Yehova ni we ‘buhungiro bwacu mu bihe vy’amagorwa’

“Agakiza k’abagororotsi kanduruka k’Uhoraho, ni we buhungiro bgabo mu gihe c’amagorwa”.—ZABURI 37:39.

1, 2. (a) Yezu yasabiye iki abigishwa biwe? (b) Imana igomba iki ku vyerekeye abasavyi bayo?

YEHOVA ni mushoboravyose. Arafise ububasha bwo gukingira abasavyi biwe b’abizerwa mu buryo ubwo ari bwo bwose ashaka. Yoshobora mbere gukura abasavyi biwe mu bandi bantu bo mw’isi, akabashira ahantu hatagira inkomanzi kandi harangwa amahoro. Ariko rero, ku vyerekeye abigishwa biwe, Yezu yasenze asaba Se wiwe wo mw’ijuru ati: “Singusaba ng’ubakūre mw isi, ariko ng’ubarinde wa Mubi”.—Yohana 17:15.

² Yehova yahisemwo kutadukura “mw isi”. Ahubwo riho, agomba yuko tuba mu bantu bo muri iyi si kugira ngo tubwire abandi ubutumwa bwiwe butanga icizigiro n’impumurizo (Abaroma 10:13-15). Mugabo, nk’uko Yezu yavyerekanye muri rya sengesho yatuye, mu kuba muri iyi si, turageramirwa na “wa Mubi”. Abantu b’abagambarazi be n’inteko z’ibinyabuzima vy’impwemu vy’ibibisha birateza imibabaro myinshi be n’amaganya menshi, abakirisu na bo bakaba batatewe urucanco rubakingira amagorwa.—1 Petero 5:9.

3. N’abasavyi ba Yehova b’abizerwa bategerezwa gushikirwa n’iki, mugabo ni impumurizo iyihe dusanga mw’Ijambo ry’Imana?

³ Mu gihe c’ibigeragezo nk’ivyo, ni ibisanzwe ko umuntu aca mu bihe vy’ugucika intege (Imigani 24:10). Bibiliya irimwo inkuru nyinshi zivuga abizerwa bashikiwe n’amagorwa. Umwanditsi wa Zaburi avuga ati: “Amarushwa y’umugororotsi ni menshi, arik’Uhoraho ayamukiza yose” (Zaburi 34:19). Erega ni vyo, ibintu bibabaje birashikira n’umuntu w’“umugororotsi”! Cokimwe na wa mwanditsi wa Zaburi ari we Dawidi, rimwe na rimwe twoshobora mbere kwumva ‘tudendebukiwe, tujanjaguritse’ (Zaburi 38:8). Yamara, birahumuriza kumenya yuko “Uhoraho aba hafi y’abafise imitima imenetse, kand’akiza abafise imitima ijanjaguritse”.—Zaburi 34:18; 94:19.

4, 5. (a) Mu buryo buhuye n’Imigani 18:10, dutegerezwa gukora iki kugira ngo turonke uburinzi bw’Imana? (b) Ni intambwe zitomoye izihe twotera kugira ngo turonke imfashanyo y’Imana?

⁴ Mu buryo buhuye na rya sengesho rya Yezu, Yehova aduhozako ijisho koko ngo aturinde. Ni we “buhungiro bga[cu] mu gihe c’amagorwa” (Zaburi 37:39). Igitabu c’Imigani gikoresha imvugo nk’iyo nyene igihe kivuga giti: “Izina ry’Uhoraho n’umunara ukomeye: Umugororotsi awirukiramwo, akaba amahoro” (Imigani 18:10). Ico canditswe kirahishura ukuri kw’ishimikiro ku vyerekeye ukuntu Yehova yitwararikana ikibabarwe ibiremwa vyiwe. Imana iraronsa uburinzi canecane abagororotsi bayironderana umwete, nk’aho twoba turiko twirukira mu munara ukomeye turondera gukingirwa.

⁵ Igihe duhanganye n’ingorane zitesha umutwe, dushobora gute kwirukira kuri Yehova kugira ngo adukingire? Nimuze turimbure intambwe zitatu zihambaye twotera kugira ngo turonke imfashanyo ya Yehova. Ubwa mbere, dutegerezwa kwitura Dawe wa twese wo mw’ijuru biciye mw’isengesho. Ubwa kabiri, dukwiye gukora twisunga impwemu yiwe yera. Ubwa gatatu na ho, dutegerezwa kuyobokera intunganyo Yehova yashizeho mu kurondera kwifatanya n’abakirisu bagenzi bacu bashobora kuturemurura amagorwa.

