Ukuntu Hana yaronse amahoro yo mu mutima

UMUGORE umwe w’umwizigirwa arasenga Yehova n’ijwi ryumvikana amuhayagiza. Abona yuko Imana yamushize hejuru imukuye mu mukungugu, ifata umubabaro yarimwo iwusubiriza akanyamuneza.

Uwo mugore yitwa Hana. Ni igiki catumye ukuntu yiyumva guhinduka bimwe bidasanzwe? Ni kubera iki ubu akamwemwe kamusya? Dushobora gute kwungukira ku vyamushikiye? Kugira turonke inyishu z’ivyo bibazo, reka twihweze inkuru yigana ivyiwe.

Umuryango uri mu ngorane

Hana ni umwe mu bagore babiri ba Elukana, uwo na we akaba ari Umulewi aba mu ntara y’Abefurayimu (1 Samweli 1:1, 2a; 1 Ngoma 6:33, 34). Naho ivy’ukugira abagore benshi bitari mu mugambi Imana yari ifitiye abantu kuva mu ntango, birarekuwe muri iki gihe kiriko kiravugwa aho abantu baganzwa n’Ivyagezwe vya Musa, kandi hariho n’amategeko abigenga. Umuryango wa Elukana usanzwe usenga Yehova, yamara mu ngo usanga umugabo afise abagore benshi harakunda kuba indyane, nk’uko bibonekera ku kuntu ivyo mu rugo rwa Elukana vyifashe.

Hana ni ingumba mu gihe uwundi mugore wa Elukana, ari we Penina, afise abana nka bangahe. Penina ni mukeba wa Hana.​—1 Samweli 1:2b.

Kuba ingumba bibonwa ko ari agatukisha mu bagore b’Abisirayelikazi, mbere bikabonwa ko ari icerekana yuko umuntu ata co amaze mu nyonga z’Imana. Yamara, nta na kimwe cerekana yuko kuba Hana adashobora kuvyara ari ikimenyamenya c’uko adashimwa n’Imana. Ariko Penina, aho kugerageza guhoza Hana, arakoresha ubushobozi afise bwo kuvyara mu gutuntuza uwo mukeba wiwe.

Ingendo umuryango wama ugira uja ku ngoro ya Yehova

Izo ndyane ziri mu muryango wa Elukana ntizibuza ko wama ugira urugendo ku mwaka ku mwaka uja gushikana ibimazi ku ngoro ya Yehova i Shiloa. Urwo rugendo rw’ukugenda n’ukugaruka rw’ibilometero nka 60, rushobora kuba rugirwa ku maguru. Ivyo biringo bitegerezwa kuba bigoye canecane kuri Hana, kubera yuko imigabane nk’ingahe y’ikimazi c’ishimwe ihabwa Penina n’abana bimwe, ariko Hana we akaronka umugabane umwe utarenga nturenguke. Muri ivyo bihe, Penina aca aboneraho uturyo two kubabaza Hana, akamutera intuntu kuko bisa n’uko Yehova “yamuzivye inda”. Ivyo biza biraba ku mwaka ku mwaka, ku buryo bituma Hana arira akanka no kurya. Gutyo, ingendo zari zikwiye kuba iziteye umunezero kuri we, zicika ibihe vy’umubabaro. Ariko naho vyifashe gutyo, Hana aragira izo ngendo aja ku ngoro ya Yehova.​—1 Samweli 1:3-7.

Woba ubona ukuntu Hana yadusigiye akarorero keza? Iyo wavunitse umutima uca ukora iki? Woba uca wikumira ukareka kwifatanya n’abo musangiye ukwemera? Ivyo si vyo Hana yagize. Kuba kumwe n’abasavyi ba Yehova yabigize umugenzo. Naho twoba turi mu bintu bitoroshe, dukwiye natwe kubigenza gutyo nyene.​—Zaburi 26:12; 122:1; Imigani 18:1; Abaheburayo 10:24, 25.

Elukana aragerageza guhoza Hana no kumenya akamubakiye. Aramubaza ati: “Urizwa n’iki ga Hana? N’iki kikubuza kurya? Ubabajwe n’iki? Mbega sinkurutira abahungu cumi wovyaye?” (1 Samweli 1:8). Elukana ashobora kuba atazi ingene Penina amumerera nabi, kandi Hana ashobora kuba ahitamwo gutunturira imbere aho kwidoga. Uko vyoba biri kwose, Hana aragaragaza ukwizera afise igihe arondera amahoro mu kwitura Yehova mw’isengesho.

