“Igikorwa canyu kiri n’impera”

UMWAMI ASA ayoboye ingabo ziwe, aramanuka mu mubande uri epfo cane yihuta avuye mu misozi ya Yuda akaja mu kiyaya co ku nkengera y’ikiyaga. Asa ashitse aho uwo mubande wagukira, arahagarara akiruhutsa. Hepfo yiwe hari ikambi y’abansi kandi ni nini cane! Izo ngabo z’Abanyetiyopiya zitegerezwa kuba zingana n’umuliyoni umwe. Iza Asa zozo zirenga gato ica kabiri c’abo bagabo benshi.

Muri uwo mwanya intambara igira itangure, ni igiki Asa yitwararika gusumba ibindi? Kwoba ari uguha amategeko abajenerali biwe? Kwoba ari ukuremesha ingabo ziwe? Kwoba ari ukwandikira amakete umuryango wiwe? Eka data! Muri ivyo bintu bitoroshe Asa arimwo, arasenga.

Imbere y’uko twihweza iryo sengesho tukongera tugasuzuma ivyabaye ico gihe, reka tubanze turabe Asa uwo yari. Ni igiki catumye avyifatamwo gutyo? Yoba yari afise imvo zumvikana zo kurondera gufashwa n’Imana? Inkuru yerekeye Asa itubwira iki ku vyerekeye ukuntu Yehova ahezagira ivyo abasavyi biwe bakora?

INKURU YEREKEYE ASA

Mu myaka 20 yakurikiye igihe Isirayeli yagaburwamwo ubwami bubiri, Yuda yari yarononywe cane n’imigenzo ya gipagani. Igihe Asa yaba umwami mu 977 B.G.C., mbere n’ikirimba c’umwami cari carahumanijwe n’ugusenga imana z’ivy’irondoka z’Abanyakanani. Mugabo inkuru yahumetswe yigana ivyo ku ngoma ya Asa, ivuga yuko “[yatanguye] gukora ivyari vyiza kandi bigororotse mu maso ya Yehova Imana yiwe.” Asa “[yarakuyeho] ibicaniro vy’ibinyamahanga n’ibibanza bikirurutse, amenagura inkingi nyeranda yongera yicira ibikingi vyeranda.” (2 Ngo. 14:2, 3) Vyongeye, Asa yarakuye mu bwami bwa Yuda “abamaraya b’urusengero b’abagabo,” bano bakaba bararyamana n’abo basangiye igitsina bitwaje idini. Igikorwa Asa yakoze nticagarukiye gusa ku gutikiza ivyo bintu. Yaranahimirije abantu “kurondera Yehova Imana ya ba sekuruza babo” no gukurikiza “itegeko n’ibwirizwa” ry’Imana.​—1 Abm. 15:12, 13; 2 Ngo. 14:4.

Kubera ko Yehova yahimbawe n’umwete Asa yari afitiye ugusenga kw’ukuri, yaramuhaye impera yo kumara imyaka n’imyaka aganza mu mahoro. Ni co gituma uwo mwami yavuze ati: “Twa[ra]rondeye Yehova Imana yacu. Twaramurondeye, na we aduhaye akaruhuko impande zose.” Abantu barakoresheje ako karyo mu gukomeza ibisagara vyo mu bwami bwa Yuda. Inkuru yo muri Bibiliya ivuga iti: “Baguma bubaka kandi bararoranirwa”.​—2 Ngo. 14:1, 6, 7.

KU RUGAMBA

Turavye inkuru yerekeye Asa, ntidukwiye gutangazwa n’uko yasenze igihe yari ahanganye n’ingabo z’abantu nyinshi kuruta izindi zose zivugwa mu Vyanditswe. Asa yari azi ko Imana iha impera abakora ibikorwa biranga ukwizera. Mw’isengesho uwo mwami yatuye, yaringinze Yehova ngo amufashe. Asa yaratahura yuko aramutse yihetse ku Mana maze ikamushigikira, ubwinshi bw’abo bansi canke inkomezi zabo ata co vyobaye bivuze. Kubera ko ayo matati yari yerekeye izina rya Yehova, Asa yatakambiye Imana yishimikije iryo zina. Uwo mwami yasenze ati: “Dufashe, ewe Yehova Mana yacu, kuko ari wewe twishimikije, kandi mw’izina ryawe ni ho tuje kurwanya iri sinzi. Ewe Yehova, uri Imana yacu. Umuntu buntu ntakurushe inkomezi.” (2 Ngo. 14:11) Ni nk’aho yariko aravuga ngo: ‘Iki gitero c’Abanyetiyopiya cagabwe kuri wewe, Yehova. Ntiwemere ko izina ryawe risigwa iceyi mu kureka ngo abantu batagira inkomezi batembagaze abitirirwa izina ryawe.’ Ni co gituma “Yehova [yaciye] atsindira Abanyetiyopiya imbere ya Asa n’imbere ya Yuda, Abanyetiyopiya barata barahunga.”​—2 Ngo. 14:12.