Ububasha bw’isengesho

6. Abakirisu b’ukuri babona gute isengesho?

⁶ Abahinga mu vy’amagara baravuga yuko isengesho rishobora kuba umuti w’intimba n’amaganya. Naho vyoba vyoshoboka yuko akanya umuntu amara mu gacerere ariko arasenga gashobora kumuremurura amaganya, ikintu nk’ico nyene coshobora gushikwako biciye ku majwi amwamwe yo mu bidukikije canke mbere biciye ku gukandakanda umuntu mu mugongo. Abakirisu b’ukuri ntibafatira mu rwara isengesho mu kuribona gusa nk’umuti utuma umuntu yumva amerewe neza. Isengesho turibona nk’ukuganira n’Umuremyi mu buryo burangwa icubahiro cinshi. Isengesho dutura ririmwo ukwibanda ku Mana be n’ukuyizigira. Ego cane, isengesho riri mu bigize ugusenga kwacu.

7. Gusengana ukwizigira bisobanura iki, kandi amasengesho nk’ayo adufasha gute kwihanganira amaganya?

⁷ Amasengesho yacu ategerezwa guherekezwa n’ukwiyumvamwo ko twizigiye Yehova. Intumwa Yohani yanditse ati: “Ubu ni bgo bushizi bg’ubgoba dufise kuri yo, n’ukw iyo dusavye ikintu cose gihwanye n’ivy’igomba, itwumva” (1 Yohana 5:14). Yehova, we Kinyabuzima kirengeye vyose, Imana yonyene y’ukuri akaba na mushoboravyose, mu vy’ukuri aritwararika bimwe bidasanzwe amasengesho abasavyi biwe baturana ubwira. Kumenya gusa yuko Imana yacu y’inyarukundo itwumva igihe tuyibwira amaganya dufise be n’ingorane zacu, biraduhumuriza.—Ab’i Filipi 4:6.

8. Ni kubera iki abakirisu b’abizerwa badakwiye kwigera biyumvamwo isoni canke ngo biyumvemwo ko batabereye igihe begera Yehova mw’isengesho?

⁸ Abakirisu b’abizerwa ntibakwiye kwigera biyumvamwo isoni, ko batabereye, canke ngo biyumvemwo ko ata kwizigira bafise igihe begera Yehova mw’isengesho. Ni vyo, igihe twiyumvamwo ko twacitse intege canke twarengewe n’ingorane, hari aho tutokwama dufise impengamiro yo kwegera Yehova mw’isengesho. Mu bihe nk’ivyo, vyoba vyiza twibutse yuko Yehova ‘aterwa akagongwe n’abahahazwa biwe’ be n’uko “[a]hūmuriza abicisha bugufi” (Yesaya 49:13; 2 Ab’i Korinto 7:6). Mu bihe vy’amaganya n’amagorwa ni ho canecane dukeneye kwitura Dawe wa twese wo mw’ijuru nka we buhungiro bwacu tubigiranye ukwizigira.

9. Ukwizera kurangura uruhara uruhe igihe twegera Imana mw’isengesho?

⁹ Kugira ngo twungukire bimwe bishitse ku gateka ko gutura isengesho, dutegerezwa kugira ukwizera nyakuri. Bibiliya ivuga yuko “uwēgēra Imana akwiye kwizera yukw iriho, igaha impēra abayirondera” (Abaheburayo 11:6). Ukwizera si ugupfa kwemera gusa yuko Imana “iriho”. Ukwizera nyakuri kurimwo ukwemera bimwe bikomeye ubushobozi bw’Imana be n’icipfuzo ifise vyo kuduha impera kubera ukuyigamburukira kwacu mu buzima. “Inyonga z’Uhoraho ziri ku bagororotsi, n’amatwi yiwe ari ku vyo basenga” (1 Petero 3:12). Kwama tuzi yuko Yehova atwitwararikana urukundo biratuma amasengesho dutura agira insobanuro idasanzwe.

