Samweli Wakutoma

25 Mukupita kwa ndzidzi Samweli+ afa; pontho Aizraeli onsene agumanyikana mbalira thangwi yakufa kwace, pontho iwo amuikha dhuzi na nyumba yace ku Rama.+ Buluka penepo Dhavidhi aenda kuthando ya Parani.

2 Ku Maoni+ kukhali na mamuna mʼbodzi wakuti akaphata basa yace ku Karmelo.*+ Mamuna unoyu akhali wakupfuma kakamwe; iye akhali na mabira 3.000 na mbuzi 1.000, pontho iye akhakwedza maweya a mabira ace ku Karmelo. 3 Mamuna unoyu dzina yace ikhali Nabhale,+ nkazace akhacemerwa Abhigaili.+ Nkazace akhali wandzeru kakamwe na wakubalika, mbwenye mamunace akhali wa mʼbanja ya Kalebe,+ iye akhali wakunentsa kakamwe.+ 4 Dhavidhi pikhali iye nʼthando abva kuti Nabhale akukwedza maweya a mabira ace. 5 Natenepa Dhavidhi atuma aphale khumi toera aende kuna Nabhale, pontho iye aapanga: “Ndokoni ku Karmelo, mungafika kuna Nabhale mbvundzeni mu dzina yanga kuti ali tani. 6 Buluka penepo mpangeni: ‘Ntendere mbukhale na imwe, mbukhalembo kuna anthu a panyumba panu na kuna pinthu pyonsene piri na imwe. 7 Ine ndabva kuti imwe mukukwedza maweya a mabira anu. Akumbizi anu pikhali iwo na ife, nee taacita pinthu pyakuipa,+ pontho nkhabe cinthu cidaluza iwo mu ndzidzi onsene ukhali iwo ku Karmelo. 8 Bvundzisani aphale anu, iwo anakupangani pyenepi. Tambirani mwadidi aphale anga thangwi tabwera pa ndzidzi wakutsandzayisa.* Ndaphata miyendo, pasani atumiki anu na mwananu Dhavidhi pire pinakwanisa imwe.’”+

9 Natenepa aphale a Dhavidhi aenda, mbapanga Nabhale mafala anewa onsene mu dzina ya Dhavidhi. Pidamala iwo kulonga, 10 Nabhale atawira atumiki a Dhavidhi: “Mbani Dhavidhi, pontho mbani mwana wa Yese? Ntsiku zino kuna atumiki azinji akuti asathawa ambuyawo.+ 11 Thangwi yanji ndisafunika kukwata mikate yanga, madzi anga na nyama zidaphera ine anyakukwedza maweya a mabira anga, mbandipasa amuna akuti nee ndisadziwa kudabuluka iwo?”

12 Natenepa, aphale a Dhavidhi abwerera mbampanga pyonsene pidalonga Nabhale. 13 Mwakukhonda dembuka, Dhavidhi apanga amuna akhali na iye: “Monsene mangirani masupada anu ncunu mwanu!”+ Natenepa onsene amangira masupada awo, Dhavidhi mbamangirambo ya­ce ncunu mwace. Amuna cifupi na 400 aenda pabodzi na Dhavidhi, mbwenye amuna 200 asala toera kuonera mitolo.

14 Mu ndzidzi ukhacitika pyenepi, mʼbodzi wa atumiki a Nabhale apanga Abhigaili nkazi wa Nabhale: “Dhavidhi atuma anthu buluka kuthando toera kudzamwanyika mbuyathu, mbwenye iye aatikana.+ 15 Amuna anewa aticitira pinthu pyadidi kakamwe. Iwo cipo aticitira pinthu pyakuipa, pontho ife nee taluza cinthu mu ndzidzi onsene udakhala ife na iwo nʼthando.+ 16 Ndzidzi onsene ukhali ife na iwo mbatikakumbiza mabira, iwo akhali ninga mpanda wacitsidzikizo kuna ife masiku na masikati. 17 Cincino nyerezerani kuti munacitanji, thangwi pyenepi pinabweresa nyatwa kuna mbuyathu na kuna anthu onsene a panyumba pace.+ Mbuyathu ndi munthu wakunentsa kakamwe+ nkhabe anakwanisa kulonga naye.”

18 Natenepa Abhigaili+ a­kwata mwakucimbiza mikate 200, pitomba pikulu piwiri pya vinyu, mabira akuphiwa kale maxanu, ntsengwa zixanu za tirigu* yakukazinga, mapindi 100 a mauva akuumiswa mbaumbwa pabodzi, kuphatanizambo mapindi 200 a masambvu akuumiswa mbaumbwa pabodzi, akwiza pyenepi pyonsene pa maburu.+ 19 Buluka penepo iye apanga atumiki ace: “Tsogolani, ine ndiri kubwera nduli mwanu.” Mbwenye iye nee alonga cinthu kuna mamunace Nabhale.

20 Mu ndzidzi ukhafamba Abhigaili pa buru, Dhavidhi pabodzi na amuna akhali na iye akhabwera, mbwenye iwo nee akhakwanisa kumuona thangwi Abhigaili akhabisika na phiri. Buluka penepo iye agumanikana nawo. 21 Dhavidhi akhadalonga: “Ine ndaonera pinthu pyonsene pya mamuna unoyu nʼthando, pontho iye nee aluza cinthu,+ ngakhale tenepo asandibwezera pinthu pyakuipa.+ 22 Mulungu mbatcunyuse kakamwe anyamalwa a Dhavidhi,* ine ndingasiya ku­ti mamuna mʼbodzi* wa panyumba ya Nabhale apulumuke mpaka mangwana namacibese.”