Muri kino gihe, twebwe abasavyi ba Yehova turafise abansi benshi b’abanyenkomezi. Ntituzobarwanya dukoresheje ibirwanisho nya birwanisho turi ku rugamba nya rugamba. Yamara, turashobora kwemera tudakeka ko Yehova azohezagira abantu bose b’abizigirwa barwana mw’izina ryiwe intambara yo mu buryo bw’impwemu agatuma batahukana intsinzi. Intambara turwana umwe wese ku giti ciwe yoshobora kuba irimwo ukwita ku rutare kugira ngo tunanire agatima gakwiye hose ko kurekerana ibintu mu bijanye no kwigenza runtu, kurwanya ubugoyagoye bwacu bwite, canke gukingira umuryango wacu utwosho twonona. Ariko rero, naho twoshikirwa n’amarushwa ameze gute, turashobora kuremeshwa n’isengesho Asa yatuye. Intsinzi yatahukanye yayihawe na Yehova. Yarerekanye ico abo bose biheka ku Mana bashobora kwitega. Nta muntu n’umwe ashobora guhangana na Yehova.

INDEMESHO N’INGABISHO

Igihe Asa yari avuye ku rugamba, yarahuye na Azariya. Uwo muhanuzi yaramuremesheje yongera aramugabisha ati: “Nyumvirize, ewe Asa na Yuda yose na Benyamini yose! Yehova azobana namwe nimwabana na we; nimwamurondera, azoreka mumuronke, mugabo nimwamuheba azobaheba. . . . Mugire umutima rugabo kandi amaboko yanyu ntaregere, kuko igikorwa canyu kiri n’impera.”​—2 Ngo. 15:1, 2, 7.

Ayo majambo arashobora gukomeza ukwizera kwacu. Arerekana ko Yehova azobana natwe magingo tumukorera tudahemuka. Igihe tumutabaje ngo adufashe, turashobora kwizigira ko atwumva. Azariya yavuze ati: “Mugire umutima rugabo.” Akenshi usanga bidusaba umutima rugabo kugira ngo dukore ibigororotse, ariko turazi ko dushobora kubishikako tubifashijwemwo na Yehova.

Kubera ko inakuru wa Asa ari we Mayaka yari yarakoze “ikigirwamana giteye ishishi agikoreye igikingi ceranda,” Asa yari afise igikorwa kitoroshe co kumukura mu kibanza yarimwo c’ubwami co kuba “umugore w’iteka.” Yaratsinze urwo rugamba maze araturira ico kigirwamana ca inakuru. (1 Abm. 15:13) Asa yarahezagiwe kubera umwiyemezo wiwe n’umutima rugabo wiwe. Natwe nyene dutegerezwa kwumira tutanyiganyiga kuri Yehova no ku ngingo mfatirwako ziwe zigororotse, incuti zacu zaba ari intahemuka ku Mana canke atari ko biri. Nitwabigenza gutyo, Yehova azoduha impera kubera iyo ngendo yacu y’ubwizigirwa.

Imwe mu mpera Asa yahawe kwabaye ukwibonera Abisirayeli benshi bo mu bwami bwo mu buraruko bwari bwarahunye basegenyukira muri Yuda igihe babona ko Yehova yari kumwe na we. Baraha agaciro cane ugusenga kw’ukuri ku buryo bahisemwo guheba amazu yabo kugira ngo babe mu basavyi ba Yehova. Asa na Yuda yose babigiranye umunezero baciye binjira mw’‘isezerano ryo kurondera Yehova n’umutima wabo wose n’ubuzima bwabo bwose.’ Havuyemwo iki? Imana “[yararetse barayironka]; Yehova abandanya kubaha akaruhuko impande zose.” (2 Ngo. 15:9-15) Ese ukuntu duhimbarwa igihe abakunda ubugororotsi baje mu gusenga Yehova gutyoroye!

Ariko rero, amajambo yavuzwe n’umuhanuzi Azariya yarimwo n’ingabisho. Yavuze ati: “Nimwa[heba Yehova] azobaheba.” Ese ivyo bitokwigera bidushikira, kuko ingaruka zoba iz’agahomerabunwa! (2 Pet. 2:20-22) Ivyanditswe ntibihishura igituma Yehova yarungikiye Asa iyo ngabisho, mugabo uwo mwami ntiyayikurikije.