10. Amasengesho yacu ategerezwa kuba ameze gute nimba dushaka ko Yehova aturamira mu buryo bw’impwemu?

¹⁰ Yehova yumviriza amasengesho yacu igihe tuyaturanye umutima wacu wose. Umwanditsi wa Zaburi yanditse ati: “Ntakambishije umutima wose; unyishure Uhoraho we” (Zaburi 119:145). Amasengesho yacu ntameze nka mwene ya yandi y’umugenzo yo mu madini menshi. Yoyo si ayo guheza umwuga canke ayaturanywe udutima tubiri. Igihe dusenga Yehova n’“umutima [wacu] wose”, amajambo yacu aba atekeye insobanuro kandi akavuganwa intumbero koko. Inyuma y’amasengesho duturana ubwira nk’ayo, duca dutangura kwiyumvamwo ukuruhurirwa kuva ku gukorera “Uhoraho umutwaro wa[cu]”. Nk’uko Bibiliya isezerana, ‘azoturamira’.—Zaburi 55:22; 1 Petero 5:6, 7.

Impwemu y’Imana ni umufasha wacu

11. Uburyo bumwe Yehova atwishuramwo igihe ‘tuguma dusaba’ ngo adufashe ni ubuhe?

¹¹ Yehova ntiyumva gusa ivyo asabwa, mugabo kandi arishura (Zaburi 65:2). Dawidi yanditse ati: “Ku musi w’amarushwa yanje nzokwambaza, kuk’uzonyishura” (Zaburi 86:7). Mu buryo buhuye n’ivyo, Yezu yaremesheje abigishwa biwe ‘kuguma basaba’ ngo Yehova abafashe kubera yuko ‘Dawe wa twese wo mw’ijuru azoha impwemu yera abayimusavye’ (Luka 11:9-13). Ego cane, inguvu ikora y’Imana irakora bwa mufasha, canke bwa muhumuriza, ku basavyi b’Imana.—Yohana 14:16.

12. Impwemu y’Imana ishobora kudufasha gute igihe ingorane zisa n’iziturengeye?

¹² N’igihe nyene duhanganye n’ibigeragezo, impwemu y’Imana irashobora kudushiramwo “ubushobozi buhebuje” (2 Ab’i Korinto 4:7). Intumwa Paulo, uwihanganiye ibintu bitesha umutwe, yavuganye ukwizigira ati: “Nshobozwa vyose n’ūmpa inkomezi” (Ab’i Filipi 4:13). Muri ubwo buryo nyene, abakirisu benshi muri iki gihe bariyumvisemwo yuko basubiranye inkomezi zo mu vy’impwemu no mu vy’akanyengetera, biba vyishuye ugutakamba kwabo. Akenshi ingorane zitesha umutwe zisa n’aho umengo ntiziturengeye rwose iyo tumaze kuronka imfashanyo y’impwemu y’Imana. Bitumwe n’izo nkomezi zitangwa n’Imana, turashobora kuvuga nk’uko ya ntumwa yavuze, duti: “Dusugerezwa impande zose, ariko ntidushika mu mbombane; turazazanirwa, ariko ntituranduka umutima; turahamwa, ariko ntiduhebga; dukubitwa hasi, ariko ntitugwaho”.—2 Ab’i Korinto 4:8, 9.

13, 14. (a) Yehova yagaragaje gute ko ari ubuhungiro bwacu biciye mw’Ijambo ryiwe ryanditse? (b) Gushira mu ngiro ingingo ngenderwako zo muri Bibiliya vyagufashije gute wewe ubwawe?

¹³ Impwemu yera kandi yarahumetse Ijambo ry’Imana ryanditse irongera irarizigama ku bw’ineza yacu. Yehova yagaragaje gute yuko ari ubuhungiro bwacu mu bihe vy’amagorwa biciye mw’Ijambo ryiwe? Uburyo bumwe ni mu kuturonsa ubwenge buroranye canke ubukerebutsi ngirakimazi be n’amakenga canke ubushobozi bwo kwiyumvira (Imigani 3:21-24). Bibiliya iramenyereza ubushobozi bwacu bwo kwiyumvira kandi ikaryohora ububasha bwacu bwo kuzirikana (Abaroma 12:1, NW). Biciye ku gusoma ubudahorereza Ijambo ry’Imana no kurizirikanako, ivyo bikajana no kurishira mu ngiro, turashobora gutuma ‘ububasha bwacu bwo gutegera bumenyerezwa gutandukanya ikibi n’iciza’ (Abaheburayo 5:14, NW). Ushobora kuba wariboneye ingene ingingo ngenderwako zo muri Bibiliya zagufashije gufata ingingo ziranga ubukerebutsi igihe wari uhanganye n’ingorane. Bibiliya irashobora gutuma tugira amakenga canke ubushobozi bwo kwiyumvira bwodufasha gutora umuti ngirakamaro w’ingorane zitesha umutwe.—Imigani 1:4.

