Dhanyeli

9 Mu caka cakutoma ca Dhariyo+ mwana wa Asuwero wa dzindza ya Amedhi wakuti akhadakhazikiswa ninga mambo mu umambo wa Akaldheya,+ 2 mu caka cakutoma ca utongi wace, ine Dhanyeli ndadzindikira kuti pyaka pya kufudzwa kwa Yerusalemu+ pinakhala 70.+ Ndadzindikira pyenepi thangwi ya mafala a Yahova adalembwa mʼmabukhu,* adapanga iye mprofeta Yeremiya. 3 Natenepa ndayangʼana kuna Yahova Mulungu wandimomwene, mbandinʼdembetera mu phembero, mbandicita jejuu,+ kubvala masakha na kukhwazika dotha. 4 Ine ndacita phembero kuna Yahova Mulungu wanga mbandibweka madawo athu, ine ndalonga:

“Yahova Mulungu wandimomwene, wankulu na Wakudzumisa, wakuti musacita pinapikira imwe, pontho musapangiza ufuni wakukhonda mala+ kuna ale anakufunani na kuna ale anabvera* mitemo yanu.+ 5 Ife tadawa, tadodoma, pontho tacita pinthu pyakuipa, mbatikusandukirani.+ Ife tasiya kubvera mitemo yanu na matongero anu. 6 Ife nee tabvera atumiki anu aprofeta,+ akuti alonga mu dzina yanu kuna amambo athu, atsogoleri athu, ambuyathu na kuna mbumba yonsene ya mu dziko yathu. 7 Yahova, imwe ndimwe wakulungama, ife ndzidzi onsene tisacita pinthu pyakuti pisatibweresera manyadzo, ninga lero. Inde, tonsene tadzala na manyadzo kuphatanizambo anthu anakhala ku Yuda, anthu anakhala ku Yerusalemu na Aizraeli onsene, ale anakhala dhuzi na ale anakhala kutali, mʼmadziko onsene adaabalalisa imwe thangwi ya pinthu pyakuipa pidakucitirani iwo.+

8 “Yahova, ife tiri na manyadzo* kuphatanizambo amambo athu, atsogoleri athu na ambuyathu thangwi ife takudawirani. 9 Yahova Mulungu wathu, imwe ndimwe wantsisi na wakulekerera,+ mbwenye ife takusandukirani.+ 10 Ife nee tabvera fala yanu Yahova Mulungu wathu, nee tatowezera mitemo yanu idatipasa imwe kubulukira kwa atumiki anu aprofeta.+ 11 Aizraeli onsene nee abvera Mwambo wanu, pontho asiya kubvera fala yanu, natenepa imwe mwatipasa dzedze idadumbira imwe, mbilembwa mu Mwambo wa Mose ntumiki wa Mulungu wandimomwene,+ thangwi ife takudawirani. 12 Imwe mwacita pire pidaticenjeza imwe kuti munacita kuna ife+ na kuna atsogoleri athu akuti akhatitonga. Imwe mwatibweresera nyatwa ikulu kakamwe, pinthu pidacitikira Yerusalemu cipo pyacitika kale pa dziko yonsene yapantsi.+ 13 Nyatwa zonsene zidalembwa mu Mwambo wa Mose zacitika kuna ife,+ ngakhale tenepo, ife nee tadembetera toera kubverwa ntsisi na imwe Yahova Mulungu wathu. Ife nee tasiya madawo athu,+ mbatipangiza kuti imwe ndimwe wakukhulupirika.

14 “Natenepa, imwe Yahova mwapitiriza kuonesesa mbamubweresa nyatwa zenezi kuna ife thangwi imwe Yahova Mulungu wathu ndimwe wakulungama mu pinthu pyonsene pinacita imwe; ngakhale tenepo, ife nee tabvera fala yanu.+

