‘Ehe iyi ni yo Mana yacu’

Amayagwa arimburwa muri ibi biganiro bibiri vyo kwiga ashingiye ku gitabu Niwiyegereze Yehova, casohowe kw’ihwaniro ry’intara ryabaye kw’isi yose mu 2002/2003.​—Raba ikiganiro kivuga ngo “Carandonkeje ivyo nkeneye mu mutima”, guhera ku rupapuro rwa 20.

“Eh’iyi ni yo Mana yacu; ni yo twari turorereye, na yo iradukiza: uyu ni we Uhoraho”.​—YESAYA 25:9.

1, 2. (a) Yehova yise gute umwe sekuruza w’imiryango Aburahamu, kandi ivyo bishobora gutuma twiyumvira iki? (b) Bibiliya idukura amazinda gute yuko dushobora kugiriranira ubucuti somambike n’Imana?

“UMUKUNZI wanje”. Ukwo ni ko Yehova, Umuremyi w’ijuru n’isi, yise umwe sekuruza w’imiryango Aburahamu (Yesaya 41:8). Iyumvire nawe: Kubona umuntu buntu agiranira ubucuti n’Umukama Segaba w’ijuru n’isi! Woshobora kwibaza uti: ‘Vyoba bishoboka ko niyegereza Imana muri ubwo buryo?’.

² Bibiliya iradukura amazinda yuko dushobora kugiranira n’Imana ubucuti bwa hafi. Aburahamu yarashoboye kwunga ubwo bucuti bwa somambike kubera yuko “yizeye Imana” (Yakobo 2:23). No muri iki gihe nyene, Yehova ‘agiriranira ubucuti bwa somambike n’abagororotsi’ (Imigani 3:32). Muri Yakobo 4:8, Bibiliya iduhimiriza iti: “Mwiyegereze Imana, na yo izobēgēra”. Biragaragara yuko nitwatera intambwe zo kwiyegereza Yehova, na we nyene azotwiyegereza. Mugabo none, ayo majambo yahumetswe yoba ashaka kuvuga yuko ari twebwe, abantu b’abanyavyaha kandi b’abanyagasembwa, dutera intambwe ya mbere? Haba n’intete. Kugiriranira ubucuti somambike na Yehova bishoboka gusa kubera yuko Imana yacu y’inyarukundo yateye intambwe zibiri zihambaye.​—Zaburi 25:14.

3. Yehova yateye intambwe zibiri izihe kugira ngo atume bidushobokera kugiriranira ubucuti na we?

³ Ubwa mbere, Yehova yararinganije ivy’uko Yezu ‘atanga ubuzima bwiwe kw’incungu ya benshi’ (Matayo 20:28). Iyo nkuka y’incungu ituma bidushobokera kwiyegereza Imana. Bibiliya ivuga iti: “Twebge tugira urukundo, kukw ari yo yabanje kudukunda” (1 Yohana 4:19). Egome, kubera yuko Imana “ari yo yabanje kudukunda”, yaradushingiye umushinge wo kugiriranira na yo ubucuti. Ubugira kabiri, Yehova ubwiwe yaratwihishuriye. Mu bugenzi ubwo ari bwo bwose tugira, ubunywanyi bushingira ku kumenya vy’ukuri uwundi muntu, ku gushima no guha agaciro kamere ziwe zimuranga. Rimbura ico ivyo bisobanura. Iyo Yehova aza kuba ari Imana yihishije kandi itamenyekana, ntitwoshoboye kwigera tumwiyegereza. Yamara, aho kwinyegeza, Yehova ashaka yuko tumumenya (Yesaya 45:19). Mw’Ijambo ryiwe Bibiliya, Yehova yihishura akoresheje imvugo dushobora gutahura, ico kikaba ari ikimenyamenya c’uko atadukunda gusa, mugabo kandi ko ashaka yuko tumumenya tukongera tukamukunda nka we Dawe wa twese wo mw’ijuru.

