Twasuye Indoneziya

IGIHUGU cya Indoneziya kigizwe n’ibirwa bigera ku 17.000. Abaturage baho barangwa n’urugwiro, kwihangana, kugira ikinyabupfura no kwakira abashyitsi.

Bakunda kurya umuceri uri kumwe n’uburisho burimo ibirungo biryoshye, bakarenzaho imbuto. Mu turere tumwe na tumwe, abagize umuryango basangira bicaye ku musambi, bagafata uburisho bakabuvanga n’umuceri maze bakarisha intoki. Abaturage bo muri Indoneziya benshi bavuga ko ibyokurya basangiye batyo bibaryohera cyane.

Abaturage bo muri Indoneziya bakunda ubugeni, kubyina n’umuzika. Bafite igikoresho gakondo cy’umuzika gikozwe mu migano baterateranya. Bagikora mu buryo bwihariye, maze umuntu yagicugusa kigatanga ijwi ry’umuzika ryihariye. Kugira ngo abacuranzi bacurange icyo gikoresho, bisaba ko bafatanya, buri wese acugusa igikoresho cye mu gihe gikwiriye.

Mbere y’ikinyejana cya 15, muri Indoneziya hari higanje idini ry’Abahindu n’iry’Ababuda. Ariko mu kinyejana cya 16, Abisilamu batangiye kugira uruhare rukomeye mu muco w’abaturage bo muri Indoneziya. Abanyaburayi bahageze mu kinyejana cya 16 bashakisha ibirungo bihaboneka, maze bituma binjiza amadini yiyita aya gikristo muri icyo gihugu.

Abahamya ba Yehova, bazwi ku isi hose bitewe no kwigisha Bibiliya, batangiye gukorera muri Indoneziya kuva mu wa 1931. Ubu muri icyo gihugu hari Abahamya ba Yehova barenga 22.000. Bashyiraho imihati kugira ngo babwirize abafite ubumuga bwo kutumva. Vuba aha, abagera kuri 500 bitabiriye amateraniro yihariye y’Abahamya ba Yehova yo mu rurimi rw’amarenga, bagiye kwizihiza Urwibutso rw’urupfu rwa Yesu Kristo.