15 “Cincino, imwe Yahova Mulungu wathu wakuti mwabulusa mbumba yanu mu dziko ya Ejitu na djanja yamphambvu,+ Imwe wakuti mwacitisa dzina yanu kubveka mpaka lero,+ ife tadawa, pontho tacita pinthu pyakuipa. 16 Yahova, mwakubverana na mabasa anu onsene akulungama,+ taphata miyendo, bulusani ukali wanu na kuipirwa kwanu mu nzinda wanu wa Yerusalemu, phiri yanu yakucena; anthu onsene adatizungulira,+ asaseka Yerusalemu na mbumba yanu thangwi ya madawo athu na madodo a ambuyathu. 17 Cincino imwe Mulungu wathu, bveserani phembero ya ntumiki wanu na kudembetera kunacita iye; Yahova, thangwi ya mbiri yanu, citani pinthu pyadidi kuna mbuto yanu yakucena+ yakuti yamala kufudzwa.+ 18 Mulungu wanga, bveserani, onani kufudzwa kudacitwa ife na kufudzwa kudacitwa nzinda unacemerwa na dzina yanu; ife tisakudembeterani, tayu thangwi tisacita pinthu pyakulungama, mbwenye thangwi ya ntsisi zanu zikulu.+ 19 Yahova tibvesereni. Yahova tilekerereni.+ Yahova bveserani mbamucita pinthu! Lekani kudembuka thangwi ya dzina yanu imwe Mulungu wanga, thangwi nzinda wanu na mbumba yanu isacemerwa na dzina yanu.”+

20 Mu ndzidzi ukhalonga ine, pontho ukhacita ine phembero, mbandibweka madawo anga na madawo a mbumba yanga ya Izraeli, pikhacita ine phembo toera kubverwa ntsisi na Yahova Mulungu wanga, thangwi ya phiri yakucena ya Mulungu wanga,+ 21 inde, mu ndzidzi ukhapitiriza ine kucita phembero, mamuna ule adaona ine pakutoma mʼmasomphenya+, Gabhriyeli,+ abwera kuna ine. Unoyu ukhali ndzidzi wakupereka ntsembe yakumaulo, pontho ine ndikhadaneta kakamwe. 22 Iye abwera toera kudzandiphedza kubvesesa pinthu pinafuna kucitika. Iye alonga:

“Dhanyeli, ine ndabwera toera kudzakupasa luso yakubvesesa pinthu pyenepi pyonsene. 23 Mu ndzidzi udatoma iwe kudembetera, ine ndatambira mphangwa, natenepa ndabwera kudzakupanga mphangwa zenezi, thangwi iwe ndiwe munthu wakufunika kakamwe.+ Natenepa bvesera mwadidi, pontho yesera kubvesesa masomphenya anewa.

24 “Pakhazikiswa masumana* 70 kuna mbumba yako na kuna nzinda wanu wakucena,+ toera kumalisa kukhonda bvera mitemo, toera kumalisa madawo,+ toera kulekerera madodo,+ toera kubweresa ulungami wakukhonda mala,+ toera kufunga na cidzindikiro masomphenya na maprofesiya,*+ pontho toera kudzodza Wakucena wa Akucena.* 25 Usafunika kudziwa na kubvesesa kuti kutomera mu ndzidzi unafuna kuperekwa ntemo toera kumanga pontho na kusasanyira Yerusalemu+ mpaka kubwera kwa Mesiya*+ Ntsogoleri,+ panadzapita masumana manomwe, pontho masumana 62.+ Nzinda wa Yerusalemu unadzamangwa mbusasanyirwa papswa, pontho unadzakhala na mbuto yapakweca na djenje yacitsidzikizo nʼkhundu mwawo, mbwenye pyenepi pinadzacitika mʼmidzidzi yakunentsa.

26 “Pakupita masumana 62 Mesiya anadzaphiwa,+ pontho nee anadzasiya cinthu.+

“Nsoka wa anyankhondo wa ntsogoleri wakuti akubwera, unadzafudza nzinda na mbuto yakucena.+ Mbuto yakucena inadzazambazika na madzi akudzala. Pontho panadzaoneka nkhondo mpaka kunkhomo; mwakubverana na pidatonga Mulungu, panadzaoneka kufudzwa.+

27 “Iye anadzacitisa kuti cibverano ca anthu azinji ciphate basa sumana ibodzi; pontho pakati-nakati pa sumana ineyi, iye anadzamalisa ntsembe za pinyama na miyoni.+

“Nyakufudza anadzabwera mʼmaphapido mwa pinthu pyakunyanyasa;+ pontho pinthu pidatongwa, pinadzacitwa kuna ule adafudzwa mpaka azambazike.”