Amambo Waciwiri
1 Pidafa Akabu, Amoabhe+ asandukira Aizraeli.
2 Ku Samariya, ntsiku inango Akaziya agwa na pa janela bulukira nkwartu yace yandzulu mbaphekeka. Natenepa iye atuma anthu mbaapanga: “Ndokoni mukabvundzise Bhaale-Zebhubhi mulungu wa ku Ekroni+ khala ine ndinawanga peno nkhabe.”+ 3 Mbwenye anju wa Yahova apanga Eliya*+ wa ku Tisbhe: “Lamuka, ndoko ukaonane na anthu adatumwa na mambo wa ku Samariya mbuapanga: ‘Imwe muli kuenda kabvundzisa Bhaale-Zebhubhi mulungu wa ku Ekroni,+ kodi ku Izraeli nkhabeko Mulungu? 4 Na thangwi ineyi, Yahova alonga tenepa: “Iwe nee unadzalamuka patalimba inagona iwe, thangwi mwakukhonda penula, unadzafa.”’” Natenepa Eliya abuluka mbaenda.
5 Anthu adatuma Akaziya pidabwerera iwo, mwakukhonda dembuka iye aabvundza: “Thangwi yanji mwabwerera?” 6 Iwo antawira: “Mamuna unango abwera kuna ife mbatipanga: ‘Bwererani kuna mambo adakutumani, pontho mpangeni: “Yahova alonga tenepa: ‘Imwe muli kuenda kabvundzisa Bhaale-Zebhubhi mulungu wa ku Ekroni, kodi ku Izraeli nkhabeko Mulungu? Natenepa iwe nee unadzalamuka patalimba inagona iwe, thangwi mwakukhonda penula, unadzafa.’”’”+ 7 Penepo iye aabvundza: “Akhala tani mamuna unoyu adabwera kuna imwe mbalonga mafala anewa?” 8 Iwo antawira: “Iye akhadabvala nguwo yakucitwa na maweya,+ pontho akhadamanga sintu ya nthembe ncunu mwace.”+ Penepo pene iye alonga: “Unoyu ndi Eliya wa ku Tisbhe.”
9 Buluka penepo, mambo atuma nkulu wa anyankhondo 50 pabodzi na anyankhondo ace 50. Pidaenda nkulu wa anyankhondo kuna Eliya, an’gumana ali nawa padzulu paphiri, mbampanga: “Ntumiki wa Mulungu wandimomwene,+ mambo alonga: ‘Tcitani.’” 10 Mbwenye Eliya atawira nkulu wa anyankhondo 50: “Khala ine ndine ntumiki wa Mulungu, moto mbutcite buluka kudzulu+ toera upise iwe pabodzi na anyankhondo ako 50.” Penepo moto watcita buluka kudzulu mbupisa iye pabodzi na anyankhondo ace 50.
11 Natenepa mambo atuma nkulu unango wa anyankhondo 50 pabodzi na anyankhondo ace 50. Iye aenda kuna Eliya mbampanga: “Ntumiki wa Mulungu wandimomwene, mambo alonga: ‘Tcitani mwakucimbiza.’” 12 Mbwenye Eliya aatawira: “Khala ine ndine ntumiki wa Mulungu wandimomwene, moto mbutcite buluka kudzulu toera upise iwe pabodzi na anyankhondo ako 50.” Penepo moto wa Mulungu watcita buluka kudzulu mbupisa iye pabodzi na anyankhondo ace 50.
13 Buluka penepo, mambo atuma pontho nkulu wacitatu wa anyankhondo 50 pabodzi na anyankhondo ace 50. Natenepa nkulu wacitatu wa anyankhondo 50 aenda paphiri, agodama pamaso pa Eliya mbatoma kudembetera toera abverwe ntsisi mbampanga: “Ntumiki wa Mulungu wandimomwene, ndaphata miyendo, onani umaso wanga na umaso wa atumiki anu awa 50 kukhala wakufunika kakamwe pamaso panu. 14 Akulu akutoma awiri a anyankhondo 50 pabodzi na misoka yawo ya anyankhondo 50 apiswa na moto udabuluka kudzulu, mbwenye cincino onani umaso wanga kukhala wakufunika kakamwe pamaso panu.”
15 Penepo anju wa Yahova apanga Eliya: “Ndoko pabodzi na iye. Leka kun’gopa.” Natenepa iye alamuka mbaenda naye kuna mambo. 16 Buluka penepo Eliya apanga mambo: “Ipi ndi pidalonga Yahova: ‘Iwe watuma anthu toera akabvundzise Bhaale-Zebhubhi mulungu wa ku Ekroni.+ Kodi mu Izraeli nkhabemo Mulungu?+ Thangwi yanji nee wabvundzisa iye? Na thangwi ineyi, iwe nee unadzalamuka patalimba inagona iwe, thangwi mwakukhonda penula, unadzafa.’” 17 Natenepa iye afa, mwakubverana na mafala a Yahova adalonga Eliya; nakuti iye nee akhali na mwana, Yeoramu*+ adzakhala mambo pa mbuto yace, mu caka caciwiri ca Yeoramu+ mwana wa Yosafate, mambo wa ku Yuda.
18 Mphangwa zinango zinalonga pya umaso wa Akaziya+ na pinthu pidacita iye, pyalembwa m’bukhu inalonga pinthu pidacitika mu ndzidzi wa amambo a ku Izraeli.