¹⁴ Ijambo ry’Imana riraturonsa irindi sôko ry’inkomezi, iryo na ryo rikaba ari icizigiro c’ubukiriro (Abaroma 15:4). Bibiliya itubwira yuko ibintu bibi bitazobandanya kubaho ibihe vyose. Amarushwa ayo ari yo yose adushikira ni ay’igihe gito (2 Ab’i Korinto 4:16-18). “[Tw]izigiye kuzoronka ubugingo budashira, ubgo Imana itazi kubesha yasezeranye kera, ibihe vyose bitarabaho” (Tito 1:2). Nimba tunezerererwa ico cizigiro, tukama tuzi kazoza gakayangana Yehova adusezeranira, turashobora kwihanganira amagorwa.—Abaroma 12:12; 1 Ab’i Tesalonike 1:3.

Ishengero ni uburyo Imana igaragarizamwo urukundo

15. Abakirisu bashobora kuberanira kirumara gute?

¹⁵ Iyindi ntunganyo iva kuri Yehova ishobora kudufasha mu bihe vy’amagorwa ni ubugenzi twinovora mw’ishengero rya gikirisu. Bibiliya ivuga iti: “Umukunzi akundana ibihe vyose, kandi yavukiye kukubera nk’uwo muvukana mu magorwa” (Imigani 17:17). Ijambo ry’Imana riremesha abo mw’ishengero bose kwubahana canke guterana iteka no gukundana (Abaroma 12:10). Intumwa Paulo yanditse ati: “Ntihagire umuntu ababara ivyiwe, arikw ababare ivya mugenzi we (1 Ab’i Korinto 10:24). Kugira ako gatima, birashobora kudufasha gushira umutima ku vyo abandi bakeneye aho kuwushira ku bigeragezo vyacu bwite. Igihe twitanze tugakorera abandi, ntitubafasha gusa mugabo kandi turagira agahimbare n’umunezero bituma imitwaro yacu bwite iremuruka, bikarushiriza kutworohera kuyikorera.—Ivyakozwe 20:35.

16. Umukirisu umwumwe wese ashobora gute kuba kiremesha?

¹⁶ Abagabo n’abagore bahumuye mu vy’impwemu barashobora kugira uruhara ruhambaye mu vyo gukomeza abandi. Kugira ngo ivyo babishikeko, baraba abantu begereka kandi baronkeka (2 Ab’i Korinto 6:11-13). Ishengero rirahezagirwa vy’ukuri igihe bose barondera uturyo two gukeza abakiri bato, two kwubaka abizera bashasha, be n’utwo kuremesha abihebuye (Abaroma 15:7). Urukundo rwa kivukanyi ruzodufasha kandi kwirinda agatima ko kwicura abandi. Dukwiye kutihutira kwiyumvira yuko ingorane zishikira umuntu ari ikimenyetso c’uko agoyagoya mu vy’impwemu. Birabereye kubona Paulo ahimiriza abakirisu “[kuremesha] abarandutse imitima” (1 Ab’i Tesalonike 5:14). Bibiliya yerekana yuko n’abakirisu b’abizerwa bashikirwa n’amagorwa.—Ivyakozwe 14:15.

17. Ni uturyo utuhe dufise two gukomeza ubucuti buri mu kivukano cacu c’abakirisu?

¹⁷ Amakoraniro ya gikirisu araturonsa akaryo keza igitangaza ko guhumurizanya no kuremeshanya (Abaheburayo 10:24, 25). Iyo migenderanire irangwa urukundo ntigarukira gusa ku makoraniro y’ishengero. Ahubwo, abasavyi b’Imana bararondera uturyo two kuja hamwe n’abandi mu bindi bihe bisanzwe. Ibintu biteye intuntu nivyaduka, tuzofashanya n’umutima ukunze kubera ko ubucuti bukomeye buzoba bwaramaze gutsimbatara hagati yacu. Intumwa Paulo yanditse ati: “Umubiri ntiwireme ibice, arikw ingingo zibabarane . . . Kand’urugingo rumwe iyo rubabaye, ingingo zose zirababazanywa na rwo: cank’iy’urugingo rumwe ruhawe icubahiro, ingingo zose zihimbaranwa na rwo”.—1 Ab’i Korinto 12:25, 26.

