Samweli Waciwiri

12 Natenepa, Yahova atuma Natani+ toera aende kuna Dhavidhi. Iye aenda kuna Dhavidhi+ mbampanga: “Mu nzinda ubodzi mukhali amuna awiri, m’bodzi akhali wakupfuma, unango akhali wakutcerenga. 2 Mamuna wakupfuma akhali na mabira mazinji na ng’ombe zizinji;+ 3 mbwenye mamuna wakutcerenga akhali na bira ing’ono ibodzi ikazi idagula iye.+ Iye akhaitsalakana, pontho ikhakula panyumba pace pabodzi na anace. Bira ineyi ikhadya cakudya cakucepa cikhali na iye, ikhamwa mukhamwera iye, pontho ikhagona paditi pace. Iyo ikhali ninga mwana wankazi kuna iye. 4 Mukupita kwa ndzidzi, panyumba pa mamuna wakupfuma pabwera mulendo, iye nee akwata mabira ace na ng’ombe zace toera kuphera mulendo. Mbwenye iye akwata bira ikazi ya mamuna wakutcerenga mbaiphera mulendo wace.”+

5 Penepo Dhavidhi aipirwa kakamwe na mamuna adacita pyenepi, mbapanga Natani: “Ndiri kudumbira mu dzina ya Yahova Mulungu wa m’maso+ kuti mamuna adacita pyenepi athema kuphiwa! 6 Nakuti iye acita pinthu pyenepi pyakuipa kakamwe, iye asafunika kubwezera mabira manai+ thangwi ya bira ibodzi ikazi.”

7 Penepo Natani apanga Dhavidhi: “Mamuna unoyu ndiwe! Yahova Mulungu wa Izraeli alonga tenepa: ‘Ine ndakudzodza toera ukhale mambo wa Izraeli,+ mbandikupulumusa m’manja mwa Sauli.+ 8 Ine ndikhafuna kukupasa nyumba ya mbuyako+ na kupereka akazi ace+ m’manja mwako, pontho ndikhafuna kukupasa utongi wa Izraeli na wa Yuda.+ Kusiyapo pyenepi, ine ndikhafuna kucita pizinji kakamwe kuna iwe.+ 9 Thangwi yanji wapwaza mafala a Yahova mbucita cinthu cakuipa pamaso pace? Wapha na supada+ Uriya wakuti ndi Mueti! Pidamala iwe kumupha na supada ya Aamoni,+ iwe wakwata nkazace mbakhala nkazako.+ 10 Natenepa supada nee inadzabuluka panyumba pako,+ thangwi iwe wandipwaza pidakwata iwe nkazi wa Uriya wakuti ndi Mueti, mbakhala nkazako.’ 11 Yahova alonga tenepa: ‘Ine ndinakubweresera nyatwa bulukira panyumba pako;+ ndinadzakwata akazako iwe mbukaona, mbandiapereka kuna mamuna unango,*+ pontho iye anadzapita nawo m’mabonde dzuwa iri bvuu.+ 12 Maseze iwe wacita pinthu ncibisobiso,+ ine ndinadzacita pyenepi dzuwa iri bvuu Aizraeli onsene mbakaona.’”

13 Penepo Dhavidhi apanga Natani: “Ine ndadawira Yahova.”+ Natani apanga Dhavidhi: “Yahova akulekerera madawo ako.+ Iwe nee unafa.+ 14 Mbwenye nakuti watsalakana Yahova mwakusowa cilemedzo thangwi yakucita pinthu pyenepi, mwakukhonda penula mwana unoyu adabalwa anadzafa.”

