Tsamba Yakutoma Kuna Akristu a ku Korinto
16 Cincino, thangwi ya pyakupereka pinabulusa imwe toera kuphedza anthu akucena,+ imwe munakwanisa kutowezera pitsogolero pidapereka ine mʼmipingo ya ku Galasya. 2 Masumana onsene, pa ntsiku yakutoma, mʼbodzi na mʼbodzi wa imwe asafunika kukoya cinthu pakhundu mwakubverana na pinthu piri na iye, toera pyakupereka pikhonde kucitwa ndingafika. 3 Mbwenye ndingafika kweneko, ndinadzatumiza ku Yerusalemu amuna anafuna kupangiza imwe mʼmatsamba anu+ kuti ndi anthu akunyindirika toera aende kapereke miyoni idabulusa imwe mwakukoma ntima. 4 Mbwenye pingafunika kuti ine ndiendembo kweneko, ndinaenda pabodzi na iwo.
5 Ndinabwera kudzakuonani ndingabuluka ku Masedhonya, thangwi ndinapita na ku Masedhonya;+ 6 panango ndinakhala ntsiku zingasi na imwe, peno mpaka kumala kwa ndzidzi wa khoni,* toera ndingafuna kubuluka mundiperekere pangʼono kunafuna ine kuenda. 7 Thangwi nee ndisafuna kukuonani cincino mu ndzidzi unapita ine na njira basi, mbwenye ndisafuna kuti Yahova* angatawirisa, ndikhale na imwe mu ntsiku zingasi.+ 8 Mbwenye ndinapitiriza kukhala kuno ku Efeso+ mpaka pa Phwando ya Pentekoste, 9 thangwi ndafungulirwa nsuwo ukulu toera kuphata basa,+ mbwenye pana apingizi azinji.
10 Timoti+ angafika kuna imwe, citani pyonsene pinakwanisa imwe toera akhonde kugopa cinthu mu ndzidzi unafuna kukhala iye pakati panu, thangwi iye asaphatambo basa ya Yahova*+ ninga ine. 11 Natenepa, nee mʼbodzi asafunika kumpwaza. Mperekereni muntendere paulendo wace, toera iye abwere kuna ine, thangwi ine pabodzi na abale anango tisanʼdikhira.
12 Mbwenye mʼbale wathu Apolo,+ ine ndanʼdembetera toera abwere kuna imwe pabodzi na abale. Iye nee asafuna kubwera cincino, mbwenye anabwera angakhala na ndzidzi.
13 Khalani dzololo,*+ khalani akuwanga mu cikhulupiro,+ khalani acipapo,*+ khalani amphambvu.+ 14 Pinthu pyonsene pinacita imwe, piciteni mwaufuni.+
15 Abale, imwe musadziwa kuti anthu a panyumba ya Estefano ndi anyakupfundza akutoma a* ku Akaya, pontho kuti iwo aperekeka okhene toera kutumikira anthu akucena. Cincino ndisakudembeterani toera, 16 imwembo mupitirize kubvera anthu ninga anewa, na onsene anatiphedzera mbaphata basa mwakuwanga.+ 17 Mbwenye ine ndisatsandzaya thangwi Estefano,+ Fortunato na Akayiko akuti ali kuno pabodzi na ine, thangwi iwo andicitira pinthu pikhafunika imwe kundicitira mbamudakhala kuno. 18 Iwo awangisa ine na imwe ene. Natenepa, lemedzani anthu ninga anewa.*
19 Mipingo ya ku Azya isapereka mwanyikiro kuna imwe. Akila na Priska pabodzi na mpingo unasonkhana panyumba pawo,+ asapereka mwanyikiro na ntima onsene kuna imwe mwa Mbuya. 20 Abale onsene asapereka mwanyikiro kuna imwe. Mwanyikanani unango na ndzace na mpswompswono ninga abale.
21 Cincino tambirani mwanyikiro wanga ine Paulu, udalemba ine na manja anga.
22 Khala munthu nkhabe kufuna Mbuya, mbapaswe dzedze. Bwerani Mbuyathu! 23 Kukoma ntima kukulu kwa Mbuya Yezu mbakukhale na imwe. 24 Ufuni wanga mbukhale na imwe monsene akuti muli akuphatana na Kristu Yezu.