18. Ni impengamiro iyihe dukwiye kwirinda igihe twumva twihebuye?

¹⁸ Rimwe na rimwe, twoshobora kwumva twihebuye cane ku buryo twumva tudashaka kuba kumwe n’abakirisu bagenzi bacu. Dukwiye kurwanya inyiyumvo nk’izo kugira ngo ntitwiyime impumurizo be n’imfashanyo abo dusangiye ukwizera bashobora kuduha. Bibiliya ituburira iti: “Uwigungira ukwiwe aba arondera ivyo yiharije gusa, kand’arwanya inama nziza zose” (Imigani 18:1). Abavukanyi n’abavukanyikazi bacu ni uburyo Imana ikoresha mu kutubungabunga. Nitwemera icese iyo ntunganyo irangwa urukundo, tuzoronka induhuro mu bihe vy’amagorwa.

Nugume ubona ibintu neza

19, 20. Ivyanditswe bidufasha gute kwamirira kure ivyiyumviro vy’ukwica intege?

¹⁹ Mu gihe ducitse intege kandi tukagira imibabaro, biroroshe ko dutsimbataza ivyiyumviro vy’ukwica intege. Nk’akarorero, igihe bamwebamwe bariko bashikirwa n’ingorane, boshobora gutangura gukekeranya ku kuntu bahagaze mu vy’impwemu, bakiyumvira yuko amagume barimwo ari ikimenyetso c’uko Imana itabashima. Ariko rero, niwibuke yuko Yehova ata n’umwe agerageresha “ibibi” (Yakobo 1:13). Bibiliya ivuga iti: ‘Imana ntibabaza abantu ibigomba, canke ngo ibatere intuntu’ (Gucura intimba 3:33). Ahubwo nyabuna, Yehova aratuntura igihe abasavyi biwe bari mu mibabaro.—Yesaya 63:8, 9; Zekariya 2:8.

²⁰ Yehova ni “Data wa twese w’imbabazi, [akongera akaba] Imana yirura imibabaro yose” (2 Ab’i Korinto 1:3). Aratubabara, kandi azodushira hejuru mu gihe gikwiriye (1 Petero 5:6, 7). Kwama tuzi yuko Imana idukunda bizodufasha kuguma tubona ibintu neza, eka mbere bidufashe kunezerwa. Yakobo yanditse ati: “Mwiyumvire kw ar’ivyo kunezererwa rwose, bene Data, ni mwagwa mu bibagerageza bitari bimwe” (Yakobo 1:2). Kubera iki? Yishura ati: “Kuko ni yamara kurama azohabga igitsibo c’ubu[zima], ico Imana yasezeraniye abayikunda”.—Yakobo 1:12.

21. Naho duhangana n’ingorane zimeze gute, Imana ikura amazinda gute abagaragaza ko ari intahemuka kuri yo?

²¹ Nk’uko Yezu yatuburiye, mw’isi tuzogira amarushwa (Yohana 16:33). Mugabo Bibiliya isezerana yuko ata ‘marushwa canke ivyago canke uguhamwa canke inzara canke ukwambara ubusa canke ukuba mw’irinde’ bizodutandukanya n’urukundo rw’Imana be n’urukundo rw’Umwana wayo (Abaroma 8:35, 39). Ese ukuntu bihumuriza kumenya yuko amagorwa ayo ari yo yose adushikira ari ay’igihe gito! Igihe tukirindiriye iherezo ry’ugucumukura kw’abantu, Dawe wa twese munyarukundo Yehova, aduhozako ijisho ngo aturinde. Nitwamuhungirako kugira ngo adukingire, azogaragaza ko ari “ubuhungiro bg’abadenderezwa, . . . ubuhungiro mu bihe vy’amagorwa”.—Zaburi 9:9.

Twize iki?

• Abakirisu bakwiye kwitega iki umwanya bakiba muri iyi si mbi?

• Amasengesho duturana ubwira ashobora gute kudukomeza igihe duhanganye n’ibigeragezo?

• Impwemu y’Imana ni umufasha mu buryo nyabaki?

• Twokora iki kugira ngo dufashanye?

[Ifoto ku rup. 18]

Dutegerezwa kurondera Yehova nk’aho twoba turiko twirukira mu munara ukomeye

[Amafoto ku rup. 20]

Abahumuye mu vy’impwemu ntibagisha akaryo na kamwe ko gukeza abandi no kubaremesha