4. Tuzokwumva tumerewe gute ku vyerekeye Yehova uko tuzoza turarushiriza kumenya kamere ziwe?

⁴ Woba warigeze kubona akana gatoya kereka abagenzi bako se wako maze ataco kinona, kakavugana umunezero kandi kihaya gati: “Urya ni we dawe”? Abasavyi b’Imana barafise imvo yumvikana yo kwiyumva nk’ukwo ku vyerekeye Yehova. Bibiliya irabura igihe abantu b’abizerwa bazovuga n’ijwi rirenga bati: ‘Ehe iyi ni yo Mana yacu’ (Yesaya 25:8, 9). Uko turushiriza kumenya kamere za Yehova, ni ko tuzoza turarushiriza kwumva yuko dufise Umuvyeyi mwiza aruta abandi bose n’Umugenzi somambike aruta bose. Egome, gutegera kamere za Yehova biraduha imvo nyinshi zo kurushiriza kumwiyegereza. Nimuze rero dusuzume ingene Bibiliya ihishura kamere nkurunkuru za Yehova ari zo ububasha, ubutungane, ubukerebutsi n’urukundo. Muri iki kiganiro, tugira tuganire kuri izo kamere zitatu za mbere.

“Afise ububasha bunyomoje”

5. Ni kubera iki bibereye ko Yehova wenyene yitwa ‘Mushoboravyose’, kandi ni mu buryo butandukanye ubuhe akoresha ububasha bwiwe buteye akoba?

⁵ Yehova “afise ububasha bunyomoje” (Yobu 37:23). Muri Yeremiya 10:6 havuga hati: “Nta gihwanye nawe, Uhoraho, kuk’uhambaye, kand’ izina ryawe rikaba irihambaye kubg’ububasha bgawe”. Nta kiremwa na kimwe kimeze nka Yehova, we ari n’ububasha ntangere. Kubera ico, ni we wenyene yitwa ‘Mushoboravyose’ (Ivyahishuriwe 15:3). Yehova akoresha ububasha bwiwe buteye akoba mu kurema, mu gusangangura, mu gukingira no mu kunagura. Rimbura uturorero tubiri gusa: ububasha bwiwe bwo kurema be n’ububasha bwiwe bwo gukingira.

6, 7. Izuba rifise ububasha bungana iki, kandi ritanga ikimenyamenya c’ukuri guhambaye ukuhe?

⁶ Iyo uhagaze hanze mu ci ku musi izuba ryaka cane, wumva iki ku rukoba rwawe? Wumva ubushuhe bw’izuba. Ariko rero, mu vy’ukuri uba uriko urumva igikorwa c’ububasha bwa Yehova bwo kurema. Mbega izuba rifise ububasha bungana iki? Mu ntimatima yaryo, harashushe kugeza ku bipimo vy’ubushuhe vya dogere nk’imiliyoni 15. Mu gihe wofata agace kangana n’umutwe w’urushinge k’intimatima y’izuba maze ukagashira ngaha kw’isi, ntiwoshobora guhagarara ku bilometero 150 uvuye kuri ako kantu isase gashushe ngo ugende udahiye! Uko isegunda rihera, izuba rirekura inguvu z’ubushuhe zingana n’izorekurwa haturitse amabombe ruhonyanganda amamiliyoni amajana n’amajana. Yamara, isi izunguruka iryo tanure ribengerana riteye akoba iri ku burebure bubereye. Mu gihe isi yoba yegereye cane izuba, amazi yose ari kuri yo yoca akama; mu gihe na ho yoba iri kure yaryo, amazi yose yocika ibarafu. Umubumbe wacu uramutse wegereye cane izuba canke ukaja kure yaryo, aho hose vyotuma ata gifise ubuzima kirangwa kuri wo.

⁷ Abantu benshi babona ko izuba ari ikintu gisanzwe, naho nyene ritariho batoshobora kubaho. Kubera ico, barahomba ico izuba rishobora kutwigisha. Muri Zaburi 74:16 havuga ivyerekeye Yehova hati: “Waremye umuco n’izuba”. Egome, izuba rirahesha icubahiro Yehova, we “yaremye ijuru n’isi” (Zaburi 146:6). Ariko rero, izuba ni kimwe gusa mu vyaremwe vyinshi bitwigisha ivyerekeye ububasha bwinshi Yehova afise. Uko turushiriza kwiga ivyerekeye ububasha bwa Yehova bwo kurema, ni ko akoba tugira karushiriza kwiyongera.

8, 9. (a) Ni ikigereranirizo ikihe kiranga ikibabarwe kitwereka umutima ukunze Yehova afise wo gukingira no kubungabunga abasavyi biwe? (b) Umwungere wo mu bihe vya Bibiliya yabungabunga gute intama ziwe, kandi ivyo bitwigisha iki ku bijanye n’Umwungere wacu Mukuru?

