Ezekiyeli

6 “‘Mbwenye nyakuonera unoyu angaona anyamalwa mbakabwera, angakhonda kuliza nyanga+ toera kucenjeza anthu, anyamalwa angafika, mbapha munthu mʼbodzi pakati pawo, munthu unoyu anadzafa thangwi ya madawo ace, mbwenye mulando wa ciropa cace unadzakhala na nyakuonera.’+

7 “Mbwenye iwe mwana wa munthu, ine ndakusankhula toera ukhale nyakuonera wa mbumba ya Izraeli; ungabva fala inabuluka pamulomo panga, usafunika kuadziwisa cenjezo yanga.+ 8 Ine ndingapanga munthu wakuipa kuti: ‘Mwandimomwene iwe unadzafa!’+ Iwe ungakhonda kupanga munthu unoyu wakuipa mbuncejeza kuti acinje makhaliro ace, iye anadzafa ninga munthu wakuipa thangwi ya madawo ace,+ mbwenye ine ndinadzakupasa mulando thangwi ya ciropa cace. 9 Mbwenye iwe ungacenjeza munthu unoyu wakuipa toera asiye makhaliro ace akuipa, iye mbakhonda kucinja makhaliro ace, iye anadzafa thangwi ya madawo ace,+ mbwenye iwe mwandimomwene unadzapulumusa umaso wako.+

10 “Iwe mwana wa munthu, panga mbumba ya Izraeli: ‘Imwe mwalonga kuti: “Kukhonda bvera kwathu na madawo athu ndi ntolo wakulemera kakamwe kuna ife, pisaticitisa kumala mphambvu;+ mphapo tinapitiriza tani kukhala na umaso?”’+ 11 Apange kuti: ‘“Ine ndiri kudumbira mu dzina yanga,” alonga Yahova, Mbuya Wankulu Kakamwe, “ine nee ndisakomerwa na kufa kwa munthu wakuipa, mbwenye ndisafuna kuti munthu wakuipa+ acinje makhaliro ace,+ mbapitiriza kukhala na umaso.+ Siyani, siyani makhaliro anu akuipa,+ imwe mbumba ya Izraeli, thangwi yanji musafunika kufa?”’+

12 “Iwe mwana wa munthu, panga mbumba yako kuti: ‘Pinthu pyadidi pinacita munthu wakulungama, nee pinadzampulumusa angasiya kucita pinthu pyadidi;+ pontho, pinthu pyakuipa pinacita munthu wakuipa, nee pinadzamʼphesa angasiya kucita pinthu pyakuipa.+ Pinthu pyadidi pinacita munthu wakulungama, nee pinadzampulumusa pa ntsiku inafuna iye kudawa.+ 13 Ine ndingapanga munthu wakulungama kuti: “Mwandimomwene, iwe unapitiriza kukhala na umaso,” iye anganyindira kulungama kwace, mbacita pinthu pyakuipa,+ nee cinthu cibodzi cakulungama cidacita iye cinadzakumbukirwa, iye anadzafa thangwi ya pinthu pyakuipa pidacita iye.+

14 “‘Ine ndingapanga munthu wakuipa kuti: “Mwandimomwene iwe unadzafa,” iye angasiya madawo ace, mbacita pinthu pyadidi na pyakulungama,+ 15 angabweza cinthu cidaphatira iye munthu adanfiyari,+ angabweza cinthu cidaba iye,+ mbabvera mitemo inapasa umaso, thangwi yakucalira kucita pinthu pyakuipa, mwakukhonda penula, iye anapitiriza kukhala na umaso.+ Iye nee anadzafa. 16 Iye nee anadzatcunyuswa thangwi ya madawo adacita iye,+ mwakukhonda penula, iye anapitiriza kukhala na umaso thangwi yakucita pinthu pyadidi na pyakulungama.’+

17 “Ngakhale tenepo, mbumba yako yalonga: ‘Yahova asacita pinthu pyakukhonda kulungama,’ mbwenye mwandimomwene, pinthu pyakukhonda kulungama ndi pire pinacita iwo.