15 Buluka penepo Natani aenda kunyumba kwace.

Pontho Yahova acitisa kuti mwana adabala Dhavidhi na nkazi wakuti akhali wa Uriya aphatwe na utenda. 16 Dhavidhi adembetera Mulungu wandimomwene thangwi ya mwana, pontho acita jejuu. Ntsiku zonsene namasiku Dhavidhi akhapita nkwartu mwace mbagona pantsi+ masiku amumphu. 17 Natenepa akulu a panyumba pace akhalimira pana iye mbansembedzera toera alamuke, mbwenye iye akhakhonda, pontho nee akhafuna kudya pabodzi na iwo. 18 Pa ntsiku yacinomwe mwana afa, mbwenye atumiki a Dhavidhi akhagopa kumpanga kuti mwana afa. Iwo alonga: “Mwana pikhali iye m’maso ife talonga na mambo, mbwenye nee atibvesera. Mphapo tinampanga tani kuti mwana afa? Panango iye anacitika cinthu cakuipa.”

19 Dhavidhi pidaona iye kuti atumiki ace akulonga ciwerewere kuna unango na ndzace, iye adzindikira kuti mwana afa. Dhavidhi abvundza atumiki ace: “Mwana afa?” Iwo atawira: “Inde, afa.” 20 Natenepa Dhavidhi alamuka, asamba, adzola mafuta akununkhira,+ mbacinja nguwo zace. Buluka penepo aenda kunyumba+ ya Yahova mbamulambira. Pidamala iye abwerera kunyumba kwace,* aphemba cakudya mbadya. 21 Atumiki ace ambvundza: “Thangwi yanji mwacita pyenepi? Mwana pikhali iye m’maso imwe mukakhonda kudya, pontho mukhalira; mbwenye pidafa mwana, imwe mwalamuka, mbamudya.” 22 Iye atawira: “Mwana pikhali iye m’maso, ine ndikakhonda kudya,+ pontho ndikhalira thangwi ndikhanyerezera: ‘Mbani anapidziwa khala Yahova anandibvera ntsisi mbapulumusa mwana?’+ 23 Cincino mwana afa, thangwi yanji ndisafunika kucita jejuu? Kodi ine ndinakwanisa kumulamusa?+ Ine ndinaenda kuna iye,+ mbwenye iye nee anabwerera kuna ine.”+

24 Buluka penepo Dhavidhi abalangaza nkazace Bhatisebha.+ Agona pabodzi na iye, mbapita naye m’mabonde. Mukupita kwa ndzidzi iye abala mwana wamamuna, mban’thula Salomoni.*+ Pontho Yahova akhafuna mwana unoyu,+ 25 natenepa Iye atuma mprofeta Natani+ toera akan’thule Yedhidhiya,* thangwi Yahova akhanfuna.

26 Yoabhe apitiriza kumenyana na Rabha+ nzinda wa Aamoni,+ mbakwata nzinda ukakhala mambo.+ 27 Natenepa Yoabhe atuma anthu toera aende kuna Dhavidhi, mbampanga: “Ndamenyana na nzinda wa Rabha,+ mbandikwata nzinda wa madzi.* 28 Cincino gumanyani anyankhondo onsene adasala, ndokoni kamenyana na nzinda mbamuukwata. Gopa ine ndinakunda nzinda unoyu anthu mbandisimba.”*

29 Natenepa Dhavidhi agumanya anyankhondo onsene, aenda ku Rabha, amenyana na nzinda unoyu mbaukunda. 30 Penepo iye abulusa nthimba ikhali munsolo mwa Malkamu, mbiikhwa munsolo mwa Dhavidhi. Nthimba ineyi ikhalemera talento ibodzi* ya ouro, pontho ikhadabalikiswa na miyala ya ntengo ukulu. Iye akwatambo pinthu pizinji kakamwe pidatapata iwo+ mu nzinda unoyu.+ 31 Iye akwata anthu akhali mwenemu mbaenda kaaphatisa basa yakuswa miyala, yakuphata basa na macado na mafaramentu anango akutwa a utale na ya kuumba mabhuloko. Pyenepi ndi pidacita iye m’mizinda yonsene ya Aamoni. Pakumalisa Dhavidhi na anyankhondo onsene abwerera ku Yerusalemu.