Yoswa
24 Buluka penepo, Yoswa agumanyiza madzindza onsene a Izraeli ku Sikemu, mbacemeresa akulu a Izraeli, atsogoleri a madzindza, anyakutonga miseru na akadamu,+ pontho iwo abwera pamaso pa Mulungu wandimomwene. 2 Yoswa apanga mbumba yonsene kuti: “Yahova Mulungu wa Izraeli alonga tenepa: ‘Kale kakamwe+ ambuyanu,+ kuphatanizambo Tera babace Abhrahamu na Naori, akakhala kuntunda unango wa Nkulo wa Eufrate, pontho akhatumikira alungu anango.+
3 “‘Mukupita kwa ndzidzi ine ndabulusa mbuyanu Abhrahamu+ kuntunda unango wa Nkulo wa Eufrate, ndanfambisa mu dziko yonsene ya Kanani, mbandinjipisa anace.*+ Ine ndampasa nkhombo mbabala Izaki;+ 4 Izaki abala Yakobe na Izau.+ Buluka penepo ine ndapasa Izau Phiri ya Seiri toera ikhale unthaka wace;+ mbwenye Yakobe na anace aenda ku Ejitu.+ 5 Mukupita kwa ndzidzi ine ndatuma Mose na Aroni,+ pontho ndagwisa miliri mu Ejitu,+ mbandikubulusani mu dziko ineyi. 6 Pikhabulusa ine ababanu mu Ejitu,+ mbafika pa bara, Aejitu aatowerera na ngolo za nkhondo pabodzi na anyamakavalo mpaka pa Bara Yakufuira.+ 7 Ambuyanu atoma kukhuwa kuna Yahova+ toera aaphedze, natenepa ine ndaikha cidima pakati pa imwe na Aejitu, pontho ndabiza Aejitu na madzi a mʼbara mbafa.+ Imwe mwaona na maso anu pinthu pidacita ine ku Ejitu.+ Buluka penepo imwe mwakhala nʼthando pyaka pizinji.*+
8 “‘Ine ndakufikisani ku dziko ya Aamori akuti akakhala kuntunda unango* wa Yordani, pontho iwo amenyana na imwe.+ Mbwenye ine ndaapereka mʼmanja mwanu toera mukwate dziko yawo, pontho ine ndaafudza pamaso panu.+ 9 Natenepa, mambo Bhalaki wa ku Moabhe mwana wa Zipori, aenda kamenyana na Aizraeli. Iye acemeresa Bhalamu mwana wa Bheori toera akupaseni dzedze.+ 10 Mbwenye ine nee ndafuna kubvesera Bhalamu.+ Natenepa iye akupasani nkhombo mwakubwereza-bwereza,+ pontho ine ndakupulumusani mʼmanja mwace.+
11 “‘Buluka penepo imwe mwawambuka Yordani+ mbamufika ku Yeriko.+ Atsogoleri* a ku Yeriko, kuphatanizambo Aamori, Aperesi, Akanani, Aeti, Ajirgasi, Aeveu na Ayebusi amenyana na imwe, mbwenye ine ndaapereka mʼmanja mwanu.+ 12 Ine ndaacitisa kugopa* mbamudzati kufika, natenepa kugopa kweneku kwaacitisa kukuthawani+ ninga pidacita amambo awiri a ku Amori. Iwo nee athawa thangwi ya supada yanu peno uta wanu.+ 13 Natenepa, ine ndakupasani dziko yakuti nee mwaiphatira basa na mizinda yakuti nee mwaimanga,+ mbamukhala mwenemu. Muli kudya misapo ya mauva na misapo ya milivera idakhonda imwe kutceka.’+
14 “Na thangwi ineyi, gopani Yahova mbamuntumikira mwakukhulupirika.*+ Bulusani alungu akhatumikira ambuyanu kuntunda unango wa Nkulo wa Eufrate na ku Ejitu,+ mbamutumikira Yahova. 15 Khala nee musakomerwa na kutumikira Yahova, sankhulani lero anafuna imwe kutumikira,+ peno alungu akhatumikira ambuyanu kuntunda unango wa Nkulo wa Eufrate+ peno alungu Aamori a mu dziko inakhala imwe.+ Mbwenye ine na anthu a panyumba panga, tinatumikira Yahova.”
