Yehova agwije urukundo rudahemuka
“Yehova . . . agwije ubuntu-mvarukundo”.—ZABURI 145:8, NW.
1. Urukundo rw’Imana rugera he?
“IMANA [ni] urukundo” (1 Yohana 4:8). Ayo majambo akora ku mutima aragaragaza ko uburyo Yehova ategeka bushingiye ku rukundo. Emwe, mbere n’abantu batamugamburukira barungukira ku zuba n’imvura atanga abigiranye urukundo (Matayo 5:44, 45)! Kubera urukundo Imana yakunze isi y’abantu, n’abansi bayo barashobora kwigaya, bakayihindukirira, hanyuma bagashikira ubuzima (Yohana 3:16). Ariko rero, vuba Yehova azokuraho abanyakibi b’ibinani kugira abantu bamukunda binovore ubuzima budahera mw’isi nshasha y’ubugororotsi.—Zaburi 37:9-11, 29; 2 Petero 3:13.
2. Ni umuce udasanzwe w’urukundo uwuhe Yehova agaragariza abamwiyeguriye?
2 Yehova arerekana urukundo afitiye abasavyi biwe b’ukuri mu buryo buranga ko abaha agaciro kandi buramba. Bene urwo rukundo rwerekanwa n’ijambo ry’igiheburayo rihindurwa ngo “ubuntu-mvarukundo” canke “urukundo rudahemuka”. Wa Mwami Dawidi wa Isirayeli ya kera yaraha agaciro bimwe bigera ibwina ubuntu-mvarukundo bw’Imana. Kubera ivyo yari yariboneye be n’ukuzirikana ku vyo Imana yagiriye abandi, Dawidi yarashoboye kuririmba afise ukwizigira ati: “Yehova . . . agwije ubuntu-mvarukundo [canke “urukundo rudahemuka”]”.—Zaburi 145:8, NW.
Uburyo bwo kumenya intahemuka z’Imana
3, 4. (a) Zaburi ya 145 idufasha gute kumenya intahemuka za Yehova? (b) Intahemuka z’Imana ‘ziyihezagira’ gute?
3 Ku biraba Yehova Imana, Hana nyina w’umumenyeshakazoza Samweli yavuze ati: “Azozigama ibirenge vy’abagororotsi biwe [“intahemuka ziwe”, NW]” (1 Samweli 2:9). Izo “ntahemuka” ni bande? Umwami Dawidi aratanga inyishu. Amaze guhayagiza kamere z’akaroruhore za Yehova, aca avuga ati: “Abakunzi bawe [“intahemuka zawe”, NW] bazogushemagiza [canke “bazoguhezagira”, NW]” (Zaburi 145:10). Ushobora kwibaza ukuntu umuntu ashobora guhezagira Imana. Abigira ubwa mbere na mbere mu kuyishemeza canke mu kuyihaya.
4 Intahemuka za Yehova biboneka ko ari barya bakoresha iminwa yabo kugira ngo bamuhaye. Igihe bateramiye hamwe be n’igihe bari ku makoraniro ya gikirisu, ni igiki bakunda kuganirako? Emwe, ni Ubwami bwa Yehova! Abasavyi b’Imana b’intahemuka bafise inyiyumvo nk’iza Dawidi, uwaririmvye ati: “Bazovuga ubgiza bg’ubgami bgawe [ni ukuvuga bwa Yehova], bandagaze ububasha bgawe”.—Zaburi 145:11.
5. Tuzi gute ko Yehova atega ugutwi igihe intahemuka ziwe bamuhaya?
5 Yehova yoba atega ugutwi igihe intahemuka ziwe bamushemagiza? Egome, aratega ugutwi ivyo bavuga. Mu buhanuzi buvuga ivyerekeye ugusenga kw’ukuri muri kino gihe cacu, Malaki yanditse ati: “Nukw abubaha Uhoraho baragānīra; Uhoraho atega amatwi arumviriza; maz’igitabo candikirwa imbere yiwe c’icibutso c’abubaha Uhoraho bakiyumvira izina ryiwe” (Malaki 3:16). Yehova biramuhimbara cane rwose igihe intahemuka ziwe bamuhaya, kandi arabibuka.
