Tsamba Yakutoma Kuna Akristu a ku Tesalonika

4 Pakumalisa, abale anga, ninga imwe mwatambira pitsogolero pidabuluka kuna ife, pinapangiza makhaliro anafunika imwe kukhala nawo toera kukomeresa Mulungu,+ mwandimomwene ndi pyenepi pinacita imwe, tisakuphembani, mbatikudembeterani mu dzina ya Mbuya Yezu toera mupitirize kucita pyenepi mwakuthimizirika kakamwe. 2 Thangwi imwe musadziwa pitsogolero pidakupasani ife kubulukira mwa Mbuya Yezu.

3 Thangwi Mulungu asafuna kuti imwe mukhale anthu akucena,+ pontho mucalire ulukwali.*+ 4 Mʼbodzi na mʼbodzi wa imwe asafunika adziwe kuti anatonga tani manungo ace+ toera akhale akucena+ na akulemedzeka, 5 lekani kukhala ninga anthu a madzindza anango akuti nkhabe kudziwa Mulungu,+ thangwi iwo asasirira kakamwe pyaulukwali.+ 6 Nee mʼbodzi asafunika kunumpha madire a makhaliro adidi mbacitira pyakuipa mʼbale wace mu pinthu pyenepi, thangwi Yahova* anadzatcunyusa anthu onsene anacita pinthu pyenepi, ninga mudakupangani ife kale mbatikucenjezani mwakuwanga. 7 Thangwi Mulungu nee aticemera toera tikhale na umaso wakunyanyasa, mbwenye toera tikhale anthu akucena.+ 8 Natenepa, ule anapwaza macenjezo anewa, nee asapwaza munthu, mbwenye asapwaza Mulungu,+ wakuti asakupasani nzimu wace wakucena.+

9 Mbwenye tingalonga pya kufuna abale onsene,+ nee tisafunika kukulemberani pinango, thangwi imwe musapfundziswa na Mulungu toera kufunana unango na ndzace.+ 10 Mwandimomwene, imwe musacita pyenepi kuna abale onsene, mucisa consene ca Masedhonya. Mbwenye ife tisakudembeterani abale, kuti pitirizani kucita pyenepi mwakuthimizirika kakamwe. 11 Wangisirani toera mukhale muntendere,+ mbamukhonda kudzudzumika kakamwe na pinthu pya anango,*+ pontho phatani basa na manja anu+ ninga mudakupfundzisani ife, 12 toera anthu akunja*+ aone kuti imwe muli na makhaliro adidi, mbamukhonda kusowa cinthu.

13 Abale, kusiyapo pyenepi, ife nee tisafuna kuti imwe mukhale anthu akukhonda dziwa pinafuna kucitika kuna ale adafa,*+ toera mukhonde kutsukwala kakamwe ninga pinacita ale akuti nkhabe cidikhiro.+ 14 Khala ife tisakhulupira kuti Yezu afa mbalamuswa muli akufa,+ ife tisakhulupirambo kuti ale adafa, akuti ali akuphatana na Yezu, Mulungu anadzaalamusa muli akufa toera akhale pabodzi na iye.+ 15 Pinakupangani ife cincino pisabverana na mafala a Yahova:* Mwa ife, ale anafuna kukhala mʼmaso mu ndzidzi wakuonekera kwa Mbuya, nee tinadzakhala patsogolo pa ale adamala kufa;* 16 thangwi Mbuya anadzatcita buluka kudzulu na nʼkhuwo wamphambvu na fala ya arkanju,+ mbaphatirira tuluka ya Mulungu; penepo ale adafa mwakuphatana na Kristu anadzakhala akutoma kulamuswa.+ 17 Buluka penepo, ife akuti ticiri na umaso, tinadzakwatwa pabodzi na iwo mʼmakole+ toera kuonana na Mbuya+ kudzulu; munjira ineyi, ndzidzi onsene tinadzakhala pabodzi na Mbuya.+ 18 Natenepa, pitirizani kuphatisira mafala anewa toera kubalangazana unango na ndzace.