Samweli Waciwiri

19 Yoabhe apangwa: “Mambo akulira, pontho ali wakutsukwala thangwi ya Abhisaloni.”+ 2 Natenepa kuwina* kwawo pa ntsiku ineyi kwacinja mbakudza kutsukwala kuna anyankhondo onsene, thangwi iwo abva kuti mambo akulira mwanace. 3 Pa ntsiku ineyi, anyankhondo abwerera akumatama mu nzinda+ ninga anyankhondo akuti ali na manyadzo thangwi yakuthawa kunkhondo. 4 Mambo akhadaphimbira nsolo wace, mbapitiriza kulira mwakugaluza: “Mwananga Abhisaloni! Abhisaloni mwananga, mwananga!”+

5 Buluka penepo Yoabhe apita n’nyumba mukhali mambo, mbampanga: “Lero imwe mwapasisa manyadzo atumiki anu onsene adakupulumusani, mbapulumusambo ananu,+ ananu akazi,+ akazanu na akazanu apakhundu.+ 6 Imwe musafuna ale anakuidani, mbamuida ale anakufunani, thangwi lero imwe mwapangiza pakweca kuti akulu na atumiki anu nkhabe basa kuna imwe. Ndiri na cinyindiro consene cakuti mbidakhala kuti ndi Abhisaloni basi adapulumuka lero, tonsene mbatiphiwa, imwe mbamudakomerwa. 7 Cincino lamukani, ndokoni mukawangise atumiki anu, thangwi mungakhonda kucita pyenepi, ndiri kudumbira mu dzina ya Yahova kuti nkhabe munthu anafuna kukhala na imwe masiku ano. Pyenepi pinadzakhala pyakutekera kakamwe kupiringana pyakuipa pyonsene pidakucitikirani kutomera mu uphale wanu mpaka cincino.” 8 Natenepa mambo alamuka, mbaenda kakhala pansuwo ukulu wa nzinda, pontho anthu onsene adziwiswa: “Mambo ali nawa pansuwo ukulu wa nzinda.” Buluka penepo anthu onsene aenda kuna mambo.

Mbwenye Aizraeli anango* akhadathawa, m’bodzi na m’bodzi mbaenda kunyumba kwace.+ 9 Anthu onsene a madzindza onsene a Izraeli akhaketesana, mbalonga: “Mambo atipulumusa m’manja mwa anyamalwa athu,+ pontho atiombola m’manja mwa Afilisti; mbwenye cincino athawa mu dziko thangwi ya Abhisaloni.+ 10 Pontho Abhisaloni, ule adadzodza ife toera akhale mambo wathu,+ aphiwa kunkhondo.+ Mphapo thangwi yanji nee mukucita ­cinthu toera mambo abwerere?”

11 Mambo Dhavidhi atumiza mphangwa izi kuna nyantsembe Zadhoke+ na kuna nyantsembe Abhiyatari:+ “Pangani akulu a Yuda+ kuti: ‘Thangwi yanji musadembuka kubweresa mambo kunyumba kwace, mu ndzidzi wakuti mafala a Aizraeli onsene afika kunakhala mambo? 12 Imwe ndimwe abale anga; ndimwe magogodo anga na manungo anga.* Thangwi yanji musadembuka kubweresa mambo?’ 13 Pontho panga Amasa:+ ‘Kodi iwe nee ndiwe magogodo anga na manungo anga? Mulungu mbanditcunyuse kakamwe ndingakhonda kukukhazikisa cincino ninga nkulu wa anyankhondo anga pa mbuto ya Yoabhe.’”+

14 Natenepa iye akhuya* mitima ya amuna onsene a Yuda, mbakhala ninga munthu m’bodzi, pontho iwo atumiza mphangwa izi kuna mambo: “Bwererani pabodzi na atumiki anu onsene.”

15 Mambo atoma kubwerera mbafika ku Yordani, pontho anthu a ku Yuda abwera kudzatambira mambo ku Jiligale+ toera awambuke naye Yordani. 16 Buluka penepo, Simei+ wa ku Bhaurimu mwana wa Jera wa dzindza ya Bhenjamini pabodzi na amuna a ku Yuda aenda mwakucimbiza kaonana na Mambo Dhavidhi, 17 pontho iye akhali na amuna 1.000 a dzindza ya Bhenjamini. Zibha+ ntumiki wa panyumba ya Sauli na anace 15 amuna pabodzi na atumiki ace 20, aenda mwakucimbiza mbafika ku Yordani mambo mbadzati kufika. 18 Iye* awambuka na panawambuka na anthu toera kubweresa anthu a panyumba ya mambo na kucita pyonsene pikhafuna mambo. Mbwenye Simei mwana wa Jera agodama patsogolo pa mambo pikhali iye dhuzi toera kuwambuka Yordani. 19 Iye apanga mambo: “Mbuyanga mambo lekani kundiona ninga munthu wa mulando, pontho lekani kukumbuka pinthu pyakuipa pidacita ine ntumiki wanu+ pa ntsiku idabuluka imwe mu Yerusalemu. Mambo lekani kukoya pyenepi muntima mwanu, 20 thangwi ine ntumiki wanu ndisadziwa mwadidi kuti ndadawa; na thangwi ineyi, lero ndine munthu wakutoma wa panyumba ya Zuze adabwera kudzaonana na imwe mbuyanga mambo.”