6. Ni igikorwa ikihe kidufasha kumenya intahemuka z’Imana?
6 Abasavyi ba Yehova b’intahemuka bashobora kandi kumenyekanira ku mutima rugabo wabo be no ku kuntu bibwiriza mu kuganiriza abantu atari abasavyi ba ya Mana y’ukuri. Kukaba nkako, intahemuka z’Imana ‘baramenyesha abana b’abantu ivy’inkomezi yakoze, n’ubwiza buninahaye bw’ubwami bwiwe’ (Zaburi 145:12). Woba urondera uturyo two kubwira abatazi Yehova ivyerekeye ubwami bwiwe kandi ukatwungukirako bimwe bishitse? Ubwami bwiwe ntibumeze nk’intwaro z’abantu vuba zigiye gukurwaho, bwo buzokwamaho (1 Timoteyo 1:17). Birihutirwa ko abantu bamenya ivyerekeye ubwami bwa Yehova bwamaho, maze bagafata impagararo yo kuba ababushigikira. Dawidi yaririmvye ati: “Ubgami bgawe n’ubgami bg’ibihe bidashira, ubugabe bgawe buzohangama uk’urunganwe ruzogenda rukurikira urundi”.—Zaburi 145:13.
7, 8. Ni igiki cabaye mu 1914, kandi ni ikimenyamenya ikihe kihari c’uko Imana ubu iganza biciye ku Bwami bw’Umwana wayo?
7 Kuva mu 1914, harabaye iyindi mvo yo kuvuga ivyerekeye ubwami bwa Yehova. Muri uwo mwaka, Imana yarashinze Ubwami bwo mw’ijuru burongowe na Mesiya ari we Yezu Kirisitu, Umwana wa Dawidi. Gutyo, Yehova yarashikije umuhango wiwe w’uko ubwami bwa Dawidi bwoshinzwe mu buryo butanyiganyiga ibihe bidahera.—2 Samweli 7:12, 13; Luka 1:32, 33.
8 Ikimenyamenya c’uko Yehova ubu aganza biciye ku Bwami bw’Umwana wiwe Yezu Kirisitu, kibonekera mw’iranguka ribandanya kuba ry’ikimenyetso c’ukuhaba kwa Yezu. Umuce wibonekeje cane w’ico kimenyetso ni igikorwa Yezu yari yarabuye ko cokozwe n’intahemuka z’Imana zose igihe yavuga ati: “Ubu butumwa bgiza bg’ubgami buzovugwa mw isi yose, ngo bube ikimenyetso kibere icabona amahanga yose, maz’umuhero uzoca uza” (Matayo 24:3-14). Kubera yuko intahemuka z’Imana bariko barashitsa ubwo buhanuzi babigiranye umwete, abagabo, abagore n’abana barenga imiliyoni zitandatu bariko baragira uruhara muri ico gikorwa gihambaye kandi kidasanzwe. Vuba, abarwanya Ubwami bwa Yehova bose bagiye guherengetera.—Ivyahishuriwe 11:15, 18.
Twungukire ku busegaba bwa Yehova
9, 10. Yehova atandukaniye he n’abategetsi b’abantu?
9 Nimba turi abakirisu biyeguye, ubucuti dufitaniye n’Umukama Segaba Yehova buratuzanira ivyiza vyinshi (Zaburi 71:5; 116:12). Nk’akarorero, kubera ko dutinya Imana kandi tugakora ivy’ukugororoka, turemerwa na yo kandi tukayiyegereza mu buryo bw’impwemu (Ivyakozwe 10:34, 35; Yakobo 4:8). Igitandukanye n’ivyo, abategetsi b’abantu akenshi ukunda kubona bari kumwe n’abantu bamenyekana, nk’indongozi mu vya gisirikare, abadandaza batunze canke abantu barurangiranwa mu vy’inkino no mu vy’ibiteramo. Nk’uko ikinyamakuru co muri Afirika citwa Sowetan kibivuga, umutegetsi umwe wo mu vy’intwaro akomeye yavuze amajambo akurikira ku bijanye n’uturere two mu gihugu ciwe twasinzikajwe n’ubukene: “Ndatahura igituma benshi muri twebwe badashaka kuja muri bene utwo turere. Ni uko gusa dushaka kwibagira ko ibintu nk’ivyo bibaho. Biraducumita mu mutima kandi turumva ubuyega kubera [imiduga] izimvye tugenderamwo”.
