Itegure kwagura umurimo wawe uhereye ubu

1. Mu gihe cy’Urwibutso tuzaba dufite uburyo bwo gukora iki, kandi se twakwitegura dute?

¹ Buri mwaka, igihe cy’Urwibutso kiduha uburyo bwo ‘gusingiza Yehova cyane’ (Zab 109:30). Ese uzagaragaza ko ushimira uwatanze incungu wagura umurimo wawe muri Werurwe? Iki ni cyo gihe cyo gutangira kwitegura.—⁠Imig 21:5.

2. Wowe ubwawe wakiriye ute gahunda yo kugabanya amasaha abapayiniya b’abafasha basabwaga kuzuza muri Mata umwaka ushize, kandi se abandi bo babyakiriye bate?

² Kuba umupayiniya w’umufasha: Mu mwaka ushize, amatorero yarishimye cyane amaze kumenya gahunda yashyizweho muri Mata yo kugabanya umubare w’amasaha asabwa abapayiniya b’abafasha. Hari umuvandimwe wanditse ati “kubera ko nkiri umunyeshuri, sinashobora kuba umupayiniya w’igihe cyose. Icyakora muri uku kwezi kwa Mata, ngiye kuzuza fomu nsabe gukora amasaha 30, ariko nihatire kuzuza amasaha 50.” Mushiki wacu ufite akazi yaranditse ati “amasaha mirongo itatu! Ayo rwose biroroshye kuyagezaho.” Igihe iyo gahunda yatangazwaga, hari mushiki wacu uri mu kigero cy’imyaka 80 wari warahoze ari umupayiniya wagize ati “iki ni cyo gihe nari narategereje! Yehova yamenye ko nari nguwe neza igihe nari umupayiniya.” Abandi batashoboye kuba abapayiniya b’abafasha bishyiriyeho intego yo gukora byinshi mu murimo.

3. Kuki ugomba gusuzuma niba waba umupayiniya w’umufasha muri Werurwe, Mata na Gicurasi?

³ Ukwezi kwa Werurwe na ko kuzaba ari ukwezi gushimishije cyane ko gukora umurimo w’ubupayiniya bw’ubufasha, kuko tuzaba dushobora gukora amasaha 30 cyangwa 50. Nanone guhera kuwa gatandatu tariki ya 17 Werurwe, tuzifatanya muri gahunda yihariye yo gutumira abantu kugira ngo bazaze kwifatanya natwe kwizihiza Urwibutso ruzaba ku itariki ya 5 Mata. Hari benshi bazifuza kwagura umurimo wo kubwiriza ku buryo bazaba abapayiniya no muri Mata na Gicurasi, aho bazasabwa kuzuza amasaha 50.

4. Twakwagura dute umurimo wacu, kandi se bizatugirira akahe kamaro?

⁴ Muri gahunda yanyu y’umugoroba w’iby’umwuka mu muryango y’ubutaha, muzasuzume uko buri wese mu bagize umuryango yakwagura umurimo mu gihe cy’Urwibutso (Imig 15:22). Jya usaba Yehova aguhe imigisha mu mihati ushyiraho (1 Yoh 3:22). Niwagura umurimo wawe, uzarushaho gusingiza Yehova kandi ugire ibyishimo byinshi.—⁠2 Kor 9:6.