⁸ Yehova kandi arakoresha ububasha bwiwe bwinshi kugira ngo akingire abasavyi biwe no kugira ngo ababungabunge. Bibiliya ikoresha imvugo ngereranyo zimwezimwe zikomeye yamara zikora ku mutima mu kudondora imihango Yehova yatanze yo kwitwararika kudukingira. Raba nk’akarorero ibivugwa muri Yesaya 40:11. Ngaha Yehova ubwiwe yigereranya n’umwungere, abasavyi biwe na bo akabagereranya n’intama. Dusoma duti: “Azoragira umukuku wiwe nk’umwungere, azoterura imyagazi mu maboko, ayitware mu gikiriza, kand’izonsa azoziyobora buhoro-buhoro”. Woba ushobora kumera nk’uwubona ibivuzwe muri ico canditswe?

⁹ Mu bikoko, ni bikeya usanga bidashoboye kwirwanira nk’intama. Umwungere wo mu bihe vya Bibiliya yategerezwa kuba umurindutsi kugira ngo intama ziwe azikingire amabingira, idubu hamwe n’intare (1 Samweli 17:34-36; Yohana 10:10-13). Mugabo hariho ibihe ugukingira n’ukubungabunga intama vyasaba ikibabarwe. Nk’akarorero, igihe intama yaba yavyariye kure y’uruhongore, umwungere yashobora gute kuzigama ako kagazi kakivuka katagira gitabara? Kumbure mu kiringo c’imisi nk’ingahe, yaragatwara “mu gikiriza” ciwe, ni ukuvuga mu mpuzu yarenza ku zindi yambaye. None akagazi kashika gute mu gikiriza c’umwungere? Ako kagazi karashobora kwegera uwo mwungere, mbere kakikubagura ku kuguru kwiwe. Ariko rero, umwungere ni we yategerezwa kwunama, akaramvura amaboko yiwe, agaterura nya kagazi, maze akagashira mu gikiriza ciwe hatekanye. Ese ukuntu ari ikigereranirizo kiranga ikibabarwe c’umutima ukunze Umwungere wacu Mukuru afise wo kudukingira no kutubungabunga!

10. Ni uburinzi nyabaki Yehova aturonsa muri iki gihe, kandi ni kubera iki ubwo burinzi buhambaye bimwe bidasanzwe?

¹⁰ Yehova ntiyatanze gusa umuhango wo kudukingira. Mu bihe vya Bibiliya, yaragaragaje mu buryo bw’igitangaro yuko ashoboye “gukiza abamwubaha ibibagerageza” (2 Petero 2:9). Bite hoho muri iki gihe? Turazi yuko adakoresha ububasha bwiwe kugira ngo adukingire ivyago vyose ubu. Ariko rero, araduha ikintu gihambaye kuruta, na co kikaba ari uburinzi bwo mu vy’impwemu. Imana yacu y’inyarukundo iradukingira ivyotugirira nabi mu vy’impwemu, mu kuturonsa ivyo dukeneye kugira ngo twihanganire ibigeragezo twongere tuzigame ubucuti dufitaniye na yo. Nk’akarorero muri Luka 11:13 havuga hati: “Ko muzi guha abana banyu ingabire nziza muri babi, mbega So wo mw ijuru ntazorushiriza rwose guha [im]pwemu yera aba[yi]musavye?”. Iyo nguvu y’ububasha irashobora kudufasha gutsinda ikigeragezo ico ari co cose canke ingorane iyo ari yo yose dushobora guhura na yo (2 Ab’i Korinto 4:7). Gutyo rero, Yehova arakora kugira ngo azigame ubuzima bwacu, atari mu myaka mikeyi gusa mugabo mu bihe bidahera. Dufise ico cizigiro mu muzirikanyi, ugucumukura ukwo ari kwo kwose kwo muri uru runkwekwe turashobora vy’ukuri kukubona yuko ‘guhwahutse kandi ko ari ukw’akanya gato’ (2 Ab’i Korinto 4:17). Mbega none ntitwumva dukwegerewe ku Mana ikoresha ububasha bwayo ibigiranye urukundo ku neza yacu?

‘Yehova akunda ubutungane’

11, 12. (a) Ni kubera iki ubutungane bwa Yehova budukwegera kuri we? (b) Ni iciyumviro ikihe Dawidi yashitseko ku vyerekeye ubutungane bwa Yehova, kandi ayo majambo yahumetswe ashobora gute kuduhumuriza?