10 Ego ni ko, abategetsi b’abantu bamwebamwe baritwararika ata buryarya ukumererwa neza kw’abo batwara. Mugabo, n’abameze neza cane muri bo ntibazi abo batwara mu buryo bwimbitse. Nkako, twoshobora kwibaza duti: “Hoba hariho umutegetsi n’umwe yitwararika cane abo atwara bose ku buryo yihutira gufasha umwe wese mu bihe vy’amagorwa”? Egome, ariho. Dawidi yanditse ati: “Uhoraho aramira abatemba bose, yēmesha abahetamye bose”.—Zaburi 145:14.
11. Ni ibigeragezo ibihe bishikira intahemuka z’Imana, kandi ni imfashanyo iyihe bafise?
11 Ibigeragezo vyinshi be n’ivyago vyinshi birashikira intahemuka za Yehova Imana bivuye ku gasembwa kabo no ku kuba baba mw’isi iri mu bubasha bwa Shetani “wa Mubi” (1 Yohana 5:19; Zaburi 34:19). Abakirisu barashikirwa n’uruhamo. Bamwebamwe bararwara indwara zidakira canke bakababazwa n’ukubura ababo. Rimwe na rimwe, amakosa intahemuka za Yehova bakora yoshobora gutuma ‘bahetamira’ mu gucika intege. Ariko rero, naho boshikirwa n’ikigeragezo kimeze gute, Yehova yama yiteguriye guhumuriza no kuronsa inkomezi zo mu vy’impwemu umwumwe wese muri bo. Ukwo ni ko nyene wa Mwami Yezu Kirisitu yitwararikana urukundo abatwarwa biwe b’intahemuka.—Zaburi 72:12-14.
Imfungurwa zihaza mu gihe kibereye
12, 13. Yehova aronsa “ibiriho vyose” ivyo bikeneye gushika ku rugero rungana iki?
12 Kubera ubuntu-mvarukundo bwinshi Yehova afise, araronsa abasavyi biwe ivyo bakeneye vyose. Muri ivyo harimwo ukubaronsa imfungurwa zirimwo ivyangombwa. Umwami Dawidi yanditse ati: “Vyose biguhanga amaso [Yehova], nawe ukabigaburira ivyo kurya vyavyo igihe kigeze. Upfumbaturura igipfunsi cawe, ugahāza ukwifuza kw’ibiriho vyose” (Zaburi 145:15, 16). Mbere no mu bihe vy’ivyago, Yehova arashobora kuyobora ibintu ku buryo bw’uko intahemuka ziwe baronka ‘ivyo barya ku musi’.—Luka 11:3; 12:29, 30.
13 Dawidi yaravuze yuko “ibiriho vyose” bihaga. Aho harimwo n’ibikoko. Iyo ivyatsi vyinshi vyo kw’isi be n’ibiterwa vyo mu mazi bitaba biriho, ibiremwa vyo mu mazi, inyoni be n’ibikoko vyo kw’isi ntivyoronse impemu nziza bihumeka canke ibifungurwa bifungura (Zaburi 104:14). Ariko rero, Yehova aritwararika yuko bironka ivyo bikeneye vyose.
14, 15. Imfungurwa zo mu vy’impwemu ziriko zitangwa gute muri iki gihe?