21 Penepo pene Abhisai+ mwana wa Zeruya+ abvundza: “Kodi Simei nee athema kuphiwa thangwi yakupasa dzedze nyakudzodzwa wa Yahova?”+ 22 Mbwenye Dhavidhi abvundza: “Munapyonji imwe ana a Zeruya?+ Thangwi yanji lero mukundisandukira? Kodi lero mu Izraeli musafunika kuphiwa munthu? Kodi ine nee ndisadziwa kuti lero ndakhala pontho mambo wa Izraeli?” 23 Buluka penepo mambo apanga Simei: “Iwe nee unafa.” Pontho iye adumbira toera kumpasa cinyindiro.+

24 Mefibhoseti+ ndzukulu wa Sauli aendambo kaonana na mambo. Iye nee akhadatsuka miyendo yace,* nee akhadacinga ndebvu zace za padzulu pamulomo, pontho nee akhadafula nguwo zace kutomera ntsiku idabuluka mambo mpaka ntsiku idabwerera iye muntendere. 25 Pidafika* iye ku Yerusalemu toera kuonana na mambo, mambo ambvundza: “Mefibhoseti thangwi yanji nee waenda na ine?” 26 Iye atawira: “Mbuyanga mambo, imwe musadziwa kuti ndine wakulamala.+ Ine ndapanga ntumiki wanga: ‘Ndikhunganyire buru toera ndiikwire kuti ndiende pabodzi na mambo.’ Mbwenye iye andinyengeza.+ 27 Iye alonga uthambi kuna mbuyanga mambo thangwi ya ntumiki wanu.+ Nakuti mbuyanga mambo ndimwe ninga anju wa Mulungu wandimomwene, citani pyonsene pinaona imwe kukhala pyadidi. 28 Anthu onsene a panyumba ya babanga mbadaphiwa na imwe mbuyanga mambo. Ngakhale tenepo imwe mwanditawirisa toera ndikhale pabodzi na ale anadya pameza panu.+ Mambo, ndi ufulu upi pontho uli na ine toera ndikuphembeni cinthu cinango?”

29 Natenepa mambo ampanga: “Leka longa pontho pinango. Ine ndatonga kuti iwe na Zibha musafunika kugawana munda.”+ 30 Penepo Mefibhoseti apanga mambo: “Iye mbakwate pyace onsene, nakuti imwe mbuyanga mambo mwafika mwadidi panyumba.”

31 Buluka penepo Bharzilai+ wa ku Jiliyadhi abuluka ku Rojelimu mbafika ku Yordani. Iye aperekera mambo mpaka ku nkulo wa Yordani. 32 Bharzilai akhadakalamba kakamwe, iye akhali na pyaka 80 pyakubalwa, pontho iye akhapasa mambo cakudya mu ndzidzi ukakhala mambo ku Manaimu,+ thangwi iye akhali wakupfuma kakamwe. 33 Natenepa mambo apanga Bharzilai: “Wambuka pabodzi na ine, pontho ine ndinadzakupasa cakudya ku Yerusalemu.”+ 34 Mbwenye Bharzilai apanga mambo: “Ndi pyaka pingasi* pya umaso pidasala na ine toera ndiende pabodzi na mambo ku Yerusalemu? 35 Ine ndiri na pyaka 80 pyakubalwa.+ Kodi ndinakwanisa kudzindikira pyadidi na pyakuipa? Ine ntumiki wanu, ndinakwanisa kudzindikira kukoma kwa pinthu pinadya ine na pinamwa ine? Kodi ndinakwanisa pontho kudzindikira mafala a anyakuimba akazi na amuna?+ Mphapo thangwi yanji ine ntumiki wanu ndisafunika kukhala ntolo unango kuna imwe mbuyanga mambo? 36 Mambo, imwe nee musafunika kundipasa muoni, thangwi kuna ine ndi nkhombo kukuperekerani mpaka ku Yordani. 37 Ndaphata miyendo, tawirisani kuti ine ntumiki wanu ndiende kafere mu nzinda udabalwa ine dhuzi na masiye a baba na mama.+ Mbwenye ali pano ntumiki wanu Kimani.+ Nkwateni toera awambuke pabodzi na imwe mbuyanga mambo, pontho ncitireni pinaona imwe kukhala pyadidi.”

38 Natenepa mambo alonga: “Kimani anadzawambuka pabodzi na ine, pontho ine ndinadzancitira pinaona iwe kukhala pyadidi; pyonsene pinafuna iwe kundiphemba, ine ndinadzakucitira.” 39 Penepo anthu onsene atoma kuwambuka Yordani; mbwenye mambo pikhafuna iye kuwambuka, ampswompswona Bharzilai+ mbampasa nkhombo. Buluka penepo Bharzilai abwerera kunyumba. 40 Mambo pidawambuka iye nkulo toera kuenda ku Jiligale,+ Kimani awambuka pabodzi na iye. Anthu onsene a ku Yuda na khundu ibodzi ya mbumba ya Izraeli awambuka na mambo.+

41 Natenepa amuna onsene a Izraeli aenda kuna mambo, mbambvundza: “Thangwi yanji abale athu, amuna a ku Yuda aenda kakukwatani mwacibisobiso, mbacitisa kuti imwe mambo Dhavidhi na anthu a panyumba panu kuphatanizambo amuna onsene+ akhali na imwe muwambuke Yordani?” 42 Amuna onsene a ku Yuda atawira amuna a ku Izraeli: “Ife tacita pyenepi thangwi mambo ndi m’bale wathu.+ Thangwi yanji mwaipirwa na pyenepi? Kodi ife tadyeswa kale na mambo peno tapaswa kale muoni na iye?”

43 Mbwenye amuna a ku Izraeli atawira amuna a ku Yuda: “Ndife madzindza khumi, natenepa tiri na ufulu ukulu kakamwe kuna Dhavidhi kupiringana imwe. Mphapo thangwi yanji imwe mwatipwaza? Kodi sife tayu akhafunika kukhala akutoma kubweresa mambo wathu?” Natenepa amuna a ku Yuda awina pakuketesana na* amuna a ku Izraeli.