Misangani
5 Mwananga, bvesera mwadidi mafala anga audziwisi.
Bvesera mwadidi pinakupfundzisa ine,+
2 Toera utsidzikize luso yako yakunyerezera,
Ndzidzi onsene mbulonga+ pinthu mwakubverana na undimomwene.
3 Mafala a nkazi waulukwali asadjodja ninga khana ya uci,+
Pontho, mulomo wace ndi wakufewa kakamwe kupiringana mafuta.+
4 Mbwenye pakumalisa iye asawawa ninga muti wakuwawa,+
Pontho asatwa ninga supada yakuceka uku na uku.+
5 Miyendo yace isatcitira toera kufa.
Mathanyo ace asatsogolera Kunthumbi.*
6 Iye nee asatsalakana njira ya umaso.
Asandzendza-ndzendza, mbakhonda dziwa kunaenda iye.
7 Imwe ananga, cincino ndibvesereni,
Pontho lekani kukhonda bvera pinalonga ine.
8 Mwananga, khala kutali na iye;
Leka kufendedzera dhuzi nsuwo wa nyumba yace,+
9 Toera ukhonde kupereka kulemedzwa kwako kuna anthu anango,+
Peno pyaka pyako pinatowera pikhonde khala pya nyatwa;+
10 Toera anthu anakhonda iwe kudziwa akhonde kumala pinthu pyako,+
Pontho pinthu pidathabukira iwe pikhonde kuenda kunyumba ya munthu wa dziko inango.
11 Ungakhonda kucita pyenepi, unadzabulira kunkhomo kwa umaso wako,
Mphambvu zako zingamala pabodzi na manungo ako,+
12 Mbulonga: “Ine ndaida kakamwe kulangwa!
Ntima wanga wapwaza kusandikwa!
13 Nee ndabvesera fala ya apfundzisi anga,
Nee ndabvesera mwadidi ale akhandipfundzisa.
14 Ndikhali dhuzi toera kugwera mu pinthu pyonsene pyakuipa,
Pamaso pa mbumba ya Mulungu.”+
16 Thangwi yanji madzi ako asafunika atayike mʼmiseu?
Thangwi yanji madzi ako akuwewa asafunika atayike mu mbuto zapakweca?+
17 Asafunika akhale ako basi,
Nee usafunika kugawana na anthu anango.+
18 Ncera wako mbupaswe nkhombo,
Komerwa na nkazi wa uphale wako,+
19 Iye ndi ninga mbawala ikazi yakupfulika, ninga mbuzi yakubalika ya mʼmapiri.+
Mabere ace mbakutsandzayise ndzidzi onsene.
Tsandzaya ndzidzi onsene thangwi ya ufuni wace.+
20 Mwananga, thangwi yanji mbudakwatika na nkazi waulukwali?
21 Thangwi njira za munthu ziri pamaso pa Yahova;
Iye asaona mwadidi njira zace zonsene.+
22 Nyakuipa asamangwa na madodo ace,
Pontho iye anadzamangwa na nkhambala za madawo ace.+
23 Iye anadzafa thangwi yakukhonda kutawira kulangwa,
Mbatayika thangwi yakukula kwa upswiru wace.