Tsamba Yaciwiri Kuna Akristu a ku Tesalonika

2 Mbwenye pya kuonekera kwa Mbuyathu Yezu Kristu+ na kugumanywa kwathu toera kukhala pabodzi na iye,+ ife tisakuphembani abale 2 toera mukhonde kuluza mwakucimbiza manyerezero anu adidi, pontho mukhonde kudzudzumika anthu angalonga kuti ntsiku ya Yahova* yafika,+ mwakukhonda tsalakana khala iwo asalonga kuti pyenepi pisabulukira mʼmafala akupumirwa,*+ mu mphangwa zakulongwa na anthu, peno mʼmatsamba anaoneka ninga atumizwa na ife.

3 Lekani kunyengezwa,* nee na munthu mʼbodzi, thangwi mbidzati kufika ntsiku ineyi, pakutoma anadzaoneka anyakusandukira Mulungu,*+ mbapangizika pakweca munthu wakukhonda bvera mwambo,+ ule anafuna kudzafudzwa.+ 4 Iye ndi nyakupingiza, pontho asakuzika ekhene padzulu pa pyonsene pinacemerwa alungu peno cinthu cinalambirwa; natenepa, iye asakhala pantsi mu templo ya Mulungu, mbapangizika ekhene pakweca ninga mulungu. 5 Kodi nee musakumbuka kuti pikhali ine pabodzi na imwe kazinji kene ndikhakupangani pinthu pyenepi?

6 Cincino imwe musadziwa kuti mbani anaphata basa yakupingiza munthu wakukhonda bvera mwambo, toera iye apangizwe pa ndzidzi wakuthema. 7 Mwandimomwene, kukhonda bvera mwambo kweneku kwakuti ndi cibisobiso, kusacitika;+ mbwenye kunapitiriza nee kudziwika mpaka angabuluswa ule anampingiza. 8 Mwandimomwene, pa ndzidzi unoyu, nyakukhonda bvera mwambo anadzapangizwa pakweca, wakuti Mbuya Yezu anadzanfudza na mafala amphambvu anabuluka pamulomo pace,*+ mbamʼmalisiratu pa ndzidzi wakuti kuonekera kwace+ kunadzapangizika pakweca. 9 Mbwenye kuonekera kwa munthu wakukhonda bvera mwambo kusatsogolerwa na Sathani,+ wakuti asampasa mphambvu yakucita pinthu pyakudzumisa, pidzindikiro, pirengo pyauthambi,*+ 10 na ntundu onsene wa manyengerero akukhonda kulungama+ toera kupeusa ale akuti ali kuenda kafudzwa, toera kuabwezera kukhonda tawira kwawo na ntima onsene undimomwene wakuti mbudaapulumusa. 11 Na thangwi ineyi, Mulungu asatawirisa kuti iwo anyengezwe na pipfundziso pyapezi toera iwo akhulupire mafala authambi,+ 12 toera onsene atongwe, thangwi iwo nee akhulupira undimomwene, mbwenye akomerwa na pinthu pyakukhonda kulungama.

13 Mbwenye ife tisakulumizika toera kupereka takhuta kuna Mulungu ndzidzi onsene thangwi ya imwe abale anafuniwa na Yahova;* thangwi kubulukira pakutoma, Mulungu akusankhulani+ toera mupulumuswe, pidakucenesani iye+ na nzimu wace wakucena, pontho thangwi yakukhulupira kwanu undimomwene. 14 Iye akucemerani toera mupulumuswe kubulukira mu mphangwa zadidi zinamwaza ife, toera imwe mukhale na mbiri ya Mbuyathu Yezu Kristu.+ 15 Natenepa abale, pitirizani kukhala akuwanga+ mbamuphatisisa na manja mawiri pinthu pidapfundziswa imwe+ kubulukira mu mphangwa zakulongwa na mulomo, peno mʼmatsamba adatumiza ife. 16 Kusiyapo pyenepi, Mbuyathu Yezu Kristu pabodzi na Mulungu Babathu, ule adatifuna+ mbatipasa cibalangazo cakukhonda mala na cidikhiro cadidi+ thangwi ya kukoma ntima kwace kukulu, 17 mbabalangaze mitima yanu, pontho akuwangiseni* toera ndzidzi onsene imwe mucite pinthu pyadidi, mbamulonga mafala adidi.