Amambo Waciwiri

14 Mu caka caciwiri ca Yeowasi+ mwana wa Yeowazi mambo wa Izraeli, Amaziya mwana wa Mambo Yeowasi wa ku Yuda adzakhala mambo. 2 Iye akhali na pyaka 25 pidakhazikiswa iye ninga mambo, pontho iye atonga mu Yerusalemu mu pyaka 29. Mai wace akhali wa ku Yerusalemu,+ iye akhacemerwa Yeowadhini. 3 Amaziya apitiriza kucita pinthu pyadidi pamaso pa Yahova, mbwenye tayu ninga mbuyace akhacemerwa Dhavidhi.+ Iye acita pyonsene ninga mudacitira babace akhacemerwa Yeowasi.+ 4 Mbwenye iye nee afudza mbuto zaulambiri,+ pontho anthu akhapitiriza basi kupereka ntsembe mbacitisa kuti utci wa ntsembe zenezi uende kuna alungu awo.+ 5 Umambo wace pidakhala iwo wakuwanga, iye apha atumiki ace adapha babace wakuti akhali mambo.+ 6 Mbwenye iye nee apha ana a ale adapha babace, mwakubverana na matongero a Yahova adalembwa m’bukhu ya Mwambo wa Mose: “Ababa nee asafunika kuphiwa thangwi ya madawo adacita anawo, pontho ana nee asafunika kuphiwa thangwi ya madawo adacita ababawo; mbwenye m’bodzi na m’bodzi asafunika kuphiwa thangwi ya madawo adacita iye.”+ 7 Iye apha Aedhomi+ n’Gowa ya Munyu,+ amuna akukwana 10.000, pontho mu ndzidzi wa nkhondo iye akwata nzinda wa Sela,+ dzina ya nzinda unoyu yacinjwa mbikhala Yokiteli, iwo usacemerwa na dzina ineyi mpaka lero.

8 Natenepa, Amaziya atuma anthu kuna Yeowasi mwana wa Yeowazi wakuti akhali mwana wa Jeu mambo wa Izraeli, toera aende kampange kuti: “Bwera timenyane.”*+ 9 Mambo Yeowasi wa ku Izraeli atumiza mphangwa izi kuna Mambo Amaziya wa ku Yuda: “Thendere ya minga ya ku Libhano yatumiza mphangwa izi kuna muti wa sedhro wa ku Libhano: ‘Pereka mwanako wankazi kuna mwananga toera akhale nkazace.’ Mbwenye cinyama cantsanga ca ku Libhano capita na pa thendere ya minga, mbaciponda thendere ineyi. 10 Ndimomwene kuti iwe wafudza Edhomi,+ na thangwi ineyi, iwe usadzikuza. Komerwa na mbiri iri na iwe, mbwenye khala n’nyumba mwako. Thangwi yanji ukusosa nyatwa toera ukundwe, mbucitisambo kuti Yuda akundwe pabodzi na iwe?” 11 Mbwenye Amaziya nee abvera pidapangwa iye.+

Natenepa Mambo Yeowasi wa Izraeli aenda, pontho iye na Amaziya Mambo wa Yuda amenyana ku Bheti-Semesi+ wa ku Yuda.+ 12 Yuda akundwa na Izraeli, natenepa anyankhondo a ku Yuda athawa, m’bodzi na m’bodzi mbaenda kunyumba kwace.* 13 Yeowasi Mambo wa Izraeli aphata Amaziya Mambo wa Yuda, mwana wa Yeowasi, mwana wa Akaziya ku Bheti-Semesi. Buluka penepo iwo afika ku Yerusalemu, pontho iwo agomola mpanda wa Yerusalemu makhono 400* kutomera Pansuwo Ukulu wa Efraimu+ mpaka Pansuwo Ukulu Wapankhomo.+ 14 Iye akwata ouro yonsene, parata na pinthu pyonsene pikhali panyumba ya Yahova na pinthu pikhali m’mbuto yakukoyera mpfuma panyumba ya mambo, kuphatanizambo anthu. Buluka penepo, iye abwerera ku Samariya.