Hana agira indagano

Ibimazi vy’ishimwe vyafungurirwa ku ngoro ya Yehova. Hana amaze kuva mu cumba c’uburiro, arasenga Imana (1 Samweli 1:9, 10). Arayisaba ayinginga ati: “Ewe Uhoraho Nyen’ingabo, ni warāba umubabaro wanje incoreke yawe, ukanyibuka, ntunyibagire jewe incoreke yawe, ukantabaza umwana w’umuhungu, nanje nzomuguha, Uhoraho, abe uwawe kuzorinda apfa, kandi nta rupfuhe ruzomugera ku mutwe”.​—1 Samweli 1:11.

Isengesho Hana atura riradomako. Asaba umwana w’umuhungu maze akaraganira Yehova ko azoca amumuha akazorinda apfa ari Umunaziri (Guharūra 6:1-5). Indagano nk’iyo itegerezwa kwemerwa n’umunega wiwe, kandi ivyo Elukana akora mu nyuma birerekana yuko yemeye isezerano umugore wiwe akunda cane yagize.​—Guharūra 30:6-8.

Uburyo Hana asenga butuma Umuherezi Mukuru Eli yiyumvira ko yaborewe. Hana arakubita iminwa, mugabo Eli nta majambo yumva, kuko Hana ariko avugira mu mutima. Iryo sengesho rituranwa ubwira bimwe bidasanzwe. (1 Samweli 1:12-14). Iyumvire ukuntu Hana yumva amerewe Eli amuhambariye, mu kumubwira ko yaborewe! Yamara, arishura umuherezi mukuru mu rupfasoni. Eli amenye ko Hana yariko asenga bivuye ku “mubabaro n’amaganya bi[mur]engeye”, aramubwira ati: “Imana ya Isirayeli iguhe ico wayisavye” (1 Samweli 1:15-17). Eli amaze kuvuga ivyo, Hana arigira maze agaheza akarya, “[ntasubire] kwiraburanirwa ukundi”.​—1 Samweli 1:18.

Ni igiki dushobora kwigira kuri ivyo vyose? Igihe dusenga Yehova tumubwira ibituraje ishinga, twomumenyesha ukuntu twiyumva tukongera tukagira ivyo tumusavye tubikuye ku mutima. Nimba ata kindi kintu twoshobora gukora kugira dutorere umuti iyo ngorane, dukwiye guca tuyirekera mu maboko yiwe. Nta kindi kintu twokora coza kiruta ico.​—Imigani 3:5, 6.

Abasavyi ba Yehova bamaze gusengana ubwira, birashoboka rwose ko bagira amahoro asa n’ayo Hana yagize. Ku bijanye n’isengesho, intumwa Paulo yanditse ati: “Ntimugire ico mwiganyira, ariko muri vyose ivyo mugomba bimenyeshwe Imana, mu gusenga no mu kwinginga bifatanije no gukenguruka. Maz’amahoro y’Imana aruta uko yomenywa n’umuntu wese, azoshibamira imitima yanyu n’ivyiyumviro vyanyu muri Kristo Yesu” (Ab’i Filipi 4:6, 7). Igihe dutereye umutwaro wacu kuri Yehova, dutegerezwa kumureka akawitwararika. Maze, nka kumwe kwa Hana, ntibiba bigikenewe ko twiganyira.​—Zaburi 55:22.

Umwana atizwa Yehova

Ubu Imana iribuka Hana. Aratwara inda hanyuma akavyara umuhungu. (1 Samweli 1:19, 20). Ico ni kimwe mu bihe bikeyi vyanditswe muri Bibiliya aho Imana yitwararika cane ivuka ry’uwuzoba umusavyi wayo. Umuhungu wa Elukana na Hana, ari we Samweli, azoba umuhanuzi wa Yehova. Azogira uruhara ruhambaye mu bijanye no gushinga ingoma y’abami ba Isirayeli.