14 Abantu ntibameze nk’ibikoko, bo barakenera ivy’impwemu (Matayo 5:3). Ese ukuntu Yehova aronsa mu buryo butangaje intahemuka ziwe ivyo zikeneye mu vy’impwemu! Imbere y’uko Yezu apfa, yasezeranye ko “wa mushumba w’umwizerwa kandi w’incabwenge” yoronkeje abayoboke biwe “ibifungurwa [vyo mu vy’impwemu] ku gihe kibereye” (Matayo 24:45, NW). Amasigarira ya bamwe 144.000 basizwe ni bo bagize uwo mugwi w’umushumba muri iki gihe. Biciye kuri bo, Yehova yama atanga koko ibifungurwa umukimba vyo mu vy’impwemu.
15 Nk’akarorero, benshi mu basavyi ba Yehova ubu barungukira ku mpinduro ya Bibiliya nshasha kandi itagira agakosa mu rurimi rwabo bwite. Ese ukuntu Bibiliya Les Saintes Écritures—Traduction du monde nouveau yabaye umuhezagiro ntangere! Vyongeye, amamiliyoni y’ibitabu bifasha kwiga Bibiliya arabandanya gusohorwa mu ndimi zirenga 300. Ivyo bifungurwa vyose vyo mu vy’impwemu vyarabaye umuhezagiro ku basavyi b’Imana b’ukuri bo hirya no hino kw’isi. Ni nde abereye kwitirirwa ivyo vyose? Ni Yehova Imana. Biciye ku buntu-mvarukundo bwiwe bwinshi, yaratumye bishoboka ko wa mugwi w’umushumba utanga ‘imfungurwa igihe kigeze’. Biciye ku ntunganyo nk’izo, “ukwifuza kw’ibiriho vyose” mw’iparadizo yo mu vy’impwemu yo mu gihe ca none kurahazwa. Vyongeye, urazi ukuntu abasavyi ba Yehova banezerwa no kwizigira kuzobona vuba isi ihinduka iparadizo yo mu buryo bw’umubiri!—Luka 23:42, 43.
16, 17. (a) Ni uturorero utuhe tuhari tw’imfungurwa zo mu vy’impwemu zaje igihe kigeze? (b) Zaburi ya 145 iserura gute inyiyumvo intahemuka z’Imana bafise ku biraba ikibazo nyamukuru cavyuwe na Shetani?
16 Rimbura akarorero kibonekeje k’imfungurwa zo mu buryo bw’impwemu zatanzwe mu gihe kibereye. Mu 1939, Intambara ya Kabiri y’isi yose yaratanguye mu Buraya. Muri uwo mwaka nyene, inomero y’Umunara w’Inderetsi yo ku wa 1 Munyonyo yarimwo ikiganiro gifise umutwe uvuga ngo “Ukutagira aho uhengamiye”. Bivuye ku makuru atomoye yashikirijwe, Ivyabona vya Yehova bo hirya no hino kw’isi barabonye ko bakeneye kuguma batagira aho bahengamiye mu vy’amahanga yariko ararwana. Ivyo vyatumye barakirwa n’intwaro ku mpande zompi z’abariko barwana muri iyo ntambara yamaze imyaka itandatu. Ariko rero, naho intahemuka z’Imana bari babujijwe kandi bagahamwa, bagumye bamamaza inkuru nziza y’Ubwami. Kuva mu 1939 gushika mu 1946, barahezagiwe mu kugira iyongerekana ritangaje ry’ibice 157 kw’ijana. Vyongeye, inkuru itangaje ivuga ukutadohoka bagize mu gihe c’iyo ntambara, irabandanya gufasha abantu kubona idini y’ukuri.—Yesaya 2:2-4.
