Amambo Waciwiri
12 Mu caka cacinomwe ca Jeu,+ Yeowasi+ akhazikiswa ninga mambo, pontho iye atonga mu Yerusalemu mu pyaka 40. Mai wace akhali Zibhiya wa ku Bhersebha.+ 2 Yeowasi apitiriza kucita pinthu pyadidi pamaso pa Yahova mu ntsiku zonsene zikhapfundziswa iye na nyantsembe Yeoyadha. 3 Mbwenye iye nee afudza mbuto zaulambiri,+ pontho anthu akhapitiriza basi kupereka ntsembe mbacitisa kuti utci wa ntsembe zenezi uende kuna alungu awo.
4 Yeowasi apanga anyantsembe: “Kwatani kobiri yonsene inabwereswa n’nyumba ya Yahova ninga pyakupereka,+ yakuti ndi kobiri inapereka munthu m’bodzi na m’bodzi ninga nsonkho,+ kobiri inaperekwa na anthu adacita pikiro na kobiri yonsene inabweresa anthu panyumba ya Yahova thangwi yakufuna kwawo.+ 5 Anyantsembe anaitambira m’manja mwa ale anaipereka* mbaiphatisira toera kusasanyira nyumba,* mule munafunika iyo kusasanyirwa.”*+
6 Mu caka 23 ca Mambo Yeowasi, anyantsembe akhadzati kusasanyira nyumba mule mukhafunika iyo kusasanyirwa.+ 7 Natenepa Mambo Yeowasi acemera nyantsembe Yeoyadha+ pabodzi na anyantsembe anango mbaapanga: “Thangwi yanji imwe nee mukusasanyira nyumba? Imwe nee musafunikabve kutambira kobiri inapereka ale anacita pyakupereka, khala nee mukuiphatisira toera kusasanyira nyumba.”+ 8 Penepo anyantsembe atawira kuti nee anatambirabve kobiri inapereka mbumba, pontho nee anatsalakanabve basa yakusasanyira nyumba.
9 Buluka penepo nyantsembe Yeoyadha akwata bokosi+ mbaiphola padzulu pace mbaiikha kukhundu yamadyo pakupita n’nyumba ya Yahova. Anyantsembe akhaphata basa yakuonera pansuwo akhaikha m’bokosi ineyi kobiri yonsene ikhapereka anthu panyumba ya Yahova.+ 10 Ndzidzi onsene ukhaona iwo kuti kobiri yanjipa m’bokosi, mulembi na nyantsembe wankulu akhabwera kudzakwata* kobiri idabwereswa panyumba ya Yahova,+ mbailengesa. 11 Angamala kulengesa kobiri, iwo akhaikwata mbaipereka kuna ale adakhazikiswa toera kuyang’anira basa ikhacitwa panyumba ya Yahova. Iwo akhaiphatisira toera kulipa anyakusema matabwa, anyakumanga nyumba akuti akhaphata basa panyumba ya Yahova,+ 12 amesiri akhacita pinthu na miyala na anyakuswa miyala. Pontho iwo akhagula matabwa na miyala yakusemwa toera kusasanyira nyumba ya Yahova. Iwo akhaphatisirambo kobiri ineyi toera kugula pinthu pinango pyonsene pikhafunika pakusasanyira nyumba.
13 Mbwenye kobiri ikhabwereswa panyumba ya Yahova nee ikhaphatisirwa toera kucitisa nayo mabasiya a parata, pyakuthimisa napyo moto, mbale, matuluka,+ peno ntundu unango wa pyombo pya ouro peno pya parata toera kupiikha n’nyumba ya Yahova.+ 14 Iwo akhakwata kobiri ineyi mbaipereka kuna ale akhayang’anira basa, pontho iwo akhaiphatisira toera kusasanyira nyumba ya Yahova. 15 Amuna akhapaswa kobiri toera kulipa anthu akhaphata basa, nee akhabvundziswa kuti aphatisira tani kobiri ineyi, thangwi iwo akhali akunyindirika.+ 16 Mbwenye kobiri ikhaperekwa ninga ntsembe thangwi ya mulando+ na kobiri ikhaperekwa ninga ntsembe toera kulekererwa madawo nee ikhaphatisirwa toera kusasanyira nyumba ya Yahova; iyo ikhapaswa anyantsembe.+
17 Mu ndzidzi unoyu, Azaeli+ mambo wa ku Sirya aenda kamenyana na nzinda wa Gati+ mbaukunda, buluka penepo iye akhali dzololo toera kuenda kamenyana* na nzinda wa Yerusalemu.+ 18 Na thangwi ineyi, Yeowasi mambo wa ku Yuda, akwata pinthu pidapereka* ambuyace: Yosafate, Yeoramu na Akaziya akuti akhali amambo a ku Yuda, kuphatanizambo pinthu pidapereka iye na ouro yonsene idagumana iye m’mbuto yakukoyera mpfuma panyumba ya Yahova na m’mbuto yakukoyera mpfuma panyumba ya mambo, mbapitumiza kuna Azaeli mambo wa ku Sirya.+ Natenepa iye nee amenyanabve na nzinda wa Yerusalemu.
19 Mphangwa zinango zinalonga pya umaso wa Yeowasi na pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Yuda. 20 Mbwenye atumiki a Yeowasi abverana toera kunsandukira,+ pontho iwo amupha panyumba ya pa Nkuku wa Mataka*+ yakuti ikhali panjira inatcitira kuenda ku Sila. 21 Atumiki ace adamupha+ akhali Yozakari mwana wa Simeati na Yeozabhadhi mwana wa Someri. Iye aikhwa munthumbi pabodzi na ambuyace mu Nzinda wa Dhavidhi, pontho mwanace anacemerwa Amaziya adzakhala mambo pa mbuto yace.+