¹¹ Yehova akora ibigororotse kandi bikwiriye, ivyo akabigira ata guhindagurika, atagira nkunzi. Ubutungane bw’Imana si kamere itarimwo igishika n’ubuntu yotuma twigira kure Imana, mugabo ni kamere ikwegera, ituma twiyegereza Yehova. Bibiliya iravuga itomoye ukuntu iyo kamere yeza umutima. Nimuze rero turimbure uburyo butatu Yehova agaragarizamwo ubutungane bwiwe.

¹² Ubwa mbere, ubutungane bwa Yehova buratuma agaragaza ubwizerwe be n’ukudahemuka ku basavyi biwe. Dawidi umwanditsi wa zaburi yahavuye yibonera uwo muce w’ubutungane bwa Yehova. Afatiye ku vyamushikiye we ubwiwe be no ku kwiga inzira z’Imana, Dawidi yoba yashitse ku ciyumviro ikihe? Yarikuguye ati: “Uhoraho akunda imanza ziroranye, ntaheba abakunzi biwe. Bazigamwa ibihe vyose” (Zaburi 37:28). Mbega ugusubirizwa umutima mu nda! Imana yacu ntizokwigera na rimwe iheba abatayihemukira. Turashobora rero kwizigira ubucuti bwa hafi tugiranira na Yehova be n’ukuntu atubungabungana urukundo. Ubutungane bwiwe buradukura amazinda kuri ivyo.​—Imigani 2:7, 8.

13. Ukuba Yehova ababara ba ntahonikora kugaragara gute mu Vyagezwe yahaye Isirayeli?

¹³ Ubwa kabiri, ubutungane bw’Imana ntibwirengagiza ivyo abagowe bakeneye. Ukuba Yehova ababaye ba ntahonikora kuragaragarira mu Vyagezwe yahaye Isirayeli. Nk’akarorero, ivyo Vyagezwe vyarimwo intunganyo zatuma impfuvyi n’abapfakazi bitabwaho (Gusubira mu vyagezwe 24:17-21). Kubera ko Yehova yari azi ingene ubuzima bwari kugora mwene iyo miryango, we ubwiwe yabaye Umucamanza n’Umukingizi wabo akora kivyeyi (Gusubira mu vyagezwe 10:17, 18). Yagabishije Abisirayeli yuko nka hamwe bogirira nabi abagore n’abana batagira gitabara, atobuze kwumviriza ugutakamba kwa mwene abo bantu. Nk’uko vyanditswe muri Kuvayo 22:22-24, yavuze ati: “Uburake bganje bu[zo]ziriringa”. Naho uburake atari imwe muri kamere nkurunkuru za Yehova, aragira ishavu rigororotse bivuye ku bintu vy’akarenganyo bigirwa nkana na canecane igihe abarenganywa baba ari impahazwa.​—Zaburi 103:6.

14. Ni ikimenyamenya ikihe cibonekeje vy’ukuri c’uko Yehova atagira nkunzi?

¹⁴ Ubwa gatatu, mu Gusubira mu vyagezwe 10:17 Bibiliya idukura amazinda yuko Yehova “[a]datinya abantu ku kigohe, [a]tarya ingurire”. Yehova ntameze nk’abantu benshi bafise ububasha canke akosho ku bandi, we ntatwarwa n’ubutunzi bw’ivy’umubiri canke agashusho ko ku mubiri. Ntahengamira ku ruhande runaka canke ngo agire nkunzi. Ikimenyamenya cibonekeje vy’ukuri c’uko Yehova atagira nkunzi ni iki: Akaryo abantu bahabwa ko gucika abasavyi biwe, bakaba biteze kuzoronka ubuzima budahera, ntigahabwa gusa abantu b’inkehwa batoranijwe. Ahubwo riho, mu Vyakozwe 10:34, 35 havuga hati: “Imana [nti]robanura abantu ku butoni, ariko mu mahanga yose ūyubaha, agakora ivy’ukugororoka, iramwemera”. Ico cizigiro kiri imbere y’abantu bose ata kuraba ikibanza bafise mu kibano, ibara ry’urukoba rwabo canke igihugu babamwo. None ubwo si ubutungane nyakuri bugaragazwa ku rugero rwo hejuru? Mu vy’ukuri, ugutahura neza ubutungane bwa Yehova biradukwegera kuri we!