17 Imfungurwa zo mu vy’impwemu Yehova atanga ntiziboneka igihe kigeze vyonyene, ariko kandi zirahaza rwose. Igihe amahanga yariko arwana bikomeye mu Ntambara ya Kabiri y’isi yose, abasavyi ba Yehova barafashijwe kwitunira ku kintu kirengeye kure n’iyo ubukiriro bwabo bwite. Yehova yarabafashije gutahura yuko ikibazo nyamukuru, kikaba ari icerekeye ivyaremwe vyose, kijanye n’uburenganzira Yehova afise bwo kuba Segaba. Ese ukuntu bimara akanyota kumenya yuko, bivuye ku kudahemuka kw’Ivyabona vya Yehova, umwumwe wese muri bo yagize uruhara rutoyi mw’iyemezwa ry’ubusegaba bwa Yehova no mu kwerekana ko Shetani ari umubeshi (Imigani 27:11)! Intahemuka za Yehova ntibameze nka Shetani we acokora Yehova n’uburyo ategeka. Bo babandanya kuvugira aheru bati: “Uhoraho agororoka mu nzira ziwe zose”.—Zaburi 145:17.
18. Ni akarorero ka vuba akahe kahari k’imfungurwa zo mu buryo bw’impwemu zihuje n’igihe kandi zihaza cane?
18 Akandi karorero k’imfungurwa zo mu buryo bw’impwemu zihuje n’igihe kandi zihaza, ni ca gitabu Niwiyegereze Yehova casohorwa kuri ya Mahwaniro y’Intara amajana n’amajana yatazirwa ngo “Abamamaji b’Ubwami b’Abanyamwete” yabaye hirya no hino kw’isi mu 2002-2003. Ico gitabu, icahinguwe na “wa mushumba w’umwizerwa kandi w’incabwenge” hanyuma kigasohorwa n’Ivyabona vya Yehova, kirashimika kuri kamere zitangaje za Yehova Imana, ushizemwo na zimwe zivugwa muri Zaburi ya 145. Ico gitabu ciza nta gukeka ko kizogira uruhara ruhambaye mu gufasha intahemuka z’Imana kurushiriza mbere kuyiyegereza.
Igihe co kurushiriza kwiyegereza Yehova
19. Ni igihe gihambaye ikihe cegereje, kandi tuzovyifatamwo gute?
19 Igihe gihambaye mu vy’ugutorera umuti ikibazo c’ubusegaba bwa Yehova kiriko kiregereza. Nk’uko vyabuwe muri Ezekiyeli ikigabane ca 38, Shetani vuba agiye kurangiza uruhara rwiwe rwo kuba “Gogi wo mu gihugu c’i Magogi”. Ivyo bizoba birimwo igitero kizogirwa kw’isi yose ku basavyi ba Yehova. Ivyo bizoba ari akigoro ka nyuma ka Shetani ko gusenyura ukutadohoka kw’intahemuka z’Imana. Abasavyi ba Yehova bazokenera, kuruta uko bigeze kubigira, kumwihekako babigiranye ubwira, mbere bataka barondera imfashanyo. Ugutinya Imana kwabo kuranga ukuyubaha be n’urukundo bayikunda vyoba bizoba impfagusa? Habe namba, kubera ko Zaburi ya 145 ivuga iti: “Uhoraho aba hafi y’abamwambaza bose, y’abamwambaza mu vy’ukuri bose. Azoshitsa ivyo abamwubaha bagomba; kand’azokwumva ugutakamba kwabo, abakize. Uhoraho azigama abamukunda bose; arikw abanyakibi bose azobahonnya”.—Zaburi 145:18-20.
20. Amajambo yo muri Zaburi 145:18-20 azogaragara gute ko ari ay’ukuri muri kazoza katari kure?
20 Ese ukuntu bizoba vyeza umutima kwibonera ko Yehova azoba ari hafi tukongera tukibonera ububasha bwiwe bwo kurokora niyaherengeteza inkozi z’ikibi zose! Muri ico gihe gihambaye ubu cegereje cane, Yehova azokwumviriza gusa “abamwambaza mu vy’ukuri”. Nta nkeka ko atazotega ugutwi abiyorobeka. Ijambo ry’Imana rirerekana mu buryo butomoye yuko ugukoresha izina ryiwe ukwo ari kwo kwose kwagizwe n’abanyakibi ku munuta wa nyuma kwamye kuba impfagusa.—Imigani 1:28, 29; Mika 3:4; Luka 13:24, 25.
