’isi. Ego ni ko yaratanze n’umuhango w’iparadizo yo mw’ijuru, mugabo wari ugenewe abantu bakeyi barobanuwe. (Luka 12:32) Igihe abo barobanuwe bapfuye, barazurirwa kuba mw’Iparadizo yo mw’ijuru, bakifatanya na Kristu kugira ngo bazoganze Iparadizo yo kw’isi. (Ivyahishuwe 5:10; 14:1-3) Abo bazofatanya na we kuganza bari mw’ijuru, bazokwiyemeza yuko ivyo mw’Iparadizo yo kw’isi biyoborwa neza kandi bibungabungwa neza nk’uko Imana ibitegeka.

Yezu yari azi yuko ivyo ari vyo Imana igomba ku bijanye n’isi. Nakare, yari kumwe na Se mw’ijuru igihe wa murima wa Edeni waremwa. Ubuzima bwo mw’Iparadizo yo kw’isi yo muri kazoza bugenewe abo bose bizera. (Yohani 3:16) Umwe wese muri abo, Yezu amusezeranira ati: “Uzoba uri kumwe nanje muri Paradizo.”—Luka 23:43.

[Abo dukesha ifoto ku rup. 25]