‘Yo, uburebure bw’amajepfo bw’ubukerebutsi bw’Imana!’

15. Ubukerebutsi ni iki, kandi Yehova abugaragaza gute?

¹⁵ Nk’uko vyanditswe mu Baroma 11:33, Intumwa Paulo yaravyuriwe umutima wo kwandika ati: ‘Yo, uburebure bw’amajepfo bw’ubukerebutsi n’ubumenyi bw’Imana!’. Egome, uko dutohoza imice itandukanye y’ubukerebutsi bw’akaburarugero bwa Yehova, ntitubura gutekerwa n’akoba. None iyo kamere twoyisigura gute? Ubukerebutsi bushira hamwe ubwenge, ugutandukanya ibintu be n’ugutahura maze bukabikoresha. Yehova akoresheje ubwaguke bw’ubumenyi afise be n’ubwimbike bw’ugutahura kwiwe, yama nantaryo afata ingingo nziza kuruta zishoboka, akazishitsa akoresheje uburyo bwiza bubaho.

16, 17. Ivyo Yehova yaremye bigaragaza gute ubukerebutsi bwiwe bw’akaburarugero? Tanga akarorero.

¹⁶ Ni ibintu bimwebimwe ibihe bitomoye vyerekana ubukerebutsi bw’akaburarugero bwa Yehova? Muri Zaburi ya 104:24 havuga hati: “Uhoraho we, ereg’ibikorwa vyawe n’ivy’uburyo bginshi! Vyose wabikoresheje ub[ukerebutsi]: isi yuzuye ubutunzi bgawe”. Kukaba nkako, uko turushiriza kwiga ibintu Yehova yaremye, ni ko turushiriza guterwa akoba n’ubukerebutsi bwiwe. Erega abanyasiyansi baramenye vyinshi mu kwiga ivyo Yehova yaremye! Mbere hariho igisata c’ivy’ubuhinga bwo guhingura ibintu kirondera kwigana ubuhinga buri mu vyaremwe.

¹⁷ Nk’akarorero, ushobora kuba warigeze kwitegereza ujorewe ubwiza bw’inzu y’igitangurirwa. Ni ikintu vy’ukuri gihinguye mu buryo bw’igitangaza. Utugozi tumwetumwe dusa n’utworoshe, usanga dukomeye kuruta icuma kitagwa ingese, tukaba tugumye kuruta utunyuzi tw’ikoti idatoborwa n’amasasu. Ariko neza na neza ivyo bisobanura iki? Niwihe ishusho y’inzu y’igitangurirwa yoba yagizwe nini gushika ingane n’urusenga rukoreshwa mu bwato bw’ukuroba. Mwene iyo nzu yoshobora gutangira indege itwara abantu iriko iragenda mu kirere! Emwe, Yehova yaremye ivyo bintu vyose ‘mu bukerebutsi’!

18. Ubukerebutsi bwa Yehova bubonekera gute mu kuntu yakoresheje abantu ngo babe ari bo bandika Ijambo ryiwe Bibiliya?

¹⁸ Ikimenyamenya gihambaye kuruta ibindi c’ubukerebutsi bwa Yehova dushobora kugisanga mw’Ijambo ryiwe Bibiliya. Impanuro ziranga ubukerebutsi ziri muri Bibiliya ziratwereka vy’ukuri uburyo bwiza kuruta bwo kubaho (Yesaya 48:17). Mugabo ubukerebutsi ntangere bwa Yehova burabonekera kandi mu buryo Bibiliya yanditswe. Uti gute? Yehova yaragaragaje ubukerebutsi mu guhitamwo gukoresha abantu ngo babe ari bo bandika Ijambo ryiwe. Iyo akoresha abamarayika mu kwandika Ijambo ryiwe ryahumetswe, mbega Bibiliya yari kudukwegera nk’uko bigenda ubu? Ego ni ko, abamarayika baba barashoboye kudondora Yehova bakoresheje ukubona ibintu kwabo kwo mu buryo buhanitse bakongera bagaserura ukuntu ubwabo bamuyobokera. Ariko, ubwo koko tuba twarashoboye kwigereranya n’ibiremwa vy’impwemu bitagira agasembwa, bimwe ubwenge bwavyo, ubumenyi be n’inkomezi bifise biruta kure n’iyo ivyacu?​—Abaheburayo 2:6, 7.

