Yezu ni nde?

Yezu ari mu bantu bazwi cane babaye kw’isi. Abantu benshi usanga bazi Yezu kw’izina gusa, ariko ata vyinshi bazi ku bimwerekeye. Mbere benshi usanga bamuzi ugutandukanye. None Bibiliya ivuga iki ku bimwerekeye?

1. Yezu ni nde?

Yezu ni ikiremwa c’impwemu c’ububasha kiba mw’ijuru. Yaremwe na Yehova Imana imbere y’uko ibindi bintu vyose biremwa. Ni co gituma yitwa “imfura mu biremwa vyose.” (Abakolosayi 1:15) Bibiliya ivuga ko Yezu ari “Umwana . . . w’ikinege” w’Imana kubera ko ari we wenyene Yehova yiremeye ata wundi biciyeko. (Yohani 3:16) Yezu yarakoranye cane na Se wiwe Yehova, aramufasha kurema ibindi bintu vyose. (Soma Imigani 8:30.) Yezu ni umugenzi somambike wa Yehova. Ni umuvugizi w’Imana adahemuka, akaba amenyesha abandi ubutumwa n’ubuyobozi bivuye kuri Yehova. Ni co gituma yitwa “Jambo.”—Yohani 1:14.

2. Kubera iki Yezu yaje kw’isi?

Haraciye nk’imyaka 2.000 Yehova akoze igitangaro. Akoresheje impwemu yiwe nyeranda, yarimuye ubuzima bwa Yezu abukuye mw’ijuru abushira mu nda y’umwigeme w’isugi yitwa Mariya. Gutyo, Yezu yarashoboye kuvuka ari umuntu. (Soma Luka 1:34, 35.) Yehova yarungitse Yezu kw’isi kugira abe Mesiya yari yarasezeranywe, ari we Kristu, yongere acungure abantu.a Ubuhanuzi bwose bwerekeye Mesiya bwaramurangukiyeko. Ivyo vyatumye abantu bamenya ko Yezu yari “Kristu, Umwana w’Imana nzima.”—Matayo 16:16.

3. Ubu Yezu ari hehe?

Inyuma y’aho Yezu apfiriye, Imana yaramuzuye asubira kuba ikiremwa c’impwemu, aca asubira mw’ijuru. ‘Imana yaciye imuduza imushira mu kibanza co hejuru cane.’ (Abafilipi 2:9) Ubu Yezu afise ikibanza kidasanzwe mw’ijuru. Ni we agira kabiri havuye Yehova.

4. Yezu si Imana Mushoboravyose

Yezu ni ikiremwa c’impwemu gifise ububasha kiri mw’ijuru. Naho ari ukwo, Bibiliya yigisha ko agamburukira Yehova, Imana yiwe ikaba na Se. Uti kubera iki tuvuze gutyo? Nimurabe iyo VIDEWO kugira ubone ivyo Bibiliya yigisha ku bijanye n’itandukaniro riri hagati ya Yezu n’Imana Mushoboravyose.

IVIDEWO: Yezu Kristu yoba ari Imana? (3:22)

Ivyanditswe bikurikira biradufasha gutahura itandukaniro riri hagati ya Yehova na Yezu. Nimusome icanditswe kimwekimwe cose, muce muganira kuri ivyo bibazo:

Nimusome Luka 1:30-32.

• Uwo mumarayika yavuze ko Yezu apfana iki na Yehova Imana “Musumbavyose”?

Nimusome Matayo 3:16, 17.

• Igihe Yezu yabatizwa, ijwi ryavuye mw’ijuru ryavuze iki?

• Wibaza ko iryo jwi ryari irya nde?

Nimusome Yohani 14:28.

• Hagati y’umwana na se ni nde asumba uwundi?

• Kuba Yezu yise Yehova Se wiwe bitwereka iki?

Nimusome Yohani 12:49.

• Yezu yoba yabona ko we na Se wiwe ari umuntu umwe? Wewe ubivugako iki?

5. Ivyerekana ko Yezu yari Mesiya

IVIDEWO: Yezu yarashikije ubuhanuzi (3:03)

Nimusome ubu buhanuzi bwo muri Bibiliya, muce muganira kuri ibi bibazo:

Nimusome Mika 5:2, kugira mubone ahantu Mesiya yari kuvukira.b

• Yezu yoba yavukiye aho nyene hari haravuzwe?—Matayo 2:1.

Nimusome Zaburi 34:20 na Zekariya 12:10, kugira mubone ivyo Bibiliya yari yaravuze ku bijanye n’urupfu rwa Mesiya.

• Ivyo bintu vyoba vyarabaye?—Yohani 19:33-37.

• Woba wibaza ko Yezu hari ico yakoze kugira atume ubwo buhanuzi bumurangukirako?

• Ivyo bidufasha kubona ko Yezu ari nde?

INCAMAKE

Yezu ni ikiremwa c’impwemu gifise ububasha. Ni Umwana w’Imana akaba na Mesiya.

Wize iki?

• Kubera iki Yezu yitwa “imfura mu biremwa vyose”?

• Ni ibiki Yezu yakoze imbere y’uko aza kw’isi?

• Twemezwa n’iki ko Yezu ari Mesiya?

RONDERA N’IBINDI

Nurabe ibindi bintu vyerekana ko Yezu ari Mesiya.

“Ubuhanuzi bwerekeye Mesiya bwoba bwemeza ko Yezu yari we Mesiya?” (Ikiganiro co kuri jw.org)

Nurabe ivyo Bibiliya ivuga ku bijanye n’ubucuti buri hagati y’Imana na Yezu.

“Kubera iki Yezu yitwa Umwana w’Imana?” (Ikiganiro co kuri jw.org)

Nurabe igituma inyigisho y’Ubutatu idashingiye kuri Bibiliya.

“Yezu yoba ari Imana?” (Umunara w’Inderetsi, 1 Ndamukiza 2009)

Nurabe ukuntu ubuzima bw’umukenyezi umwe bwahindutse aho amenyeye ivyo Bibiliya yigisha ku bijanye na Yezu.

“Umuyahudikazi asigura icatumye asubira gusuzuma ivyo yemera” (Be maso!, Rusama 2013)