23 Abhigaili pidaona iye Dhavidhi, atcita mwakucimbiza pa buru, agodama patsogolo pa Dhavidhi, mbakotamisa nkhope yace mpaka pantsi. 24 Iye agodama dhuzi na manyalo a Dhavidhi mbalonga: “Mbuyanga, mulando mbukhale na ine; siyani kuti ntumiki wanu wankazi alonge, pontho bveserani mafala anafuna kulonga ntumiki wanu wankazi. 25 Ndaphata miyendo, lekani kulandza Nabhale+ munthu wakusowa basa, thangwi iye asacita pinthu mwakubverana na dzina yace. Dzina yace ndi Nabhale,* iye ndi munthu wakusowa ndzeru. Mbwenye ine ntumiki wanu wankazi nee ndaona amuna adatuma imwe. 26 Mbuyanga, ndiri kudumbira mu dzina ya Yahova Mulungu wa mʼmaso na mu dzina yanu kuti ndi Yahova adakukhondesani+ toera mukhonde kukhala na mulando wa ciropa,+ pontho toera mukhonde kubwezera pyakuipa na manja anu. Anyamalwa anu na ale onsene anakusakani toera kukucitani pinthu pyakuipa mbakhale ninga Nabhale. 27 Muoni+ uyu udabweresa* ntumiki wanu wankazi mbuperekwe kuna aphale ali na imwe mbuyanga.+ 28 Ndaphata miyendo, lekererani madawo a ntumiki wanu wankazi; Yahova anadzacitisa kuti ananu atonge ninga amambo mu ndzidzi uzinji,+ thangwi imwe muli kumenya nkhondo za Yahova,+ pontho nkhabepo cakuipa cinafuna kucita imwe mu umaso wanu onsene.+ 29 Munthu angakutowerani mbafuna kukuphani,* Yahova Mulungu wanu anadzakutsidzikizani ninga munatsidzikiza munthu pinthu pyace pyakufunika kakamwe pidaikha iye mʼbudu, mbwenye anyamalwa anu iye anadzaaponya kutali ninga miyala inaponywa na funda. 30 Yahova angacitira mbuyanga pinthu pyonsene pyadidi pidapikira iye, mbakukhazikisani ninga ntsogoleri wa Izraeli,+ 31 imwe nee munadzapasika mulando* thangwi yakucucisa ciropa mwakusowa mathangwi na kubwezera pinthu pyakuipa.*+ Mbuyanga, Yahova angakucitirani pinthu pyadidi, kumbukani ntumiki wanu wankazi.”

32 Natenepa Dhavidhi apanga Abhigaili: “Mbasimbwe Yahova Mulungu wa Izraeli, ule adakutuma toera ubwere kudzaonana na ine lero! 33 Mbupaswe nkhombo thangwi yakukhala kwako munthu wandzeru! Mbupaswe nkhombo thangwi yakundikhondesa kucucisa ciropa+ na kubwezera pyakuipa* na manja anga. 34 Mbwenye ndiri kudumbira kuna Yahova wa mʼmaso, Mulungu wa Izraeli adandikhondesa toera ndikhonde kukucita pyakuipa,+ mbudakhonda kubwera mwakucimbiza kudzaonana na ine,+ mangwana namacibese amuna onsene* a panyumba ya Nabhale+ mbadacerwa amala kufa.” 35 Natenepa Dhavidhi atambira pidabweresa Abhigaili mbampanga: “Ndoko kunyumba kwako muntendere. Ine ndabva pidalonga iwe, pontho ndinadzacita pidaphemba iwe.”

36 Abhigaili pidabwerera iye kuna Nabhale, anʼgumana mbakacita phwando ninga mambo nʼnyumba mwace. Nabhale akhali* wakutsandzaya, pontho iye akhadaledzera kakamwe. Abhigaili nee ampanga cinthu mpaka mangwana mwace namacibese. 37 Namacibese, Nabhale pidakungunuka iye, nkazace ampanga pinthu pyenepi. Ntima wace wadzakhala ninga wa munthu wakufa, pontho adzakhala ninga mwala mbakhonda kupfukunyuka. 38 Pidapita ntsiku khumi, Yahova apha Nabhale.

39 Dhavidhi pidabva iye kuti Nabhale afa, iye alonga: “Mbasimbwe Yahova, ule adanditsidzikiza+ pidamala ine kutikanwa na Nabhale,+ mbakhondesa ine ntumiki wace toera kucita pinthu pyakuipa.+ Yahova atcunyusa Nabhale thangwi ya pinthu pyakuipa pidacita iye!” Buluka penepo Dhavidhi atumiza mphangwa kuna Abhigaili mbamʼphemba toera akhale nkazace. 40 Natenepa atumiki a Dhavidhi aenda kuna Abhigaili ku Karmelo, mbampanga: “Dhavidhi atituma toera tidzakukwate kuti ukhale nkazace.” 41 Mwakukhonda dembuka iye agodama, akotamisa nkhope yace mpaka pantsi, mbalonga: “Ine ndiri dzololo toera kukhala ntumiki na kutsuka miyendo+ ya atumiki a mbuyanga.” 42 Buluka penepo Abhigaili+ alamuka mwakucimbiza, mbakwira pa buru yace, anyabasa ace axanu akazi akhabwera nduli mwace; iye atowera anthu adatuma Dhavidhi, mbadzakhala nkazi wa Dhavidhi.

43 Dhavidhi akhadasembambo Ainowamu+ wa ku Yezrieli,+ natenepa awiri ene adzakhala akazace.+

44 Mbwenye Sauli akhadakwata mwanace anacemerwa Mikale,+ nkazi wa Dhavidhi, mbampereka kuna Paliti+ mwana wa Laisi, wa ku Galimu.