19. Ni akarorero akahe kerekana yuko ugukoresha abanditsi b’abantu bituma Bibiliya ikundwa kandi ikaba n’iyikwegera bimwe bikomeye?

¹⁹ Ukuba harakoreshejwe abanditsi b’abantu biratuma Bibiliya ikundwa kandi ikaba n’iyikwegera bimwe bikomeye. Abayanditse bari abantu bafise inyiyumvo nk’izacu. Kubera bari abanyagasembwa, barahangana n’ibigeragezo be n’imikazo nk’ibidushikira ubu. Mu bihe bimwebimwe, barandika ivyerekeye inyiyumvo zabo bwite be n’ingorane zabashikira (2 Ab’i Korinto 12:7-10). Banditse rero amajambo ata mumarayika yari gushora guserura. Nk’akarorero, rimbura amajambo ya Dawidi yanditswe muri Zaburi ya 51. Nk’uko umutwe w’iyo zaburi uvyerekana, Dawidi yatunganije iyo zaburi amaze kugwa mu caha gikomeye. Yarasutse ibiri mu mutima, araserura intuntu nyinshi asaba yuko Imana yomugirira ikigongwe. Ku murongo wa 2 n’uwa 3 havuga hati: “Unyuhagire rwose ukugabitanya kwanje, unyoze icaha canje. Kuko nzi ibicumuro vyanje, icaha canje cama imbere yanje na ntaryo”. Ehe raba ibivugwa ku murongo wa 5: “Rāba, nabumbanywe ukugabitanya, mu vyaha ni ho mama yamvyariye”. Umurongo wa 17 wongerako uti: “Ibimazi Imana ishikanirwa n’umutima umenetse; umutima umenetse, ujanjaguwe, Mana, ntuzowukēngēra”. Ntushobora none kwumva intuntu uwo mwanditsi yari afise? Ni nde none, kiretse umuntu w’umunyagasembwa, yari gushobora guserura mwene izo nyiyumvo?

20, 21. (a) Ni kubera iki bishobora kuvugwa yuko Bibiliya irimwo ubukerebutsi bwa Yehova naho hakoreshejwe abantu mu kuyandika? (b) Ni ibiki birimburwa mu kiganiro gikurikira?

²⁰ Mu gukoresha mwene abo bantu b’abanyagasembwa, Yehova yaraturonkeje ibintu nyene dukeneye, ni ukuvuga inyandiko “[y]ahumetswe n’Imana” yamara ntiyirengagiza ko turi abantu (2 Timoteyo 3:16). Ego cane, abo banditsi bari barongowe n’impwemu yera. Gutyo, banditse ubukerebutsi bwa Yehova, ntibanditse ubwabo bwite. Ubwo bukerebutsi ni ubwo kwizigirwa bimwe bishitse. Buraruta kure n’iyo ubukerebutsi bwacu bwite gushika n’aho Imana iduhimiriza n’urukundo iti: “Wizigize Uhoraho umutima wawe wose, kandi ntiwishimikize ubgenge bg’iwawe: umumenye mu ngendo zawe zose, na we azogorora inzira zawe” (Imigani 3:5, 6). Iyo twumviye iyo mpanuro iranga ubukerebutsi, turarushiriza kwiyegereza Imana yacu nyen’ubukerebutsi bwose.

²¹ Kamere ikwegera kandi nziza kuruta izindi zose Yehova afise ni urukundo. Ukuntu Yehova yagaragaje urukundo birarimburwa mu kiganiro gikurikira.

Woba uvyibuka?

• Ni intambwe izihe Yehova yateye kugira ngo atume bidushobokera kugiriranira na we ubucuti somambike?

• Ni uturorero tumwetumwe utuhe twerekana ububasha bwa Yehova bwo kurema be n’ububasha bwiwe bwo gukingira?

• Ni mu buryo butandukanye ubuhe Yehova agaragarizamwo ubutungane bwiwe?

• Ubukerebutsi bwa Yehova bugaragarira gute mu vyo yaremye no muri Bibiliya?

[Ifoto ku rup. 10]

Nka kurya kw’umwungere atwara umwagazi w’intama mu gikiriza, Yehova arabungabunga intama ziwe abigiranye ikibabarwe

[Ifoto ku rup. 13]

Ubukerebutsi bwa Yehova bugaragarira mu kuntu Bibiliya yanditswe