Ezekiyeli
5 “Iwe mwana wa munthu, kwata supada yakutwa toera ikhale lezi yako yakucinga nayo. Pala tsisi ya munsolo mwako na ndebvu zako; buluka penepo pima tsisi yako na ndebvu zako pa bhalansa, pontho igawe mʼmakhundu matatu. 2 Zingamala ntsiku zinafuna iwe kusangizira pinafuna kucita anyamalwa angadzazungulira nzinda,+ unadzapisa khundu yakutoma ya tsisi yako na ndebvu zako nkati mwa nzinda. Buluka penepo, unadzakwata khundu yaciwiri ya tsisi yako na ndebvu zako mbuitema-tema konsene kwene mu nzinda,+ khundu yakumalisa ya tsisi yako na ndebvu zako unadzaiponya toera ibalaliswe na mphepo, penepo ine ndinadzaitowerera na supada.+
3 “Kwatambo pangʼono tsisi yako idaikha iwe pakhundu yakumalisa, mbuikoya mʼbudu ya nguwo yako. 4 Kwata penepo tsisi inango, iponye pa moto mbuipisa. Moto unoyu unamwazika kuna mbumba yonsene ya Izraeli.+
5 “Ipi ndi pidalonga Yahova, Mbuya Wankulu Kakamwe: ‘Uyu ndi nzinda wa Yerusalemu. Ine ndauikha pakati pa madzindza a anthu, pontho iwo wazungulirwa na madziko anango. 6 Mbwenye Yerusalemu andisandukira, asiya kubvera matongero anga na mitemo yanga, mbacita pinthu pyakuipa kakamwe kupiringana anthu a madzindza anango na a madziko ali nʼkhundu mwace.+ Thangwi iye akhonda matongero anga, pontho nee atoweza mitemo yanga.’
7 “Natenepa, ipi ndi pidalonga Yahova, Mbuya Wankulu Kakamwe: ‘Nakuti imwe mwapangiza kukhala anthu akukhonda bvera kakamwe kupiringana anthu a madzindza anango ali nʼkhundu mwanu, pontho nee mwatoweza mitemo yanga, mbamukhonda kubvera matongero anga, mbwenye mwatoweza matongero a madzindza ali nʼkhundu mwanu,+ 8 ipi ndi pidalonga Yahova, Mbuya Wankulu Kakamwe: “Ine ndine nyamalwa wako iwe nzinda wa Yerusalemu,+ ine ndinadzakutcunyusa, pontho ndinadzacita pyenepi pamaso pa anthu a madzindza anango.+ 9 Thangwi ya pinthu pyako pyonsene pyakunyanyasa pinacita iwe, ine ndinadzakucitira pinthu pyakuti cipo ndapicita kale, buluka penepo, cipo ndinadzapicita pontho.+
10 “‘“Na thangwi ineyi, anyakubala ali pakati pako anadzadya anawo,+ ana anadzadya anyakubalawo, ine ndinadzakutcunyusa, pontho ale anafuna kusala pakati pako ndinadzaabalalisa konsene kwene.”’+
11 “‘Natenepa, ine ndiri kudumbira mu dzina yanga,’ alonga Yahova, Mbuya Wankulu Kakamwe, ‘nakuti imwe mwapswipisa mbuto yanga yakucena thangwi ya madzimunthu anu onsene akunyanyasa, pontho thangwi ya pinthu pyonsene pyakunyanyasa pinacita imwe,+ ine nkhabe kudzakubverani ntsisi,* nee kukutsalakanani.+ 12 Nsoka ubodzi wa anthu pakati panu unadzafa na utenda peno unadzafa na njala. Nsoka unango unadzaphiwa na masupada nʼkhundu mwanu.+ Nsoka wakumalisa unadzabalaliswa konsene kwene, pontho ine ndinadzaatowerera na supada.+ 13 Buluka penepo, kuipirwa kwanga kunadzamala, ukali wanga unadzamala, pontho ine ndinadzakomerwa.+ Ndingamala kupangiza ukali wanga kuna iwo, penepo iwo anadzadziwa kuti ine Yahova ndalonga, thangwi ndisafuna kuti anthu alambire ine basi.+
14 “‘Ine ndinadzakucitisa kukhala mbuto idafudzwa, mbisowa anthu, mbuto idathema kupwazwa pakati pa anthu a madzindza anango ali nʼkhundu mwako, pamaso pa anthu onsene anafuna kupita na pana iwe.+ 15 Ine ndingadzakutonga, mbandikutcunyusa mwakuipirwa na mwaukali, iwe unadzakhala cinthu cakupwazika na cakuthema kusingirirwa.+ Unadzakhala cenjezo na cinthu cakugopesa kuna anthu a madzindza anango ali nʼkhundu mwako. Ine Yahova, ndine adapilonga.
16 “‘Ndinadzatumiza njala kuna imwe yakuti* inadzakuphani ninga muli kuphiwa na mapswimo. Njala ineyi* inadzakuphani monsene.+ Ine ndinadzathimiza njala yanu, thangwi nee ndinatawirisa kuti cakudya cipite mu nzinda.+ 17 Ine ndinadzatumiza kuna imwe njala na pikala.+ Njala ineyi na pikala pyenepi pinadzapha ananu onsene. Utenda na kuphiwa kwa anthu pinadzafika kuna ale anakhala muna iwe, pontho ine ndinadzabweresa supada kuna iwe.+ Ine Yahova, ndine adapilonga.’”