18 “Munthu wakulungama angasiya kucita pinthu pyadidi, mbacita pinthu pyakuipa, iye asafunika kufa thangwi ya pinthu pidacita iye.+ 19 Mbwenye munthu wakuipa angasiya pinthu pyakuipa pikhacita iye, mbacita pinthu pyadidi na pyakulungama, iye anapitiriza kukhala na umaso thangwi ya pinthu pinacita iye.+

20 “Mbwenye imwe mwalonga: ‘Yahova asacita pinthu pyakukhonda kulungama.’+ Imwe mbumba ya Izraeli, ine ndinadzatonga mʼbodzi na mʼbodzi mwakubverana na makhaliro ace.”

21 Pakumalisa, pa ntsiku yacixanu ya mwezi wacikhumi, wa caka 12 ca ubitcu wathu, munthu mʼbodzi adathawa ku Yerusalemu, abwera kuna ine,+ mbalonga: “Nzinda wakundwa!”+

22 Namasiku, mbidzati kufika ntsiku idabwera mamuna unoyu adathawa, mphambvu ya nzimu wa Yahova yapita muna ine, pontho iye afungula mulomo wanga, munthu unoyu mbadzati kufika namacibese. Natenepa, mulomo wanga ukhadafungulwa kale, ine nee ndikhalibve bewewe.+

23 Penepo Yahova alonga na ine, mbandipanga: 24 “Iwe mwana wa munthu, anthu a mʼmizinda idamala kufudzwa,+ ali kulonga tenepa thangwi ya dziko ya Izraeli: ‘Abhrahamu akhali munthu mʼbodzi basi, ngakhale tenepo, iye akwata dziko ino mbikhala yace.+ Mbwenye ife ndife azinji; mwakukhonda penula, dziko ino ndi yathu.’

25 “Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Imwe musadya nyama na ciropa cene,+ musanyindira madzimunthu anu akunyanyasa,* pontho musapitiriza kupha anthu.+ Mphapo thangwi yanji dziko ino isafunika ikhale yanu? 26 Imwe musanyindira masupada anu,+ musacita pinthu pyakunyanyasa, pontho mʼbodzi na mʼbodzi asapita mʼmabonde na nkazi wa ndzace.+ Mphapo thangwi yanji dziko ino isafunika ikhale yanu?”’+

27 “Iwe usafunika kuapanga tenepa: ‘Ipi ndi pidalonga Yahova, Mbuya Wankulu Kakamwe: “Ine ndiri kudumbira mu dzina yanga kuti ale anakhala mʼmizinda idamala kufudzwa, anadzaphiwa na supada, ale anakhala ntsanga ndinadzaapereka ninga pyakudya kuna pinyama pya ntsanga, ale anakhala mu mbuto zakutsidzikizwa na mipanda yakuwanga na mʼmphako za miyala, anadzafa na utenda.+ 28 Ine ndinadzacitisa dziko ino kukhala thando yakusowa anthu,+ pontho kudzikuza kwayo kunadzamala. Mapiri a dziko ya Izraeli anadzakhala madembe,+ mbakhonda kuoneka munthu anafuna kupita na mwenemu. 29 Iwo anadzadziwa kuti ine ndine Yahova ndingacitisa kuti dziko ino yonsene ikhale madembe akusowa anthu,+ thangwi ya pinthu pyonsene pyakunyanyasa pidacita iwo.”’+

30 “Mbwenye iwe mwana wa munthu, mbumba yako iri kucedza thangwi ya iwe dhuzi na mipanda na pa misuwo ya nyumba.+ Iwo asalonga kuna unango na ndzace, mʼbodzi na mʼbodzi asapanga mʼbale wace: ‘Bwerani, tendeni tibvesere mafala a Yahova.’ 31 Iwo anadzagumanyikana azinji kakamwe toera akhale patsogolo pako ninga mbumba yanga; iwo anadzabvesera mafala ako, mbwenye nee anaabvera.+ Thangwi na milomo yawo, iwo asalonga pinthu pyadidi kuna iwe,* mbwenye mitima yawo isafuna kuwina pinthu mwakukhonda kulungama. 32 Kuna iwo, iwe ndiwe ninga nyimbo yaufuni, inaimbwa na fala yadidi, inaimbwa mwadidi na cakuimba naco ca nkhambala. Iwo anadzabvesera mafala ako, mbwenye nee mʼbodzi anafuna kuabvera. 33 Pinthu pyonsene pingadzacitika, thangwi ipyo pinadzacitikadi, iwo anadzadziwa kuti pakati pawo pakhali mprofeta.”+