Nta gukeka ko Hana atangura kwigisha Samweli ivyerekeye Yehova kuva mu buhinja. Mugabo none, yoba yibagira indagano yagize? Ihibambewe! Avuga ati: “Umwana ni yamara gucūka ni ho nzodūga, ndamujane, ashikirizwe Uhoraho, agumey’igihe cose”. Samweli acutse, kumbure igihe afise imyaka itatu canke irenga gato, Hana aramujana kuba ku ngoro ya Yehova, nk’uko yabiraganye.​—1 Samweli 1:21-24; 2 Ngoma 31:16.

Hana n’umunega wiwe bamaze gushikanira Yehova ikimazi, barajana Samweli kwa Eli. Birashoboka rwose ko Hana aba afashe ukuboko agahungu kiwe igihe abwira Eli ati: “Mwami wanje, indahiro ni wewe nyene, erega ni jewe wa mugore nari mpagaze i ruhande yawe, mwami wanje, nsaba Uhoraho. Uyu mwana ni we nasaba, kand’Uhoraho yampaye ico namusavye. Ni co gitumye ndamugize inkūka y’Uhoraho; azorinda apfa ar’inkūka y’Uhoraho”. Uko ni ko Samweli atangura umurimo udasanzwe azomara ubuzima bwiwe bwose arangurira Imana.​—1 Samweli 1:25-28; 2:11.

Uko igihe kirengana, Hana nta ho yibagira Samweli. Ivyanditswe bivuga biti: “Nyina yama amubarīrira agahuzu, akakamushīra uk’umwaka utashe, uko yajana n’umugabo wiwe gutanga ikimazi c’umwaka” (1 Samweli 2:19). Nta gukeka ko Hana aguma asabira Samweli. Uko aja kumuraba ku mwaka ku mwaka, ntabura kumuremesha kuguma ari intahemuka mu gukorera Imana.

Igihe kimwe Samweli yagendewe n’abavyeyi biwe, Eli arabahezagira maze akabwira Elukana ati: “Uragahabga uruvyaro n’Uhoraho kur’uyo mugore, abasubirize mu bukandu bg’[“icatijwe Yehova”, NW]”. Ayo majambo araranguka, Hana na Elukana bagahabwa impera mu kuronka abandi bahungu batatu n’abakobwa babiri.​—1 Samweli 2:20, 21.

Ese ukuntu Elukana na Hana ari akarorero keza ku bavyeyi b’abakirisu! Ba inabibondo na ba sebibondo benshi twovuga ko batije Yehova abahungu n’abakobwa babo, mu kubaremesha gukurikirana umuce munaka w’ubusuku bw’igihe cose kure y’i muhira. Abavyeyi nk’abo b’abanyarukundo barakwiye gukezwa ku twigoro bagira. Kandi Yehova azobaha impera.

Isengesho ry’umunezero Hana atura

Ese ukuntu Hana uwahora ari ingumba ahimbawe! Ni gake usanga amasengesho yatuwe n’abagore yaranditswe muri Bibiliya. Yamara ku bijanye na Hana, turazi ivyerekeye abiri muri yo. Irya mbere ni iririmwo inyiyumvo yaseruye igihe yari ababaye kandi atuntuye. Irya kabiri na ryo ni isengesho ry’akamwemwe atura akenguruka. Atangura avuga ati: “Umutima wanje uvugiriza Uhoraho impundu”. Aranezerwa no kubona “mber’uwahora ari ingumba [yar]avyaye”. Maze arahayagiza Yehova avuga yuko ‘ashira hejuru umugorwa akamukura mu mukungugu’. Vy’ukuri, “a[r]ashira hejuru umukene, amukūye mu mwavu”.​—1 Samweli 2:1-10.

Iyo nkuru yahumetswe n’Imana ivuga ivya Hana irerekana yuko vyoshika tukababazwa n’udusembwa tw’abandi canke tukababazwa n’umutima mubi bafise. Yamara, ntidukwiye kureka ngo ingorane nk’izo zidutware umunezero dufise mu gukorera Yehova. Ni Umwe yumva amasengesho akagira ico akoze ku gutakamba kw’abasavyi biwe b’intahemuka, akabakura mu mubabaro maze akabaha amahoro y’umusesekara be n’iyindi mihezagiro.​—Zaburi 22:23-26; 34:6-8; 65:2.

[Akajambo k’epfo]

[Ifoto ku rup. 17]

Hana yaratije Yehova Samweli