21. Intahemuka za Yehova berekana gute yuko bahimbarwa no gukoresha izina ry’Imana?
21 Ubu kuruta ikindi gihe ico ari co cose, ni igihe c’uko abatinya Yehova “bamwambaza mu vy’ukuri”. Intahemuka ziwe barahimbarwa no gukoresha izina ryiwe mu masengesho batura no mu nsasanuro batanga ku makoraniro yabo. Barakoresha izina ry’Imana mu biganiro vyabo bwite. Kandi baramenyekanisha babigiranye uburindutsi izina rya Yehova mu busuku barangura ku mugaragaro.—Abaroma 10:10, 13-15.
22. Ni kubera iki bihambaye ko tuguma tunanira inyifato be n’ivyipfuzo vy’isi?
22 Kugira ngo tubandanye kwungukira ku bucuti somambike dufitaniye na Yehova Imana, birahambaye kandi yuko tuguma tunanira ibintu vyonona mu buryo bw’impwemu nk’uguhahamira amaronko, ukwinezereza kubi, agatima ko kudaharirana, canke kutababara abakenye (1 Yohana 2:15-17; 3:15-17). Ugukurikirana ibintu nk’ivyo be n’ingeso nk’izo biramutse bidakosowe, birashobora gutuma umuntu akora icaha gikomeye, maze amaherezo ntabe acemerwa na Yehova (1 Yohana 2:1, 2; 3:6). Ni ingendo iranga ubukerebutsi kugumiza mu muzirikanyi yuko Yehova azobandanya kutugaragariza ubuntu-mvarukundo canke urukundo rudahemuka nitwaguma gusa turi abizerwa kuri we.—2 Samweli 22:26.
23. Ni kazoza kakaka akahe kabikiwe intahemuka z’Imana bose?
23 Nimuze rero tugume dushingira ivyiyumviro vyacu kuri kazoza kakaka kabikiwe intahemuka za Yehova bose. Ivyo tubigenjeje gutyo, turagira icizigiro ciza igitangaza co kuzoshirwa mu bazoshira hejuru Yehova, bakamuhezagira bakongera bakamushemeza ‘umusi wose’ no mu “bihe bitazoshira” (Zaburi 145:1, 2). Nimuze rero ‘tugume twizigamira mu rukundo rw’Imana, twiteze ubuzima budahera’ (Yuda 20, 21). Uko tubandanya kwungukira kuri kamere z’igitangaza za Data wa twese wo mw’ijuru, ushizemwo n’ubuntu-mvarukundo agaragariza abamukunda, nimuze twame dufise inyiyumvo nka zimwe zaserurwa na Dawidi mu majambo ahereza Zaburi ya 145 agira ati: “Akanwa kanje kazovuga ishimwe ry’Uhoraho; abafise imibiri bose nibashemagize [canke “bahezagire”, NW] izina ryiwe ryera ibihe bitazoshira”.
Wokwishura gute?
• Zaburi ya 145 ifasha gute kumenya intahemuka z’Imana?
• Ni gute Yehova ‘ahaza ukwipfuza kw’ibiriho vyose’?
• Ni kubera iki dukeneye kurushiriza kwiyegereza Yehova?
[Ifoto ku rup. 16]
Intahemuka z’Imana barahimbarwa no kuganira ku bikorwa vyayo vy’inkomezi
[Ifoto ku rup. 17]
Abasavyi ba Yehova barafasha babigiranye umutima rugabo abatamuzi kumenya ivyerekeye ubuninahazwa bw’ubwami bwiwe
[Amafoto ku rup. 18]
Yehova araronsa imfungurwa “ibiriho vyose”
[Abo dukesha ifoto]
Ibikoko: Parque de la Naturaleza de Cabárceno
[Ifoto ku rup. 19]
Yehova araronsa inkomezi n’ubuyobozi intahemuka ziwe barondera gufashwa na we mw’isengesho