16 Penepo mbumba yatawira kuti: “Ife cipo tinasiya Yahova mbatitumikira alungu anango. 17 Ndi Yahova Mulungu wathu adatibulusa pabodzi na ababathu mu ubitcu+ ku dziko ya Ejitu.+ Iye acita pirengo pikulu pamaso pathu,+ pontho ndiye adatitsidzikiza mu ulendo onsene udacita ife na kuna mbumba zonsene zidapita ife.+ 18 Yahova athamangisa mbumba zonsene, kuphatanizambo Aamori akuti kale akakhala mu dziko ino. Na thangwi ineyi, ife tinatumikirambo Yahova, thangwi iye ndi Mulungu wathu.”
19 Buluka penepo Yoswa apanga mbumba: “Imwe nee munakwanisa kutumikira Yahova, thangwi iye ndi Mulungu wakucena;+ iye ndi Mulungu wakuti asafuna anthu alambire iye basi.+ Mungakhonda kucita pyenepi iye nee anadzalekerera madawo anu+ na kukhonda bvera kwanu. 20 Imwe mungasiya Yahova mbamutumikira alungu anango, iye anakuphindukirani* mbakufudzani maseze iye acita kale pinthu pyadidi kuna imwe.”+
21 Mbwenye mbumba yatawira Yoswa: “Ife tinatumikira Yahova!”+ 22 Natenepa Yoswa apanga mbumba: “Imwe ndimwe amboni a pinthu pidalonga imwe kuti mwasankhula kutumikira Yahova.”+ Iwo atawira: “Ife ndife amboni.”
23 “Natenepa, bulusani alungu ali pakati panu, pontho tumikirani Yahova Mulungu wa Izraeli na ntima wanu onsene.” 24 Mbumba yapanga Yoswa: “Ife tinatumikira Yahova Mulungu wathu, mbatibvera mafalace!”
25 Pa ntsiku ineyi, Yoswa acita cibverano na mbumba mbaapasa mwambo ku Sikemu. 26 Buluka penepo Yoswa alemba mafala anewa mʼbukhu ya Mwambo wa Mulungu,+ pontho akwata mwala ukulu+ mbauikha pa tsinde ya muti ukulu wakuti uli dhuzi na mbuto idaceneswa na Yahova.
27 Yoswa apitiriza kupanga mbumba yonsene kuti: “Onani! Mwala uyu unadzakhala ninga umboni kuna ife,+ thangwi iwo wabva pyonsene pidalonga Yahova kuna ife, pontho unadzakhala ninga umboni kuna imwe toera muleke kukhonda Mulungu wanu.” 28 Buluka penepo, Yoswa apanga mbumba toera iende, mʼbodzi na mʼbodzi ku dziko idatambira iye.+
29 Mukupita kwa ndzidzi, Yoswa mwana wa Nuni, ntumiki wa Yahova, afa na pyaka 110 pyakubalwa.+ 30 Natenepa, iwo amuikha ku dziko idapaswa iye ninga unthaka ku Timati-Zera+ cisa ca mapiri ca ku Efraimu, kunkwiriro kwa Phiri ya Gasi. 31 Aizraeli apitiriza kutumikira Yahova mu ntsiku zonsene za umaso wa Yoswa na mu ntsiku zonsene za umaso wa akulu adapitiriza kukhala mʼmaso pidafa Yoswa, pontho akuti aona pyonsene pidacita Yahova kuna Aizraeli.+
32 Magogodo a Zuze+ adabwereswa na Aizraeli buluka ku Ejitu, aikhwa ku Sikemu kukhundu ibodzi ya mbuto idagula Yakobe na ana a Hamori,+ babace Sikemu na kobiri zakukwana 100;+ pontho mbuto ineyi yadzakhala unthaka wa ana a Zuze.+
33 Eleazare mwana wa Aroni afambo.+ Natenepa, iwo amuikha Paphiri ya Fineya mwanace,+ idapaswa iye kucisa ca mapiri ca ku Efraimu.