Kronika Wakutoma
17 Pikakhala Dhavidhi panyumba pace, iye apanga mprofeta Natani:+ “Ine ndiri kukhala n’nyumba yakumangwa na miti ya sedhro,+ mbwenye Bokosi ya Cibverano ca Yahova iri mu nsasa wakucitwa na nguwo.”+ 2 Penepo Natani apanga Dhavidhi: “Citani pyonsene piri muntima mwanu, thangwi Mulungu wandimomwene ali na imwe.”
3 Namasiku anewa, Natani atambira mafala awa a Mulungu: 4 “Ndoko kapange ntumiki wanga Dhavidhi kuti ‘Yahova alonga tenepa: “Siwe tayu anafuna kundimangira nyumba toera ine ndikhalemo.+ 5 Ine cipo ndakhala n’nyumba kutomera pa ntsiku idabulusa ine mbumba ya Izraeli ku Ejitu mpaka lero, mbwenye ndisapitiriza kukhala mu nsasa buluka mbuto iyi kuenda mbuto inango, buluka mu tabhernakulo iyi kuenda mu tabhernakulo inango.+ 6 Ndzidzi onsene udafamba ine na Aizraeli onsene, kodi ine ndabvundza kale atsogoleri a dzindza ya Izraeli adasankhula ine toera akumbize mbumba yanga ya Izraeli kuti: ‘Thangwi yanji nee mwandimangira nyumba na miti ya sedhro?’”’
7 “Cincino panga ntumiki wanga Dhavidhi kuti: ‘Yahova wa anyankhondo alonga tenepa: “Ine ndakubulusa kukhakumbiza iwe, kule kukhatsalakana iwe mabira toera ukhale ntsogoleri wa mbumba yanga ya Izraeli.+ 8 Konsene kunafuna kuenda iwe,+ ine ndinadzakhala na iwe, pontho ndinadzapha anyamalwa ako onsene pamaso pako;+ ndinadzacitisa kuti dzina yako ikhale na mbiri ikulu ninga madzina a anthu akubvekera a pa dziko yapantsi.+ 9 Ndinadzasankhula mbuto toera mbumba yanga ya Izraeli ikhale kweneko, iwo anadzakhala kweneko mbakhonda kudzudzumiswa pontho; anthu akuipa nee anadzaapondererabve ninga pikhacita iwo kale,+ 10 kutomera pa ntsiku idakhazikisa ine anyakutonga miseru a mbumba yanga ya Izraeli.+ Ndinadzakunda anyamalwa ako onsene.+ Kusiyapo pyenepi, ine ndiri kukupanga: ‘Yahova anadzacitisa kuti dzindza yako ikhale ya amambo.’*
11 “‘“Ntsiku zako zingafika kunkhomo, mbuenda kapuma pabodzi na ambuyako, ndinadzacitisa kuti dzindza* yako, m’bodzi wa anako+ atonge ninga mambo, pontho ine ndinadzawangisa kakamwe umambo wace.+ 12 Iye ndiye anafuna kudzandimangira nyumba,+ pontho ine ndinadzawangisa kakamwe mpando waumambo wace kwenda na kwenda.+ 13 Ine ndinadzakhala babace, pontho iye anadzakhala mwananga.+ Nee ndinadzasiya kupangiza kuna iye ufuni wanga wakukhonda mala,+ ninga mudasiya ine kupangiza ufuni wanga kuna ule adakhala mambo iwe mbudzati.+ 14 Ndinan’khazikisa panyumba yanga na mu umambo wanga kwenda na kwenda,+ pontho mpando waumambo wace unadzakhala kwenda na kwenda.”’”+
15 Natani apanga Dhavidhi mafala anewa onsene na masomphenya anewa onsene.
16 Natenepa Mambo Dhavidhi akhala pantsi pamaso pa Yahova mbalonga: “Yahova Mulungu, ndine ani ine? Ninji banja yanga toera mundifikise mpaka lero?+ 17 Kusiyapo pyenepi, imwe mwalongambo kuti nyumba ya ntumiki wanu inadzakhala mu ndzidzi uzinji ntsogolo;+ imwe Yahova Mulungu, musanditsalakana ninga munthu adathema kukuzwa kakamwe. 18 Ndinalonganji pontho ine ntumiki wanu Dhavidhi thangwi ya mbiri inandipasa imwe? Imwe musadziwa mwadidi kakamwe ntumiki wanu!+ 19 Yahova, thangwi ya pikiro idacita imwe kuna ntumiki wanu, pontho mwakubverana na piri muntima mwanu,* imwe mwacita pinthu pyenepi pyonsene pikulu, mbamupangiza ukulu wanu.+ 20 Yahova, nkhabepo unango ninga na imwe,+ pontho imwe basi ndimwe Mulungu wandimomwene;+ pyonsene pidabva ife na makutu athu pisapangiza pyenepi. 21 Ndi ipi mbumba inango pa dziko yapantsi idalandana na mbumba yanu ya Izraeli?+ Mulungu wandimomwene aaombola ninga mbumba yace.+ Imwe mwapasika mwekhene dzina thangwi yakucita pinthu pikulu na pyakudzumisa,+ mbamuthamangisa anthu a madzindza anango patsogolo pa mbumba yanu+ idaombola imwe ku Ejitu. 22 Mwacitisa kuti Aizraeli akhale mbumba yanu kwenda na kwenda,+ pontho imwe Yahova mwadzakhala Mulungu wawo.+ 23 Cincino Yahova, pikiro idacita imwe kuna ntumiki wanu na anthu a panyumba pace, ndzidzi onsene mbipangize kukhala yakukhulupirika, pontho citani mwakubverana na pidapikira imwe.+ 24 Dzina yanu mbikuzwe+ kwenda na kwenda toera anthu alonge: ‘Yahova wa anyankhondo ndi Mulungu wa Izraeli,’ pontho nyumba ya ntumiki wanu Dhavidhi mbikhazikiswe mwakuwanga pamaso panu.+ 25 Thangwi imwe Mulungu wanga, mwapangiza kuna ntumiki wanu cifuno canu cakucitisa kuti dzindza ya ntumiki wanu ikhale ya amambo. Na thangwi ineyi, ine ntumiki wanu ndiri na cinyindiro toera kucita phembero iyi kuna imwe. 26 Cincino Yahova, imwe ndimwe Mulungu wandimomwene, pontho imwe mwapikira pinthu pyenepi pyadidi thangwi ya ntumiki wanu. 27 Natenepa, komerwani na kupasa nkhombo nyumba ya ntumiki wanu; iyo mbipitirize pamaso panu kwenda na kwenda, thangwi imwe Yahova, mwaipasa nkhombo, pontho iyo inadzapaswa nkhombo kwenda na kwenda.”