22 Amuna onsene adasankhulwa toera kuphata basa yakuyang’anira misuwo akhali 212. Iwo akakhala mupisa pyawo ninga mudalemberwa iwo mwakubverana na madzindza awo.+ Dhavidhi na mprofeta Samweli+ aasankhula toera aphate basa ineyi thangwi yakunyindirika* kwawo. 23 Natenepa iwo na anawo akhali na basa yakuonera misuwo ya nyumba ya Yahova,+ yakuti ndi nsasa wa nsonkhano. 24 Anyakuonera misuwo akhalipo m’makhundu manai: Kumabulukiro a dzuwa, kumadokero, kunkwiriro na kunterero.+ 25 Abale awo akuti akakhala mu mbuto zawo, akhabwera m’midzidzi idakhazikiswa toera kutumikira pabodzi na iwo mu ntsiku zinomwe. 26 Akhalipo anyakuonera misuwo anai amphambvu akuti akhaphata basa thangwi yakunyindirika kwawo. Iwo akhali Alevi, akhali na basa yakuonera mbuto zinadyera anthu, na yakuonera mpfuma ya panyumba ya Mulungu wandimomwene.+ 27 Iwo akhaphuphudza mu mbuto zawo, n’khundu mwa nyumba ya Mulungu wandimomwene thangwi akhali na basa yakuonera. Pontho iwo akhadapaswa xavi, natenepa iwo akhafungula nyumba ntsiku zonsene namacibese.