“WAKOZE IVY’UBUPFU”

Mu mwaka ugira 36 Asa ari ku ngoma, Umwami Bayasha wa Isirayeli yaragavye igitero kuri Yuda. Kumbure kugira ngo Bayasha abuze abo yatwara gushigikira Asa n’ugusenga gutyoroye, yaciye atangura gukomeza igisagara ca Rama cari ku rubibe, ku bilometero umunani mu buraruko bwa Yeruzalemu. Asa, aho kurondera gufashwa n’Imana nk’uko yari yarabigize igihe yari ahanganye n’igitero c’Abanyetiyopiya, yarondeye gufashwa n’abantu. Yararungikiye ingabirano umwami wa Siriya, amusaba gutera ubwami bwa Isirayeli bwo mu buraruko. Igihe Abasiriya bagaba ibitero nka bingahe, Bayasha yaciye ahunga ava i Rama.​—2 Ngo. 16:1-5.

Yehova ntiyahimbawe na Asa maze arungika umuhanuzi Hanani ngo abimubwire. Kubera ko Asa yari azi ivyo Imana yakoreye Abanyetiyopiya, yari akwiye kuba azi yuko “amaso [ya Yehova] anyuragira mw’isi yose kugira ngo yerekane inkomezi ziwe ku bw’abafise umutima ukwiye kuri we.” Asa ashobora kuba yarahanuwe nabi canke akabona yuko Bayasha n’ingabo ziwe batamuteye ubwoba rwose maze akiyumvira ko yari gushobora kuvyitunganiriza. Icoba carabimutumye cose, yishimikije ivyiyumviro vy’abantu ntiyiheka kuri Yehova. Hanani yavuze ati: “Wakoze ivy’ubupfu muri ivyo, kuko kuva ubu hazobaho intambara zo kukurwanya.”​—2 Ngo. 16:7-9.

Asa yavyifashemwo nabi. N’ishavu n’akantu, yaciye ashira uwo muhanuzi mu mpatane z’ibiti. (2 Ngo. 16:10) Asa yoba yariyumviriye ati: ‘Noba nkwiriye gukangirwa kandi maze imyaka myinshi ndi umwizigirwa?’ Ico gihe yari ageze mu zabukuru, ububasha bwiwe bwo kwiyumvira bwoba bwari bumaze kugabanuka? Bibiliya nta co ibivugako.

Mu mwaka ugira 39 w’ingoma yiwe, Asa yararwaye indwara ikomeye yo mu birenge. Iyo nkuru ivuga iti: “No mu ndwara yiwe, ntiyarondera Yehova mugabo arondera abavūzi.” Ico gihe, biboneka ko Asa yari amaze igihe atitwararika kamere yiwe y’ivy’impwemu. Biboneka ko yapfuye akimeze gutyo kandi atarahindura ivyiyumviro, hakaba hari mu mwaka ugira 41 w’ingoma yiwe.​—2 Ngo. 16:12-14.

Naho ari ukwo, kamere nziza za Asa be n’umwete yari afitiye ugusenga kw’ukuri bisa n’ivyarushije inguvu amakosa yiwe. Ntiyigeze areka gukorera Yehova. (1 Abm. 15:14) None dufatiye kuri ico kintu, inkuru yerekeye ubuzima bwiwe ishobora kutwigisha iki? Irashobora kudufasha gutahura ko dukwiye kuzirikana ukuntu Yehova yadufashije muri kahise, kubera yuko ivyo bintu vy’agaciro tuba twibuka bishobora kutuvyurira umutima wo kumusenga tumusaba ngo adufashe igihe dushikiwe n’ibindi bigeragezo. Yamara, ntidukwiye kwibwira yuko tudakeneye impanuro zo mu Vyanditswe ngo ni uko tumaze imyaka myinshi dukorera Imana tudahemuka. Twaba tumaze igihe kingana iki, Yehova azodukangira nitwahuba. Turakeneye kwemera ukwo gukosorwa twitonze kugira ngo tukwungukireko. N’igihambaye kuruta vyose, Data wa twese wo mw’ijuru azobana natwe nitwabana na we. Amaso ya Yehova ararondera kw’isi yose abamukorera badahemuka. Arabaronsa impera mu gukoresha ububasha bwiwe ku bw’ineza yabo. Ivyo nyene ni vyo yagiriye Asa, kandi natwe arashobora kubitugirira.

[Iciyumviro nyamukuru ku rup. 9]

Yehova araha impera abantu b’abizigirwa barwana intambara yo mu buryo bw’impwemu

[Iciyumviro nyamukuru ku rup. 10]

Turakeneye umutima rugabo kugira ngo dukore ibigororotse imbere ya Yehova