15 Mphangwa zinango zinalonga pya umaso wa Yeowasi, pinthu pyamphambvu pidacita iye na pinthu pinango pidacita iye, kuphatanizambo kumenyana kudacita iye na Mambo Amaziya wa ku Yuda, pyalembwa m’bukhu inalonga pinthu pidacitika mu ndzidzi wa amambo a ku Izraeli. 16 Buluka penepo, Yeowasi afa ninga pidacita ambuyace, mbaikhwa ku Samariya+ pa mbuto idaikhwa amambo anango a Izraeli; pontho mwanace anacemerwa Yerobhoamu*+ adzakhala mambo pa mbuto yace.

17 Amaziya+ mwana wa Yeowasi mambo wa ku Yuda, akhala m’maso pyaka 15 pidamala kufa Yeowasi+ mwana wa Yeowazi mambo wa Izraeli.+ 18 Mphangwa zinango zinalonga pya umaso wa Amaziya, zalembwa m’bukhu inalonga pinthu pidacitika mu ndzidzi wa amambo a ku Yuda. 19 Mukupita kwa ndzidzi, anthu ansandukira+ mu Yerusalemu iye mbathawira ku Lakisi, mbwenye iwo atuma amuna, pontho amuna anewa antowera mpaka ku Lakisi, mbam’phera kweneko. 20 Buluka penepo, iwo ankwata na makavalo, mbaenda kamuikha munthumbi pabodzi na ambuyace ku Yerusalemu mu Nzinda wa Dhavidhi.+ 21 Pidamala iwo, mbumba yonsene ya ku Yuda yakwata Azariya*+ pikhali iye na pyaka 16 pyakubalwa,+ mbin’khazikisa ninga mambo pa mbuto ya babace wakuti ndi Amaziya.+ 22 Pidafa mambo* ninga pidacita ambuyace,+ Azariya amanga pontho nzinda wa Elati+ mbaubwezera ku Yuda.

23 Mu caka 15 ca Amaziya mwana wa Yeowasi mambo wa ku Yuda, Yerobhoamu+ mwana wa Yeowasi Mambo wa Izraeli adzakhala mambo ku Samariya, pontho iye atonga mu pyaka 41. 24 Iye akhacita pinthu pyakuipa pamaso pa Yahova. Pontho apitiriza kucita madawo onsene akuti Yerobhoamu mwana wa Nebhati acitisa Aizraeli kudawa nawo.+ 25 Iye akhazikisa pontho madire a dziko ya Izraeli kutomera ku Lebho-Amati*+ mpaka ku Bara ya ku Arabha,*+ mwakubverana na mafala adalonga Yahova Mulungu wa Izraeli kubulukira kuna ntumiki wace Yona+ mwana wa Amitai, mprofeta wa ku Gati-Eferi.+ 26 Yahova akhadaona kuti Aizraeli akhathabuswa kakamwe. Nee pakhadasala munthu toera kuphedza Izraeli,+ ngakhale wakusowa ciphedzo peno wakusowa mphambvu. 27 Mbwenye Yahova akhadapikira kuti nee anafudza dzina ya Izraeli pa dziko yapantsi.+ Natenepa iye aphatisira Yerobhoamu mwana wa Yeowasi toera kuapulumusa.+

28 Mphangwa zinango zinalonga pya umaso wa Yerobhoamu, pinthu pyamphambvu pidacita iye na pinthu pinango pyonsene pidacita iye, kuphatanizambo nkhondo zidamenya iye, pontho kuti abwezeresa tani Dhamasku+ na Amati+ ku Yuda mu Izraeli, pyalembwa m’bukhu inalonga pinthu pidacitika mu ndzidzi wa amambo a ku Izraeli. 29 Buluka penepo, Yerobhoamu afa mbaikhwa ninga pidacita ambuyace, amambo a ku Izraeli; pontho mwanace anacemerwa Zakariya+ adzakhala mambo pa mbuto yace.