Jya ukora umurimo wo kubwiriza mu buryo bunonosoye—Utoza abigishwa ba Bibiliya kugira gahunda nziza yo kwiyigisha

Impamvu ari iby’ingenzi: Kugira ngo abigishwa ba Bibiliya bagire amajyambere yo mu buryo bw’umwuka, bagomba kwiga ibintu birenze inyigisho z’ibanze zo mu Ijambo ry’Imana (Heb 5:12–6:1). Kwiyigisha bisaba gushyiraho imihati. Bikubiyemo gufata ibintu bishya tumenye tukabihuza n’ibyo dusanzwe tuzi maze tugatahura akamaro bidufitiye (Imig 2:1-6). Abigishwa ba Bibiliya nibitoza kwikorera ubushakashatsi bizabafasha kujya babona ibisubizo by’ibibazo bibaza bifashishije ibitabo byacu. Imihati yose bashyiraho kugira ngo bakurikize ibyo biga, izatuma bagira ibikenewe byose kugira ngo bahangane n’ibigeragezo bazahura na byo mu mibereho yabo ya gikristo.—⁠Luka 6:47, 48.

Uko wabigenza:

Jya utsindagiriza akamaro ko kwishingikiriza kuri Yehova mu isengesho, buri gihe uko mugiye kwiga.—Yoh 14:26; 1 Kor 2:10.
Kuva ugitangira kwigisha umuntu Bibiliya, jya umutera inkunga yo kujya ategura mbere y’uko mwiga. Jya umwereka igitabo cyawe, maze umwigishe uko yajya aca umurongo cyangwa agashyira akamenyetso ku ijambo cyangwa ku gitekerezo cy’ingenzi gusa.
Jya usaba uwo wigisha kujya asubiza mu magambo ye. Jya wirinda ko gahunda yanyu yo kwiga ihinduka ibibazo n’ibisubizo, aho umwigishwa aba arwana no kubona aho igisubizo kiri ngo ahite agisoma.
Jya utera umwigishwa inkunga yo kujya asoma Ijambo ry’Imana buri munsi. Mwereke ingengabihe yo gusoma Bibiliya iboneka ku rubuga rwa jw.org, igaragaza uko yabigenza. Kugira gahunda ihoraho yo gusoma Bibiliya buri munsi bisaba kwiyemeza, ariko imihati umuntu ashyiraho si imfabusa.—Zab 1:2, 3.
Jya wereka umwigishwa wa Bibiliya uko yakoresha Watchtower Library cyangwa ISOMERO RYO KURI INTERINETI RYA Watchtower, kugira ngo abone ibisubizo by’ibibazo bishingiye kuri Bibiliya. Mufashe gusobanukirwa impine z’amazina y’ibitabo bikunze gukoreshwa mu materaniro y’itorero.

Gerageza gukora ibi muri uku kwezi:

Igihe murangije gusuzuma agatwe gato cyangwa igice, ujye usaba umwigishwa wa Bibiliya kuvuga muri make ibyo yungutse. Niba udafite umwigishwa wa Bibiliya, uzitoze kuvuga muri make umurongo wo muri Bibiliya cyangwa uvuge ibikubiye muri paragarafu y’Umunara w’Umurinzi mu magambo make kugira ngo unoze uburyo bwawe bwo gusobanukirwa ibyo usoma.